ರಷ್ಯಾ ವಿರುದ್ಧ ನಿರ್ಬಂಧ ಮಸೂದೆಗೆ ಅಮೆರಿಕ ಕಾಂಗ್ರೆಸ್ ಅಸ್ತು; ಭಾರತ, ಚೀನಾ ಸೇರಿದಂತೆ ರಷ್ಯಾ ತೈಲ ಖರೀದಿದಾರರ ಮೇಲೆ ಶೇ.100ರಷ್ಟು ಟ್ರಂಪ್ 'ಸುಂಕಷ್ಟ'?
ಡೊನಾಲ್ಡ್ ಟ್ರಂಪ್ | Photo: PTI
ವಾಷಿಂಗ್ಟನ್: ಉಕ್ರೇನ್ ನಲ್ಲಿನ ಯುದ್ಧಕ್ಕೆ ಸಂಬಂಧಿಸಿದಂತೆ ರಷ್ಯಾ ಮೇಲೆ ಮತ್ತಷ್ಟು ಒತ್ತಡ ಹೇರುವ ಉದ್ದೇಶದ ಹೊಸ ನಿರ್ಬಂಧಗಳ ಮಸೂದೆಗೆ ಅಮೆರಿಕ ಕಾಂಗ್ರೆಸ್ ಬುಧವಾರ ಅನುಮೋದನೆ ನೀಡಿದೆ.
ರಿಪಬ್ಲಿಕನ್ ಪಕ್ಷದ ನೇತೃತ್ವದ ಪ್ರತಿನಿಧಿಗಳ ಸಭೆ (ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್) ಮಸೂದೆಯನ್ನು 262–159 ಮತಗಳಿಂದ ಅಂಗೀಕರಿಸಿತು. ಇದರೊಂದಿಗೆ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅಧಿಕಾರಕ್ಕೆ ಮರಳಿದ ಬಳಿಕ ರಷ್ಯಾ ವಿರುದ್ಧ ಕೈಗೊಂಡಿರುವ ಅತ್ಯಂತ ಪ್ರಮುಖ ಶಾಸಕಾಂಗ ಕ್ರಮಕ್ಕೆ ಕಾಂಗ್ರೆಸ್ ಒಪ್ಪಿಗೆ ನೀಡಿದಂತಾಗಿದೆ.
ಕಳೆದ ತಿಂಗಳು ಸೆನೆಟ್ ನಲ್ಲಿ ಮಸೂದೆ 86–11 ಮತಗಳಿಂದ ಅಂಗೀಕಾರಗೊಂಡಿತ್ತು. ಮಸೂದೆಗೆ ಸಹಿ ಹಾಕುವುದಾಗಿ ಟ್ರಂಪ್ ಹೇಳಿದ್ದಾರೆ.
ರಷ್ಯಾದ ಇಂಧನ ಮತ್ತು ರಕ್ಷಣಾ ವಲಯಗಳು, ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಮತ್ತು ಇತರ ಹಿರಿಯ ಅಧಿಕಾರಿಗಳನ್ನು ಮಸೂದೆ ಗುರಿಯಾಗಿಸಿಕೊಂಡಿದೆ. ಪಾಶ್ಚಿಮಾತ್ಯ ದೇಶಗಳ ನಿರ್ಬಂಧಗಳನ್ನು ತಪ್ಪಿಸಲು ರಷ್ಯಾದ ತೈಲ ಸಾಗಿಸಲು ಬಳಸಲಾಗುತ್ತಿದೆ ಎನ್ನಲಾದ ಟ್ಯಾಂಕರ್ ಗಳ ಮೇಲೂ ಕ್ರಮ ಕೈಗೊಳ್ಳಲು ಮಸೂದೆಯಲ್ಲಿ ಅವಕಾಶವಿದೆ.
ರಷ್ಯಾದ ಯುದ್ಧಕ್ಕೆ ಹಣಕಾಸು ಒದಗಿಸುವ ಆದಾಯವನ್ನು ಕಡಿಮೆ ಮಾಡುವುದು ಮಸೂದೆಯ ಪ್ರಮುಖ ಉದ್ದೇಶ. ರಷ್ಯಾದ ತೈಲ ಮತ್ತು ಅನಿಲವನ್ನು ಹೆಚ್ಚಿನ ಪ್ರಮಾಣದಲ್ಲಿ ಖರೀದಿಸುವ ಭಾರತ ಮತ್ತು ಚೀನಾ ಸೇರಿದಂತೆ ದೇಶಗಳ ಮೇಲೆ ಶೇ.100ರಷ್ಟು ಸುಂಕ ವಿಧಿಸಲು ಟ್ರಂಪ್ ಗೆ ಅಧಿಕಾರ ನೀಡುವ ಅಂಶವೂ ಮಸೂದೆಯಲ್ಲಿದೆ.
ಸುಂಕದ ಅಧಿಕಾರಕ್ಕೆ ಡೆಮೋಕ್ರಾಟ್ ಗಳ ವಿರೋಧ
ಆದರೆ, ಟ್ರಂಪ್ ಗೆ ವ್ಯಾಪಕವಾಗಿ ಸುಂಕ ವಿಧಿಸುವ ಅಧಿಕಾರ ನೀಡಿರುವುದಕ್ಕೆ ಡೆಮೋಕ್ರಾಟ್ ಗಳಲ್ಲಿ ಭಿನ್ನಾಭಿಪ್ರಾಯ ವ್ಯಕ್ತವಾಗಿದೆ. ಉಕ್ರೇನ್ ಗೆ ಬಹುತೇಕ ಡೆಮೋಕ್ರಾಟ್ ಗಳು ಬೆಂಬಲ ನೀಡುತ್ತಿದ್ದರೂ, ವ್ಯಾಪಾರ ನೀತಿಗೆ ಸಂಬಂಧಿಸಿದಂತೆ ಟ್ರಂಪ್ ಗೆ ಹೆಚ್ಚಿನ ಅಧಿಕಾರ ನೀಡುವುದನ್ನು ಅವರು ವಿರೋಧಿಸಿದ್ದಾರೆ.
ಅಮೆರಿಕದ ಹೌಸ್ ಫಾರಿನ್ ಅಫೇರ್ಸ್ ಕಮಿಟಿಯ ಡೆಮೋಕ್ರಾಟ್ ಸದಸ್ಯ ಗ್ರೆಗೊರಿ ಮೀಕ್ಸ್ ಮಸೂದೆಯನ್ನು ಟೀಕಿಸಿದ್ದಾರೆ. ಮಸೂದೆಯಲ್ಲಿ ಗಂಭೀರ ದೋಷಗಳಿವೆ ಎಂದು ಅವರು ಹೇಳಿದ್ದಾರೆ.
“ಮಸೂದೆಯ ಮೂಲಕ ಅಮೆರಿಕದ ಜನರ ಮೇಲೆ ಹೊಸ ಆಮದು ತೆರಿಗೆ ವಿಧಿಸಲು ಟ್ರಂಪ್ಗೆ ಹೆಚ್ಚಿನ ಅಧಿಕಾರ ನೀಡಲಾಗಿದೆ. ಆದರೆ, ರಷ್ಯಾ ಮತ್ತು ಅದರ ಬೆಂಬಲಿಗರ ಮೇಲೆ ಹೊಸ ನಿರ್ಬಂಧ ವಿಧಿಸುವ ಹೊಣೆಗಾರಿಕೆಯನ್ನು ಕಡಿಮೆ ಮಾಡಲಾಗಿದೆ. ಶ್ವೇತಭವನದ ವಕೀಲರು ಈ ರೀತಿಯಲ್ಲಿ ಮಸೂದೆಯನ್ನು ರೂಪಿಸಿದ್ದಾರೆ” ಎಂದು ಮೀಕ್ಸ್ ಆರೋಪಿಸಿದ್ದಾರೆ.
ದ್ವಿತೀಯ ಸುಂಕದ ನಿಬಂಧನೆಗಳನ್ನು ತೆಗೆದುಹಾಕಿದರೆ ಮಸೂದೆಯನ್ನು ಬೆಂಬಲಿಸುವುದಾಗಿ ಮೀಕ್ಸ್ ಹೇಳಿದ್ದಾರೆ. ಆದರೆ, ಆ ನಿಬಂಧನೆಗಳ ವ್ಯಾಪ್ತಿಯನ್ನು ಕಡಿಮೆ ಮಾಡುವ ಉದ್ದೇಶದ ತಿದ್ದುಪಡಿಗಳನ್ನು ರಿಪಬ್ಲಿಕನ್ನರು ತಿರಸ್ಕರಿಸಿದ್ದಾರೆ.
ಪುಟಿನ್ ಮೇಲೆ ಒತ್ತಡ ಹೇರುವ ಉದ್ದೇಶ
ಆದರೂ ಹಲವು ಡೆಮೋಕ್ರಾಟ್ಗಳು ಮಸೂದೆಯನ್ನು ಬೆಂಬಲಿಸಿದ್ದಾರೆ. ನಿರ್ಬಂಧಗಳನ್ನು ವಿರೋಧಿಸಿದ ಕೆಲವೇ ರಿಪಬ್ಲಿಕನ್ನರು ಇದನ್ನು ವಿರೋಧಿಸಿದ್ದಾರೆ.
ರಷ್ಯಾ–ಉಕ್ರೇನ್ ಯುದ್ಧ ಐದನೇ ವರ್ಷಕ್ಕೆ ಕಾಲಿಟ್ಟಿದೆ. ಆದರೆ, ಯುದ್ಧ ಕೊನೆಗೊಳಿಸುವ ಶಾಂತಿ ಒಪ್ಪಂದ ಇನ್ನೂ ಸಾಧ್ಯವಾಗಿಲ್ಲ. ಹೀಗಾಗಿ ರಷ್ಯಾ ಮೇಲೆ ಕಠಿಣ ಆರ್ಥಿಕ ಒತ್ತಡ ಹೇರಬೇಕು ಎಂದು ಮಸೂದೆ ಬೆಂಬಲಿಗರು ಹೇಳಿದ್ದಾರೆ.
ಮಸೂದೆ ಅಂಗೀಕಾರವನ್ನು ಉಕ್ರೇನ್ ಪರ ಕಾರ್ಯಕರ್ತರು ಸ್ವಾಗತಿಸಿದ್ದಾರೆ. ರಷ್ಯಾದ ದಾಳಿಗಳು ಇನ್ನೂ ಮುಂದುವರಿದಿವೆ ಎಂದು ಅವರು ಹೇಳಿದ್ದಾರೆ. ಬುಧವಾರ ದಕ್ಷಿಣ ಉಕ್ರೇನ್ನಲ್ಲಿ ನಾಗರಿಕರ ಸಾರಿಗೆ ವಾಹನಗಳ ಮೇಲೆ ನಡೆದ ಡ್ರೋನ್ ದಾಳಿಯಲ್ಲಿ ಐವರು ಮೃತಪಟ್ಟಿದ್ದಾರೆ ಎಂದು ಕೈವ್ ಅಧಿಕಾರಿಗಳು ತಿಳಿಸಿದ್ದಾರೆ.
ರಷ್ಯಾವನ್ನು ಮಾತುಕತೆಗೆ ಒತ್ತಾಯಿಸಲು ಹೆಚ್ಚಿನ ಒತ್ತಡ ಅಗತ್ಯವಿದೆ ಎಂದು ಉಕ್ರೇನ್ ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್ಸ್ಕಿ ಹೇಳಿದ್ದಾರೆ. ಮಸೂದೆ ಅಂಗೀಕರಿಸುವಂತೆ ಅವರು ಕಾಂಗ್ರೆಸ್ಗೆ ಒತ್ತಾಯಿಸಿದ್ದರು.
“ರಷ್ಯಾ ತಿಂಗಳಿಗೆ 30,000 ಸೈನಿಕರನ್ನು ಕಳೆದುಕೊಳ್ಳುತ್ತಿದೆ. ಇಷ್ಟು ದೊಡ್ಡ ಪ್ರಮಾಣದಲ್ಲಿ ಸೈನಿಕರು ಮೃತಪಟ್ಟರೂ ಪುಟಿನ್ ಯುದ್ಧವನ್ನು ನಿಲ್ಲಿಸಲು ಸಿದ್ಧರಿಲ್ಲ” ಎಂದು ಜುಲೈನಲ್ಲಿ ವಾಷಿಂಗ್ಟನ್ಗೆ ಭೇಟಿ ನೀಡಿದ್ದ ಝೆಲೆನ್ಸ್ಕಿ ಹೇಳಿದ್ದರು.
‘ಹೀಗಾಗಿ ಈಗ ಉಪಕ್ರಮ ಪುಟಿನ್ ಅವರ ಕೈಯಲ್ಲಿಲ್ಲ’ ಎಂದೂ ಅವರು ಹೇಳಿದ್ದರು.
ರಷ್ಯಾದ ಸೇನೆಗೆ ಬೆಂಬಲ ನೀಡುವ ಕಂಪೆನಿಗಳು ಮತ್ತು ವಿದೇಶಿ ವ್ಯಕ್ತಿಗಳು ಹಾಗೂ ಸಂಸ್ಥೆಗಳನ್ನೂ ಮಸೂದೆ ಗುರಿಯಾಗಿಸಿಕೊಂಡಿದೆ. ಇರಾನ್ ಗೆ ಸಂಬಂಧಿಸಿದ ನಿರ್ಬಂಧಗಳನ್ನು ವಿಸ್ತರಿಸುವ ಅಂಶವೂ ಇದರಲ್ಲಿದೆ.
ಕಾಂಗ್ರೆಸ್ ಮೂಲಕ ನಿರ್ಬಂಧ ಮತ್ತು ಸುಂಕಗಳ ನೀತಿಯನ್ನು ನಿರ್ಧರಿಸುವ ಬದಲು ಅವುಗಳ ಮೇಲಿನ ನಿಯಂತ್ರಣವನ್ನು ತಮ್ಮಲ್ಲೇ ಉಳಿಸಿಕೊಳ್ಳಲು ಟ್ರಂಪ್ ಸಾಮಾನ್ಯವಾಗಿ ಆದ್ಯತೆ ನೀಡಿದ್ದಾರೆ. ಇದರಿಂದಾಗಿ ಮಸೂದೆ ಒಂದು ವರ್ಷಕ್ಕೂ ಹೆಚ್ಚು ಕಾಲ ವಿಳಂಬವಾಗಿತ್ತು.
ಈ ಮಸೂದೆಯನ್ನು 2025ರ ಎಪ್ರಿಲ್ ನಿಂದ ಮಂಡಿಸುತ್ತಿದ್ದ ರಿಪಬ್ಲಿಕನ್ ಸೆನೆಟರ್ ಲಿಂಡ್ಸೆ ಗ್ರಹಾಂ ಜುಲೈನಲ್ಲಿ ಹಠಾತ್ ನಿಧನರಾಗಿದ್ದರು.
ನವೆಂಬರ್ನಲ್ಲಿ ನಡೆಯಲಿರುವ ಮಧ್ಯಂತರ ಚುನಾವಣೆಗಳ ಪ್ರಚಾರಕ್ಕಾಗಿ ಹೌಸ್ ಸದಸ್ಯರು ವಾಷಿಂಗ್ಟನ್ನಿಂದ ಹೊರಡುವ ಮುನ್ನ ಬುಧವಾರ ಮತದಾನ ನಡೆಯಿತು.
“ಮಸೂದೆಗೆ ಶೀಘ್ರ ಸಹಿ ಹಾಕಿ ಕಾನೂನಾಗಿಸಬೇಕು. ಬಳಿಕ ರಷ್ಯಾದ ಯುದ್ಧಕ್ಕೆ ಹಣ ಹರಿಯುವುದನ್ನು ತಡೆಯಲು ಅಮೆರಿಕ ಕಠಿಣ ಕ್ರಮ ಕೈಗೊಳ್ಳಬೇಕು” ಎಂದು ಉಕ್ರೇನಿಯನ್ ಇಂಧನ ಸಂಘಟನೆ ‘ರಜೋಮ್ ವಿ ಸ್ಟ್ಯಾಂಡ್’ನ ಕಾರ್ಯನಿರ್ವಾಹಕ ನಿರ್ದೇಶಕಿ ಸ್ವಿಟ್ಲಾನಾ ರೊಮಾಂಕೊ ಹೇಳಿದ್ದಾರೆ.
“ಮಸೂದೆ ಜಾರಿಗೆ ವಿಳಂಬವಾದ ಪ್ರತಿಯೊಂದು ದಿನವೂ ಉಕ್ರೇನ್ನಲ್ಲಿ ಇನ್ನಷ್ಟು ಜನರು ಪ್ರಾಣ ಕಳೆದುಕೊಳ್ಳುತ್ತಾರೆ” ಎಂದು ಅವರು ಕಳವಳ ವ್ಯಕ್ತಪಡಿಸಿದ್ದಾರೆ.
