ಫ್ರಾನ್ಸ್ ನ ಗಲಭೆಗಳಿಗೆ ಮ್ಯಾಕ್ರನ್ ರ ವಲಸೆ ನೀತಿಯೇ ಕಾರಣ: ಟ್ರಂಪ್ ವಾಗ್ದಾಳಿ
ವಾರಾಂತ್ಯದ ಹಿಂಸಾಚಾರ; 2,400 ಮಂದಿ ಬಂಧನ, 1,000 ಪೊಲೀಸ್ ಅಧಿಕಾರಿಗಳಿಗೆ ಗಾಯ
ವಾಷಿಂಗ್ಟನ್, ಅ. 20: ಫ್ರಾನ್ಸ್ ನಲ್ಲಿ ಭುಗಿಲೆದ್ದಿರುವ ಗಲಭೆಗಳಿಗೆ ಅಧ್ಯಕ್ಷ ಎಮ್ಯಾನುಯೆಲ್ ಮ್ಯಾಕ್ರನ್ ಅವರ ವಲಸೆ ನೀತಿಗಳೇ ಕಾರಣ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಆರೋಪಿಸಿದ್ದಾರೆ. ವಲಸೆಯ ವಿಚಾರದಲ್ಲಿ ತಾವು ನೀಡಿದ್ದ ಸಲಹೆಯನ್ನು ಮ್ಯಾಕ್ರನ್ ಪಾಲಿಸಿದ್ದರೆ ದೇಶದಲ್ಲಿ ಇಂತಹ ಅಶಾಂತಿಯನ್ನು ತಪ್ಪಿಸಬಹುದಿತ್ತು ಎಂದು ಅವರು ಹೇಳಿದ್ದಾರೆ.
‘ಪ್ಯಾರಿಸ್ ಶೀಘ್ರದಲ್ಲೇ ಮುಸ್ಲಿಂ ನಗರವಾಗಲಿದೆ. ಇದು ನಾವು ಮಾಡಿಕೊಂಡಿದ್ದ ಒಪ್ಪಂದವಾಗಿರಲಿಲ್ಲ’ ಎಂದು ಟ್ರಂಪ್ ಹೇಳಿದ್ದಾರೆ. ವಲಸಿಗರ ಒಳಹರಿವಿನಿಂದ ಫ್ರಾನ್ಸ್ ರಾಜಧಾನಿಯ ಜನಸಂಖ್ಯಾ ಸ್ವರೂಪ ಗಣನೀಯವಾಗಿ ಬದಲಾಗಿದೆ ಎಂದು ಅವರು ಆರೋಪಿಸಿದ್ದಾರೆ.
ಶ್ವೇತಭವನದ ಹೊರಗೆ ಸೋಮವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಟ್ರಂಪ್, ಹೆಚ್ಚಿನ ಸಂಖ್ಯೆಯ ವಲಸಿಗರಿಗೆ ಫ್ರಾನ್ಸ್ ಪ್ರವೇಶಿಸಲು ಅವಕಾಶ ನೀಡದಂತೆ ಹಲವು ವರ್ಷಗಳ ಹಿಂದೆಯೇ ಮ್ಯಾಕ್ರನ್ ಅವರಿಗೆ ಎಚ್ಚರಿಕೆ ನೀಡಿದ್ದಾಗಿ ತಿಳಿಸಿದ್ದಾರೆ.
‘ಅವರು ನನ್ನ ಸ್ನೇಹಿತರು. ಫ್ರಾನ್ಸ್ ನಲ್ಲಿ ನೀವು ದೊಡ್ಡ ತಪ್ಪು ಮಾಡುತ್ತಿದ್ದೀರಿ. ಜಗತ್ತಿನ ಎಲ್ಲರನ್ನೂ ದೇಶದೊಳಗೆ ಪ್ರವೇಶಿಸಲು ಅವಕಾಶ ನೀಡುತ್ತಿದ್ದೀರಿ ಎಂದು ಬಹಳ ಹಿಂದೆಯೇ ಅವರಿಗೆ ಹೇಳಿದ್ದೆ. ಇಡೀ ಜಗತ್ತೇ ಇಲ್ಲಿಗೆ ಬರುತ್ತಿತ್ತು. ಪ್ಯಾರಿಸ್ ಶೀಘ್ರದಲ್ಲೇ ಮುಸ್ಲಿಂ ನಗರವಾಗಲಿದೆ. ಆದರೆ, ಇದು ನಾವು ಮಾಡಿಕೊಂಡಿದ್ದ ಒಪ್ಪಂದವಾಗಿರಲಿಲ್ಲ’ ಎಂದು ಟ್ರಂಪ್ ಹೇಳಿದ್ದಾರೆ.
ವಾರಾಂತ್ಯದಲ್ಲಿ ನಡೆದ ಗಲಭೆಗಳು, ಲೂಟಿ ಮತ್ತು ಪ್ರತಿಭಟನಾಕಾರರು ಹಾಗೂ ಪೊಲೀಸರ ನಡುವಿನ ಸಂಘರ್ಷಗಳ ಬಳಿಕ ಫ್ರಾನ್ಸ್ ನ ಪ್ಯಾರಿಸ್, ಲಿಲ್, ನೈಸ್ ಸೇರಿದಂತೆ ಹಲವು ನಗರಗಳ ನಿರ್ದಿಷ್ಟ ಪ್ರದೇಶಗಳಲ್ಲಿ ಕರ್ಫ್ಯೂ ಹಾಗೂ ಸಾರ್ವಜನಿಕ ಸಭೆ-ಸಮಾರಂಭಗಳ ಮೇಲೆ ನಿರ್ಬಂಧ ವಿಧಿಸಲಾಗಿದೆ.
ಮುಂದಿನ ಅಧ್ಯಕ್ಷೀಯ ಚುನಾವಣೆಯ ಸಿದ್ಧತೆಯ ನಡುವೆಯೇ ಭದ್ರತಾ ವೈಫಲ್ಯಗಳು, ವ್ಯಾಪಾರ-ವಹಿವಾಟುಗಳಿಗೆ ಉಂಟಾದ ಹಾನಿ ಮತ್ತು ಸಾರ್ವಜನಿಕರ ಹೆಚ್ಚುತ್ತಿರುವ ಆಕ್ರೋಶದಿಂದಾಗಿ ಪ್ರಧಾನಿ ಸೆಬಾಸ್ಟಿಯನ್ ಲೆಕೋರ್ನು ನೇತೃತ್ವದ ಸರ್ಕಾರ ತೀವ್ರ ಒತ್ತಡ ಎದುರಿಸುತ್ತಿದೆ.
ಗಲಭೆ ಬಳಿಕ ಸ್ಥಳೀಯ ಕರ್ಫ್ಯೂ
ಪ್ಯಾರಿಸ್ ನಲ್ಲಿ ಸಂಪೂರ್ಣ ಕರ್ಫ್ಯೂ ವಿಧಿಸುವ ಬದಲು ನಿರ್ದಿಷ್ಟ ಪ್ರದೇಶಗಳಿಗೆ ಸೀಮಿತವಾದ ನಿರ್ಬಂಧಗಳನ್ನು ಜಾರಿಗೊಳಿಸಲು ಫ್ರಾನ್ಸ್ ಸರ್ಕಾರ ನಿರ್ಧರಿಸಿದೆ. ತುರ್ತು ಪರಿಸ್ಥಿತಿ ಘೋಷಿಸುವ ಸಾಧ್ಯತೆಯನ್ನು ತಳ್ಳಿಹಾಕದಿದ್ದರೂ, ಸದ್ಯಕ್ಕೆ ಸ್ಥಳೀಯ ಮಟ್ಟದ ನಿರ್ಬಂಧಗಳೇ ಸೂಕ್ತ ಎಂದು ಪ್ರಧಾನಿ ಸೆಬಾಸ್ಟಿಯನ್ ಲೆಕೋರ್ನು ತಿಳಿಸಿದ್ದಾರೆ.
‘ಶಾಂತಿ ಮತ್ತು ಸುವ್ಯವಸ್ಥೆಯನ್ನು ಮರುಸ್ಥಾಪಿಸುವ ನನ್ನ ನಿರ್ಧಾರ ದೃಢವಾಗಿದೆ’ ಎಂದು ಅವರು ಸುದ್ದಿಗಾರರಿಗೆ ಹೇಳಿದ್ದಾರೆ.
ಪ್ಯಾರಿಸ್ ಪೊಲೀಸರು ಸೋಮವಾರ ರಾತ್ರಿ 8 ಗಂಟೆಯಿಂದ ರಾಜಧಾನಿಯ ಕೆಲವು ನಿರ್ದಿಷ್ಟ ಪ್ರದೇಶಗಳಲ್ಲಿ ಪ್ರತಿಭಟನೆಗಳನ್ನು ನಿಷೇಧಿಸಿದ್ದಾರೆ. ಪ್ಲೇಸ್ ಡೆ ಲಾ ರಿಪಬ್ಲಿಕ್ ಮತ್ತು ಲೆಸ್ ಹಾಲ್ಸ್ ಸುತ್ತಮುತ್ತ ಸೋಮವಾರ ರಾತ್ರಿ 11 ಗಂಟೆಯಿಂದ ಮಂಗಳವಾರ ಬೆಳಿಗ್ಗೆ 6 ಗಂಟೆಯವರೆಗೆ ಕರ್ಫ್ಯೂ ವಿಧಿಸಲಾಗಿದೆ. ನಿರ್ಬಂಧಗಳನ್ನು ಜಾರಿಗೊಳಿಸಲು ಹೆಚ್ಚುವರಿ ಪೊಲೀಸ್ ಸಿಬ್ಬಂದಿಯನ್ನು ನಿಯೋಜಿಸಲಾಗಿದೆ.
ಫ್ರಾನ್ಸ್ ನ ಆಂತರಿಕ ಸಚಿವಾಲಯದ ಪ್ರಕಾರ, ಗಲಭೆಗಳ ಸಂದರ್ಭದಲ್ಲಿ ಸುಮಾರು 2,400 ಮಂದಿಯನ್ನು ಬಂಧಿಸಲಾಗಿದ್ದು, ಸುಮಾರು 1,000 ಪೊಲೀಸ್ ಅಧಿಕಾರಿಗಳು ಗಾಯಗೊಂಡಿದ್ದಾರೆ. ಶನಿವಾರ ನಡೆದ ಘಟನೆಯೊಂದರಲ್ಲಿ ಪ್ರತಿಭಟನಾಕಾರರೊಬ್ಬರು ಹೃದಯಾಘಾತದಿಂದ ಮೃತಪಟ್ಟಿದ್ದಾರೆ.
ವಾರಾಂತ್ಯದ ಹಿಂಸಾಚಾರದಿಂದ ಸುಮಾರು 3,000 ಅಂಗಡಿ-ಮುಂಗಟ್ಟುಗಳಿಗೆ ಹಾನಿಯಾಗಿದೆ ಎಂದು ಫೆಡರೇಶನ್ ಆಫ್ ಟ್ರೇಡ್ ಅಂಡ್ ರಿಟೇಲ್ ತಿಳಿಸಿದೆ. ಹಾನಿಗೊಳಗಾದ ವ್ಯಾಪಾರ ಸಂಸ್ಥೆಗಳಿಗೆ ಸರ್ಕಾರ ನೆರವು ನೀಡಬೇಕು ಎಂಬ ಒತ್ತಾಯವೂ ಕೇಳಿಬಂದಿದೆ.
ಇದಕ್ಕೂ ಮೊದಲು, ರಾಷ್ಟ್ರವನ್ನುದ್ದೇಶಿಸಿ ಟಿವಿಯಲ್ಲಿ ಮಾತನಾಡಿದ್ದ ಮ್ಯಾಕ್ರನ್, ಗಲಭೆ ಮತ್ತು ವಿನಾಶಕಾರಿ ಕೃತ್ಯಗಳನ್ನು ಖಂಡಿಸಿದ್ದರು. ಹಿಂಸಾಚಾರದ ದೃಶ್ಯಗಳ ಬಗ್ಗೆ ಆಕ್ರೋಶ ವ್ಯಕ್ತಪಡಿಸಿದ್ದರು.
‘ಯಾವುದೂ ಇದನ್ನು ಸಮರ್ಥಿಸುವುದಿಲ್ಲ, ಯಾವುದೂ ಇದನ್ನು ವಿವರಿಸುವುದಿಲ್ಲ, ಯಾವುದೂ ಇದನ್ನು ಕ್ಷಮಿಸುವುದಿಲ್ಲ’ ಎಂದು ಅವರು ಹೇಳಿದ್ದಾರೆ. ಫ್ರಾನ್ಸ್ ನ ನಾಗರಿಕರು ತಮ್ಮದೇ ದೇಶದ ವಿರುದ್ಧ ಇಂತಹ ಕೃತ್ಯಗಳನ್ನು ಹೇಗೆ ಎಸಗಲು ಸಾಧ್ಯ ಎಂದು ಪ್ರಶ್ನಿಸಿದ್ದಾರೆ.
ಶಾಂತಿಯುತ ಪ್ರತಿಭಟನೆಗಳಲ್ಲಿ ಪಾಲ್ಗೊಳ್ಳುವವರಿಗೆ ನ್ಯಾಯಯುತ ಅಹವಾಲುಗಳು ಇರಬಹುದು ಎಂದು ಮ್ಯಾಕ್ರನ್ ಒಪ್ಪಿಕೊಂಡಿದ್ದಾರೆ. ಆದರೆ, ಅವರ ಬೇಡಿಕೆಗಳನ್ನು ಹಿಂಸಾಚಾರ ಮತ್ತು ವಿನಾಶದಲ್ಲಿ ತೊಡಗಿರುವವರ ಕೃತ್ಯಗಳೊಂದಿಗೆ ಸಮೀಕರಿಸಬಾರದು ಎಂದು ಒತ್ತಿಹೇಳಿದ್ದಾರೆ.
ಮ್ಯಾಕ್ರನ್ ತುರ್ತು ಪರಿಸ್ಥಿತಿ ಘೋಷಿಸುವ ನಿರ್ಧಾರ ಕೈಗೊಂಡಿಲ್ಲ. ಆದರೆ, ಸಾರ್ವಜನಿಕ ಕಟ್ಟಡಗಳು ಮತ್ತು ಉದ್ಯಮ ಸಂಸ್ಥೆಗಳನ್ನು ರಕ್ಷಿಸುವ ಅಗತ್ಯವಿದ್ದಲ್ಲಿ ಪ್ರತಿಭಟನೆಗಳನ್ನು ನಿಷೇಧಿಸಲು ಸ್ಥಳೀಯ ಅಧಿಕಾರಿಗಳಿಗೆ ಸರ್ಕಾರ ಅಧಿಕಾರ ನೀಡಲಿದೆ ಎಂದು ತಿಳಿಸಿದ್ದಾರೆ.
ಗಲಭೆ ಪೀಡಿತ ಪ್ರದೇಶಗಳಲ್ಲಿ ನಿರ್ಬಂಧಗಳನ್ನು ಮುಂದುವರಿಸಿರುವ ಫ್ರಾನ್ಸ್ ಸರ್ಕಾರ, ಶಾಂತಿ ಮತ್ತು ಸುವ್ಯವಸ್ಥೆಯನ್ನು ಮರುಸ್ಥಾಪಿಸುವುದು, ವ್ಯಾಪಾರ ಸಂಸ್ಥೆಗಳನ್ನು ರಕ್ಷಿಸುವುದು ಹಾಗೂ ಭದ್ರತೆಯ ಕುರಿತು ಸಾರ್ವಜನಿಕರ ಆತಂಕಗಳನ್ನು ನಿವಾರಿಸುವ ಸವಾಲು ಎದುರಿಸುತ್ತಿದೆ.
