ಹಾರ್ಮುಝ್ ಮೂಲಕ ಸಾಗುವ ಹಡಗುಗಳಿಗೆ ಶುಲ್ಕ ವಿಧಿಸುವುದಿಲ್ಲ ಎಂದು ಇರಾನ್ ತಿಳಿಸಿದೆ: ಅಮೆರಿಕದ ಉಪಾಧ್ಯಕ್ಷ ಜೆ.ಡಿ. ವ್ಯಾನ್ಸ್

ವಾಷಿಂಗ್ಟನ್: ಹಾರ್ಮುಝ್ ಜಲಸಂಧಿ ಮೂಲಕ ಸಾಗುವ ಹಡಗುಗಳಿಗೆ ಯಾವುದೇ ಶುಲ್ಕ ವಿಧಿಸುವ ಯೋಜನೆ ಇಲ್ಲ ಎಂದು ಇರಾನ್ ಅಮೆರಿಕಕ್ಕೆ ತಿಳಿಸಿದೆ ಎಂದು ಅಮೆರಿಕದ ಉಪಾಧ್ಯಕ್ಷ ಜೆ.ಡಿ. ವ್ಯಾನ್ಸ್ ಹೇಳಿದ್ದಾರೆ. ಆದರೆ, ಜಲಸಂಧಿಯಲ್ಲಿ ಹಡಗುಗಳ ಸುರಕ್ಷಿತ ಸಂಚಾರ, ನೆಲಬಾಂಬ್‌ ಗಳ ತೆರವು ಹಾಗೂ ಜಲಮಾರ್ಗವನ್ನು ಸಂಪೂರ್ಣವಾಗಿ ಪುನಃ ತೆರೆಯುವ ಕುರಿತು ಇನ್ನೂ ಹಲವು ಪ್ರಶ್ನೆಗಳು ಬಾಕಿ ಉಳಿದಿವೆ ಎಂದು ಅವರು ತಿಳಿಸಿದ್ದಾರೆ.

‘ಫಾಕ್ಸ್ ನ್ಯೂಸ್‌’ಗೆ ನೀಡಿದ ಸಂದರ್ಶನದಲ್ಲಿ ವ್ಯಾನ್ಸ್ ಈ ಮಾಹಿತಿ ನೀಡಿದ್ದಾರೆ. ಇರಾನ್‌ ನೊಳಗಿನ ಕೆಲವರು ಹಾರ್ಮುಝ್ ಮೂಲಕ ಸಾಗುವ ಹಡಗುಗಳಿಗೆ ಶುಲ್ಕ ವಿಧಿಸುವ ಕುರಿತು ಮಾತನಾಡಿದ್ದಾರೆ. ಆದರೆ, ಅಂತಹ ಯಾವುದೇ ಯೋಜನೆ ಇಲ್ಲ ಎಂದು ಇರಾನ್ ಅಮೆರಿಕಕ್ಕೆ ತಿಳಿಸಿದೆ ಎಂದರು.

‘ಹಾರ್ಮುಝ್ ಜಲಸಂಧಿಗೆ ಶುಲ್ಕ ವಿಧಿಸುವ ಯಾವುದೇ ಯೋಜನೆ ಇಲ್ಲ ಎಂದು ಇರಾನಿಯನ್ನರು ನಮಗೆ ತಿಳಿಸಿದ್ದಾರೆ. ಆದರೆ, ಅವರು ವಾಸ್ತವದಲ್ಲಿ ಏನು ಮಾಡುತ್ತಾರೆ ಎಂಬುದನ್ನು ನಾವು ನೋಡಬೇಕಿದೆ’ ಎಂದು ವ್ಯಾನ್ಸ್ ಹೇಳಿದರು.

ಸಹಜ ಇಂಧನ ಸಾಗಣೆ ಪುನರಾರಂಭಕ್ಕೆ ಒತ್ತು

ಸಂಘರ್ಷ ಆರಂಭವಾಗುವ ಮೊದಲು ಕೊಲ್ಲಿ ಪ್ರದೇಶದಿಂದ ನಡೆಯುತ್ತಿದ್ದ ತೈಲ ಮತ್ತು ಅನಿಲ ರಫ್ತು ಮತ್ತೆ ಅದೇ ಮಟ್ಟಕ್ಕೆ ಮರಳಬೇಕು ಎಂಬುದು ಅಮೆರಿಕದ ಪ್ರಮುಖ ಉದ್ದೇಶವಾಗಿದೆ ಎಂದು ವ್ಯಾನ್ಸ್ ಹೇಳಿದರು.

‘ಸಂಘರ್ಷಕ್ಕೂ ಮುನ್ನ ಕೊಲ್ಲಿ ಪ್ರದೇಶದಲ್ಲಿ ಸಾಗುತ್ತಿದ್ದ ತೈಲ ಮತ್ತು ಅನಿಲದ ಪ್ರಮಾಣ ಮತ್ತೆ ಸಾಗಬೇಕು ಎಂಬುದು ನಮ್ಮ ನಿರೀಕ್ಷೆ’ ಎಂದು ಅವರು ಹೇಳಿದರು. ಈ ಸಂದೇಶವನ್ನು ಇರಾನ್‌ ನ ಅಧಿಕಾರಿಗಳೂ ಅಮೆರಿಕಕ್ಕೆ ನೀಡಿದ್ದಾರೆ ಎಂದರು.

ಕೊಲ್ಲಿ ರಾಷ್ಟ್ರಗಳೂ ಸಹಜ ಹಡಗು ಸಂಚಾರ ಮತ್ತು ಇಂಧನ ವ್ಯಾಪಾರ ಪುನರಾರಂಭವಾಗುವುದನ್ನು ಬೆಂಬಲಿಸುತ್ತಿವೆ ಎಂದು ವ್ಯಾನ್ಸ್ ತಿಳಿಸಿದರು.

ಆದರೆ, ಇರಾನ್ ನೀಡುವ ಭರವಸೆಗಳನ್ನು ಅಮೆರಿಕ ಹಾಗೆಯೇ ಸ್ವೀಕರಿಸುವುದಿಲ್ಲ. ಇರಾನ್‌ ನ ಮಾತಿಗಿಂತ ಅದರ ನಡೆಗಳನ್ನು ಪರಿಶೀಲಿಸಲಾಗುವುದು ಎಂದು ವ್ಯಾನ್ಸ್ ಸ್ಪಷ್ಟಪಡಿಸಿದರು.

‘ನಾವು ನಂಬುವುದಿಲ್ಲ, ಪರಿಶೀಲಿಸುತ್ತೇವೆ. ಜನರು ಏನು ಹೇಳುತ್ತಾರೆ ಎಂಬುದಕ್ಕಿಂತ ಅವರು ಏನು ಮಾಡುತ್ತಾರೆ ಎಂಬುದನ್ನು ನೋಡುತ್ತೇವೆ’ ಎಂದು ಅವರು ಹೇಳಿದರು.

ಹಡಗುಗಳಿಗೆ ಶೇ 5–7ರಷ್ಟು ಶುಲ್ಕದ ಚರ್ಚೆ

ಇತ್ತೀಚಿನ ತಿಂಗಳುಗಳಲ್ಲಿ ಹಾರ್ಮುಝ್ ಜಲಸಂಧಿ ಇರಾನ್–ಅಮೆರಿಕ ನಡುವಿನ ಪ್ರಮುಖ ವಿವಾದದ ವಿಷಯವಾಗಿದೆ. ಜಲಸಂಧಿ ಮೂಲಕ ಸಾಗುವ ಹಡಗುಗಳಿಗೆ ಇರಾನ್ ಶುಲ್ಕ ವಿಧಿಸಬಹುದು ಎಂಬ ವರದಿಗಳು ಈ ಹಿಂದೆ ಪ್ರಕಟವಾಗಿದ್ದವು.

ಇರಾನ್ ಅಧಿಕಾರಿಗಳನ್ನು ಉಲ್ಲೇಖಿಸಿದ ವರದಿಗಳ ಪ್ರಕಾರ, ಹಡಗುಗಳು ಸಾಗಿಸುವ ಸರಕುಗಳ ಮೌಲ್ಯದ ಶೇ 5ರಿಂದ 7ರಷ್ಟು ಶುಲ್ಕ ವಿಧಿಸುವ ಸಾಧ್ಯತೆಯನ್ನು ಟೆಹ್ರಾನ್ ಪರಿಶೀಲಿಸಿತ್ತು.

ಇರಾನ್‌ ನಲ್ಲಿ ಈ ಬಗ್ಗೆ ಚರ್ಚಿಸಿರುವುದು ನಿಜ ಎಂದು ವ್ಯಾನ್ಸ್ ಒಪ್ಪಿಕೊಂಡರು. ಆದರೆ, ಸದ್ಯ ಹಾರ್ಮುಝ್ ಜಲಸಂಧಿಗೆ ಶುಲ್ಕ ವಿಧಿಸುವ ಯಾವುದೇ ಯೋಜನೆ ಇಲ್ಲ ಎಂದು ಟೆಹ್ರಾನ್ ಅಮೆರಿಕಕ್ಕೆ ಭರವಸೆ ನೀಡಿದೆ ಎಂದರು.

ಸುರಕ್ಷಿತ ಹಡಗು ಸಂಚಾರದ ಬಗ್ಗೆ ಚರ್ಚೆ

ಶುಲ್ಕದ ಪ್ರಶ್ನೆಯ ಜತೆಗೆ ಹಾರ್ಮುಝ್ ಮೂಲಕ ಹಡಗುಗಳ ಸುರಕ್ಷಿತ ಸಂಚಾರದ ಬಗ್ಗೆಯೂ ಇರಾನ್ ಮತ್ತು ಅಮೆರಿಕ ಚರ್ಚಿಸುತ್ತಿವೆ.

ಸಂಘರ್ಷದ ಸಂದರ್ಭದಲ್ಲಿ ಜಲಸಂಧಿಯ ಕೆಲವು ಭಾಗಗಳಲ್ಲಿ ನೆಲಬಾಂಬ್‌ ಗಳನ್ನು ಹಾಕಲಾಗಿದೆ ಎಂಬ ವರದಿಗಳಿವೆ. ಈ ಹಿನ್ನೆಲೆಯಲ್ಲಿ ಇರಾನ್ ಮತ್ತು ಕೊಲ್ಲಿ ರಾಷ್ಟ್ರಗಳು, ವಿಶೇಷವಾಗಿ ಒಮಾನ್, ಹಡಗು ಮಾರ್ಗಗಳನ್ನು ಸುರಕ್ಷಿತಗೊಳಿಸುವ ಕುರಿತು ಚರ್ಚಿಸುತ್ತಿವೆ ಎಂದು ವ್ಯಾನ್ಸ್ ಹೇಳಿದರು.

ವಾಣಿಜ್ಯ ಹಡಗುಗಳಿಗೆ ಸುರಕ್ಷಿತ ಮಾರ್ಗ ಕಲ್ಪಿಸುವುದು ಮತ್ತು ನೆಲಬಾಂಬ್‌ ಗಳನ್ನು ತೆರವುಗೊಳಿಸುವುದು ಮಾತುಕತೆಯ ಪ್ರಮುಖ ವಿಷಯಗಳಾಗಿವೆ.

ಹಾರ್ಮುಝ್ ಮೂಲಕ ಸಾಗುವ ವಾಣಿಜ್ಯ ಹಡಗುಗಳನ್ನು ಇರಾನ್ ಗುರಿಯಾಗಿಸುವುದಿಲ್ಲ ಎಂಬ ಖಾತರಿಯನ್ನೂ ಅಮೆರಿಕ ಬಯಸುತ್ತಿದೆ ಎಂದು ವ್ಯಾನ್ಸ್ ಹೇಳಿದರು.

ಸಂಪೂರ್ಣವಾಗಿ ತೆರೆಯಲು ಇರಾನ್‌ ನ ಷರತ್ತು

ಹಾರ್ಮುಝ್ ಜಲಸಂಧಿಯನ್ನು ಸಂಪೂರ್ಣವಾಗಿ ಪುನಃ ತೆರೆಯುವುದು ಕೇವಲ ಹಡಗು ಸಂಚಾರದ ಪ್ರಶ್ನೆಯಲ್ಲ. ಅದಕ್ಕೆ ರಾಜಕೀಯ ಮತ್ತು ಭದ್ರತಾ ಷರತ್ತುಗಳೂ ಇವೆ ಎಂದು ಇರಾನ್ ಸೂಚಿಸಿದೆ.

ಇರಾನ್ ವಿದೇಶಾಂಗ ಸಚಿವ ಅಬ್ಬಾಸ್ ಅರಘ್ಚಿ ಅವರು ಅಮೆರಿಕದೊಂದಿಗೆ ನಡೆಯುತ್ತಿರುವ ಮಾತುಕತೆಗಳು ಅಂತಿಮ ಹಂತದಲ್ಲಿವೆ ಎಂದು ಹೇಳಿದ್ದಾರೆ. ಆದರೆ, ಜಲಸಂಧಿಯ ಮೂಲಕ ಸಂಪೂರ್ಣ ಸಂಚಾರ ಪುನರಾರಂಭಿಸಲು ಕೆಲವು ಹೆಚ್ಚುವರಿ ಷರತ್ತುಗಳನ್ನು ಪೂರೈಸಬೇಕಿದೆ ಎಂದು ತಿಳಿಸಿದ್ದಾರೆ.

ಹಿಂದಿನ ಕದನ ವಿರಾಮ ಒಪ್ಪಂದದ ಉಲ್ಲಂಘನೆಗಳಿಗೆ ಅಮೆರಿಕ ಪರಿಹಾರ ನೀಡಬೇಕು ಹಾಗೂ ಇರಾನ್ ವಿರುದ್ಧದ ಪ್ರತಿಕೂಲ ಕ್ರಮಗಳನ್ನು ನಿಲ್ಲಿಸಬೇಕು ಎಂದು ಇರಾನ್ ಅಧಿಕಾರಿಗಳು ಒತ್ತಾಯಿಸಿದ್ದಾರೆ.

ಇರಾನ್‌ ನ ಭದ್ರತಾ ಮುಖ್ಯಸ್ಥ ಮೊಹಮ್ಮದ್ ಬಕರ್ ಝೋಲ್ಕಾದರ್, ನಿರ್ಬಂಧಗಳಿಗೆ ಸಂಬಂಧಿಸಿದ ಸಮಸ್ಯೆಗಳು ಹಾಗೂ ಇರಾನ್‌ನ ಕಡಲ ಚಟುವಟಿಕೆಗಳ ಮೇಲಿನ ನಿರ್ಬಂಧಗಳನ್ನು ಅಮೆರಿಕ ಪರಿಹರಿಸಬೇಕು ಎಂದು ಹೇಳಿದ್ದಾರೆ.

‘ತಸ್ನಿಮ್’ ಸುದ್ದಿ ಸಂಸ್ಥೆಗೆ ನೀಡಿದ ಸಂದರ್ಶನದಲ್ಲಿ ಅವರು, ಅಮೆರಿಕ ತನ್ನ ನಡವಳಿಕೆಯನ್ನು ‘ಸರಿಪಡಿಸಿಕೊಳ್ಳುವ’ವರೆಗೆ ಹಾರ್ಮುಝ್ ಜಲಸಂಧಿಯನ್ನು ಮುಚ್ಚಲಾಗುವುದು ಎಂದು ಹೇಳಿದ್ದಾರೆ.

ಮಾತುಕತೆಯಲ್ಲಿ ಪ್ರಗತಿ; ಒಪ್ಪಂದ ಇನ್ನೂ ದೂರ

ಇರಾನ್ ಜೊತೆ ಶೀಘ್ರದಲ್ಲೇ ಒಪ್ಪಂದಕ್ಕೆ ಬರಬಹುದು ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಹೇಳಿದ್ದಾರೆ.

ಆದರೆ, ವ್ಯಾನ್ಸ್ ಹೆಚ್ಚು ಎಚ್ಚರಿಕೆಯ ನಿಲುವು ವ್ಯಕ್ತಪಡಿಸಿದ್ದಾರೆ. ಮಾತುಕತೆಯಲ್ಲಿ ಇತ್ತೀಚೆಗೆ ಪ್ರಗತಿ ಕಂಡುಬಂದಿದ್ದರೂ, ಹಲವು ಪ್ರಮುಖ ಸಮಸ್ಯೆಗಳು ಇನ್ನೂ ಬಗೆಹರಿದಿಲ್ಲ ಎಂದು ಅವರು ಹೇಳಿದರು.

‘ನಮ್ಮ ಉದ್ದೇಶಗಳು ಈಡೇರಿವೆ ಎಂದು ಭಾವಿಸಲು ಅಗತ್ಯವಾದ ಕ್ರಮಗಳನ್ನು ಇರಾನ್ ಕೈಗೊಳ್ಳಬಹುದೇ ಎಂಬುದು ಪ್ರಶ್ನೆ’ ಎಂದು ವ್ಯಾನ್ಸ್ ಹೇಳಿದರು.

ಜಾಗತಿಕ ಇಂಧನಕ್ಕೆ ಪ್ರಮುಖ ಮಾರ್ಗ

ಹಾರ್ಮುಝ್ ಜಲಸಂಧಿ ಜಗತ್ತಿನ ಪ್ರಮುಖ ಇಂಧನ ಸಾಗಣೆ ಮಾರ್ಗಗಳಲ್ಲಿ ಒಂದಾಗಿದೆ. ವಿಶ್ವದ ತೈಲ ಮತ್ತು ನೈಸರ್ಗಿಕ ಅನಿಲ ವ್ಯಾಪಾರದ ಸುಮಾರು ಐದನೇ ಒಂದು ಭಾಗ ಈ ಜಲಸಂಧಿಯ ಮೂಲಕ ಸಾಗುತ್ತದೆ.

ಹೀಗಾಗಿ, ಹಾರ್ಮುಝ್ ಮೂಲಕ ಹಡಗು ಸಂಚಾರಕ್ಕೆ ಅಡ್ಡಿಯಾದರೆ ಜಾಗತಿಕ ಇಂಧನ ಮಾರುಕಟ್ಟೆ ಮತ್ತು ವಿಶ್ವದ ವಿವಿಧ ದೇಶಗಳ ಸರಕಾರಗಳ ಮೇಲೆ ಪರಿಣಾಮ ಬೀರುವ ಸಾಧ್ಯತೆ ಇದೆ.