US Midterm Election | ಮಧ್ಯಂತರ ಚುನಾವಣೆ ಫಲಿತಾಂಶದ ಬೆನ್ನಲ್ಲೇ ಫೆಲೆಸ್ತೀನಿಯನ್ನರಲ್ಲಿ ಹೊಸ ನಿರೀಕ್ಷೆ!
ಇಸ್ರೇಲ್ ಪರ ಅಮೆರಿಕದ ನೀತಿ ಬದಲಾಗುವ ಆಶಾವಾದ; PLO ರಾಜತಾಂತ್ರಿಕ ಸ್ಥಾನಮಾನ ಮರುಸ್ಥಾಪನೆಗೆ ಹೊಸ ಕಾಂಗ್ರೆಸ್ ನೆರವಾಗುವ ವಿಶ್ವಾಸ
ರಮಲ್ಲಾ: ಅಮೆರಿಕದ ಮಧ್ಯಂತರ ಚುನಾವಣೆಯ ಫಲಿತಾಂಶ ಆಕ್ರಮಿತ ಪಶ್ಚಿಮ ದಂಡೆಯಲ್ಲಿರುವ ಕೆಲವು ಫೆಲೆಸ್ತೀನಿಯನ್ನರಲ್ಲಿ ಹೊಸ ಭರವಸೆ ಮೂಡಿಸಿದೆ. ಇಸ್ರೇಲ್ ಗೆ ಅಮೆರಿಕ ನೀಡುತ್ತಿರುವ ಬೆಂಬಲದ ನೀತಿಯಲ್ಲಿ ಬದಲಾವಣೆಯಾಗಬಹುದು ಹಾಗೂ ಫೆಲೆಸ್ತೀನಿಗೆ ಹೆಚ್ಚಿನ ಆದ್ಯತೆ ದೊರೆಯಬಹುದು ಎಂಬ ನಿರೀಕ್ಷೆ ಅವರಲ್ಲಿ ಕಾಣಿಸಿಕೊಂಡಿದೆ ಎಂದು Aljazeera ವರದಿ ಮಾಡಿದೆ.
ರಮಲ್ಲಾದ 71 ವರ್ಷದ ಹಾನಿ ಲಹ್ರೌಬ್ ಅವರ ಪ್ರಕಾರ, ಡೊನಾಲ್ಡ್ ಟ್ರಂಪ್ ಆಡಳಿತದ ಅವಧಿಯಲ್ಲಿ ಅಮೆರಿಕದ ನೀತಿಯು 'ಮೊದಲು ಇಸ್ರೇಲ್, ಅಮೆರಿಕಕ್ಕೆ ಮೊದಲ ಆದ್ಯತೆಯಲ್ಲ' ಎಂಬಂತಿತ್ತು. ಇದೀಗ ಈ ನಿಲುವಿನಲ್ಲಿ ಬದಲಾವಣೆಯಾಗಬಹುದು ಎಂಬ ಆಶಯವನ್ನು ಅವರು ವ್ಯಕ್ತಪಡಿಸಿದ್ದಾರೆ.
"ಫೆಲೆಸ್ತೀನಿನ ವಿಷಯವು ಚುನಾವಣೆಗಳ ಮೇಲೆ ಪ್ರಭಾವ ಬೀರುವ ಪ್ರಮುಖ ವಿಷಯಗಳಲ್ಲಿ ಒಂದಾಗಿದೆ" ಎಂದು ಅವರು ಅಸೋಸಿಯೇಟೆಡ್ ಪ್ರೆಸ್ಗೆ ತಿಳಿಸಿದ್ದಾರೆ.
ಫೆಲೆಸ್ತೀನಿನ ಜನರ ಅಂತರರಾಷ್ಟ್ರೀಯ ಮಟ್ಟದಲ್ಲಿ ಮಾನ್ಯತೆ ಪಡೆದ ಪ್ರತಿನಿಧಿ ಸಂಸ್ಥೆಯಾಗಿರುವ ಫೆಲೆಸ್ತೀನಿನ ಲಿಬರೇಶನ್ ಆರ್ಗನೈಸೇಷನ್ (PLO)ನ ರಾಜತಾಂತ್ರಿಕ ಸ್ಥಾನಮಾನವನ್ನು ಪುನಃಸ್ಥಾಪಿಸಲು ಹೊಸ ಕಾಂಗ್ರೆಸ್ ನೆರವಾಗಬಹುದು ಎಂಬ ನಿರೀಕ್ಷೆಯನ್ನೂ ಇತರ ಫೆಲೆಸ್ತೀನಿಯನ್ನರು ಹೊಂದಿದ್ದಾರೆ.
ರಮಲ್ಲಾದ 80 ವರ್ಷದ ಸುಲೇಮಾನ್ ಮಾಲಿ ಅವರು, PLO ರಾಜತಾಂತ್ರಿಕರು ಮತ್ತೆ ಅಮೆರಿಕಕ್ಕೆ ಮರಳಲು ಅವಕಾಶ ದೊರೆಯಬಹುದು ಎಂದು ಆಶಿಸಿದ್ದಾರೆ. ಟ್ರಂಪ್ ಆಡಳಿತವು ಫೆಲೆಸ್ತೀನಿನ ರಾಜತಾಂತ್ರಿಕರ ಮೇಲೆ ವೀಸಾ ನಿರ್ಬಂಧಗಳನ್ನು ವಿಧಿಸಿದ್ದಲ್ಲದೆ, ವಾಷಿಂಗ್ಟನ್ ನಲ್ಲಿದ್ದ PLO ಕಚೇರಿಯನ್ನೂ ಮುಚ್ಚಿತ್ತು.
"ನಾವು ಬದುಕಲು ಬಯಸುವ ಜನರು" ಎಂದು ಅವರು ಅಸೋಸಿಯೇಟೆಡ್ ಪ್ರೆಸ್ಗೆ ತಿಳಿಸಿದ್ದಾರೆ.
ಇದೇ ವೇಳೆ, ತಮ್ಮ ಕ್ಷೇತ್ರದ ಹೌಸ್ ಚುನಾವಣೆಯಲ್ಲಿ ಡೆಮಾಕ್ರಟಿಕ್ ಅಭ್ಯರ್ಥಿಯನ್ನು ಬೆಂಬಲಿಸಿದ ಸುಮಾರು ಶೇ. 70ರಷ್ಟು ಮತದಾರರು, ಇಸ್ರೇಲ್ ಗೆ ಅಮೆರಿಕ ನೀಡುತ್ತಿರುವ ಬೆಂಬಲ 'ತುಂಬಾ ಪ್ರಬಲವಾಗಿದೆ' ಎಂದು ಅಭಿಪ್ರಾಯಪಟ್ಟಿದ್ದಾರೆ. ಎಪಿ ನಡೆಸಿದ ಮತದಾರರ ಸಮೀಕ್ಷೆಯಲ್ಲಿ ಈ ಅಂಶ ಬಹಿರಂಗವಾಗಿದೆ.
