ಜಾಗತಿಕ ಇಸ್ಲಾಂ ಬೆದರಿಕೆ ಕುರಿತು ಅಮೆರಿಕನ್ನರಿಗೆ ಸುಳ್ಳು ಹೇಳಿದ್ದೆ: ಟಕರ್ ಕಾರ್ಲ್ಸನ್ ತಪ್ಪೊಪ್ಪಿಗೆ

ಹೊಸದಿಲ್ಲಿ: ಸೆಪ್ಟೆಂಬರ್ 11ರ ಭಯೋತ್ಪಾದಕ ದಾಳಿಯ ಬಳಿಕ ಅಮೆರಿಕದ ಜನತೆಗೆ ಜಾಗತಿಕ ಇಸ್ಲಾಂನಿಂದ ಬೆದರಿಕೆ ಇದೆ ಎಂದು ತಪ್ಪು ಮಾಹಿತಿ ನೀಡಲಾಗಿತ್ತು ಹಾಗೂ ತಾನೂ ಕೂಡಾ ಅದನ್ನು ನಂಬಿ ದೂರದರ್ಶನದಲ್ಲಿ ಮುಸ್ಲಿಮರ ಬಗ್ಗೆ ಸುಳ್ಳು ಮಾಹಿತಿಗಳನ್ನು ಪ್ರಸಾರ ಮಾಡಿದ್ದೆ ಎಂದು ಅಮೆರಿಕದ ಫಾಕ್ಸ್ ನ್ಯೂಸ್ ಮಾಜಿ ನಿರೂಪಕ ಟಕರ್ ಕಾರ್ಲ್ಸನ್ ಹೇಳಿದ್ದಾರೆ.

ಸ್ಕೈ ನ್ಯೂಸ್ ಪತ್ರಕರ್ತೆ ಯಾಲ್ದಾ ಹಕೀಂ ಅವರಿಗೆ ನೀಡಿದ ಸಂದರ್ಶನದಲ್ಲಿ ಮಾತನಾಡಿದ ಕಾರ್ಲ್ಸನ್, "ಸೆಪ್ಟೆಂಬರ್ 11ರ ದಾಳಿಯ ಬಳಿಕ ಅಮೆರಿಕಕ್ಕೆ ಜಾಗತಿಕ ಇಸ್ಲಾಂನಿಂದ ಅಪಾಯವಿದೆ ಎಂದು ನಮಗೆ ಹೇಳಲಾಯಿತು. ಆದರೆ, ನಂತರ ಅದು ನಿಜವಲ್ಲ ಎಂಬುದು ನನಗೆ ತಿಳಿಯಿತು" ಎಂದು ಹೇಳಿದ್ದಾರೆ.

ಟ್ರಂಪ್ ಆಡಳಿತದ ಟೀಕಾಕಾರರಾಗಿರುವ ಕಾರ್ಲ್ಸನ್, ಫಾಕ್ಸ್ ನ್ಯೂಸ್ ವಾಹಿನಿಯಲ್ಲಿ ನಿರೂಪಕರಾಗಿದ್ದ ಸಂದರ್ಭದಲ್ಲಿ ತಾವೇ ದೂರದರ್ಶನದಲ್ಲಿ ಮುಸ್ಲಿಮರ ಕುರಿತು ತಪ್ಪು ಮತ್ತು ದಾರಿತಪ್ಪಿಸುವ ಮಾಹಿತಿಗಳನ್ನು ಪ್ರಸಾರ ಮಾಡಿದ್ದೆ ಎಂದು ಒಪ್ಪಿಕೊಂಡಿದ್ದಾರೆ. ಅಲ್ಲದೆ, ತಾವು ಎಂದಿಗೂ ರಿಪಬ್ಲಿಕನ್ ಪಕ್ಷದ ಕಟ್ಟಾ ಬೆಂಬಲಿಗರಾಗಿರಲಿಲ್ಲ ಎಂದೂ ಹೇಳಿದ್ದಾರೆ.

ಪ್ರಸ್ತುತ ನಡೆಯುತ್ತಿರುವ ಯುದ್ಧಗಳಿಂದಾಗಿ ಅಮೆರಿಕದ ಪರಿಸ್ಥಿತಿ ಜಟಿಲವಾಗಿದೆಯೇ ಎಂಬ ಯಾಲ್ದಾ ಹಕೀಂ ಅವರ ಪ್ರಶ್ನೆಗೆ ಉತ್ತರಿಸಿದ ಕಾರ್ಲ್ಸನ್, "ಖಂಡಿತವಾಗಿಯೂ ನಾವು ಅದರ ಬೆಲೆಯನ್ನು ತೆತ್ತಿದ್ದೇವೆ" ಎಂದು ಹೇಳಿದ್ದಾರೆ.

"ನಾನು ರಿಪಬ್ಲಿಕನ್ ಪಕ್ಷದ ಬಗ್ಗೆ ಅಸಮಾಧಾನಗೊಳ್ಳಲು ಕಾರಣವಾಗಿರುವ ಅಂಶಗಳಲ್ಲಿ ಇದೂ ಒಂದು. ಅದು ನನ್ನ ದೇಶ. ಅಲ್ಲಿ ನನ್ನ ತೆರಿಗೆಯ ಹಣವಿದೆ. ಇದು ನನ್ನ ವಿಶ್ವಾಸಾರ್ಹತೆಗೆ ಸಂಬಂಧಿಸಿದ ವಿಚಾರವಾಗಿದೆ. ನನ್ನ ಪೂರ್ವಜರು ನಿರ್ಮಿಸಿದ ದೇಶದ ನೈತಿಕ ಅಧಿಕಾರದ ಪ್ರಶ್ನೆಯೂ ಇದಾಗಿದೆ. ಹೀಗಾಗಿ, ನಾನು ಈ ವಿಷಯದಿಂದ ತೀವ್ರವಾಗಿ ತೊಂದರೆಗೊಳಗಾಗಿದ್ದೇನೆ" ಎಂದು ಅವರು ಹೇಳಿದ್ದಾರೆ.

ಇಸ್ರೇಲ್ ಕುರಿತು ಮಾತನಾಡಿದ ಕಾರ್ಲ್ಸನ್, "ಇಸ್ರೇಲ್‌ನಲ್ಲಿ ಒಂದು ರೀತಿಯ ಭಯ ಮತ್ತು ಅನುಮಾನಗಳ ಮನೋಭಾವವಿದೆ. ಆ ಮನೋಭಾವವೇ ಅವರ ರಾಜಕೀಯ ಮತ್ತು ಭದ್ರತಾ ದೃಷ್ಟಿಕೋನವನ್ನು ರೂಪಿಸಿದೆ. ಅಮೆರಿಕಕ್ಕೂ ಇಂತಹ ಮನೋಭಾವ ಹೊಸದೇನಲ್ಲ" ಎಂದು ಹೇಳಿದ್ದಾರೆ.

"9/11ರ ದಾಳಿಯ ಬಳಿಕ ಅಮೆರಿಕದಲ್ಲಿ ಭಯ ಮತ್ತು ಆತಂಕದ ವಾತಾವರಣ ನಿರ್ಮಾಣವಾಗಿತ್ತು. ಅದರ ಪರಿಣಾಮವಾಗಿ, ಜಾಗತಿಕ ಇಸ್ಲಾಂ ಅಮೆರಿಕಕ್ಕೆ ದೊಡ್ಡ ಬೆದರಿಕೆ ಎಂಬ ನಂಬಿಕೆಯನ್ನು ಜನರಲ್ಲಿ ಬಿತ್ತಲಾಯಿತು. ನಾನೂ ಕೂಡಾ ದೂರದರ್ಶನದಲ್ಲಿ ಮುಸ್ಲಿಮರನ್ನು ಹಿಂಸಾತ್ಮಕ ಮತ್ತು ಅಪಾಯಕಾರಿ ಧಾರ್ಮಿಕ ಗುಂಪಿನವರಂತೆ ಚಿತ್ರಿಸುವ ಸುಳ್ಳುಗಳನ್ನು ಪ್ರಸಾರ ಮಾಡಿದ್ದೆ. ಆಗ ನಾನು ಆ ಪ್ರಚಾರವನ್ನು ನಂಬಿದ್ದೆ ಮತ್ತು ತಪ್ಪು ಮಾಡಿದ್ದೆ" ಎಂದು ಕಾರ್ಲ್ಸನ್ ಒಪ್ಪಿಕೊಂಡಿದ್ದಾರೆ.

"ಎಲ್ಲ ಅರಬ್ಬರೂ ನನ್ನನ್ನು ಕೊಲ್ಲಲು ಬಯಸುತ್ತಾರೆ ಎಂದು ಇಸ್ರೇಲಿಯರು ನಂಬುತ್ತಾರೆ ಎಂಬುದನ್ನು ನಾನು ಅರ್ಥ ಮಾಡಿಕೊಂಡಿದ್ದೇನೆ. ಅವರು ನಮ್ಮನ್ನು ಕೊಲ್ಲುವ ಮುನ್ನ ನಾವೇ ಅವರನ್ನು ಕೊಲ್ಲಬೇಕು ಎಂಬುದು ಅವರ ನಂಬಿಕೆಯಾಗಿದೆ" ಎಂದೂ ಅವರು ಅಭಿಪ್ರಾಯಪಟ್ಟಿದ್ದಾರೆ.

2023ರಲ್ಲಿ ಫಾಕ್ಸ್ ನ್ಯೂಸ್ ವಾಹಿನಿಯಿಂದ ಟಕ್ಕರ್ ಕಾರ್ಲ್ಸನ್ ಅವರನ್ನು ಹೊರಹಾಕಿದ ಬಳಿಕ, ಅವರು ತಮ್ಮದೇ ಪಾಡ್‌ಕಾಸ್ಟ್ ಆರಂಭಿಸಿದ್ದಾರೆ. ಇರಾನ್ ವಿರುದ್ಧದ ಇಸ್ರೇಲ್‌ನ ಯುದ್ಧ ಪ್ರಯತ್ನಗಳಿಗೆ ಅಮೆರಿಕ ಬೆಂಬಲ ನೀಡಲು ನಿರ್ಧರಿಸಿದ ನಂತರ, ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಕುರಿತು ಅವರಿಗೆ ಭ್ರಮನಿರಸನವಾಗಿದೆ ಎಂದು ವರದಿಯಾಗಿದೆ.

ಇದರಿಂದಾಗಿ, 2024ರ ಅಧ್ಯಕ್ಷೀಯ ಚುನಾವಣೆಯಲ್ಲಿ ಡೊನಾಲ್ಡ್ ಟ್ರಂಪ್ ಅವರನ್ನು ಬೆಂಬಲಿಸಿದ್ದಕ್ಕಾಗಿ ಕಾರ್ಲ್ಸನ್ ತಮ್ಮ ಶ್ರೋತೃಗಳ ಕ್ಷಮೆ ಕೋರಿದ್ದಾರೆ. ಇದೇ ವೇಳೆ, ತಮ್ಮ ಮತ್ತೊಂದು ಪಾಡ್‌ಕಾಸ್ಟ್ ಕಾರ್ಯಕ್ರಮದಲ್ಲಿ ಡೊನಾಲ್ಡ್ ಟ್ರಂಪ್ ವಿರುದ್ಧ ವಾಗ್ದಾಳಿ ನಡೆಸಿದ ಅವರು, "ನಾನು ನಿಮ್ಮನ್ನು ಗಂಭೀರವಾಗಿ ಪರಿಗಣಿಸುವುದಿಲ್ಲ" ಎಂದು ಹೇಳಿದ್ದಾರೆ.