US Midterm Election | ಡೆಮೋಕ್ರಾಟ್ ಗಳ ಗೆಲುವಿನ ಬೆನ್ನಲ್ಲೇ ಟ್ರಂಪ್ ಮೀಡಿಯಾ ಷೇರುಗಳಿಗೆ ಭಾರಿ ಹೊಡೆತ; ಟ್ರಂಪ್ ಗೆ 73 ಮಿಲಿಯನ್ ಡಾಲರ್ ನಷ್ಟ
ನ. 3ರ ಚುನಾವಣಾ ಫಲಿತಾಂಶದ ಬಳಿಕ ಶೇ. 11ಕ್ಕೂ ಹೆಚ್ಚು ಕುಸಿದ ಷೇರುಗಳು; 2026ರಲ್ಲಿ ಒಟ್ಟಾರೆ ಶೇ. 55ಕ್ಕೂ ಅಧಿಕ ಕುಸಿತ
ವಾಶಿಂಗ್ಟನ್: ಅಮೆರಿಕದ ಮಧ್ಯಂತರ ಚುನಾವಣೆಯಲ್ಲಿ ಡೆಮೋಕ್ರಾಟ್ ಗಳು ಕಾಂಗ್ರೆಸ್ ನ ಎರಡೂ ಸದನಗಳ ಮೇಲೆ ಹಿಡಿತ ಸಾಧಿಸಿದ ಬೆನ್ನಲ್ಲೇ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಮಾಲೀಕತ್ವದ ಟ್ರಂಪ್ ಮೀಡಿಯಾ & ಟೆಕ್ನಾಲಜಿ ಗ್ರೂಪ್ ನ ಷೇರುಗಳು ಭಾರಿ ಕುಸಿತ ಕಂಡಿವೆ. ಬುಧವಾರ ಅಮೆರಿಕದ ಷೇರು ಮಾರುಕಟ್ಟೆ ಆರಂಭವಾದ ಕೆಲವೇ ಹೊತ್ತಿನಲ್ಲಿ ಶೇ. 11ಕ್ಕೂ ಹೆಚ್ಚು ಕುಸಿದ ಷೇರುಗಳು ಸಾರ್ವಕಾಲಿಕ ಕನಿಷ್ಠ ಮಟ್ಟ ತಲುಪಿವೆ. ಇದರಿಂದ ಟ್ರಂಪ್ ಅವರ ಅಂದಾಜು 6.5 ಶತಕೋಟಿ ಡಾಲರ್ ಸಂಪತ್ತಿನಲ್ಲಿ 73 ಮಿಲಿಯನ್ ಡಾಲರ್ ನಷ್ಟವಾಗಿದೆ ಎಂದು ಫೋರ್ಬ್ಸ್ ವರದಿ ಮಾಡಿದೆ.
ಟ್ರಂಪ್ ಅವರ ಸಾಮಾಜಿಕ ಮಾಧ್ಯಮ ವೇದಿಕೆ 'ಟ್ರೂತ್ ಸೋಶಿಯಲ್'ನ ಹಿಂದಿರುವ ಕಂಪೆನಿಯ ಷೇರುಗಳು ಪ್ರತಿ ಷೇರಿಗೆ 5.23 ಡಾಲರ್ ಗೆ ಕುಸಿದಿವೆ. ಕಳೆದ ವಾರ ದಾಖಲಾಗಿದ್ದ 5.40 ಡಾಲರ್ ನ ಹಿಂದಿನ ಕನಿಷ್ಠ ಮಟ್ಟವನ್ನೂ ಇದು ಮೀರಿಸಿದೆ. ಈ ಮೂಲಕ ಕಂಪೆನಿಯ ಷೇರುಗಳು ಸಾರ್ವಕಾಲಿಕ ಕನಿಷ್ಠ ಮಟ್ಟ ತಲುಪಿವೆ.
ನ. 3ರಂದು ನಡೆದ ಮಧ್ಯಂತರ ಚುನಾವಣೆಯಲ್ಲಿ ಡೆಮೋಕ್ರಾಟ್ ಗಳು ಸೆನೆಟ್ ಮತ್ತು ಪ್ರತಿನಿಧಿಗಳ ಸಭೆ ಎರಡರ ಮೇಲೂ ಹಿಡಿತ ಸಾಧಿಸಿದ್ದಾರೆ. ಚುನಾವಣಾ ಫಲಿತಾಂಶ ಸ್ಪಷ್ಟವಾಗುವ ಮುನ್ನ ಅಂದಿನ ವಹಿವಾಟಿನಲ್ಲಿ ಟ್ರಂಪ್ ಮೀಡಿಯಾ ಷೇರುಗಳು ಸುಮಾರು ಶೇ. 5ರಷ್ಟು ಏರಿಕೆ ಕಂಡಿದ್ದವು. ಆದರೆ, ಡೆಮೋಕ್ರಾಟ್ ಗಳ ಗೆಲುವು ಖಚಿತವಾಗುತ್ತಿದ್ದಂತೆ ಆ ಏರಿಕೆಯ ಬಹುಪಾಲು ಲಾಭ ಕಳೆದುಕೊಂಡವು ಎಂದು 24/7 ವಾಲ್ ಸ್ಟ್ರೀಟ್ ವರದಿ ಮಾಡಿದೆ.
►2026ರಲ್ಲಿ ಶೇ. 55ಕ್ಕೂ ಅಧಿಕ ಕುಸಿತ
ಟ್ರಂಪ್ ಮೀಡಿಯಾ ಷೇರುಗಳು 2026ರಲ್ಲಿ ಈಗಾಗಲೇ ಭಾರಿ ಕುಸಿತ ದಾಖಲಿಸಿವೆ. ಈ ವರ್ಷ ಷೇರುಗಳ ಮೌಲ್ಯ ಶೇ. 55ಕ್ಕೂ ಹೆಚ್ಚು ಕುಸಿದಿದೆ ಎಂದು ಫೋರ್ಬ್ಸ್ ವರದಿ ತಿಳಿಸಿದೆ. ಮತ್ತೊಂದು ಮಾರುಕಟ್ಟೆ ವರದಿಯ ಪ್ರಕಾರ, ವರ್ಷದ ಆರಂಭದಿಂದ ಈವರೆಗಿನ ಕುಸಿತ ಶೇ. 60ರಷ್ಟಿದೆ.
ಕಳೆದ ಒಂದು ತಿಂಗಳಲ್ಲೇ ಷೇರುಗಳ ಮೌಲ್ಯ ಸುಮಾರು ಶೇ. 41ರಷ್ಟು ಕುಸಿದಿದೆ. ಇತ್ತೀಚಿನ ಚುನಾವಣಾ ಫಲಿತಾಂಶದಿಂದ ಉಂಟಾದ ಕುಸಿತಕ್ಕೂ ಮುನ್ನವೇ ಕಂಪೆನಿ ಷೇರು ಮಾರುಕಟ್ಟೆಯಲ್ಲಿ ಒತ್ತಡ ಎದುರಿಸುತ್ತಿತ್ತು ಎಂದು 24/7 ವಾಲ್ ಸ್ಟ್ರೀಟ್ ವರದಿ ಮಾಡಿದೆ.
►238.1 ಮಿಲಿಯನ್ ಡಾಲರ್ ನಷ್ಟ
ಷೇರುಗಳ ಇತ್ತೀಚಿನ ಕುಸಿತಕ್ಕೂ ಮುನ್ನವೇ ಟ್ರಂಪ್ ಮೀಡಿಯಾ ಹಣಕಾಸಿನ ಒತ್ತಡದಲ್ಲಿತ್ತು. 2026ರ ಎರಡನೇ ತ್ರೈಮಾಸಿಕದಲ್ಲಿ ಕಂಪೆನಿ 238.1 ಮಿಲಿಯನ್ ಡಾಲರ್ ನಿವ್ವಳ ನಷ್ಟ ದಾಖಲಿಸಿತ್ತು. ಇದೇ ಅವಧಿಯಲ್ಲಿ ಕಂಪೆನಿಯ ಆದಾಯ ಕೇವಲ 1.7 ಮಿಲಿಯನ್ ಡಾಲರ್ ಆಗಿತ್ತು ಎಂದು ಇನ್ವೆಸ್ಟರ್ಸ್ಹಬ್ ವರದಿ ಮಾಡಿದೆ.
ಈ ನಷ್ಟದ ಬಹುಪಾಲು ಡಿಜಿಟಲ್ ಸ್ವತ್ತುಗಳು ಮತ್ತು ಇಕ್ವಿಟಿ ಸೆಕ್ಯುರಿಟಿಗಳ ಮೇಲಿನ 190.4 ಮಿಲಿಯನ್ ಡಾಲರ್ ಅವಾಸ್ತವಿಕ ನಷ್ಟದಿಂದ ಉಂಟಾಗಿತ್ತು. ಇದರ ಜತೆಗೆ ಕಂಪೆನಿ 25.6 ಮಿಲಿಯನ್ ಡಾಲರ್ ಕಾನೂನು ವೆಚ್ಚವನ್ನೂ ದಾಖಲಿಸಿತ್ತು.
►ವಿಲೀನಕ್ಕೆ ಇನ್ನೂ ಅನುಮೋದನೆ ಬಾಕಿ
ಟ್ರಂಪ್ ಮೀಡಿಯಾದ ವಿಲೀನ ಪ್ರಕ್ರಿಯೆ ಇನ್ನೂ ಪೂರ್ಣಗೊಂಡಿಲ್ಲ. ಒಪ್ಪಂದ ಮುಂದುವರಿಯಲು ಷೇರುದಾರರು ಮತ್ತು ನಿಯಂತ್ರಕ ಸಂಸ್ಥೆಗಳ ಅನುಮೋದನೆ ಅಗತ್ಯವಿದೆ.
ನ. 9ರಂದು ಅಮೆರಿಕದ ಷೇರು ಮಾರುಕಟ್ಟೆ ವಹಿವಾಟು ಮುಕ್ತಾಯಗೊಂಡ ಬಳಿಕ ಕಂಪೆನಿ 2026ರ ಮೂರನೇ ತ್ರೈಮಾಸಿಕದ ಹಣಕಾಸು ಫಲಿತಾಂಶಗಳನ್ನು ಪ್ರಕಟಿಸಲಿದೆ. ಅದೇ ಸಂಜೆ ಗಳಿಕೆಯ ಕುರಿತ ಸಭೆಯನ್ನೂ ನಡೆಸಲು ಯೋಜಿಸಿದೆ.
