ವಿಮರ್ಶಾತ್ಮಕ ಯುದ್ಧ ವರದಿಗಳ ಮೇಲೆ ಬಿತ್ತು ಟ್ರಂಪ್ ಕಣ್ಣು; ಸುದ್ದಿ ಸಂಸ್ಥೆಗಳಿಗೆ ಪರವಾನಗಿ ರದ್ದು ಬೆದರಿಕೆ

ವಾಷಿಂಗ್ಟನ್: ಇರಾನ್ ವಿರುದ್ಧದ ಅಮೆರಿಕದ ಯುದ್ಧದ ಕುರಿತು ವಿಮರ್ಶಾತ್ಮಕ ವರದಿಗಳನ್ನು ಪ್ರಸಾರ ಮಾಡುವ ಸುದ್ದಿ ಸಂಸ್ಥೆಗಳ ಪ್ರಸಾರ ಪರವಾನಗಿಗಳನ್ನು ರದ್ದುಗೊಳಿಸುವ ಸಾಧ್ಯತೆ ಇದೆ ಎಂದು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಆಡಳಿತ ಎಚ್ಚರಿಕೆ ನೀಡಿದೆ. ಮಾಧ್ಯಮಗಳು ತಿರುಚಿದ ಹಾಗೂ ಸುಳ್ಳು ಸುದ್ದಿಗಳನ್ನು ಹರಡುತ್ತಿವೆ ಎಂಬ ಆರೋಪ ಮಾಡಲಾಗಿದೆ ಎಂದು aljazeera.com ವರದಿ ಮಾಡಿದೆ.

ಫೆಡರಲ್ ಕಮ್ಯುನಿಕೇಷನ್ಸ್ ಕಮಿಷನ್ (FCC) ಅಧ್ಯಕ್ಷ ಬ್ರೆಂಡನ್ ಕಾರ್ ಶನಿವಾರ ಸಾಮಾಜಿಕ ಜಾಲತಾಣದಲ್ಲಿ ಪ್ರಕಟಿಸಿದ ಹೇಳಿಕೆಯಲ್ಲಿ, ಸುದ್ದಿ ಪ್ರಸಾರ ಮಾಡುವ ಸಂಸ್ಥೆಗಳು ಸಾರ್ವಜನಿಕ ಹಿತಾಸಕ್ತಿಯಲ್ಲಿ ಕಾರ್ಯನಿರ್ವಹಿಸಬೇಕು, ಇಲ್ಲವಾದರೆ ತಮ್ಮ ಪರವಾನಗಿಗಳನ್ನು ಕಳೆದುಕೊಳ್ಳಬೇಕಾಗುತ್ತದೆ ಎಂದು ತಿಳಿಸಿದ್ದಾರೆ.

“ತಪ್ಪು ಮಾಹಿತಿ ಅಥವಾ ತಿರುಚಿದ ಸುದ್ದಿ ನೀಡುತ್ತಿರುವ ಪ್ರಸಾರಕರು ತಮ್ಮ ವರದಿ ವಿಧಾನವನ್ನು ತಕ್ಷಣ ಸರಿಪಡಿಸಿಕೊಳ್ಳಬೇಕು; ಇಲ್ಲವಾದರೆ ಪರವಾನಗಿ ನವೀಕರಣದ ವೇಳೆ ಸಮಸ್ಯೆ ಎದುರಿಸಬೇಕಾಗುತ್ತದೆ” ಎಂದು ಕಾರ್ ತಿಳಿಸಿದ್ದಾರೆ.

ಮಾಧ್ಯಮಗಳು ಟ್ರಂಪ್ ಆಡಳಿತದ ನಿಲುವಿಗೆ ಅನುಗುಣವಾಗಿ ವರದಿ ಮಾಡಬೇಕು ಎಂದು ಒತ್ತಡ ಹೇರುತ್ತಿದ್ದಾರೆ ಎಂಬ ಕಾರಣಕ್ಕೆ ಕಾರ್ ವಿರುದ್ಧ ಟೀಕೆ ವ್ಯಕ್ತವಾಗಿದೆ. ಕಳೆದ ವರ್ಷ ಟ್ರಂಪ್ ಅವರನ್ನು ಟೀಕಿಸಿದ್ದ ಹಾಸ್ಯನಟ ಜಿಮ್ಮಿ ಕಿಮ್ಮೆಲ್ ಅವರ ಕಾರ್ಯಕ್ರಮದ ಬಗ್ಗೆ ABC ಚಾನೆಲ್ ಕ್ರಮ ಕೈಗೊಳ್ಳಬೇಕು ಎಂದು ಅವರು ಸೂಚಿಸಿದ್ದರು. “ನೀವೇ ನಿಮ್ಮ ನಡೆ ಬದಲಾಯಿಸಿಕೊಳ್ಳಿ; ಇಲ್ಲವಾದರೆ ನಾವು ಕ್ರಮ ಕೈಗೊಳ್ಳುತ್ತೇವೆ” ಎಂದು ಕಾರ್ ಎಚ್ಚರಿಸಿದ್ದರು. ಈ ಹೇಳಿಕೆಯ ಬಳಿಕ ABC, ಜಿಮ್ಮಿ ಕಿಮ್ಮೆಲ್ ಅವರ ಕಾರ್ಯಕ್ರಮವನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಿತು.

ಕಾರ್ ಅವರ ಇತ್ತೀಚಿನ ಹೇಳಿಕೆ ರಾಜಕಾರಣಿಗಳು ಹಾಗೂ ವಾಕ್ ಸ್ವಾತಂತ್ರ್ಯ ಹೋರಾಟಗಾರರಿಂದ ತೀವ್ರ ಖಂಡನೆಗೆ ಗುರಿಯಾಗಿದೆ. ಹವಾಯಿ ರಾಜ್ಯದ ಸೆನೆಟರ್ ಬ್ರಿಯಾನ್ ಸ್ಕಾಟ್ಜ್, “ಇದು ಯುದ್ಧದ ಬಗ್ಗೆ ‘ಸಕಾರಾತ್ಮಕ’ ವರದಿ ನೀಡುವಂತೆ ನೀಡಿದ ಸ್ಪಷ್ಟ ಸೂಚನೆ; ಇಲ್ಲದಿದ್ದರೆ ಪರವಾನಗಿ ನವೀಕರಣ ಸಾಧ್ಯವಿಲ್ಲ ಎಂಬ ಸಂದೇಶ” ಎಂದು ಕಳವಳ ವ್ಯಕ್ತಪಡಿಸಿದ್ದಾರೆ. “ಇದು ಕೇವಲ ಹಾಸ್ಯ ಕಾರ್ಯಕ್ರಮಗಳ ವಿಷಯವಲ್ಲ; ಯುದ್ಧವನ್ನು ಹೇಗೆ ವರದಿ ಮಾಡಬೇಕು ಎಂಬುದರ ಬಗ್ಗೆ ಸರ್ಕಾರದ ಹಸ್ತಕ್ಷೇಪ” ಎಂದು ಅವರು ಹೇಳಿದ್ದಾರೆ.

ಫೌಂಡೇಶನ್ ಆಫ್ ಇಂಡಿವಿಜುವಲ್ ರೈಟ್ಸ್ ಅಂಡ್ ಎಕ್ಸ್ಪ್ರೆಶನ್ (FIRE) ಸಂಸ್ಥೆಯ ಸಾರ್ವಜನಿಕ ವಕಾಲತ್ತು ನಿರ್ದೇಶಕ ಆರನ್ ಟೆರ್, “ಸರ್ಕಾರ ನಡೆಸುತ್ತಿರುವ ಯುದ್ಧದ ಬಗ್ಗೆ ಮಾಹಿತಿಯನ್ನು ಸೆನ್ಸಾರ್ ಮಾಡಲು ಅಮೆರಿಕದ ಸಂವಿಧಾನದ ಮೊದಲ ತಿದ್ದುಪಡಿ ಅವಕಾಶ ನೀಡುವುದಿಲ್ಲ” ಎಂದು ಎಚ್ಚರಿಸಿದ್ದಾರೆ.

ಇದರ ಮಧ್ಯೆ, ಸೌದಿ ಅರೇಬಿಯಾದಲ್ಲಿ ಇರಾನ್ ದಾಳಿಯಲ್ಲಿ ಅಮೆರಿಕದ ಇಂಧನ ತುಂಬುವ ವಿಮಾನಗಳು ಹೊಡೆದಿವೆ ಎಂಬ ವರದಿಗಳನ್ನು ಟ್ರಂಪ್ ತಳ್ಳಿಹಾಕಿ, ಅವು ಸುಳ್ಳು ಸುದ್ದಿ ಎಂದು ಹೇಳಿದ್ದಾರೆ. ವಿಮಾನಗಳು ಹೊಡೆದಿಲ್ಲ ಅಥವಾ ನಾಶವಾಗಲಿಲ್ಲ; ಐದು ವಿಮಾನಗಳಲ್ಲಿ ನಾಲ್ಕು ಯಾವುದೇ ಗಂಭೀರ ಹಾನಿಯಿಲ್ಲದೆ ಮತ್ತೆ ಸೇವೆಗೆ ಮರಳಿವೆ ಎಂದು ಅವರು ಟ್ರೂತ್ ಸೋಶಿಯಲ್ ನಲ್ಲಿ ತಿಳಿಸಿದ್ದಾರೆ. ವಾಸ್ತವಕ್ಕೆ ವಿರುದ್ಧವಾಗಿ ವರದಿ ಮಾಡುವುದು ಉದ್ದೇಶಪೂರ್ವಕ ದಾರಿತಪ್ಪಿಸುವಿಕೆಯಾಗಿದೆ ಎಂದು ಆರೋಪಿಸಿದ ಅವರು, “ಕೆಲವು ಮಾಧ್ಯಮಗಳು ನಾವು ಯುದ್ಧದಲ್ಲಿ ಸೋಲಬೇಕು ಎಂದು ಬಯಸುತ್ತಿವೆ” ಎಂದು ಹೇಳಿದ್ದಾರೆ.

ಮಾಧ್ಯಮಗಳನ್ನು ನಿಯಂತ್ರಿಸಲು ಸರ್ಕಾರದ ಅಧಿಕಾರ ಬಳಸಬಹುದು ಎಂಬ ಆರೋಪ ಟ್ರಂಪ್ ವಿರುದ್ಧ ಕೇಳಿಬರುತ್ತಿದ್ದು, ಇದರಿಂದ ಪತ್ರಿಕಾ ಸ್ವಾತಂತ್ರ್ಯದ ಬಗ್ಗೆ ಕಳವಳ ಹೆಚ್ಚಾಗಿದೆ.

ಫೆಬ್ರವರಿ 28ರಂದು ಅಮೆರಿಕ ಮತ್ತು ಇಸ್ರೇಲ್ ಆರಂಭಿಸಿದ ಈ ಯುದ್ಧಕ್ಕೆ ಅಮೆರಿಕದಲ್ಲಿ ವ್ಯಾಪಕ ಬೆಂಬಲ ಇಲ್ಲವೆಂದು ಸಮೀಕ್ಷೆಗಳು ಸೂಚಿಸುತ್ತವೆ. ಕ್ವಿನ್ನಿಪಿಯಾಕ್ ಸಮೀಕ್ಷೆಯ ಪ್ರಕಾರ, ಶೇಕಡಾ 53 ಮತದಾರರು ಇರಾನ್ ವಿರುದ್ಧದ ಮಿಲಿಟರಿ ಕಾರ್ಯಾಚರಣೆಯನ್ನು ವಿರೋಧಿಸಿದ್ದಾರೆ. ಇದರಲ್ಲಿ ಶೇಕಡಾ 89 ಡೆಮೋಕ್ರಾಟ್ ಗಳು ಹಾಗೂ ಶೇಕಡಾ 60 ಸ್ವತಂತ್ರ ಮತದಾರರು ಸೇರಿದ್ದಾರೆ.

ಕಾನೂನು ತಜ್ಞರು ಈ ಯುದ್ಧವನ್ನು ಅಂತರರಾಷ್ಟ್ರೀಯ ಕಾನೂನಿನ ಉಲ್ಲಂಘನೆ ಎಂದು ಟೀಕಿಸಿದ್ದಾರೆ. ಅಪ್ರಚೋದಿತ ದಾಳಿಗಳನ್ನು ನಿಷೇಧಿಸುವ ನಿಯಮಗಳನ್ನು ಇದು ಉಲ್ಲಂಘಿಸಿದೆ ಎಂಬ ಅಭಿಪ್ರಾಯ ವ್ಯಕ್ತವಾಗಿದೆ.

ಇದರ ನಡುವೆಯೇ, ಇರಾನ್ ಅಮೆರಿಕದ ಭದ್ರತೆಗೆ ತಕ್ಷಣದ ಬೆದರಿಕೆ ಎಂಬುದಾಗಿ ಟ್ರಂಪ್ ವಿವಿಧ ಕಾರಣಗಳನ್ನು ಮುಂದಿಟ್ಟಿದ್ದಾರೆ. ಮಧ್ಯಪ್ರಾಚ್ಯಾದ್ಯಂತ ಅಮೆರಿಕದ ಪಡೆಗಳ ಮೇಲೆ ಇರಾನ್ ದಾಳಿಗಳು ನಡೆಯುತ್ತಿರುವುದನ್ನು ಹಾಗೂ ಪ್ರಮುಖ ಜಲಮಾರ್ಗವಾದ ಹಾರ್ಮುಝ್ ಜಲಸಂಧಿಯ ಪರಿಸ್ಥಿತಿಯನ್ನು ಉಲ್ಲೇಖಿಸಿ, ಯುದ್ಧ ಯಶಸ್ವಿಯಾಗಿ ಸಾಗುತ್ತಿದೆ ಎಂದು ಅವರು ಹೇಳಿದ್ದಾರೆ.

“ನಾವು ಗೆದ್ದಿದ್ದೇವೆ. ಮೊದಲ ಗಂಟೆಯಲ್ಲೇ ಯುದ್ಧ ಮುಗಿದಿತ್ತು” ಎಂದು ಕೆಂಟುಕಿಯಲ್ಲಿ ನಡೆದ ರ‍್ಯಾಲಿಯಲ್ಲಿ ಅವರು ಹೇಳಿದ್ದಾರೆ.

ಇನ್ನೊಂದೆಡೆ, ಯುದ್ಧದ ವಿರುದ್ಧ ಸಾರ್ವಜನಿಕ ಅಭಿಪ್ರಾಯ ತಿರುಗಲು ಮಾಧ್ಯಮಗಳೇ ಕಾರಣವೆಂದು ಆಡಳಿತ ಆರೋಪಿಸಿದೆ. ರಕ್ಷಣಾ ಕಾರ್ಯದರ್ಶಿ ಪೀಟ್ ಹೆಗ್ಸೆತ್, “ಕೆಲವು ಪತ್ರಕರ್ತರು ನಕಾರಾತ್ಮಕ ವರದಿಗಳನ್ನು ನಿಲ್ಲಿಸಲು ಸಾಧ್ಯವಾಗುತ್ತಿಲ್ಲ” ಎಂದು ಹೇಳಿದ್ದಾರೆ. ದೇಶಭಕ್ತ ವರದಿಗಾರರು ಹೆಚ್ಚು ಆಶಾವಾದಿ ಶೀರ್ಷಿಕೆಗಳನ್ನು ನೀಡಬೇಕು ಎಂದು ಅವರು ಸೂಚಿಸಿದ್ದಾರೆ.

“‘ಮಧ್ಯಪ್ರಾಚ್ಯ ಯುದ್ಧ ತೀವ್ರಗೊಳ್ಳುತ್ತಿದೆ’ ಎಂಬುದರ ಬದಲು ‘ಇರಾನ್ ಹೆಚ್ಚು ಹತಾಶವಾಗಿದೆ’ ಎಂದು ಹೇಳಬೇಕು” ಎಂದು ಹೆಗ್ಸೆತ್ ತಿಳಿಸಿದ್ದಾರೆ.

ಹಾರ್ಮುಝ್ ಜಲಸಂಧಿಯನ್ನು ಮುಚ್ಚುವ ಅಪಾಯವನ್ನು ಕಡಿಮೆ ಅಂದಾಜು ಮಾಡಿದೆ ಎಂಬ ವರದಿಗಾಗಿ ಅವರು CNN ಅನ್ನು ಟೀಕಿಸಿದರು. ಇದರ ನಡುವೆಯೇ, ಭವಿಷ್ಯದಲ್ಲಿ ಆ ನೆಟ್ವರ್ಕ್ ಲ್ಯಾರಿ ಎಲಿಸನ್ ಅವರ ಪುತ್ರ ಡೇವಿಡ್ ಎಲಿಸನ್ ಅವರ ನಿಯಂತ್ರಣಕ್ಕೆ ಬರಬಹುದು ಎಂಬ ಸುದ್ದಿಯನ್ನು ಉಲ್ಲೇಖಿಸಿ, “ಅವರು ಎಷ್ಟು ಬೇಗ ವಹಿಸಿಕೊಳ್ಳುತ್ತಾರೋ ಅಷ್ಟು ಉತ್ತಮ” ಎಂದು ವ್ಯಂಗ್ಯವಾಡಿದರು.