ಅಮೆರಿಕದಿಂದ ದಾಳಿ ಭೀತಿ | 'AC ಬಂದ್ ಮಾಡಿ, 24 ಗಂಟೆ ಆಶ್ರಯದಲ್ಲಿರಿ': ನಾಗರಿಕರಿಗೆ ಇರಾನ್‌ ನಿಂದ ಪರಮಾಣು ದಾಳಿ ಎದುರಿಸಲು ಮಾರ್ಗಸೂಚಿ!

ಟೆಹ್ರಾನ್: ಅಮೆರಿಕದ ಸಂಭಾವ್ಯ ದಾಳಿಯ ಆತಂಕ ಇರಾನ್‌ ನಲ್ಲಿ ಹೆಚ್ಚುತ್ತಿರುವ ಬೆನ್ನಲ್ಲೇ, ಪರಮಾಣು ಸ್ಫೋಟ ಸಂಭವಿಸಿದರೆ ನಾಗರಿಕರು ಹೇಗೆ ಬದುಕುಳಿಯಬೇಕು ಎಂಬುದರ ಕುರಿತು ಇರಾನ್ ಅಪರೂಪದ ಸಾರ್ವಜನಿಕ ಮಾರ್ಗಸೂಚಿಯನ್ನು ಬಿಡುಗಡೆ ಮಾಡಿದೆ. 'ACಗಳನ್ನು ಬಂದ್ ಮಾಡಿ, ಕಿಟಕಿ-ಬಾಗಿಲು ಮುಚ್ಚಿ, ಕನಿಷ್ಠ 24 ಗಂಟೆಗಳ ಕಾಲ ಸುರಕ್ಷಿತ ಸ್ಥಳದಲ್ಲಿರಿ' ಎಂದು ಮಾರ್ಗಸೂಚಿಯಲ್ಲಿ ಸೂಚನೆ ನೀಡಲಾಗಿದೆ.

ಪರಮಾಣು ಸ್ಫೋಟ ಸಂಭವಿಸಿದಾಗ ಎಲ್ಲಿ ಆಶ್ರಯ ಪಡೆಯಬೇಕು, ಸ್ಫೋಟದ ತೀವ್ರ ಬೆಳಕಿನಿಂದ ಹೇಗೆ ರಕ್ಷಿಸಿಕೊಳ್ಳಬೇಕು, ವಿಕಿರಣಶೀಲ ಧೂಳಿನ ಸಂಪರ್ಕದಿಂದ ದೂರವಿರುವುದು ಹೇಗೆ ಎಂಬುದನ್ನು ಎಂಟು ನಿಮಿಷಗಳ ವೀಡಿಯೋದಲ್ಲಿ ವಿವರಿಸಲಾಗಿದೆ. ವಿಕಿರಣದ ಪರಿಣಾಮ ಎದುರಿಸಲು ಬಳಸುವ ಔಷಧಗಳ ಬಗ್ಗೆಯೂ ಮಾಹಿತಿ ನೀಡಲಾಗಿದೆ.

ಇರಾನ್ ನ ಅಧಿಕೃತ ಸುದ್ದಿ ಸಂಸ್ಥೆ IRNA ಅ. 29ರಂದು ಈ ವೀಡಿಯೋವನ್ನು ಪ್ರಕಟಿಸಿದೆ. ಜನರು ನೆಲಮಾಳಿಗೆ ಅಥವಾ ಸದೃಢ ಕಟ್ಟಡಗಳಲ್ಲಿ ಆಶ್ರಯ ಪಡೆಯಬೇಕು. ಕಿಟಕಿಗಳಿಂದ ದೂರವಿರಬೇಕು. ಹೊರಗಿನ ಗಾಳಿಯನ್ನು ಒಳಗೆ ತರುವ ಹವಾನಿಯಂತ್ರಣ ವ್ಯವಸ್ಥೆಗಳನ್ನು ಸ್ಥಗಿತಗೊಳಿಸಬೇಕು ಎಂದು ಸೂಚಿಸಲಾಗಿದೆ.

ಸಂಭಾವ್ಯ ದಾಳಿಯ ಬಳಿಕ ಕನಿಷ್ಠ 24 ಗಂಟೆಗಳ ಕಾಲ ಆಶ್ರಯದಿಂದ ಹೊರಬರಬಾರದು. ಈ ಅವಧಿಗೆ ಬೇಕಾಗುವ ಪ್ಯಾಕ್ ಮಾಡಲಾದ ಆಹಾರ ಮತ್ತು ಬಾಟಲಿ ನೀರನ್ನು ಸಿದ್ಧವಾಗಿಟ್ಟುಕೊಳ್ಳಬೇಕು. ಕಾರು ಅಥವಾ ಇತರ ವಾಹನಗಳಲ್ಲಿ ಆಶ್ರಯ ಪಡೆಯಬಾರದು ಎಂದೂ ಎಚ್ಚರಿಸಲಾಗಿದೆ. ಈ ಮಾರ್ಗಸೂಚಿಗಳ ಕುರಿತು ಈಜಿಪ್ಟ್ ಮತ್ತು ಸೌದಿ ಅರೆಬಿಯದ ಮಾಧ್ಯಮಗಳೂ ವರದಿ ಮಾಡಿವೆ.

ಸ್ಫೋಟ ಸಂಭವಿಸಿದ ಸ್ಥಳದಿಂದ ದೂರದಲ್ಲಿದ್ದರೂ ಅಪಾಯ ಎದುರಾಗಬಹುದು. ಸ್ಫೋಟದ ಬಳಿಕ ಗಾಳಿಯಲ್ಲಿ ಹರಡುವ ವಿಕಿರಣಶೀಲ ಧೂಳು ದೂರದ ಪ್ರದೇಶಗಳಿಗೂ ತಲುಪಬಹುದು ಎಂದು ಇರಾನ್ ನ ತುರ್ತು ಸೇವೆಗಳ ಅಧಿಕಾರಿಗಳು ಎಚ್ಚರಿಸಿದ್ದಾರೆ.

►ಪಿಕಾಕ್ಸ್ ಪರ್ವತದ ಮೇಲೆ ಅಮೆರಿಕದ ದಾಳಿ ಸಾಧ್ಯತೆ?

ಇರಾನ್‌ ನಲ್ಲಿ ಕಳೆದ ಹತ್ತು ವರ್ಷಗಳಿಗೂ ಹೆಚ್ಚು ಕಾಲದಿಂದ ಪ್ರತಿವರ್ಷ ನಾಗರಿಕರ ಸುರಕ್ಷತೆ ಕುರಿತು ಜಾಗೃತಿ ಮೂಡಿಸುವ ಕಾರ್ಯಕ್ರಮಗಳನ್ನು ನಡೆಸಲಾಗುತ್ತಿದೆ. ಇದರ ಭಾಗವಾಗಿ ಈ ಮಾರ್ಗಸೂಚಿಯನ್ನು ಬಿಡುಗಡೆ ಮಾಡಲಾಗಿದೆ. ಆದರೆ, ಈ ಹಿಂದೆ ಇರಾನ್ ಇಷ್ಟೊಂದು ವಿವರವಾದ ಪರಮಾಣು ದಾಳಿ ಬದುಕುಳಿಯುವ ಮಾರ್ಗದರ್ಶಿಯನ್ನು ಪ್ರಕಟಿಸಿರುವ ಬಗ್ಗೆ ವರದಿಗಳಿಲ್ಲ.

ಜೂನ್ 2025ರಲ್ಲಿ ಇರಾನ್ ನ ಪರಮಾಣು ಸೌಲಭ್ಯಗಳ ಮೇಲೆ ಇಸ್ರೇಲ್ ಮತ್ತು ಅಮೆರಿಕ ವೈಮಾನಿಕ ದಾಳಿ ನಡೆಸಿದ್ದವು. ಆಗ ದಾಳಿ ನಡೆದ ಸ್ಥಳಗಳನ್ನು ಹೊರತುಪಡಿಸಿ ಬೇರೆಡೆಗೆ ವಿಕಿರಣ ಹರಡಿಲ್ಲ ಎಂದು ಇರಾನ್ ಅಧಿಕಾರಿಗಳು ಜನರಿಗೆ ಭರವಸೆ ನೀಡಿದ್ದರು. ಈಗಿನ ಮಾರ್ಗಸೂಚಿಯು ಇದಕ್ಕಿಂತ ಭಿನ್ನವಾಗಿದ್ದು, ಪರಮಾಣು ಸ್ಫೋಟದ ಪರಿಣಾಮಗಳನ್ನು ಎದುರಿಸಲು ಜನರಿಗೆ ನೇರ ಮುನ್ನೆಚ್ಚರಿಕೆಗಳನ್ನು ನೀಡಿದೆ.

ಇರಾನ್ ನ ಇಸ್ಫಹಾನ್ ಪ್ರಾಂತ್ಯದ ತುರ್ತು ಸೇವೆಗಳು ಈ ವೀಡಿಯೋವನ್ನು ಬಿಡುಗಡೆ ಮಾಡಿವೆ. ನಟಾಂಝ್ ಪರಮಾಣು ಸೌಲಭ್ಯದ ಸಮೀಪದಲ್ಲಿರುವ ಪಿಕಾಕ್ಸ್ ಪರ್ವತದ ಒಳಗೆ ಆಳವಾಗಿ ನಿರ್ಮಿಸಲಾಗಿರುವ ಪರಮಾಣು ಸಂಬಂಧಿತ ತಾಣದ ಮೇಲೆ ಅಮೆರಿಕ ದಾಳಿ ನಡೆಸಬಹುದು ಎಂಬ ಊಹಾಪೋಹಗಳ ನಡುವೆಯೇ ಮಾರ್ಗಸೂಚಿ ಪ್ರಕಟವಾಗಿದೆ.

ಅಕ್ಟೋಬರ್ 16ರಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ಅಮೆರಿಕವು ಪಿಕಾಕ್ಸ್ ಪರ್ವತವನ್ನು ಗುರಿಯಾಗಿಸಬಹುದು ಎಂದು ಹೇಳಿದ್ದರು. ಆದರೆ, ಪರಮಾಣು ಶಸ್ತ್ರಾಸ್ತ್ರಗಳ ಬಳಕೆಯ ಸಾಧ್ಯತೆಯನ್ನು ಸ್ಪಷ್ಟವಾಗಿ ತಳ್ಳಿಹಾಕಿದ್ದರು.

ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರು ಈ ತಾಣದ ಮೇಲೆ ದಾಳಿ ನಡೆಸಲು ಬಯಸುತ್ತಿದ್ದಾರೆ ಎಂಬ ಚರ್ಚೆಯೂ ನಡೆಯುತ್ತಿದೆ. ಸೋಮವಾರ ಅಮೆರಿಕದ ಪತ್ರಕರ್ತ ಮತ್ತು ನಿರೂಪಕ ಟಕರ್ ಕಾರ್ಲ್ಸನ್, ಕೆಲವೇ ದಿನಗಳಲ್ಲಿ ಪಿಕಾಕ್ಸ್ ಪರ್ವತದ ಮೇಲೆ ದಾಳಿ ನಡೆಸುವಂತೆ ನೆತನ್ಯಾಹು ಅವರು ಟ್ರಂಪ್ ಮೇಲೆ ಒತ್ತಡ ಹೇರುತ್ತಿದ್ದಾರೆ ಎಂದು ಆರೋಪಿಸಿದ್ದಾರೆ.

►ಸ್ಫೋಟ ಸಂಭವಿಸಿದರೆ ತಕ್ಷಣ ಏನು ಮಾಡಬೇಕು?

ಪರಮಾಣು ಸ್ಫೋಟದಿಂದ ನಾಲ್ಕು ಪ್ರಮುಖ ಅಪಾಯಗಳು ಎದುರಾಗುತ್ತವೆ ಎಂದು ಮಾರ್ಗಸೂಚಿಯಲ್ಲಿ ವಿವರಿಸಲಾಗಿದೆ. ಸ್ಫೋಟದ ತೀವ್ರ ಬೆಳಕು, ಸ್ಫೋಟದ ಅಲೆ, ಭಾರೀ ಶಾಖ ಮತ್ತು ವಿಕಿರಣಶೀಲ ವಸ್ತುಗಳ ಹರಡುವಿಕೆ ಇವು ಆ ಅಪಾಯಗಳು.

ಇಸ್ಫಹಾನ್ ರೆಡ್ ಕ್ರೆಸೆಂಟ್ ಸೊಸೈಟಿಯ ಶಿಕ್ಷಣ ಮತ್ತು ಸಂಶೋಧನಾ ಉಪ ನಿರ್ದೇಶಕ ಇಬ್ರಾಹಿಂ ಅಡೆಲ್ಜಾಡೆಹ್, ಜನರು ಸದೃಢ ಕಟ್ಟಡಗಳಲ್ಲಿ ಆಶ್ರಯ ಪಡೆಯಬೇಕು ಎಂದು ಸಲಹೆ ನೀಡಿದ್ದಾರೆ.

'ಕಟ್ಟಡದ ಮಧ್ಯಭಾಗದಲ್ಲಿರುವ ನೆಲಮಾಳಿಗೆ ಅಥವಾ ಕಿಟಕಿಗಳಿಂದ ದೂರವಿರುವ ಕೋಣೆ ಆಶ್ರಯ ಪಡೆಯಲು ಸೂಕ್ತ ಸ್ಥಳವಾಗಬಹುದು. ಆದರೆ, ಅಲ್ಲಿಗೆ ಸುರಕ್ಷಿತವಾಗಿ ತಲುಪಲು ಸಾಧ್ಯವಿರಬೇಕು' ಎಂದು ಅವರು IRNAಗೆ ತಿಳಿಸಿದ್ದಾರೆ.

ಮನೆಯ ಬಾಗಿಲು ಮತ್ತು ಕಿಟಕಿಗಳನ್ನು ಮುಚ್ಚಬೇಕು. ಹೊರಗಿನ ಗಾಳಿಯನ್ನು ಒಳಗೆ ತರುವ AC ಮತ್ತು ಗಾಳಿ ಸಂಚಾರ ವ್ಯವಸ್ಥೆಗಳನ್ನು ಬಂದ್ ಮಾಡಬೇಕು ಎಂದು ಸೂಚಿಸಲಾಗಿದೆ.

ಈಜಿಪ್ಟ್ ನ ವೀಟೋ ಮಾಧ್ಯಮದ ವರದಿಯ ಪ್ರಕಾರ, ಕನಿಷ್ಠ 24 ಗಂಟೆಗಳ ಕಾಲ ಆಶ್ರಯದಲ್ಲಿರಲು ಸಿದ್ಧತೆ ಮಾಡಿಕೊಳ್ಳಬೇಕು. ಸೌದಿ ಅರೆಬಿಯದ ಸೌದಿ ನ್ಯೂಸ್ 50 ವರದಿಯ ಪ್ರಕಾರ, 24 ಗಂಟೆಗಳು ಕಳೆದ ಕೂಡಲೇ ಹೊರಗೆ ಬರುವುದು ಸುರಕ್ಷಿತ ಎಂದು ಭಾವಿಸಬಾರದು. ಅಧಿಕಾರಿಗಳಿಂದ ಸುರಕ್ಷತೆಯ ಕುರಿತು ಮಾಹಿತಿ ದೊರೆತ ಬಳಿಕವೇ ಆಶ್ರಯದಿಂದ ಹೊರಬರಬೇಕು ಎಂದು ಸಲಹೆ ನೀಡಲಾಗಿದೆ.

►ಹೊರಾಂಗಣದಲ್ಲಿ ಸಿಲುಕಿಕೊಂಡರೆ ಮಲಗಿ!

ಸ್ಫೋಟದ ತೀವ್ರ ಬೆಳಕನ್ನು ನೇರವಾಗಿ ನೋಡಬಾರದು ಎಂದು ಅಧಿಕಾರಿಗಳು ಎಚ್ಚರಿಸಿದ್ದಾರೆ. ಹೊರಗಿರುವಾಗ ಸ್ಫೋಟ ಸಂಭವಿಸಿ, ತಕ್ಷಣ ಕಟ್ಟಡದೊಳಗೆ ಹೋಗಲು ಸಾಧ್ಯವಾಗದಿದ್ದರೆ ನೆಲದ ಮೇಲೆ ಮಲಗಬೇಕು. ಗೋಡೆ ಅಥವಾ ಯಾವುದಾದರೂ ಗಟ್ಟಿಯಾದ ವಸ್ತುವಿನ ಹಿಂದೆ ಅಡಗಿಕೊಂಡು ತಲೆ ಮತ್ತು ಮುಖವನ್ನು ರಕ್ಷಿಸಿಕೊಳ್ಳಬೇಕು.

ಸ್ಫೋಟದ ಮೊದಲ ಅಲೆ ಹಾದುಹೋದ ಬಳಿಕ ಸಮೀಪದ ಕಟ್ಟಡದೊಳಗೆ ಹೋಗಬೇಕು. ಸ್ಫೋಟವನ್ನು ನೋಡುವ ಅಥವಾ ಫೋಟೊ, ವೀಡಿಯೋ ತೆಗೆಯುವ ಉದ್ದೇಶದಿಂದ ಹೊರಗೆ ಬರಬಾರದು ಎಂದು ಈಜಿಪ್ಟ್ ನ ಸದಾ ಎಲ್ ಬಲಾಡ್ ಮಾಧ್ಯಮ ವರದಿ ಮಾಡಿದೆ.

ಕಾರು ಅಥವಾ ಇತರ ವಾಹನಗಳ ಒಳಗೆ ಆಶ್ರಯ ಪಡೆಯಬಾರದು. ಆಶ್ರಯ ಪಡೆದಿರುವ ಕಟ್ಟಡಕ್ಕೆ ಬೆಂಕಿ ಹೊತ್ತಿಕೊಂಡರೆ ಅಥವಾ ಅದು ಕುಸಿಯುವ ಅಪಾಯವಿದ್ದರೆ ಅಲ್ಲಿಂದ ಹೊರಬಂದು ಮತ್ತೊಂದು ಸುರಕ್ಷಿತ ಕಟ್ಟಡಕ್ಕೆ ತೆರಳಬೇಕು ಎಂದು ಸೌದಿ ನ್ಯೂಸ್ 50 ವರದಿ ತಿಳಿಸಿದೆ.

►ಭಾರತದ ಕೆಲವು ಭಾಗಗಳಿಗೂ ವಿಕಿರಣದ ಅಪಾಯ?

ಪರಮಾಣು ಸ್ಫೋಟ ಸಂಭವಿಸಿದ ಸ್ಥಳದಿಂದ ದೂರದಲ್ಲಿರುವವರಿಗೂ ವಿಕಿರಣದ ಅಪಾಯ ಎದುರಾಗಬಹುದು ಎಂದು ಇರಾನ್ ಎಚ್ಚರಿಸಿದೆ.

ಸ್ಫೋಟದ ಬಳಿಕ ಗಾಳಿಯಲ್ಲಿ ಹರಡುವ ವಿಕಿರಣಶೀಲ ಧೂಳು ದೂರದ ಪ್ರದೇಶಗಳಿಗೂ ತಲುಪಬಹುದು ಎಂದು ಅಡೆಲ್ಜಾಡೆಹ್ ತಿಳಿಸಿದ್ದಾರೆ.

‘ಸ್ಫೋಟ ಸಂಭವಿಸಿದ ಸ್ಥಳದಿಂದ ದೂರದಲ್ಲಿರುವ ಜನರೂ ಅಧಿಕೃತ ಎಚ್ಚರಿಕೆಗಳನ್ನು ಗಂಭೀರವಾಗಿ ಪರಿಗಣಿಸಬೇಕು. ತಮ್ಮ ಮನೆ ಮತ್ತು ಕೆಲಸದ ಸ್ಥಳ ಸುರಕ್ಷಿತವಾಗಿದೆಯೇ ಎಂಬುದನ್ನು ಅಧಿಕಾರಿಗಳು ನೀಡುವ ಮಾಹಿತಿಯ ಆಧಾರದಲ್ಲಿ ನಿರ್ಧರಿಸಬೇಕು’ ಎಂದು ಅವರು ಹೇಳಿದ್ದಾರೆ.

ಗಾಳಿಯು ವಿಕಿರಣಶೀಲ ಧೂಳನ್ನು ಪೂರ್ವದ ಕಡೆಗೆ ಕೊಂಡೊಯ್ದರೆ ಪಾಕಿಸ್ತಾನ ಮತ್ತು ಭಾರತದ ಕೆಲವು ಭಾಗಗಳಿಗೂ ಅದು ತಲುಪಬಹುದು ಎಂದು ವರದಿ ತಿಳಿಸಿದೆ.

ವಿಕಿರಣಶೀಲ ಧೂಳು ದೇಹಕ್ಕೆ ತಾಗಿರುವ ಶಂಕೆಯಿದ್ದರೆ ಹೊರಗಿನ ಬಟ್ಟೆಗಳನ್ನು ಎಚ್ಚರಿಕೆಯಿಂದ ತೆಗೆದು ಮುಚ್ಚಿದ ಚೀಲದಲ್ಲಿ ಇಡಬೇಕು. ಬಳಿಕ ದೇಹದ ತೆರೆದ ಭಾಗಗಳು ಮತ್ತು ಕೂದಲನ್ನು ಬೆಚ್ಚಗಿನ ನೀರು ಹಾಗೂ ಸಾಬೂನಿನಿಂದ ತೊಳೆಯಬೇಕು ಎಂದು ಸೂಚಿಸಲಾಗಿದೆ.

ಸೌದಿ ನ್ಯೂಸ್ 50 ವರದಿಯ ಪ್ರಕಾರ, ಸ್ನಾನ ಮಾಡುವಾಗ ಹೇರ್ ಕಂಡಿಷನರ್ ಬಳಸಬಾರದು; ಸಾಮಾನ್ಯ ಶಾಂಪೂ ಬಳಸಬೇಕು. ಸ್ನಾನ ಮಾಡಲು ಸಾಧ್ಯವಾಗದಿದ್ದರೆ ಒದ್ದೆಯಾದ ವೈಪ್ಗಳಿಂದ ದೇಹದ ತೆರೆದ ಭಾಗಗಳನ್ನು ಸ್ವಚ್ಛಗೊಳಿಸಬೇಕು. ಪ್ಯಾಕ್ ಮಾಡಲಾದ ಆಹಾರ ಮತ್ತು ಬಾಟಲಿ ನೀರನ್ನು ಮಾತ್ರ ಬಳಸಬೇಕು ಎಂದು ಸಲಹೆ ನೀಡಲಾಗಿದೆ.

►ವೈದ್ಯರ ಸಲಹೆಯಿಲ್ಲದೆ ಅಯೋಡಿನ್ ಮಾತ್ರೆ ಬೇಡ

ವಿಕಿರಣದ ಪರಿಣಾಮದಿಂದ ರಕ್ಷಿಸಿಕೊಳ್ಳಲು ಬಳಸುವ ಔಷಧಗಳ ಬಗ್ಗೆಯೂ ವೀಡಿಯೋದಲ್ಲಿ ವಿವರಿಸಲಾಗಿದೆ.

ಇಸ್ಫಹಾನ್ ನ ಆಸ್ಪತ್ರೆಪೂರ್ವ ತುರ್ತು ಸೇವೆಗಳ ವಕ್ತಾರ ಅಬ್ಬಾಸ್ ಅಬೇದಿ, ವೈದ್ಯರ ಸಲಹೆಯಿಲ್ಲದೆ ಅಯೋಡಿನ್ ಮಾತ್ರೆಗಳನ್ನು ಸೇವಿಸಬಾರದು ಎಂದು ಎಚ್ಚರಿಸಿದ್ದಾರೆ.

‘ಕೆಲವು ಸಂದರ್ಭಗಳಲ್ಲಿ ಸ್ಥಿರ ಅಯೋಡಿನ್, ಥೈರಾಯ್ಡ್ ಗ್ರಂಥಿಯು ವಿಕಿರಣಶೀಲ ಅಯೋಡಿನ್ ಹೀರಿಕೊಳ್ಳುವುದನ್ನು ತಡೆಯಲು ಸಹಾಯ ಮಾಡುತ್ತದೆ. ಆದರೆ, ಇತರ ವಿಕಿರಣಶೀಲ ವಸ್ತುಗಳಿಂದ ಅಥವಾ ಸ್ಫೋಟದಿಂದ ಉಂಟಾಗುವ ವಿಕಿರಣದಿಂದ ಇದು ರಕ್ಷಣೆ ನೀಡುವುದಿಲ್ಲ’ ಎಂದು ಅವರು IRNAಗೆ ತಿಳಿಸಿದ್ದಾರೆ.

ವಿಕಿರಣಶೀಲ ಸೀಸಿಯಂ-137 ದೇಹದೊಳಗೆ ಸೇರಿ ಮಾಲಿನ್ಯ ಉಂಟುಮಾಡಿದ ಕೆಲವು ಸಂದರ್ಭಗಳಲ್ಲಿ ಬಳಸುವ ‘ಪ್ರಶ್ಯನ್ ಬ್ಲೂ’ ಎಂಬ ಔಷಧದ ಬಗ್ಗೆಯೂ ವೀಡಿಯೋದಲ್ಲಿ ಮಾಹಿತಿ ನೀಡಲಾಗಿದೆ.

►ವಿದ್ಯುನ್ಮಾನ ಉಪಕರಣಗಳೂ ಸ್ಥಗಿತಗೊಳ್ಳಬಹುದು

ಪರಮಾಣು ಸ್ಫೋಟದಿಂದ ಉಂಟಾಗುವ ವಿದ್ಯುತ್ಕಾಂತೀಯ ಅಲೆಗಳು ಎಲೆಕ್ಟ್ರಾನಿಕ್ ಉಪಕರಣಗಳು ಮತ್ತು ಸಂವಹನ ವ್ಯವಸ್ಥೆಗಳ ಕಾರ್ಯನಿರ್ವಹಣೆಗೆ ಅಡ್ಡಿಪಡಿಸಬಹುದು ಎಂದು ಇರಾನ್ ನ ಅಧಿಕಾರಿಗಳು ಎಚ್ಚರಿಸಿದ್ದಾರೆ.

ಇಂತಹ ಸಂದರ್ಭದಲ್ಲಿ ಅಧಿಕೃತ ಮಾಹಿತಿ ಪಡೆಯಲು ಬ್ಯಾಟರಿಯಿಂದ ಕಾರ್ಯನಿರ್ವಹಿಸುವ ರೇಡಿಯೊಗಳನ್ನು ಬಳಸುವಂತೆ ಶಿಫಾರಸು ಮಾಡಿದ್ದಾರೆ.

ಜೂನ್ 2025ರಲ್ಲಿ ಇಸ್ರೇಲ್ ಮತ್ತು ಅಮೆರಿಕ ಇರಾನ್ ನ ಪರಮಾಣು ಸೌಲಭ್ಯಗಳ ಮೇಲೆ ದಾಳಿ ನಡೆಸಿದ್ದ ಸಂದರ್ಭದಲ್ಲಿ, ದಾಳಿ ನಡೆದ ಸ್ಥಳಗಳನ್ನು ಹೊರತುಪಡಿಸಿ ಬೇರೆಡೆಗೆ ವಿಕಿರಣ ಹರಡಿಲ್ಲ ಎಂದು ಟೆಹ್ರಾನ್ ಜನರಿಗೆ ಭರವಸೆ ನೀಡಿತ್ತು. ಆದರೆ, ಈಗಿನ ಮಾರ್ಗಸೂಚಿಯಲ್ಲಿ ವಿಕಿರಣಶೀಲ ಧೂಳು ದೂರದ ಪ್ರದೇಶಗಳಿಗೆ ಹರಡುವ ಸಾಧ್ಯತೆ, ದೀರ್ಘಕಾಲ ಆಶ್ರಯದಲ್ಲಿರಬೇಕಾದ ಅಗತ್ಯ ಮತ್ತು ಪರಮಾಣು ಸ್ಫೋಟದ ಇತರ ಪರಿಣಾಮಗಳ ಬಗ್ಗೆ ನಾಗರಿಕರಿಗೆ ಎಚ್ಚರಿಕೆ ನೀಡಲಾಗಿದೆ.

ಇರಾನ್ ಈ ಮಾರ್ಗಸೂಚಿಯನ್ನು ತನ್ನ ನಿಷ್ಕ್ರಿಯ ರಕ್ಷಣಾ ವಾರದ ಭಾಗವೆಂದು ಹೇಳಿದೆ. ಆದರೆ, ಅಮೆರಿಕದ ಮುಂದಿನ ನಡೆ ಮತ್ತು ಪಿಕಾಕ್ಸ್ ಪರ್ವತದ ಮೇಲಿನ ಸಂಭಾವ್ಯ ದಾಳಿಯ ಕುರಿತು ಊಹಾಪೋಹಗಳು ಹೆಚ್ಚಿರುವ ಸಂದರ್ಭದಲ್ಲಿ ಇಷ್ಟೊಂದು ವಿವರವಾದ ಮಾರ್ಗಸೂಚಿ ಬಿಡುಗಡೆ ಮಾಡಿರುವುದು ಅಂತರರಾಷ್ಟ್ರೀಯ ಮಟ್ಟದಲ್ಲಿ ಗಮನ ಸೆಳೆದಿದೆ.

ಸೌಜನ್ಯ: India Today