ವಾಶಿಂಗ್ಟನ್ ವಿಮಾನ ಅಪಘಾತ: ಈ ದುರಂತವನ್ನು ತಪ್ಪಿಸಬಹುದಿತ್ತು ಎಂದ ಡೊನಾಲ್ಡ್ ಟ್ರಂಪ್

ವಾಶಿಂಗ್ಟನ್: ರೊನಾಲ್ಡ್ ರೇಗನ್ ರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಅಮೆರಿಕದ ಸೇನಾ ಹೆಲಿಕಾಪ್ಟರ್ ವೊಂದು ಪ್ರಯಾಣಿಕ ವಿಮಾನಕ್ಕೆ ಢಿಕ್ಕಿ ಹೊಡೆದ ಪರಿಣಾಮ ವಿಮಾನ ನದಿಗೆ ಪತನಗೊಂಡಿದ್ದು, ಈ ಅವಘಡದಲ್ಲಿ ಹಲವರು ಮೃತಪಟ್ಟಿರುವ ಶಂಕೆ ವ್ಯಕ್ತವಾಗಿದೆ. ಈಗಾಗಲೇ 18 ಮಂದಿಯ ಮೃತದೇಹ ಪತ್ತೆಯಾಗಿದೆ.

ಈ ಕುರಿತು ಸಾಮಾಜಿಕ ಮಾಧ್ಯಮ ‘ಟ್ರುತ್’ನಲ್ಲಿ ಪೋಸ್ಟ್ ಮಾಡಿರುವ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, “ಇಂದು ಎಂತಹ ಭಯಾನಕ ರಾತ್ರಿ? ಎಲ್ಲರನ್ನೂ ದೇವರು ಆಶೀರ್ವದಿಸಲಿ” ಎಂದು ಪ್ರಾರ್ಥಿಸಿದ್ದಾರೆ.

“ವಿಮಾನ ನಿಲ್ದಾಣದತ್ತ ಆಗಮಿಸುತ್ತಿದ್ದ ವಿಮಾನ ದೈನಂದಿನ ಮಾರ್ಗದಲ್ಲಿ ಪ್ರಯಾಣಿಸುತ್ತಿತ್ತು. ಆದರೆ, ಹೆಲಿಕಾಪ್ಟರ್ ನೇರವಾಗಿ ವಿಮಾನದತ್ತ ಮುನ್ನುಗ್ಗಿತ್ತು. ಇದು ಶುಭ್ರವಾದ ರಾತ್ರಿಯಾಗಿದ್ದು, ವಿಮಾನದಲ್ಲಿ ದೀಪಗಳು ಉರಿಯುತ್ತಿದ್ದವು. ಹೆಲಿಕಾಪ್ಟರ್ ಮೇಲೆ ಅಥವಾ ಕೆಳಕ್ಕೆ ಏಕೆ ಹೋಗಲಿಲ್ಲ ಅಥವಾ ತಿರುವು ಪಡೆದುಕೊಂಡಿಲ್ಲ?” ಎಂದು ಅವರು ಪ್ರಶ್ನಿಸಿದ್ದಾರೆ.

“ನಿಯಂತ್ರಣ ಗೋಪುರ ವಿಮಾನವನ್ನು ಕಂಡಿದೆ ಎನ್ನುವ ಬದಲು ಹೆಲಿಕಾಪ್ಟರ್ ಗೆ ಏನು ಮಾಡಬೇಕೆಂದು ಏಕೆ ಸೂಚಿಸಿಲ್ಲ? ಇದೊಂದು ಕೆಟ್ಟ ಪರಿಸ್ಥಿತಿಯಾಗಿದ್ದು, ಈ ದುರಂತವನ್ನು ತಪ್ಪಿಸಬಹುದಿತ್ತು” ಎಂದು ಅವರು ವಿಷಾದ ವ್ಯಕ್ತಪಡಿಸಿದ್ದಾರೆ.

ವಾಶಿಂಗ್ಟನ್ ಡಿಸಿ ಸಮೀಪದಲ್ಲಿರುವ ಪೊಟೊಮ್ಯಾಕ್ ನದಿಯಲ್ಲಿ ರಕ್ಷಣಾ ಕಾರ್ಯಾಚರಣೆ ಪ್ರಗತಿಯಲ್ಲಿದೆ.