ವಿವಾದಾತ್ಮಕ `ವಿದೇಶಿ ಪ್ರಭಾವ' ಮಸೂದೆಗೆ ಜಾರ್ಜಿಯಾ ಅಧ್ಯಕ್ಷೆ ತಡೆ
ಜಾರ್ಜಿಯಾ ಅಧ್ಯಕ್ಷೆ ಸಲೋಮ್ ಝುರಬಿಷ್ವಿಲಿ | PC : X/@Zourabichvili_S
ಟಿಬಿಲಿಸಿ, : ವ್ಯಾಪಕ ವಿರೋಧ ಮತ್ತು ಪ್ರತಿಭಟನೆಗೆ ಕಾರಣವಾಗಿದ್ದ ವಿವಾದಾತ್ಮಕ `ವಿದೇಶಿ ಪ್ರಭಾವ; ಮಸೂದೆಗೆ ಜಾರ್ಜಿಯಾ ಅಧ್ಯಕ್ಷೆ ಸಲೋಮ್ ಝುರಬಿಷ್ವಿಲಿ ಸಾಂಕೇತಿಕ ತಡೆಯಾಜ್ಞೆ ನೀಡಿದ್ದಾರೆ.
ಆದರೆ, ಅಧ್ಯಕ್ಷರ ತಡೆಯಾಜ್ಞೆಯನ್ನು ನಿವಾರಿಸಲು ಅಗತ್ಯವಿರುವ ಸಂಸತ್ ಸದಸ್ಯರನ್ನು ಆಡಳಿತಾರೂಢ ಜಾರ್ಜಿಯನ್ ಡ್ರೀಮ್ ಪಕ್ಷ ಹೊಂದಿರುವುದರಿಂದ ತಡೆಯಾಜ್ಞೆ ಕೇವಲ ಸಾಂಕೇತಿಕವಾಗಿದೆ. ಮಸೂದೆಯ ಪ್ರಕಾರ, ತಮ್ಮ ಹಣಕಾಸು ನಿಧಿಯ ಶೇ. 20 ಕ್ಕೂ ಹೆಚ್ಚಿನ ಮೊತ್ತವನ್ನು ವಿದೇಶದಿಂದ ಪಡೆಯುವ ಸರಕಾರೇತರ ಸಂಘಟನೆಗಳು ಹಾಗೂ ಮಾಧ್ಯಮ ಸಂಸ್ಥೆಗಳು `ವಿದೇಶಿ ಶಕ್ತಿಗಳ ಹಿತಾಸಕ್ತಿಯನ್ನು ಅನುಸರಿಸುವ ಸಂಸ್ಥೆಗಳು' ಎಂದು ನೋಂದಣಿ ಮಾಡಿಕೊಳ್ಳಬೇಕಿದೆ.
ವಿರೋಧ, ಪ್ರತಿಭಟನೆಯನ್ನು ಕಡೆಗಣಿಸಿ ಆಡಳಿತಾರೂಢ ಜಾರ್ಜಿಯನ್ ಡ್ರೀಮ್ ಪಕ್ಷ ಈ ವಾರ ಮಸೂದೆಗೆ ಸಂಸತ್ನ ಅನುಮೋದನೆ ಪಡೆಯಲು ಸಫಲರಾಗಿದ್ದರು. ಇದರಿಂದಾಗಿ ಈ ಹಿಂದಿನ ಸೋವಿಯತ್ ಗಣರಾಜ್ಯದ ಭಾಗವಾಗಿದ್ದ ಜಾರ್ಜಿಯಾ ಮತ್ತೆ ರಶ್ಯದತ್ತ ವಾಲುವ ಬಗ್ಗೆ ಕಳವಳ ಹೆಚ್ಚುತ್ತಿರುವಂತೆಯೇ ಈ ವಿವಾದಾಸ್ಪದ ಮಸೂದೆಯು ಯುರೋಪಿಯನ್ ಯೂನಿಯನ್ಗೆ ಸೇರ್ಪಡೆಗೊಳ್ಳುವ ಜಾರ್ಜಿಯಾದ ಹಂಬಲಕ್ಕೆ ತೊಡಕಾಗಬಹುದು ಎಂದು ಯುರೋಪಿಯನ್ ಯೂನಿಯನ್ ಎಚ್ಚರಿಕೆ ನೀಡಿತ್ತು.
ಈ ಮಸೂದೆಯು ಭಿನ್ನಾಭಿಪ್ರಾಯ, ಸರಕಾರದ ವಿರುದ್ಧದ ಧ್ವನಿಗಳನ್ನು ಹತ್ತಿಕ್ಕುವ ಉದ್ದೇಶ ಹೊಂದಿದೆ ಎಂದು ರಾಷ್ಟ್ರದಾದ್ಯಂತ ಪ್ರತಿಭಟನೆ ನಡೆದಿತ್ತು. ಜಾರ್ಜಿಯಾವು ಯುರೋಪಿಯನ್ ಯೂನಿಯನ್ಗೆ ಸೇರ್ಪಡೆಯಾಗಬೇಕೇ ಎಂಬ ಕುರಿತು ಇತ್ತೀಚೆಗೆ ನಡೆದ ಜನಮತಗಣನೆಯಲ್ಲಿ ಶೇ. 80 ರಷ್ಟು ಜನತೆ ಪರವಾಗಿ ಧ್ವನಿ ಎತ್ತಿದ್ದರು.