ಯಮನ್ ಸಂಘರ್ಷಕ್ಕೆ ಮರುಪ್ರವೇಶಿಸಲು UAE ಒಪ್ಪಿಗೆ: ವರದಿ

ಅಬುಧಾಬಿ: ಯಮನ್‍ನಲ್ಲಿ ಹೌತಿಗಳ ವಿರುದ್ಧ ಹೋರಾಡುತ್ತಿರುವ ಕೆಲವು ಸರಕಾರಿ ಪಡೆಗಳಿಗೆ ಆರ್ಥಿಕ ನೆರವನ್ನು ಪುನರಾರಂಭಿಸುವ ಮೂಲಕ ಯಮನ್ ಸಂಘರ್ಷಕ್ಕೆ ಮರುಪ್ರವೇಶಿಸಲು ಯುನೈಟೆಡ್ ಅರಬ್ ಎಮಿರೇಟ್ಸ್ (ಯುಎಇ) ಒಪ್ಪಿಗೆ ನೀಡಿದೆ ಎಂದು ಮೂಲಗಳು ತಿಳಿಸಿವೆ. ಇದಕ್ಕೆ ಪ್ರತಿಯಾಗಿ, ಯಮನ್‍ನಲ್ಲಿ ಹೌತಿ ವಿರೋಧಿ ಪಡೆಗಳಿಗೆ ವಾಯು ರಕ್ಷಣೆ ಒದಗಿಸಲು ಸೌದಿ ಅರೇಬಿಯಾ ಒಪ್ಪಿಕೊಂಡಿದೆ.

ಸೌದಿ ಅರೇಬಿಯಾವು ಪ್ರತಿದಿನ ಡ್ರೋನ್ ಮತ್ತು ಕ್ಷಿಪಣಿ ದಾಳಿಗಳನ್ನು ಎದುರಿಸುತ್ತಿದ್ದು, ಹೌತಿಗಳ ದಾಳಿಯಿಂದಾಗಿ ತನ್ನ ವಿಮಾನ ನಿಲ್ದಾಣಗಳು ಮತ್ತು ಕೆಲವು ಇಂಧನ ಮೂಲಸೌಕರ್ಯಗಳು ಅಸ್ತವ್ಯಸ್ತಗೊಂಡಿರುವುದರಿಂದ ಸಾಮಾನ್ಯ ಪರಿಸ್ಥಿತಿಯನ್ನು ಕಾಪಾಡಿಕೊಳ್ಳಲು ಹೆಣಗಾಡುತ್ತಿದೆ.

ದಕ್ಷಿಣದ ಪಡೆಗಳು - ಮುಖ್ಯವಾಗಿ ಜೈಂಟ್ ಬ್ರಿಗೇಡ್‍ಗಳು - ಹಿಂದೆ ಯುಎಇಯಿಂದ ತರಬೇತಿ ಮತ್ತು ಹಣಕಾಸು ನೆರವು ಪಡೆದಿದ್ದವು ಮತ್ತು ಹೌತಿ ವಿರೋಧಿ ಮಿಲಿಟರಿ ಒಕ್ಕೂಟದಲ್ಲಿ ಇವು ಅತ್ಯಂತ ಪರಿಣಾಮಕಾರಿ ಪಡೆಗಳೆಂದು ಪರಿಗಣಿಸಲ್ಪಟ್ಟಿವೆ. ಆದರೆ ಯುಎಇಯು ಜನವರಿಯಲ್ಲಿ ಯಮನ್‍ನಲ್ಲಿನ ತನ್ನ ಕಾರ್ಯಾಚರಣೆಗಳನ್ನು ಸ್ಥಗಿತಗೊಳಿಸಿ, ಹಣಕಾಸು ಪೂರೈಕೆಯನ್ನು ಕಡಿತಗೊಳಿಸಿತ್ತು. ಯಮನ್‍ನ ಭವಿಷ್ಯದ ಕುರಿತು ಯುಎಇ ಮತ್ತು ಸೌದಿ ಅರೇಬಿಯಾ ನಡುವಿನ ಆಳವಾದ ಭಿನ್ನಾಭಿಪ್ರಾಯಗಳನ್ನು ಬಗೆಹರಿಸುವ ನಿಟ್ಟಿನಲ್ಲಿ ಇದು ಮೊದಲ ಸ್ಪಷ್ಟ ಸೂಚನೆಯಾಗಿದೆ.