ಸಿರಿಯಾದ ಮಾಜಿ ಅಧ್ಯಕ್ಷ ಬಶಾರ್ ಅಲ್ ಅಸ್ಸಾದ್‍ಗೆ ಮರಣದಂಡನೆ ಶಿಕ್ಷೆ

ದಮಾಸ್ಕಸ್, ಆ.11: ದೇಶದ 14 ವರ್ಷಗಳ ಸಂಘರ್ಷದ ಅವಧಿಯಲ್ಲಿ ಎಸಗಿದ ಯುದ್ಧ ಅಪರಾಧಗಳು ಮತ್ತು ಮಾನವೀಯತೆಯ ವಿರುದ್ಧದ ಅಪರಾಧಗಳಲ್ಲಿ ಮಾಜಿ ಅಧ್ಯಕ್ಷ ಬಶಾರ್ ಅಲ್-ಅಸ್ಸಾದ್ ದೋಷಿ ಎಂದು ತೀರ್ಮಾನಿಸಿದ ಸಿರಿಯಾದ ನ್ಯಾಯಾಲಯವೊಂದು ಮಂಗಳವಾರ ಅವರ ಗೈರುಹಾಜರಿಯಲ್ಲಿ ಅವರಿಗೆ ಮರಣದಂಡನೆ ಶಿಕ್ಷೆ ವಿಧಿಸಿದೆ.

ಈ ತೀರ್ಪು ಸಿರಿಯಾದ ಮಧ್ಯಂತರ ಆಡಳಿತದ ಅಡಿಯಲ್ಲಿ ಅಸ್ಸಾದ್ ವಿರುದ್ಧ ನೀಡಲಾದ ಮೊದಲ ಮರಣದಂಡನೆ ತೀರ್ಪಾಗಿದೆ. ಇದೇ ಪ್ರಕರಣದಲ್ಲಿ ಅಸ್ಸಾದ್ ಅವರ ಕಿರಿಯ ಸಹೋದರ ಮಹೇರ್ ಅಸ್ಸಾದ್ ಮತ್ತು ಸೋದರಸಂಬಂಧಿ ಅಟೆಫ್ ನಜೀಬ್ ಅವರಿಗೂ ಮರಣದಂಡನೆ ವಿಧಿಸಲಾಗಿದೆ ಎಂದು ಅಸೋಸಿಯೇಟೆಡ್ ಪ್ರೆಸ್ ವರದಿ ಮಾಡಿದೆ.

ದಕ್ಷಿಣದ ಪ್ರಾಂತವಾದ ದಾರಾದಲ್ಲಿ ನಡೆದ ದಂಗೆ ಮತ್ತು ನಂತರದ ಅಂತರ್ಯುದ್ಧಕ್ಕೆ ಕಾರಣವಾದ ಹತ್ಯಾಕಾಂಡದ ನೇತೃತ್ವ ವಹಿಸಿದ ಆರೋಪ ನಜೀಬ್ ಮೇಲಿತ್ತು. ಈ ಕಾನೂನು ಪ್ರಕ್ರಿಯೆಗಳು ಸಿರಿಯಾದ ಮಧ್ಯಂತರ ಆಡಳಿತದ ಅಡಿಯಲ್ಲಿ ಅಸ್ಸಾದ್ ವಿರುದ್ಧ ಬಂದ ಮೊದಲ ಇಂತಹ ತೀರ್ಪನ್ನು ಪ್ರತಿನಿಧಿಸುತ್ತವೆ. ಅಧಿಕಾರಿಗಳು ಮಾಜಿ ಸರಕಾರಕ್ಕೆ ಸಂಬಂಧಿಸಿದ ವ್ಯಕ್ತಿಗಳ ವಿರುದ್ಧ ಕಾನೂನು ಪ್ರಕರಣಗಳನ್ನು ಮುಂದುವರಿಸಿದ್ದು ಕೆಲವು ಆರೋಪಿಗಳು ನ್ಯಾಯಾಲಯಕ್ಕೆ ಹಾಜರಾಗಿದ್ದರೆ, ಇನ್ನು ಕೆಲವರ ವಿಚಾರಣೆಯನ್ನು ಗೈರುಹಾಜರಿಯಲ್ಲಿ ನಡೆಸಲಾಗುತ್ತಿದೆ. ಅಸ್ಸಾದ್ ಮಾಸ್ಕೋಗೆ ತೆರಳಿದ ನಂತರ ಅವರ ಗೈರುಹಾಜರಿಯಲ್ಲಿಯೇ ಈ ಮರಣದಂಡನೆ ಶಿಕ್ಷೆಯನ್ನು ಪ್ರಕಟಿಸಲಾಗಿದೆ.