ಲಂಡನ್ ಮೇಯರ್ ಚುನಾವಣೆ: ಸಾದಿಕ್ ಖಾನ್‍ಗೆ ಸತತ ಮೂರನೇ ಬಾರಿಗೆ ಗೆಲುವು

ಲಂಡನ್: ಲೇಬರ್ ಪಕ್ಷದ ಸಾದಿಕ್ ಖಾನ್ ಅವರು ಲಂಡನ್ ಮೇಯರ್ ಆಗಿ ಸತತ ಮೂರನೇ ಬಾರಿಗೆ ಐತಿಹಾಸಿಕ ಜಯ ಸಾಧಿಸಿದ್ದಾರೆ.

2016ರ ಮೇ ತಿಂಗಳಲ್ಲಿ ಮೊದಲ ಬಾರಿಗೆ ಲಂಡನ್ ಮೇಯರ್ ಆಗಿ ಆಯ್ಕೆಯಾಗಿದ್ದ ಖಾನ್, ತಮ್ಮ ಕನ್ಸರ್ವೇರ್ಟಿವ್ ಪಕ್ಷದ ಎದುರಾಳಿ ಸುಸಾನ್ ಹಾಲ್ ಅವರನ್ನು 2.76 ಲಕ್ಷ ಮತಗಳ ಅಗಾಧ ಅಂತರದಿಂದ ಸೋಲಿಸಿದ್ದಾರೆ. ಲೇಬರ್ ಪಕ್ಷದ ಪರವಾಗಿ ಶೇಕಡ 3.2ರಷ್ಟು ಹೆಚ್ಚುವರಿ ಮತಗಳು ಚಲಾವಣೆಯಾಗಿವೆ.

ಒಟ್ಟು 14 ಕ್ಷೇತ್ರಗಳ ಪೈಕಿ ಸಾದಿಕ್ 9 ರಲ್ಲಿ ಗೆಲುವು ಸಾಧಿಸಿದ್ದು, ಇದರದಲ್ಲಿ ಟೋರಿಸ್‍ನಿಂದ ಲಭ್ಯವಾಗಿರುವ ಎರಡು ಹೆಚ್ಚುವರಿ ಸ್ಥಾನಗಳು ಸೇರಿವೆ. 24 ಲಕ್ಷಕ್ಕೂ ಅಧಿಕ ಮತದಾರರು ಈ ಚುನಾವಣೆಯಲ್ಲಿ ಮತ ಚಲಾಯಿಸಿದ್ದು, ಒಟ್ಟಾರೆ ಶೇಕಡ 42.8ರಷ್ಟು ಮತದಾನವಾಗಿತ್ತು. ಇದು ಕಳೆದ ಬಾರಿ 2021ರಲಿ ನಡೆದ ಮೇಯರ್ ಚುನಾವಣೆಯಲ್ಲಿ ಚಲಾವಣೆಯಾದ ಮತಕ್ಕೆ ಹೋಲಿಸಿದರೆ ತುಸು ಕಡಿಮೆ.

ಗೆಲುವನ್ನು ಘೋಷಿಸಿದ ಬಳಿಕ ಪೂರ್ವ ಲಂಡನ್‍ನ ಸಿಟಿ ಹಾಲ್‍ನಲ್ಲಿ ಮಾತನಾಡಿದ ಅವರು, ನನಗೆ ಪ್ರೀತಿಯ ನಗರವಾಗಿರುವ ಲಂಡನ್‍ನ ಜನತೆಗೆ ಸೇವೆ ಸಲ್ಲಿಸಲು ಸಿಕ್ಕಿದ ದೊಡ್ಡ ಗೌರವ ಇದಾಗಿದೆ ಎಂದು ಬಣ್ಣಿಸಿದರು. ಕಳೆದ ಕೆಲ ತಿಂಗಳುಗಳು ಅತ್ಯಂತ ಕಠಿಣವಾಗಿದ್ದವು. ಇದೀಗ ನಾನು ವಿನಮ್ರವಾಗಿದ್ದೇನೆ ಎಂದು ಹೇಳಿದರು.

ನಾವು ನಿರಂತರ ಋಣಾತ್ಮಕ ಪ್ರಚಾರವನ್ನು ಎದುರಿಸಬೇಕಾಯಿತು. ನಾವು ಇವೆಲ್ಲಕ್ಕೆ ಸೂಕ್ತ ಅಂಕಿ ಅಂಶಗಳೊಂದಿಗೆ ಉತ್ತರಿಸಿದ್ದೇವೆ ಎಂಬ ಹೆಮ್ಮೆ ನಮಗಿದೆ. ಮೂರನೇ ಬಾರಿಗೆ ನಿರಂತರವಾಗಿ ಗೆದ್ದಿರುವುದು ನಮಗೆ ಸಂದ ಗೌರವ ಮತ್ತು ಗೆಲುವಿನ ಅಂತರ ಮತ್ತಷ್ಟು ಹೆಚ್ಚಿದೆ. ಇದು ಇತಿಹಾಸ ನಿರ್ಮಿಸುವ ವಿಚಾರವಲ್ಲ; ಬದಲಾಗಿ ಭವಿಷ್ಯವನ್ನು ರೂಪಿಸುವ ಕಾಲ ಎಂದು ಭಾವುಕರಾಗಿ ನುಡಿದರು.