ಇರಾನ್‌ ನಿಂದ ಹತ್ಯೆ ಬೆದರಿಕೆ: ಟ್ರಂಪ್‌ ರನ್ನು ವಿಮಾನಕ್ಕೆ ಆಹಾರ ಪೂರೈಸುವ ಟ್ರಕ್‌ನಲ್ಲಿ ಕರೆದೊಯ್ದು ರಹಸ್ಯವಾಗಿ ಬೇರೆ ವಿಮಾನಕ್ಕೆ ಸ್ಥಳಾಂತರ: ‘ವಾಷಿಂಗ್ಟನ್ ಪೋಸ್ಟ್’ ವರದಿ

ವಾಷಿಂಗ್ಟನ್: ಇರಾನ್‌ ನಿಂದ ಹತ್ಯೆ ಬೆದರಿಕೆ ಎದುರಿಸುತ್ತಿರುವ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ತುರ್ಕಿಯೆಯಿಂದ ಅಮೆರಿಕಕ್ಕೆ ಮರಳುವಾಗ ನಿಗದಿಯಾಗಿದ್ದ ಏರ್ ಫೋರ್ಸ್ ಒನ್ ವಿಮಾನದಲ್ಲಿ ಪ್ರಯಾಣಿಸಿರಲಿಲ್ಲ. ಬದಲಿಗೆ, ಅವರನ್ನು ವಿಮಾನಕ್ಕೆ ಆಹಾರ ಪೂರೈಸುವ ಟ್ರಕ್‌ ನಲ್ಲಿ ರಹಸ್ಯವಾಗಿ ಕರೆದೊಯ್ದು C-32A ಮಿಲಿಟರಿ ವಿಮಾನಕ್ಕೆ ಹತ್ತಿಸಲಾಗಿತ್ತು ಎಂದು ‘ವಾಷಿಂಗ್ಟನ್ ಪೋಸ್ಟ್’ ವರದಿ ಮಾಡಿದೆ.

ಟ್ರಂಪ್ ಏರ್ ಫೋರ್ಸ್ ಒನ್‌ನಲ್ಲೇ ಪ್ರಯಾಣಿಸುತ್ತಿದ್ದಾರೆ ಎಂಬ ಭಾವನೆ ಮೂಡಿಸಲು ಆ ವಿಮಾನವನ್ನು ಟರ್ಕಿಯಲ್ಲಿ ಉಳಿಸಲಾಗಿತ್ತು. ಟ್ರಂಪ್ ನಿಜವಾಗಿ ಯಾವ ವಿಮಾನದಲ್ಲಿ ಪ್ರಯಾಣಿಸುತ್ತಿದ್ದಾರೆ ಎಂಬುದು ಗೊತ್ತಾಗದಂತೆ ಈ ರಹಸ್ಯ ಕಾರ್ಯಾಚರಣೆ ನಡೆಸಲಾಗಿತ್ತು ಎಂದು ವರದಿ ತಿಳಿಸಿದೆ.

ಟ್ರಂಪ್ NATO ಶೃಂಗಸಭೆಯ ಬಳಿಕ ಖತರ್ ನೀಡಿದ ಹೊಸದಾಗಿ ನವೀಕರಿಸಿದ ಬೋಯಿಂಗ್ 747-8 ವಿಮಾನದಲ್ಲಿ ತುರ್ಕಿಯೆಗೆ ಆಗಮಿಸಿದ್ದರು. ಆದರೆ, ತುರ್ಕಿಯೆಯಿಂದ ವಾಪಸಾಗುವಾಗ ಹಳೆಯ ಏರ್ ಫೋರ್ಸ್ ಒನ್ ವಿಮಾನ ಬಳಸುವುದಾಗಿ ಶ್ವೇತಭವನ ಮೊದಲೇ ತಿಳಿಸಿತ್ತು.

ಟ್ರಂಪ್ ಕೂಡ ಹಳೆಯ ಏರ್ ಫೋರ್ಸ್ ಒನ್ ಬಳಸುವುದಾಗಿ ಹೇಳಿದ್ದರು. ಬ್ರಿಟನ್‌ ನಲ್ಲಿರುವ ಅಮೆರಿಕ ಸೇನಾ ಸಿಬ್ಬಂದಿಗೆ ಆ ವಿಮಾನವನ್ನು ನೋಡುವ ಅವಕಾಶ ಸಿಗಲಿದೆ ಎಂದೂ ಅವರು ಹೇಳಿದ್ದರು.

►ಮೊದಲು ಏರ್ ಫೋರ್ಸ್ ಒನ್ ಹತ್ತಿದರು

ಟ್ರಂಪ್ ಅಂಕಾರ ವಿಮಾನ ನಿಲ್ದಾಣಕ್ಕೆ ಲಿಮೋಸಿನ್‌ ನಲ್ಲಿ ಬಂದರು. ನಂತರ ಏರ್ ಫೋರ್ಸ್ ಒನ್ ಆಗಿ ಕಾರ್ಯನಿರ್ವಹಿಸುತ್ತಿದ್ದ ನೀಲಿ–ಬಿಳಿ ಬಣ್ಣದ ಬೋಯಿಂಗ್ 747 ವಿಮಾನದ ಮೆಟ್ಟಿಲುಗಳನ್ನು ಏರಿ ಒಳಗೆ ಹೋದರು. ಅವರು ಆ ವಿಮಾನದಲ್ಲೇ ಅಮೆರಿಕಕ್ಕೆ ತೆರಳುತ್ತಿದ್ದಾರೆ ಎಂಬುದು ಮಾಧ್ಯಮಗಳಿಗೆ ಸ್ಪಷ್ಟವಾಗುವಂತೆ ಈ ದೃಶ್ಯವನ್ನು ಚಿತ್ರೀಕರಿಸಲಾಯಿತು.

ಆದರೆ, ಟ್ರಂಪ್ ಆ ವಿಮಾನದಲ್ಲೇ ಉಳಿಯಲಿಲ್ಲ.

ಟ್ರಂಪ್ ಮತ್ತು ಅವರ ಕೆಲವು ಸಹಾಯಕರು ವಿಮಾನವನ್ನು ಹತ್ತಿದ ಬಳಿಕ, ವಿಮಾನದ ಇನ್ನೊಂದು ಬದಿಗೆ ವಿಮಾನಕ್ಕೆ ಆಹಾರ ಪೂರೈಸುವ ಟ್ರಕ್ ಅನ್ನು ತರಲಾಯಿತು. ಸಾಮಾನ್ಯವಾಗಿ ವಿಮಾನಕ್ಕೆ ಆಹಾರ ಮತ್ತು ಇತರ ಸಾಮಗ್ರಿಗಳನ್ನು ಪೂರೈಸಲು ಬಳಸುವ ಈ ಟ್ರಕ್‌ ನ ಕಂಟೇನರ್ ಅನ್ನು ಹೈಡ್ರಾಲಿಕ್ ವ್ಯವಸ್ಥೆಯ ಮೂಲಕ ವಿಮಾನದ ಬಾಗಿಲಿನ ಎತ್ತರಕ್ಕೆ ಎತ್ತಲಾಯಿತು.

ಟ್ರಂಪ್ ಹಾಗೂ ಅವರ ಸಹಾಯಕರು ಈ ವ್ಯವಸ್ಥೆಯ ಮೂಲಕ ಮಾಧ್ಯಮಗಳ ಕಣ್ಣಿಗೆ ಬೀಳದೆ ವಿಮಾನದಿಂದ ಹೊರಬಂದಿದ್ದಾರೆ ಎಂದು ವರದಿಯಾಗಿದೆ.

►ಟ್ರಕ್‌ ನಲ್ಲಿ C-32A ವಿಮಾನದತ್ತ

ನಂತರ ಟ್ರಂಪ್ ಅವರನ್ನು ಅದೇ ವಿಮಾನಕ್ಕೆ ಆಹಾರ ಪೂರೈಸುವ ಟ್ರಕ್‌ ನಲ್ಲಿ ವಿಮಾನ ನಿಲ್ದಾಣದ ಇನ್ನೊಂದು ಭಾಗಕ್ಕೆ ಕರೆದೊಯ್ಯಲಾಯಿತು. ಟ್ರಕ್ ಸಮೀಪದಲ್ಲಿದ್ದ C-32A ಮಿಲಿಟರಿ ವಿಮಾನದ ಬಳಿ ತಲುಪಿತು. ಟ್ರಂಪ್ ಆ C-32A ವಿಮಾನವನ್ನು ಹತ್ತಿದರು ಎಂದು ವರದಿಯಾಗಿದೆ.

C-32A ಹಿರಿಯ ಅಮೆರಿಕ ಸರಕಾರಿ ಅಧಿಕಾರಿಗಳನ್ನು ಸಾಗಿಸಲು ಬಳಸುವ ಮಾರ್ಪಡಿಸಿದ ಬೋಯಿಂಗ್ 757 ವಿಮಾನವಾಗಿದೆ. ಸಾಮಾನ್ಯವಾಗಿ ಅಧ್ಯಕ್ಷರು ಅಥವಾ ಉಪಾಧ್ಯಕ್ಷರ ಪ್ರಯಾಣಕ್ಕಾಗಿ ಕೂಡ ಇದನ್ನು ಬಳಸಲಾಗುತ್ತದೆ. ಉಪಾಧ್ಯಕ್ಷರು ಪ್ರಯಾಣಿಸುವಾಗ ಇದಕ್ಕೆ ಸಾಮಾನ್ಯವಾಗಿ ‘ಏರ್ ಫೋರ್ಸ್ ಟು’ ಕಾಲ್‌ಸೈನ್ ಬಳಸಲಾಗುತ್ತದೆ.

‘ದಿ ವಾಷಿಂಗ್ಟನ್ ಪೋಸ್ಟ್’ ಪರಿಶೀಲಿಸಿದ ದೃಶ್ಯಾವಳಿಗಳಲ್ಲಿ ಆಹಾರ ಪೂರೈಸುವ ಟ್ರಕ್ ಟಾರ್ಮ್ಯಾಕ್ ಮೂಲಕ C-32A ವಿಮಾನದತ್ತ ಸಾಗುತ್ತಿರುವುದು ಕಂಡುಬಂದಿದೆ. ಕ್ಯಾಮೆರಾಗಳ ಗಮನ ಬೇರೆಡೆ ಇದ್ದಾಗ ಟ್ರಕ್ ಕೆಲಕಾಲ ಯಾರ ಕಣ್ಣಿಗೂ ಬೀಳಲಿಲ್ಲ. ಬಳಿಕ ಸೂಟ್ ಧರಿಸಿದ್ದ ವ್ಯಕ್ತಿಯೊಬ್ಬರು ಟ್ರಕ್‌ ನ ಕ್ಯಾಬಿನ್‌ ನಿಂದ ಇಳಿದು C-32A ವಿಮಾನದ ಮೆಟ್ಟಿಲುಗಳನ್ನು ಏರುತ್ತಿರುವುದು ಕಂಡುಬಂದಿದೆ.

ಏರ್ ಫೋರ್ಸ್ ಒನ್ ಏಕೆ ಉಳಿಸಲಾಗಿತ್ತು?

ಟ್ರಂಪ್ C-32A ವಿಮಾನಕ್ಕೆ ಹತ್ತಿದರೂ, ಅವರು ಏರ್ ಫೋರ್ಸ್ ಒನ್‌ ನಲ್ಲೇ ಇದ್ದಾರೆ ಎಂದು ತೋರಿಸಲು ಆ ದೊಡ್ಡ ವಿಮಾನವನ್ನು ಅಲ್ಲಿಯೇ ಉಳಿಸಲಾಗಿತ್ತು.

ಹೀಗಾಗಿ ಪತ್ರಕರ್ತರು ಹಾಗೂ ಶ್ವೇತಭವನದ ಕೆಲವು ಸಿಬ್ಬಂದಿ ಟ್ರಂಪ್ ತಮ್ಮೊಂದಿಗೆ ಏರ್ ಫೋರ್ಸ್ ಒನ್‌ ನಲ್ಲೇ ಪ್ರಯಾಣಿಸುತ್ತಿದ್ದಾರೆ ಎಂದು ನಂಬಿದ್ದರು. ವಾಸ್ತವದಲ್ಲಿ ಟ್ರಂಪ್ C-32A ವಿಮಾನದಲ್ಲಿದ್ದರು. ಇದರಿಂದ ಟ್ರಂಪ್ ಯಾವ ವಿಮಾನದಲ್ಲಿ ಪ್ರಯಾಣಿಸುತ್ತಿದ್ದಾರೆ ಎಂಬುದು ಹಲವು ಗಂಟೆಗಳ ಕಾಲ ಯಾರಿಗೂ ತಿಳಿಯದಂತೆ ರಹಸ್ಯವಾಗಿ ಇಡಲಾಗಿತ್ತು.

ಅಧ್ಯಕ್ಷರ ಪ್ರಯಾಣದ ಭಾಗವಾಗಿ ಎರಡು ದೊಡ್ಡ ಬೋಯಿಂಗ್ 747 ವಿಮಾನಗಳ ಜತೆಗೆ C-32A ವಿಮಾನವನ್ನೂ ತುರ್ಕಿಯೆಗೆ ಕಳುಹಿಸಲಾಗಿತ್ತು.

ಜುಲೈ 8ರ ಸಂಜೆ ಖತರ್ ಒದಗಿಸಿದ ಹೊಸ ಬೋಯಿಂಗ್ 747-8 ವಿಮಾನ ತುರ್ಕಿಯೆಯಿಂದ ಹೊರಟಿತು. ಬಳಿಕ ಟ್ರಂಪ್ ಪ್ರಯಾಣಿಸುತ್ತಿದ್ದ C-32A ವಿಮಾನವೂ ತುರ್ಕಿಯೆಯಿಂದ ಹೊರಟಿತು. ಟ್ರಂಪ್ ಏರ್ ಫೋರ್ಸ್ ಒನ್‌ನಲ್ಲಿದ್ದಾರೆ ಎಂಬ ಭಾವನೆ ಮೂಡಿಸಲು ಬಳಸಲಾಗಿದ್ದ ಹಳೆಯ ಏರ್ ಫೋರ್ಸ್ ಒನ್ ವಿಮಾನವೂ ಹೊರಟಿತು. ಈ ಎರಡು ವಿಮಾನಗಳು ಬ್ರಿಟನ್‌ ನಲ್ಲಿರುವ ಅಮೆರಿಕ ಸೇನಾ ವಿಮಾನ ನಿಲ್ದಾಣಕ್ಕೆ ಕೆಲವೇ ನಿಮಿಷಗಳ ಅಂತರದಲ್ಲಿ ತಲುಪಿದವು ಎಂದು ‘ದಿ ವಾಷಿಂಗ್ಟನ್ ಪೋಸ್ಟ್’ ವರದಿ ಮಾಡಿದೆ.

ಇದೇ ಮೊದಲಲ್ಲ:

ಅಧ್ಯಕ್ಷರನ್ನು ರಹಸ್ಯವಾಗಿ ಮತ್ತೊಂದು ವಿಮಾನಕ್ಕೆ ಸ್ಥಳಾಂತರಿಸಿ, ಜನರನ್ನು ದಾರಿ ತಪ್ಪಿಸಲು ಮತ್ತೊಂದು ವಿಮಾನ ಬಳಸುವ ತಂತ್ರ ಅಪರೂಪವಾದರೂ ಇದೇ ಮೊದಲಲ್ಲ.

2001ರ ಸೆಪ್ಟೆಂಬರ್ 11ರ ಭಯೋತ್ಪಾದಕ ದಾಳಿಗಳ ಬಳಿಕ ಜಾರ್ಜ್ W. ಬುಷ್ ಆಡಳಿತವು ಅಧ್ಯಕ್ಷರ ನಿಖರ ಸ್ಥಳವನ್ನು ರಹಸ್ಯವಾಗಿಡಲು ಇದೇ ರೀತಿಯ ಗೌಪ್ಯತಾ ತಂತ್ರ ಬಳಸಿತ್ತು ಎಂದು ‘ದಿ ವಾಷಿಂಗ್ಟನ್ ಪೋಸ್ಟ್’ ವರದಿ ಮಾಡಿದೆ. ಆದರೆ, ಬುಷ್ ಆಡಳಿತ ಅಧ್ಯಕ್ಷರ ನಿಜವಾದ ಸ್ಥಳವನ್ನು ಬಹಿರಂಗಪಡಿಸಿರಲಿಲ್ಲ; ಅವರು ಬೇರೆ ಸ್ಥಳದಲ್ಲಿದ್ದಾರೆ ಎಂದು ಸಾರ್ವಜನಿಕರಿಗೆ ಸುಳ್ಳು ಹೇಳಿರಲಿಲ್ಲ.

2000ರಲ್ಲಿ ಅಧ್ಯಕ್ಷ ಬಿಲ್ ಕ್ಲಿಂಟನ್ ಪಾಕಿಸ್ತಾನಕ್ಕೆ ಭೇಟಿ ನೀಡಿದ್ದ ಸಂದರ್ಭದಲ್ಲಿಯೂ ಇಂತಹ ತಂತ್ರ ಬಳಸಲಾಗಿತ್ತು. ಟಿವಿ ಕ್ಯಾಮೆರಾಗಳು ಏರ್ ಫೋರ್ಸ್ ಒನ್ ಅನ್ನು ಹಿಂಬಾಲಿಸುತ್ತಿದ್ದ ಸಾಮಾನ್ಯ ಬಿಳಿ ವಿಮಾನದಿಂದ ಕ್ಲಿಂಟನ್ ಇಳಿಯುತ್ತಿರುವುದನ್ನು ದಾಖಲಿಸಿದ್ದವು. ಬಳಿಕ ಅವರು ಸಾರ್ವಜನಿಕವಾಗಿ ಕಾಣಿಸಿಕೊಂಡಿದ್ದ ಅಧ್ಯಕ್ಷರ ಮಾನದಲ್ಲಿ ಪ್ರಯಾಣಿಸಿರಲಿಲ್ಲ ಎಂಬುದು ತಿಳಿದುಬಂದಿತ್ತು.

ಕಳೆದ ಮೂರು ದಶಕಗಳಲ್ಲಿ ಇಂತಹ ತಂತ್ರವನ್ನು ಹಲವು ಬಾರಿ ಬಳಸಲಾಗಿದೆ. ಅಧ್ಯಕ್ಷರಿಗೆ ಭದ್ರತಾ ಅಪಾಯ ಇದ್ದಾಗ ಅಥವಾ ಅವರು ಅಪಾಯಕಾರಿ ಪ್ರದೇಶಕ್ಕೆ ಭೇಟಿ ನೀಡಿದಾಗ, ಏರ್ ಫೋರ್ಸ್ ಒನ್ ಬದಲಿಗೆ ಮತ್ತೊಂದು ವಿಮಾನವನ್ನು ಬಳಸಲಾಗುತ್ತಿತ್ತು ಎಂದು ಅಮೆರಿಕದ ಮಾಜಿ ಅಧಿಕಾರಿಯೊಬ್ಬರು ‘ದಿ ವಾಷಿಂಗ್ಟನ್ ಪೋಸ್ಟ್’ಗೆ ತಿಳಿಸಿದ್ದಾರೆ

ಖತರ್ ನಿಂದ ಬಂದ ವಿಮಾನದ ಭದ್ರತೆ ಬಗ್ಗೆ ಪ್ರಶ್ನೆ:

ಏರ್ ಫೋರ್ಸ್ ಒನ್ ಆಗಿ ಬಳಸಲು ಖತರ್ ಅಮೆರಿಕಕ್ಕೆ ಉಡುಗೊರೆಯಾಗಿ ನೀಡಿದ ಹೊಸ ಬೋಯಿಂಗ್ 747-8 ವಿಮಾನದ ಭದ್ರತೆಯ ಬಗ್ಗೆಯೂ ಪ್ರಶ್ನೆಗಳು ಎದ್ದಿವೆ. ಪರಂಪರೆಯ ಏರ್ ಫೋರ್ಸ್ ಒನ್ ವಿಮಾನದಲ್ಲಿರುವ ಕೆಲವು ರಕ್ಷಣಾತ್ಮಕ ವ್ಯವಸ್ಥೆಗಳು ಖತರ್ ನೀಡಿದ ವಿಮಾನದಲ್ಲಿ ಇಲ್ಲ ಎಂದು ‘ದಿ ವಾಷಿಂಗ್ಟನ್ ಪೋಸ್ಟ್’ ವರದಿ ಮಾಡಿದೆ.

ಹೊಸ ವಿಮಾನದಲ್ಲಿ ಇನ್ನಷ್ಟು ಬದಲಾವಣೆಗಳನ್ನು ಮಾಡಲಾಗುವುದು ಎಂದು ಟ್ರಂಪ್ ಕಳೆದ ತಿಂಗಳು ಹೇಳಿದ್ದರು. ನೂರಾರು ಮಿಲಿಯನ್ ಡಾಲರ್ ವೆಚ್ಚದ ನವೀಕರಣಗಳ ಬಳಿಕ ಈ ವಿಮಾನ ಇತ್ತೀಚೆಗೆ ಸೇವೆಗೆ ಸೇರ್ಪಡೆಯಾಗಿತ್ತು.

‘ದಿ ವಾಷಿಂಗ್ಟನ್ ಪೋಸ್ಟ್’ ತನ್ನ ವರದಿಯ ಅಂಶಗಳನ್ನು ಶ್ವೇತಭವನದ ಮುಂದಿಟ್ಟ ಬಳಿಕ, ಖತರ್ ಒದಗಿಸಿದ ವಿಮಾನದ ಭದ್ರತೆಯನ್ನು ಶ್ವೇತಭವನ ಸಮರ್ಥಿಸಿಕೊಂಡಿದೆ.

ಹೊಸ ಏರ್ ಫೋರ್ಸ್ ಒನ್ ವಿಮಾನದಲ್ಲಿ ಟ್ರಂಪ್ ಮತ್ತು ಅವರ ಸಿಬ್ಬಂದಿಯ ಸುರಕ್ಷತೆಗೆ ಅಗತ್ಯವಾದ ಉನ್ನತ ಮಟ್ಟದ ಭದ್ರತಾ ವ್ಯವಸ್ಥೆಗಳಿವೆ ಎಂದು ಶ್ವೇತಭವನದ ಸಂವಹನ ನಿರ್ದೇಶಕ ಸ್ಟೀವನ್ ಚೆಯುಂಗ್ ಹೇಳಿದ್ದಾರೆ.

ಟ್ರಂಪ್‌ಗೆ ಇರುವ ಭದ್ರತಾ ಬೆದರಿಕೆಗಳ ಬಗ್ಗೆ ಸರಕಾರ ಈಗಾಗಲೇ ಮಾಹಿತಿ ನೀಡಿದೆ ಎಂದೂ ಅವರು ತಿಳಿಸಿದ್ದಾರೆ. ಟ್ರಂಪ್‌ ರನ್ನು ಸುರಕ್ಷಿತವಾಗಿಡಲು ಅಗತ್ಯವಿರುವ ಎಲ್ಲ ಕ್ರಮಗಳನ್ನು ಸರಕಾರ ಕೈಗೊಳ್ಳುತ್ತಿದೆ ಎಂದು ಚೆಯುಂಗ್ ಹೇಳಿದ್ದಾರೆ.