ಉಕ್ರೇನ್ ಯುದ್ಧದ ಚರ್ಚೆಗೆ ಟ್ರಂಪ್, ಜಿನ್‍ಪಿಂಗ್ ಜೊತೆ ತ್ರಿಪಕ್ಷೀಯ ಶೃಂಗಸಭೆ : ಪುಟಿನ್ ಪ್ರಸ್ತಾಪ

ಮಾಸ್ಕೊ : ಉಕ್ರೇನ್ ಯುದ್ಧವನ್ನು ಕೊನೆಗೊಳಿಸುವ ಕುರಿತು ಚರ್ಚಿಸಲು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತು ಚೀನಾ ಅಧ್ಯಕ್ಷ ಕ್ಸಿ ಜಿನ್‍ಪಿಂಗ್ ಅವರೊಂದಿಗೆ ತ್ರಿಪಕ್ಷೀಯ ಶೃಂಗಸಭೆಯನ್ನು ನಡೆಸಲು ರಶ್ಯ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಅವರು ಪ್ರಸ್ತಾಪಿಸಿದ್ದಾರೆ. ಈ ನಡೆಯು ಮಾಸ್ಕೋದ ರಾಜತಾಂತ್ರಿಕ ಸ್ಥಾನಮಾನವನ್ನು ಬಲಪಡಿಸಬಹುದಲ್ಲದೆ, ತನ್ನದೇ ಭವಿಷ್ಯದ ಕುರಿತಾದ ಮಾತುಕತೆಗಳಿಂದ ಉಕ್ರೇನ್ ಅನ್ನು ಹೊರಗಿಡಲಾಗುತ್ತಿದೆ ಎಂಬ ಕಳವಳವನ್ನು ಹೆಚ್ಚಿಸಿದೆ.

`ದಿ ವಾಲ್ ಸ್ಟ್ರೀಟ್ ಜರ್ನಲ್' ವರದಿಯ ಪ್ರಕಾರ, ಅಕ್ಟೋಬರ್ 9 ರಂದು ಟ್ರಂಪ್ ಅವರೊಂದಿಗಿನ ದೂರವಾಣಿ ಸಂಭಾಷಣೆಯ ಸಮಯದಲ್ಲಿ ಪುಟಿನ್ ಈ ಪ್ರಸ್ತಾಪವನ್ನು ಮಂಡಿಸಿದ್ದಾರೆ. ಚೀನಾದ ಶೆನ್‍ಝೆನ್‍ನಲ್ಲಿ ನವೆಂಬರ್ 18-19 ರಂದು ನಡೆಯಲಿರುವ ಏಷ್ಯಾ-ಪೆಸಿಫಿಕ್ ಆರ್ಥಿಕ ಸಹಕಾರ (ಅಪೆಕ್) ಶೃಂಗಸಭೆಯ ನೇಪಥ್ಯದಲ್ಲಿ ಈ ಸಭೆಯನ್ನು ಆಯೋಜಿಸಲು ರಶ್ಯ ಸಲಹೆ ನೀಡಿದೆ. ಈ ಪ್ರಸ್ತಾಪವು ಇನ್ನೂ ತಾತ್ಕಾಲಿಕವಾಗಿದ್ದು ಮೂರೂ ಕಡೆಯವರು ಇಂತಹ ಸಭೆಯ ಸಾಧ್ಯತೆಯನ್ನು ಒಪ್ಪಿಕೊಂಡಿದ್ದಾರೆ. ಸಭೆಯ ಬಗ್ಗೆ ಅಥವಾ ಅದರ ಸಂಭಾವ್ಯ ಅಜೆಂಡಾದ ಬಗ್ಗೆ ಇನ್ನೂ ಸ್ಪಷ್ಟ ತಿಳುವಳಿಕೆ ಇಲ್ಲ ಎಂದು ರಶ್ಯ ಅಧ್ಯಕ್ಷರ ವಕ್ತಾರ ಡಿಮಿಟ್ರಿ ಪೆಸ್ಕೋವ್ ತಿಳಿಸಿದ್ದಾರೆ.

ಆದರೆ ಅಮೆರಿಕ ಅಥವಾ ಚೀನಾ ಈ ಪ್ರಸ್ತಾವಿತ ಶೃಂಗಸಭೆಗೆ ಬಹಿರಂಗವಾಗಿ ಬದ್ಧತೆ ವ್ಯಕ್ತಪಡಿಸಿಲ್ಲ ಮತ್ತು ಪ್ರಸ್ತಾವಿತ ಮಾದರಿಯಿಂದ ಉಕ್ರೇನ್ ಅಧ್ಯಕ್ಷ ಝೆಲೆನ್‍ಸ್ಕಿ ಅವರ ಗೈರುಹಾಜರಿಯು ಶಾಶ್ವತ ಶಾಂತಿ ಒಪ್ಪಂದವನ್ನು ಸಾಧಿಸುವ ಯಾವುದೇ ಪ್ರಯತ್ನವನ್ನು ಸಂಕೀರ್ಣಗೊಳಿಸಬಹುದು ಎಂದು ವರದಿ ತಿಳಿಸಿದೆ.