ಸೌದಿ ನೇತೃತ್ವದ ದಾಳಿಗೆ ಬೆಂಬಲ ನೀಡದಂತೆ ಅಮೆರಿಕಕ್ಕೆ ಹೌದಿಗಳ ಎಚ್ಚರಿಕೆ

ಸನಾ: ಸೌದಿ ಅರೇಬಿಯಾಗೆ ಬೆಂಬಲ ನೀಡಿದರೆ ಅಥವಾ ಬಾಬ್ ಎಲ್-ಮಂದೆಬ್ ಜಲಸಂಧಿಯ ತಡೆಯನ್ನು ತೆರವುಗೊಳಿಸಲು ಯತ್ನಿಸಿದರೆ ಅಮೆರಿಕದ ಹಿತಾಸಕ್ತಿಗಳು ತಮ್ಮ ಗುರಿಯಾಗಲಿವೆ ಎಂದು ಹೌದಿಗಳು ಎಚ್ಚರಿಕೆ ನೀಡಿದ್ದಾರೆ.

ಅಮೆರಿಕವು ಸೌದಿ ಅರೇಬಿಯಾಗೆ ವೈಮಾನಿಕ ದಾಳಿ ಅಥವಾ ವೈಮಾನಿಕ ಬೆಂಬಲ ನೀಡುವ ಸಾಹಸಕ್ಕೆ ಕೈಹಾಕಿದರೆ ನಮ್ಮ ಸುತ್ತಲಿರುವ ಯಾವುದೇ ಅಮೆರಿಕನ್ ಹಿತಾಸಕ್ತಿಗಳನ್ನು ನಾವು ಗುರಿಯಾಗಿಸಿಕೊಂಡು ದಾಳಿ ಮಾಡುತ್ತೇವೆ ಮತ್ತು ಯಾವುದನ್ನೂ ಹೊರತುಪಡಿಸುವುದಿಲ್ಲ ಎಂದು ಹೌದಿ ಮಿಲಿಟರಿ ಸಲಹೆಗಾರ ಮೊಹಮ್ಮದ್ ಅಲ್-ಥೌರ್ ಹೇಳಿರುವುದಾಗಿ ಎಎಫ್‍ಪಿ ಸುದ್ದಿಸಂಸ್ಥೆ ವರದಿ ಮಾಡಿದೆ.

ಈ ಸಂಘರ್ಷದಲ್ಲಿ ಅಮೆರಿಕದ ಹಸ್ತಕ್ಷೇಪವನ್ನು ಅಂತಿಮ ಗಡಿ ಎಂದು ಪರಿಗಣಿಸಲಾಗುವುದು ಮತ್ತು ಇದು ತೀವ್ರ ಪ್ರತಿರೋಧಕ್ಕೆ ಕಾರಣವಾಗಬಹುದು. ಅಮೆರಿಕವು ತನ್ನ ನೌಕಾಪಡೆಗಳೊಂದಿಗೆ ಮಿಲಿಟರಿ ಹಸ್ತಕ್ಷೇಪ ಮಾಡಲು ಧೈರ್ಯ ಮಾಡಿದರೆ ಅಥವಾ ಬಾಬ್ ಅಲ್-ಮಂದೆಬ್ ಅನ್ನು ತನ್ನ ನಿಯಂತ್ರಣಕ್ಕೆ ತೆಗೆದುಕೊಳ್ಳಲು ಯತ್ನಿಸಿದರೆ, ತೀವ್ರ ಪ್ರತಿಕ್ರಮ ಎದುರಿಸಬೇಕಾಗುತ್ತದೆ.

ಅಮೆರಿಕದ ಹಡಗುಗಳಿಗೆ ಬಾಬ್ ಎಲ್-ಮಂದೆಬ್ ಅನ್ನು ಸಂಪೂರ್ಣವಾಗಿ ಮುಚ್ಚಲಾಗುವುದು ಎಂದು ಅಲ್-ಥೌರ್ ಎಚ್ಚರಿಕೆ ನೀಡಿರುವುದಾಗಿ ವರದಿಯಾಗಿದೆ.