ಸುಡಾನ್ | ಚಿನ್ನದ ಗಣಿ ಕುಸಿದು 11 ಮಂದಿ ಮೃತ್ಯು; 7 ಮಂದಿಗೆ ಗಾಯ

ಖರ್ಟೌಮ್: ಯುದ್ಧದಿಂದ ಜರ್ಝರಿತಗೊಂಡಿರುವ ಸುಡಾನ್‌ ನ ಈಶಾನ್ಯದಲ್ಲಿ ಸಾಂಪ್ರದಾಯಿಕ ಚಿನ್ನದ ಗಣಿ ಭಾಗಶಃ ಕುಸಿದು 11 ಕಾರ್ಮಿಕರು ಸಾವನ್ನಪ್ಪಿದ್ದಾರೆ. ದುರಂತದಲ್ಲಿ ಇತರ 7 ಮಂದಿ ಗಾಯಗೊಂಡಿರುವುದಾಗಿ ಅಧಿಕಾರಿಗಳು ಹೇಳಿದ್ದಾರೆ.

ಸುಡಾನ್‌ ನಲ್ಲಿ ಸೇನಾ ಪಡೆ ಮತ್ತು ಅರೆ ಸೇನಾಪಡೆಯ ನಡುವೆ 2023ರ ಎಪ್ರಿಲ್‍ನಿಂದ ಸಂಘರ್ಷ ನಡೆಯುತ್ತಿದೆ. ಸೇನೆಯ ನಿಯಂತ್ರಣದಲ್ಲಿರುವ ಈಶಾನ್ಯದ ರೆಡ್ ಸೀ ರಾಜ್ಯದ ಅಟ್ಬಾರ ಮತ್ತು ಹೈಯಾ ನಗರಗಳ ನಡುವೆ ಇರುವ ಕಿರ್ಶ್ ಅಲ್-ಫಿಲ್ ಗಣಿಯ ಆಳದಲ್ಲಿ ದುರಂತ ಸಂಭವಿಸಿದೆ ಎಂದು `ಸುಡಾನೀಸ್ ಮಿನರಲ್ ರಿಸೋರ್ಸಸ್ ಕಂಪೆನಿ(ಎಸ್‍ಎಂಆರ್‍ಸಿ) ಹೇಳಿದೆ. ಸೇನೆ ಮತ್ತು ಅರೆ ಸೇನಾಪಡೆಯ ನಡುವೆ ಇದೀಗ ಮೂರನೇ ವರ್ಷಕ್ಕೆ ಮುಂದುವರಿದಿರುವ ಯುದ್ಧವು ದೇಶದ ಅರ್ಥವ್ಯವಸ್ಥೆಯನ್ನು ಛಿದ್ರಗೊಳಿಸಿದ್ದರೂ 2024ರಲ್ಲಿ ದಾಖಲೆ 64 ಟನ್‍ಗಳಷ್ಟು ಚಿನ್ನ ಉತ್ಪಾದನೆಯಾಗಿದೆ ಎಂದು ಸೇನೆ ಬೆಂಬಲಿತ ಸರ್ಕಾರ ಹೇಳಿದೆ.