ಗಾಝಾದಲ್ಲಿ ಕುಸಿದ ಮರಳಿನ ದಿಬ್ಬ; ಐವರು ಮೃತ್ಯು

ಡೀರ್ ಅಲ್-ಬಲಾಹ್ (ಗಾಝಾ): ಯುದ್ಧದಲ್ಲಿ ಮನೆ ಕಳೆದುಕೊಂಡು ತಾತ್ಕಾಲಿಕ ಡೇರೆಗಳಲ್ಲಿ ಆಶ್ರಯ ಪಡೆದಿರುವ ಫೆಲೆಸ್ತೀನಿಯರ ಬದುಕು ದಿನದಿಂದ ದಿನಕ್ಕೆ ದುಸ್ತರವಾಗುತ್ತಿದೆ. ಇಸ್ರೇಲಿ ದಾಳಿಗಳ ಭೀತಿಯ ನಡುವೆ ಮಳೆ ಮತ್ತು ಚಳಿಯಿಂದಲೂ ರಕ್ಷಣೆ ಇಲ್ಲದ ಸ್ಥಿತಿಯಲ್ಲಿ ಬದುಕುತ್ತಿರುವ ಜನರಿಗೆ ಮತ್ತೊಂದು ದುರಂತ ಎದುರಾಗಿದೆ. ಡೀರ್ ಅಲ್-ಬಲಾಹ್‌ ನಲ್ಲಿ ರವಿವಾರ ಮರಳಿನ ದಿಬ್ಬ ಕುಸಿದು ಐವರು ಮೃತಪಟ್ಟಿದ್ದಾರೆ. ಈ ಘಟನೆ ನಿರಾಶ್ರಿತರಲ್ಲಿ ತೀವ್ರ ಆತಂಕ ಮೂಡಿಸಿದೆ ಎಂದು Aljazeera ವರದಿ ಮಾಡಿದೆ.

ಗಾಝಾದಲ್ಲಿ ಮನೆ ಕಳೆದುಕೊಂಡಿರುವ ಜನರಿಗೆ ಹರಿದುಹೋದ ಬಟ್ಟೆಗಳಿಂದ ನಿರ್ಮಿಸಿದ ತಾತ್ಕಾಲಿಕ ಡೇರೆಗಳೇ ಆಸರೆ. ಈ ಡೇರೆಗಳು ಭಾರಿ ಮಳೆಯಿಂದ ರಕ್ಷಣೆ ನೀಡುವಷ್ಟು ಗಟ್ಟಿಯಾಗಿಲ್ಲ. ಚಳಿಯಿಂದ ರಕ್ಷಿಸಿಕೊಳ್ಳಲು ಅಗತ್ಯ ವ್ಯವಸ್ಥೆಗಳೂ ಇಲ್ಲ. ಸುರಕ್ಷಿತ ಆಶ್ರಯ ಮತ್ತು ಬೆಚ್ಚಗಿನ ವಾತಾವರಣವಿಲ್ಲದೆ ಜನರು ಸಂಕಷ್ಟದ ಬದುಕು ಸಾಗಿಸುತ್ತಿದ್ದಾರೆ.

ರವಿವಾರ ಮರಳಿನ ದಿಬ್ಬ ಕುಸಿದಾಗ ಅದರ ಸಮೀಪದ ಡೇರೆಗಳಲ್ಲಿ ಆಶ್ರಯ ಪಡೆದಿದ್ದವರಿಗೆ ಅಪಾಯದಿಂದ ಪಾರಾಗಲು ಅವಕಾಶವೇ ಇರಲಿಲ್ಲ. ತಮ್ಮನ್ನು ರಕ್ಷಿಸಿಕೊಳ್ಳಲು ಅಥವಾ ಅಲ್ಲಿಂದ ಸುರಕ್ಷಿತವಾಗಿ ಹೊರಬರಲು ಸಾಧ್ಯವಾಗದಷ್ಟು ಅಸಹಾಯಕ ಸ್ಥಿತಿಯಲ್ಲಿ ಅವರು ಸಿಲುಕಿದ್ದರು. ಈ ದುರಂತವು ಗಾಝಾದ ನಿರಾಶ್ರಿತರು ಎದುರಿಸುತ್ತಿರುವ ಅಪಾಯಕಾರಿ ಬದುಕಿನ ವಾಸ್ತವವನ್ನು ಮತ್ತೊಮ್ಮೆ ತೆರೆದಿಟ್ಟಿದೆ.

ಮಳೆಗಾಲ ಮತ್ತು ಚಳಿಗಾಲದ ಆರಂಭದಲ್ಲೇ ಸಂಭವಿಸಿರುವ ದುರಂತ ಆತಂಕ ಮೂಡಿಸಿದೆ. ಗಾಝಾದಲ್ಲಿ ಮಾನವೀಯ ಬಿಕ್ಕಟ್ಟು ದಿನದಿಂದ ದಿನಕ್ಕೆ ಉಲ್ಬಣಿಸುತ್ತಿದ್ದು, ಭಾರಿ ಮಳೆ ಮತ್ತು ಚಳಿಯಿಂದ ಇಂತಹ ಘಟನೆಗಳು ಮತ್ತೆ ಸಂಭವಿಸಬಹುದು ಎಂಬ ಭೀತಿ ಫೆಲೆಸ್ತೀನಿಯರನ್ನು ಕಾಡುತ್ತಿದೆ.

ಪರಿಹಾರ ಸಾಮಗ್ರಿಗಳಿಗೂ ನಿರ್ಬಂಧ

ನಿರಾಶ್ರಿತರಿಗೆ ಸುರಕ್ಷಿತ ಆಶ್ರಯ ಕಲ್ಪಿಸಲು ಉತ್ತಮ ಗುಣಮಟ್ಟದ ತಾತ್ಕಾಲಿಕ ಡೇರೆಗಳು ಹಾಗೂ ಅತ್ತಿತ್ತ ಕೊಂಡೊಯ್ಯಬಹುದಾದ ಮನೆಗಳನ್ನು (ಮೊಬೈಲ್ ಹೋಮ್ಸ್) ತಕ್ಷಣ ಗಾಝಾಕ್ಕೆ ಪೂರೈಸಬೇಕು ಎಂದು ಗಾಝಾದ ನಾಗರಿಕ ರಕ್ಷಣಾ ಪಡೆ (ಸಿವಿಲ್ ಡಿಫೆನ್ಸ್) ಮತ್ತು ಮಾನವೀಯ ನೆರವು ಸಂಸ್ಥೆಗಳು ನಿರಂತರವಾಗಿ ಒತ್ತಾಯಿಸುತ್ತಿವೆ.

ಅಮೆರಿಕದ ಮೇಲ್ವಿಚಾರಣೆಯಲ್ಲಿ ಏರ್ಪಟ್ಟ ಕದನ ವಿರಾಮ ಒಪ್ಪಂದದ ಮೊದಲ ಹಂತದಲ್ಲಿಯೇ ಈ ಪರಿಹಾರ ಸಾಮಗ್ರಿಗಳ ಪೂರೈಕೆಯ ಅಂಶವನ್ನು ಸೇರಿಸಲಾಗಿತ್ತು. ಆದರೆ, ಅಗತ್ಯ ಸಾಮಗ್ರಿಗಳು ಗಾಝಾ ಪ್ರವೇಶಿಸದಂತೆ ವ್ಯವಸ್ಥಿತ ನಿರ್ಬಂಧ ವಿಧಿಸಲಾಗಿದೆ.

ಇದರಿಂದಾಗಿ ಮನೆ ಕಳೆದುಕೊಂಡವರಿಗೆ ಉತ್ತಮ ಗುಣಮಟ್ಟದ ಡೇರೆಗಳು ಮತ್ತು ತಾತ್ಕಾಲಿಕ ಮನೆಗಳು ತಲುಪುತ್ತಿಲ್ಲ. ಪರಿಣಾಮ, ಫೆಲೆಸ್ತೀನಿಯರು ಇಸ್ರೇಲಿ ದಾಳಿಗಳ ಅಪಾಯದ ಜತೆಗೆ ಚಳಿಗಾಲದ ಕಠಿಣ ಹವಾಮಾನವನ್ನೂ ಎದುರಿಸಬೇಕಾಗಿದೆ. ಸುರಕ್ಷಿತ ಆಶ್ರಯ ಮತ್ತು ಅಗತ್ಯ ರಕ್ಷಣಾ ಸೌಲಭ್ಯಗಳಿಲ್ಲದೆ ನಿರಾಶ್ರಿತರ ಸಂಕಷ್ಟ ಮತ್ತಷ್ಟು ತೀವ್ರಗೊಂಡಿದೆ.