ಇರಾನ್ ಯುದ್ಧ ತೀವ್ರ: ಇಸ್ರೇಲ್‌ ಗೆ 827 ಮಿಲಿಯನ್ ಡಾಲರ್ ತುರ್ತು ಮಿಲಿಟರಿ ನಿಧಿ ಅನುಮೋದನೆ

ಟೆಲ್‌ ಅವೀವ್‌, ಮಾ.15: ಪಶ್ಚಿಮ ಏಷ್ಯಾದಲ್ಲಿ ಇರಾನ್ ವಿರುದ್ಧ ನಡೆಯುತ್ತಿರುವ ಯುದ್ಧ ಮೂರನೇ ವಾರಕ್ಕೆ ಕಾಲಿಟ್ಟಿರುವ ಹಿನ್ನೆಲೆಯಲ್ಲಿ, ಇಸ್ರೇಲ್ ಸರ್ಕಾರ ಮಿಲಿಟರಿ ಖರೀದಿಗಳಿಗೆ 827 ಮಿಲಿಯನ್ ಡಾಲರ್ (ಸುಮಾರು 7,656 ಕೋಟಿ ರೂಪಾಯಿ) ಮೊತ್ತದ ತುರ್ತು ಬಜೆಟ್ ಹಂಚಿಕೆಗೆ ಅನುಮೋದನೆ ನೀಡಿದೆ ಎಂದು ಅಲ್ಲಿನ ಮಾಧ್ಯಮಗಳನ್ನು ಉಲ್ಲೇಖಿಸಿ Aljazeera ವರದಿ ಮಾಡಿದೆ.

ವಾರಾಂತ್ಯದಲ್ಲಿ ನಡೆದ ಕ್ಯಾಬಿನೆಟ್ ಮಂತ್ರಿಗಳ ಟೆಲಿಫೋನ್ ಸಭೆಯಲ್ಲಿ ಸುಮಾರು 2.6 ಶತಕೋಟಿ ಶೇಕೆಲ್ ಮೌಲ್ಯದ ಈ ಪ್ಯಾಕೇಜ್ ಗೆ ಒಪ್ಪಿಗೆ ನೀಡಲಾಗಿದೆ ಎಂದು ‘ಹಾರೆಟ್ಜ್’ ದಿನಪತ್ರಿಕೆ ತಿಳಿಸಿದೆ. ಈ ನಿಧಿಯನ್ನು ಭದ್ರತಾ ಖರೀದಿಗಳು ಹಾಗೂ ತುರ್ತು ಅಗತ್ಯಗಳು ಪೂರೈಸಲು ಬಳಸಲಾಗುವುದು ಎಂದು ಹೇಳಲಾಗಿದ್ದರೂ, ಹೆಚ್ಚಿನ ವಿವರಗಳನ್ನು ಬಹಿರಂಗಪಡಿಸಲಾಗಿಲ್ಲ.

ಎಲ್ಲಾ ಮಂತ್ರಿಗಳಿಗೆ ಹಂಚಲಾಗಿದ್ದ ಹಣಕಾಸು ಸಚಿವಾಲಯದ ದಾಖಲೆಯನ್ನು ಉಲ್ಲೇಖಿಸಿದ ವರದಿಗಳ ಪ್ರಕಾರ, “ಹೋರಾಟದ ತೀವ್ರತೆಯನ್ನು ಗಮನಿಸಿದರೆ ಹೆಚ್ಚುವರಿ ಬಜೆಟ್ ಹಂಚಿಕೆ ಅಗತ್ಯವಾಗಿದೆ” ಎಂದು ಹೇಳಲಾಗಿದೆ. “ಯುದ್ಧಸಾಮಗ್ರಿಗಳ ಸ್ವಾಧೀನ, ಸುಧಾರಿತ ಶಸ್ತ್ರಾಸ್ತ್ರ ವ್ಯವಸ್ಥೆಗಳ ಖರೀದಿ ಮತ್ತು ನಿರ್ಣಾಯಕ ಯುದ್ಧ ದಾಸ್ತಾನುಗಳ ಮರುಪೂರಣ ಸೇರಿದಂತೆ ಕಾರ್ಯಾಚರಣೆಗೆ ತಕ್ಷಣದ ಪ್ರತಿಕ್ರಿಯೆ ಒದಗಿಸಲು ತುರ್ತು ಅಗತ್ಯ ಉಂಟಾಗಿದೆ” ಎಂದು ದಾಖಲೆಯಲ್ಲಿ ವಿವರಿಸಲಾಗಿದೆ.

ಈ ಕ್ರಮವು “ಹೋರಾಟದ ನಡವಳಿಕೆಯಿಂದ ಉಂಟಾಗುವ ಅಗತ್ಯಗಳನ್ನು ಪರಿಹರಿಸಲು ಮಾತ್ರ ಉದ್ದೇಶಿಸಲಾದ ಅಸಾಧಾರಣ ತುರ್ತು ನಿರ್ಧಾರ” ಎಂದು ದಾಖಲೆಯು ಸ್ಪಷ್ಟಪಡಿಸಿದೆ.

ಈ ನಿಧಿಯನ್ನು ರಾಜ್ಯ ಬಜೆಟ್ನಿಂದಲೇ ಒದಗಿಸಲಾಗುತ್ತಿದೆ. ಒಟ್ಟು 222 ಬಿಲಿಯನ್ ಡಾಲರ್(ಸುಮಾರು 20.5 ಲಕ್ಷ ಕೋಟಿ ರೂಪಾಯಿ) ಮೊತ್ತದ ಬಜೆಟ್ ಯೋಜನೆಯನ್ನು ಸರ್ಕಾರ ಮಾರ್ಚ್ 12ರಂದು ಅನುಮೋದಿಸುವ ನಿರೀಕ್ಷೆಯಿದ್ದು, ಮಾರ್ಚ್ 31ರೊಳಗೆ ಸಂಸತ್ತು ಇದನ್ನು ಅಂಗೀಕರಿಸುವ ಸಾಧ್ಯತೆ ಇದೆ ಎಂದು ವರದಿಗಳು ಸೂಚಿಸಿವೆ.