ಅಮೆರಿಕದೊಂದಿಗೆ ಮಾತುಕತೆಗೆ ಇರಾನ್ ನ ಏಳು ಷರತ್ತುಗಳು : ದೇಶದ ಭದ್ರತಾ ಮುಖ್ಯಸ್ಥ ಮೊಹ್ಸೆನ್ ರಿಝಾಯಿ

ಟೆಹ್ರಾನ್:ಅಮೆರಿಕದೊಂದಿಗಿನ ಯುದ್ಧವನ್ನು ಅಂತ್ಯಗೊಳಿಸಲು ಇರಾನ್, ಮಧ್ಯಸ್ಥಿಕೆದಾರ ಖತರ್ ಮೂಲಕ ಅಮೆರಿಕಕ್ಕೆ ತನ್ನ ಅಧಿಕೃತ ಷರತ್ತುಗಳ ಪಟ್ಟಿಯನ್ನು ರವಾನಿಸಿದೆ ಎಂದು ದೇಶದ ಭದ್ರತಾ ಮುಖ್ಯಸ್ಥ ಮೊಹ್ಸೆನ್ ರಿಝಾಯಿ ಮಾಧ್ಯಮ ಸಂಸ್ಥೆ ಅಲ್ ಜಝೀರಾಗೆ ತಿಳಿಸಿದ್ದಾರೆ.

ಮತ್ತೊಂದು ಪ್ರತ್ಯೇಕ ಪೋಸ್ಟ್ ನಲ್ಲಿ, ಅಮೆರಿಕ ಸರ್ಕಾರದೊಂದಿಗೆ ಯಾವುದೇ ಮಾತುಕತೆ ಆರಂಭಿಸಲು ಇರಾನ್ ಏಳು ಷರತ್ತುಗಳನ್ನು ಪ್ರಕಟಿಸಿದೆ ಎಂದು ರಿಝಾಯಿ ಹೇಳಿದ್ದಾರೆ ಎಂದು ಅಲ್ ಜಝೀರಾ ವರದಿ ಮಾಡಿದೆ.

ಈ ಕುರಿತು ಶನಿವಾರ ಟೆಹ್ರಾನ್ ನಲ್ಲಿ ಅಲ್ ಜಝೀರಾಗೆ ನೀಡಿದ ವಿಶೇಷ ಸಂದರ್ಶನದಲ್ಲಿ ಮಾತನಾಡಿದ ಅವರು, “ನಾವು ಮಧ್ಯಸ್ಥಿಕೆ ವಹಿಸಿರುವ ಖತರ್ ಜೊತೆ ನಿರಂತರ ಸಂಪರ್ಕದಲ್ಲಿದ್ದೇವೆ. ಯುದ್ಧವನ್ನು ಕೊನೆಗೊಳಿಸುವ ಉದ್ದೇಶದಿಂದ ಖತರ್ ನಮ್ಮ ಷರತ್ತುಗಳನ್ನು ವಾಷಿಂಗ್ಟನ್ ಗೆ ತಲುಪಿಸಿದೆ. ನಾವು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಪ್ರತಿಕ್ರಿಯೆಗಾಗಿ ಕಾಯುತ್ತಿದ್ದೇವೆ,” ಎಂದು ಹೇಳಿದ್ದಾರೆ.

ರಿಝಾಯಿ ಅವರು ಸುಮಾರು ಒಂದು ತಿಂಗಳ ಹಿಂದಷ್ಟೇ ಇರಾನ್ ನ ಸುಪ್ರೀಂ ನ್ಯಾಷನಲ್ ಸೆಕ್ಯುರಿಟಿ ಕೌನ್ಸಿಲ್ ಕಾರ್ಯದರ್ಶಿಯಾಗಿ ಅಧಿಕಾರ ವಹಿಸಿಕೊಂಡಿದ್ದಾರೆ.

ಈ ಮಧ್ಯೆ, ‘ಎಕ್ಸ್’ನಲ್ಲಿ ಪೋಸ್ಟ್ ಮಾಡಿರುವ ರೆಝೈ, “ಅಮೆರಿಕ ಸರ್ಕಾರದೊಂದಿಗೆ ಯಾವುದೇ ಮಾತುಕತೆ ಆರಂಭಿಸಲು ಇರಾನ್ ಏಳು ಷರತ್ತುಗಳನ್ನು ಪ್ರಕಟಿಸಿದೆ. ಟೆಹ್ರಾನ್ ನ ಸಂದೇಶ ಸ್ಪಷ್ಟವಾಗಿದೆ ಮತ್ತು ಯಾವುದೇ ಗೊಂದಲವಿಲ್ಲ,” ಎಂದು ಬರೆದಿದ್ದಾರೆ ಎಂದು ಅಲ್ ಜಝೀರಾ ಪ್ರತ್ಯೇಕ ವರದಿಯಲ್ಲಿ ತಿಳಿಸಿದೆ.

ಮುಂದುವರಿದು ತಮ್ಮ ಪೋಸ್ಟ್ ನಲ್ಲಿ, “ವಾಷಿಂಗ್ಟನ್ ತಾನೇ ಸೃಷ್ಟಿಸಿಕೊಂಡಿರುವ ಸಂಕಷ್ಟದಿಂದ ಹೊರಬರಲು ಮತ್ತು ಮತ್ತಷ್ಟು ಅದರಲ್ಲಿ ಸಿಲುಕಿಕೊಳ್ಳುವುದನ್ನು ತಪ್ಪಿಸಲು ಬಯಸುವುದಾದರೆ, ಇರಾನ್ ನ ಹಕ್ಕುಗಳು ಮತ್ತು ಷರತ್ತುಗಳನ್ನು ಒಪ್ಪಿಕೊಳ್ಳುವುದನ್ನು ಬಿಟ್ಟು ಬೇರೆ ದಾರಿಯಿಲ್ಲ,” ಎಂದು ರಿಝಾಯಿ ಹೇಳಿದ್ದಾರೆ.

ಅಲ್ ಜಝೀರಾಗೆ ವಿಶೇಷ ಸಂದರ್ಶನ ನೀಡಿದ ಬೆನ್ನಲ್ಲೇ ರಿಝಾಯಿ ಈ ಪೋಸ್ಟ್ ಮಾಡಿದ್ದಾರೆ.

ಇರಾನ್ ಹಾಕಿದ ಷರತ್ತುಗಳೇನು?

ಇರಾನ್ ಹಾಕಿರುವ ಷರತ್ತುಗಳೇನು ಎಂಬ ಪ್ರಶ್ನೆಗೆ ಉತ್ತರಿಸಿದ ರಿಝಾಯಿ, “ಎಲ್ಲಾ ರಂಗಗಳಲ್ಲೂ ಯುದ್ಧದ ಅಂತ್ಯ, ನಮ್ಮ ಮುಟ್ಟುಗೋಲು ಹಾಕಿಕೊಳ್ಳಲಾದ ಹಣದ ಬಿಡುಗಡೆ ಮತ್ತು ನೌಕಾ ದಿಗ್ಬಂಧನದ ತೆರವು , ಇವು ನಮ್ಮ ಮುಖ್ಯ ಷರತ್ತುಗಳಾಗಿವೆ,” ಎಂದು ತಿಳಿಸಿದ್ದಾರೆ.

“ಈ ಷರತ್ತುಗಳನ್ನು ಒಪ್ಪಿಕೊಳ್ಳುವುದು ವಾಷಿಂಗ್ಟನ್ ನ ಹಿತದೃಷ್ಟಿಯಿಂದಲೂ ಒಳ್ಳೆಯದು. ಟ್ರಂಪ್ ಅವರ ಬೆದರಿಕೆಗಳಿಂದ ಯಾವುದೇ ಪ್ರಯೋಜನವಾಗುವುದಿಲ್ಲ. ನಾವು ನಿರ್ಣಾಯಕ ಯುದ್ಧಕ್ಕೂ ಸಿದ್ಧರಾಗಿದ್ದೇವೆ,” ಎಂದು ಅವರು ಎಚ್ಚರಿಸಿದ್ದಾರೆ.

ಕಳೆದ ತಿಂಗಳು ಉಭಯ ದೇಶಗಳ ನಡುವಿನ ತಿಳುವಳಿಕಾ ಒಡಂಬಡಿಕೆಯ (MoU) ಅವಧಿ ಮುಗಿದ ಬಳಿಕ, ಖತರ್ ಮತ್ತು ಪಾಕಿಸ್ತಾನಗಳು ಇತ್ತಂಡಗಳ ನಡುವೆ ಮಾತುಕತೆಯನ್ನು ಮರುಸ್ಥಾಪಿಸಲು ಪ್ರಯತ್ನಿಸುತ್ತಿವೆ.

ಫೆಬ್ರವರಿ ಅಂತ್ಯದಲ್ಲಿ ಅಮೆರಿಕ ಮತ್ತು ಇಸ್ರೇಲ್ ಇರಾನ್ ಮೇಲೆ ನಡೆಸಿದ ದಾಳಿಯಲ್ಲಿ ಸುಪ್ರೀಂ ಲೀಡರ್ ಆಯತುಲ್ಲಾ ಅಲಿ ಖಾಮಿನೈ ಮೃತಪಟ್ಟ ಬಳಿಕ ಆರಂಭವಾದ ಈ ಯುದ್ಧವನ್ನು ಅಂತ್ಯಗೊಳಿಸಲು ಪ್ರಾದೇಶಿಕ ದೇಶಗಳೂ ಪ್ರಯತ್ನಿಸುತ್ತಿವೆ.

ಇರಾನ್ ಮೇಲೆ ಅಮೆರಿಕ ಮತ್ತೊಮ್ಮೆ ದಾಳಿ ನಡೆಸುವ ಸಾಧ್ಯತೆಯನ್ನು ರಿಝಾಯಿ ತಳ್ಳಿಹಾಕಿಲ್ಲ. ಮಿಲಿಟರಿ ಮೌಲ್ಯಮಾಪನಗಳ ಪ್ರಕಾರ ಇಂತಹ ಸಾಧ್ಯತೆ ದಟ್ಟವಾಗಿದೆ ಎಂದಿರುವ ಅವರು, ಟೆಹ್ರಾನ್ ಅದನ್ನು ಎದುರಿಸಲು ಸಂಪೂರ್ಣ ಸಜ್ಜಾಗಿದೆ ಎಂದು ಒತ್ತಿಹೇಳಿದ್ದಾರೆ.

ಹಿಂದಿನ ಎರಡು ಸುತ್ತಿನ ಸಂಘರ್ಷಗಳ ಬಳಿಕ ಇರಾನ್ ನ ಮಿಲಿಟರಿ ತಂತ್ರಗಾರಿಕೆಯಲ್ಲಿ ಬದಲಾವಣೆಯಾಗಿದೆ ಎಂದು ಅವರು ಹೇಳಿದ್ದಾರೆ. ಸದ್ಯ ಗಲ್ಫ್ ನಿಂದ ಒಮನ್ ಕೊಲ್ಲಿ ಹಾಗೂ ಅರಬ್ಬಿ ಸಮುದ್ರದವರೆಗಿನ ಅಮೆರಿಕದ ನೌಕಾಪಡೆ ನೆಲೆಗಳ ಮೇಲೆ ತಮ್ಮ ಪಡೆಗಳು ಗಮನಹರಿಸಿವೆ ಎಂದು ತಿಳಿಸಿದ್ದಾರೆ.