ಸ್ಕಾಟ್ಲ್ಯಾಂಡ್, ವೇಲ್ಸ್, ಉತ್ತರ ಐರ್ಲೆಂಡ್ ಐತಿಹಾಸಿಕ ಸಭೆ : UK ಯಿಂದ ಹೊರಹೋಗುವ ಇಂಗಿತ ವ್ಯಕ್ತಪಡಿಸುವ ಒಪ್ಪಂದಕ್ಕೆ ಸಹಿ ; ವರದಿ
ಸ್ಕಾಟಿಷ್ ಸಚಿವ ಜಾನ್ ಸ್ವಿನ್ನೆ, ವೇಲ್ಸ್ನ ಸಚಿವ ರುನ್ ಅಪ್ ಇಯೋರ್ವೆತ್ ಮತ್ತು ಉತ್ತರ ಐರ್ಲೆಂಡ್ನ ಸಚಿವೆ ಮಿಚೆಲ್ ಒ'ನೀಲ್ (Photo: TOI)
ಕಾರ್ಡಿಫ್/ಲಂಡನ್: ಯುನೈಟೆಡ್ ಕಿಂಗ್ಡಮ್ನ (ಯುಕೆ) ಮೂರು ಸ್ವಾಯತ್ತ ಶಾಸಕಾಂಗಗಳಾದ ಸ್ಕಾಟ್ಲ್ಯಾಂಡ್, ಉತ್ತರ ಐರ್ಲೆಂಡ್ ಮತ್ತು ವೇಲ್ಸ್ನ ಚುನಾಯಿತ ಪ್ರತಿನಿಧಿಗಳು ಐತಿಹಾಸಿಕ ಒಪ್ಪಂದಕ್ಕೆ ಸಹಿ ಹಾಕಿದ್ದು, ವೆಸ್ಟ್ಮಿನಿಸ್ಟರ್(ಬ್ರಿಟಿಷ್ ಸಂಸತ್) ನಿಯಂತ್ರಣದಿಂದ ಮುಕ್ತವಾಗುವ ಬಗ್ಗೆ ತಮ್ಮ ಇಂಗಿತವನ್ನು ಘೋಷಿಸಿದ್ದಾರೆ ಎಂದು timesofindia ವರದಿ ಮಾಡಿದೆ.
ಕಾರ್ಡಿಫ್ನಲ್ಲಿ ನಡೆದ ಶೃಂಗಸಭೆಯಲ್ಲಿ ಸ್ಕಾಟಿಷ್ ಪ್ರಥಮ ಸಚಿವ ಜಾನ್ ಸ್ವಿನ್ನೆ, ವೇಲ್ಸ್ನ ಸಚಿವ ರುನ್ ಅಪ್ ಇಯೋರ್ವೆತ್ ಮತ್ತು ಉತ್ತರ ಐರ್ಲೆಂಡ್ನ ಪ್ರಥಮ ಸಚಿವೆ ಮಿಚೆಲ್ ಒ'ನೀಲ್ ಅವರು ಈ ಒಡಂಬಡಿಕೆಗೆ ಸಹಿ ಹಾಕಿದರು. ಐರ್ಲೆಂರ್ಡ್ನ ವಿರೋಧ ಪಕ್ಷದ ನಾಯಕಿ ಹಾಗೂ ಶಿನ್ ಫೀನ್ ಅಧ್ಯಕ್ಷೆ ಮೇರಿ ಲೌ ಮೆಕ್ಡೊನಾಲ್ಡ್ ಅವರು ನಾಲ್ಕನೇ ಸಹಿದಾರರಾಗಿದ್ದಾರೆ.
“ಈ ದ್ವೀಪಗಳಾದ್ಯಂತ ರಾಜಕೀಯ ಪರಿಸ್ಥಿತಿ ಬದಲಾಗುತ್ತಿದೆ. ಇತಿಹಾಸದಲ್ಲೇ ಮೊದಲ ಬಾರಿಗೆ, ಸ್ಕಾಟ್ಲ್ಯಾಂಡ್, ವೇಲ್ಸ್ ಮತ್ತು ಉತ್ತರ ಐರ್ಲೆಂಡ್ನಲ್ಲಿ ಯುನೈಟೆಡ್ ಕಿಂಗ್ಡಮ್ನಿಂದ ಹೊರಹೋಗಲು ಬದ್ಧವಾಗಿರುವ ಪ್ರಥಮ ಸಚಿವರು (ಸರ್ಕಾರದ ಮುಖ್ಯಸ್ಥರು) ಇದ್ದಾರೆ. ಜಗತ್ತಿನಾದ್ಯಂತ ಈ ಬೆಳವಣಿಗೆಯನ್ನು ಗಮನಿಸುತ್ತಿರುವವರಿಗೆ, ವೆಸ್ಟ್ಮಿನಿಸ್ಟರ್ ನ ಕಾಲ ಮುಗಿಯುತ್ತಿದೆ ಎಂಬುದಕ್ಕೆ ಇದಕ್ಕಿಂತ ಸ್ಪಷ್ಟವಾದ ಸೂಚನೆ ಮತ್ತೊಂದಿಲ್ಲ” ಎಂದು ಒಪ್ಪಂದದಲ್ಲಿ (MoU) ತಿಳಿಸಲಾಗಿದೆ.
“ನಮ್ಮ ರಾಷ್ಟ್ರಗಳಿಗೆ ಆತ್ಮನಿರ್ಣಯದ ಹಕ್ಕಿದೆ. ಪ್ರಜಾಪ್ರಭುತ್ವವನ್ನು ತಡೆಯಲು ಅಥವಾ ನಮ್ಮ ಜನರೇ ತಮ್ಮ ಭವಿಷ್ಯವನ್ನು ನಿರ್ಧರಿಸುತ್ತಾರೆ ಎಂಬ ತತ್ವವನ್ನು ದುರ್ಬಲಗೊಳಿಸಲು ಯಾವುದೇ ವೆಸ್ಟ್ಮಿನಿಸ್ಟರ್ ಸರಕಾರಕ್ಕೆ ಹಕ್ಕಿಲ್ಲ” ಎಂದು MoU ಹೇಳುತ್ತದೆ.
ಮೇ ತಿಂಗಳಲ್ಲಿ ನಡೆದ ಸೆನೆಡ್ (ವೇಲ್ಸ್ ಸಂಸತ್ತು) ಚುನಾವಣೆಯಲ್ಲಿ Plaid Cymru ಪಕ್ಷದ ಗೆಲುವಿನೊಂದಿಗೆ, 1999ರಲ್ಲಿ ಸ್ವಾಯತ್ತ ಆಡಳಿತ ಆರಂಭವಾದ ಬಳಿಕ ವೇಲ್ಸ್ ಸರಕಾರದ ಮೇಲೆ ನಿರಂತರ ಹಿಡಿತ ಹೊಂದಿದ್ದ ಲೇಬರ್ ಪಕ್ಷದ ಆಡಳಿತಕ್ಕೆ ತೆರೆ ಬಿದ್ದಿದೆ. ಇದರೊಂದಿಗೆ, ಯುನೈಟೆಡ್ ಕಿಂಗ್ಡಮ್ನಿಂದ ಸ್ವಾತಂತ್ರ್ಯ ಪಡೆಯಲು ಬಯಸುವ ಪಕ್ಷಗಳು ಈ ಮೂರು ಸ್ವಾಯತ್ತ ಸಂಸತ್ತುಗಳಲ್ಲೂ ಏಕಕಾಲದಲ್ಲಿ ಅಧಿಕಾರದಲ್ಲಿರುವಂತಾಗಿದೆ.
ಈ ಒಡಂಬಡಿಕೆಯು ಮುಂದುವರಿದು, “ನಮ್ಮ ಪ್ರತಿಯೊಂದು ರಾಷ್ಟ್ರಕ್ಕೂ ಪ್ರಜಾಸತ್ತಾತ್ಮಕ ವಿಧಾನಗಳ ಮೂಲಕ ಮತ್ತು ತನ್ನ ಜನರ ಇಚ್ಛೆಗೆ ಅನುಗುಣವಾಗಿ ತನ್ನ ಭವಿಷ್ಯವನ್ನು ನಿರ್ಧರಿಸುವ ಹಕ್ಕಿದೆ. ಪ್ರತಿಯೊಂದು ಅಧಿಕಾರ ವ್ಯಾಪ್ತಿಯಲ್ಲಿ ಸಾಂವಿಧಾನಿಕ ಬದಲಾವಣೆಗೆ ಸಿದ್ಧತೆ ನಡೆಸಲು, ಯೋಜನೆ ರೂಪಿಸಲು ಮತ್ತು ಅದನ್ನು ಸುಗಮಗೊಳಿಸಲು ನಾವು UK ಸರಕಾರವನ್ನು ಒತ್ತಾಯಿಸುತ್ತೇವೆ” ಎಂದು ತಿಳಿಸಿದೆ.
ಆರ್ಥಿಕತೆ ಮತ್ತು ಇಂಧನ ಸಂಪನ್ಮೂಲಗಳು ಸೇರಿದಂತೆ ವಿವಿಧ ಕ್ಷೇತ್ರಗಳಲ್ಲಿ ಸಹಕಾರವನ್ನು ಬಲಪಡಿಸಲು ಈ ಒಡಂಬಡಿಕೆ (MoU) ಮೂರೂ ಪಕ್ಷಗಳನ್ನು ಬದ್ಧಗೊಳಿಸುತ್ತದೆ. ಈ ರಾಷ್ಟ್ರಗಳ ಭವಿಷ್ಯ ಯುರೋಪಿಯನ್ ಒಕ್ಕೂಟದಲ್ಲಿದೆ (EU) ಎಂಬ ಒಮ್ಮತದ ಆಧಾರದ ಮೇಲೆ ಈ ನಿರ್ಣಯವನ್ನು ಅಂಗೀಕರಿಸಲಾಗಿದೆ ಎಂದು MoU ತಿಳಿಸಿದೆ.
UK ಪ್ರಧಾನಿ ಪ್ರತಿಕ್ರಿಯೆ
ಈ ಬಗ್ಗೆ ಪ್ರತಿಕ್ರಿಯಿಸಿರುವ UK ಪ್ರಧಾನಿ ಕಾರ್ಯಾಲಯ, ಯುಕೆ ಪ್ರಧಾನಿ ಆಂಡಿ ಬರ್ನ್ಹ್ಯಾಮ್ ಅವರಿಗೆ ಯುಕೆ ಒಕ್ಕೂಟದ ಮೇಲೆ ದೃಢವಾದ ನಂಬಿಕೆಯಿದೆ ಎಂದು ತಿಳಿಸಿದೆ. ಅವರು ಸಾಂವಿಧಾನಿಕ ಚರ್ಚೆಗಳು ಹಾಗೂ ವಾದಗಳಿಗಿಂತ ಜೀವನ ವೆಚ್ಚದ ಬಿಕ್ಕಟ್ಟನ್ನು ಪರಿಹರಿಸುವುದರ ಮೇಲೆ ಗಮನ ಹರಿಸಿದ್ದಾರೆ ಎಂದು ಹೇಳಿದೆ.
ಈ ಬಗ್ಗೆ ಪ್ರತಿಕ್ರಿಯಿಸಿರುವ ಸ್ಕಾಟಿಷ್ ಕನ್ಸರ್ವೇಟಿವ್ ಪಕ್ಷದ ನಾಯಕಿ ಹಾಗೂ ಪಕ್ಷದ ಸ್ಕಾಟಿಷ್ ಸಂಬಂಧಿತ ಇಲಾಖೆಯನ್ನು ಪ್ರತಿನಿಧಿಸುವ ಹ್ಯಾರಿಯೆಟ್ ಕ್ರಾಸ್, ಸಭೆಯನ್ನು “ಪ್ರತ್ಯೇಕತಾವಾದಿಗಳ ಶೃಂಗಸಭೆ” ಮತ್ತು “ಪ್ರಚಾರದ ಉದ್ದೇಶದ ಫೋಟೋ ಶೂಟ್” ಎಂದು ಬಣ್ಣಿಸಿದ್ದಾರೆ.
