ಇಸ್ರೇಲ್ ಚುನಾವಣೆಯಲ್ಲಿ ಅರಬ್ ಪಕ್ಷಗಳ ಸಾಧನೆಗೆ ಖತರ್ ನ ಮಾಜಿ ಪ್ರಧಾನಿ ಮೆಚ್ಚುಗೆ

ದೋಹಾ: ಇಸ್ರೇಲ್ ಚುನಾವಣೆಯಲ್ಲಿ ಅರಬ್ ನೇತೃತ್ವದ ಪಕ್ಷಗಳು ಸಾಧಿಸಿದ ಯಶಸ್ಸನ್ನು ಖತರ್‌ ನ ಮಾಜಿ ಪ್ರಧಾನಿ ಶೇಖ್ ಹಮದ್ ಬಿನ್ ಜಾಸಿಮ್ ಅಲ್ ಥಾನಿ ಶ್ಲಾಘಿಸಿದ್ದಾರೆ. ಈ ಸಾಧನೆಯು ಇಸ್ರೇಲ್‌ ನಲ್ಲಿರುವ ಫೆಲೆಸ್ತೀನಿಯರಲ್ಲಿ ತಮ್ಮ ಹಕ್ಕುಗಳ ರಕ್ಷಣೆಯ ಭರವಸೆಯನ್ನು ಬಲಪಡಿಸಲಿದೆ ಎಂದು ಅವರು ಹೇಳಿದ್ದಾರೆ ಎಂದು Aljazeera ವರದಿ ಮಾಡಿದೆ.

ಮಂಗಳವಾರ ನಡೆದ ಚುನಾವಣೆಯಲ್ಲಿ 'ಜಾಯಿಂಟ್ ಲಿಸ್ಟ್' (Joint List) ಮತ್ತು 'ಯುನೈಟೆಡ್ ಅರಬ್ ಲಿಸ್ಟ್' (United Arab List) ಪಕ್ಷಗಳು ಗಳಿಸಿದ ಸ್ಥಾನಗಳನ್ನು ಅವರು ಕೊಂಡಾಡಿದ್ದಾರೆ. ಅರಬ್ ಬಣಗಳು ಈವರೆಗೆ ಪಡೆದ ಅತಿ ಹೆಚ್ಚು ಸ್ಥಾನಗಳು ಇವು ಎಂದು ತಿಳಿಸಿದ್ದಾರೆ.

ಈ ಚುನಾವಣಾ ಯಶಸ್ಸು ಇಸ್ರೇಲ್‌ ನಲ್ಲಿರುವ ಫೆಲೆಸ್ತೀನಿಯರು ತಮ್ಮ ಹಕ್ಕುಗಳನ್ನು ರಕ್ಷಿಸಿಕೊಳ್ಳಲು, ಜೀವನ ಪರಿಸ್ಥಿತಿಗಳನ್ನು ಸುಧಾರಿಸಿಕೊಳ್ಳಲು ಹಾಗೂ ತಮ್ಮ ನೆಲದಲ್ಲಿ ಶಾಂತಿಯುತವಾಗಿ ಬದುಕಲು ನೆರವಾಗುವ ಭರವಸೆಯನ್ನು ಬಲಪಡಿಸಲಿದೆ ಎಂದು ಶೇಖ್ ಹಮದ್ 'ಎಕ್ಸ್‌' ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್ ಮಾಡಿದ್ದಾರೆ.

ಇದೇ ವೇಳೆ, ಇಸ್ರೇಲ್‌ ನಲ್ಲಿರುವ ಫೆಲೆಸ್ತೀನಿಯರ ಹಕ್ಕುಗಳಿಗಾಗಿ ಹೋರಾಡುತ್ತಿರುವ 'ಜಾಯಿಂಟ್ ಲಿಸ್ಟ್' ನಾಯಕ ಅಹ್ಮದ್ ತೀಬಿ ಅವರ ಹೋರಾಟ ಮತ್ತು ದೃಢ ಸಂಕಲ್ಪವನ್ನೂ ಅವರು ಶ್ಲಾಘಿಸಿದ್ದಾರೆ.