USA | ಬೇಸ್ಬಾಲ್ ಬ್ಯಾಟ್ ನಿಂದ ತಂದೆಯನ್ನೇ ಬಡಿದು ಕೊಂದ ಪುತ್ರ; ಗುಂಡಿಕ್ಕಿ ಹತ್ಯೆಗೈದ ಪೊಲೀಸರು
Screengrab: X
ಕನೆಕ್ಟಿಕಟ್ (ಅಮೆರಿಕಾ): ಅಮೆರಿಕದ ಕನೆಕ್ಟಿಕಟ್ ನಲ್ಲಿ ಪುತ್ರನೊಬ್ಬ ತನ್ನ ತಂದೆಯನ್ನು ಮನೆಯ ಎದುರೇ ಬೇಸ್ಬಾಲ್ ಬ್ಯಾಟ್ನಿಂದ ಬಡಿದು ಭೀಕರವಾಗಿ ಹತ್ಯೆಗೈದ ಘಟನೆ ನಡೆದಿದೆ. ದಾಳಿ ನಿಲ್ಲಿಸಿ ಆಯುಧವನ್ನು ಕೆಳಗೆ ಹಾಕುವಂತೆ ಪೊಲೀಸರು ಹಲವು ಬಾರಿ ಎಚ್ಚರಿಕೆ ನೀಡಿದರೂ ಆತ ಅದನ್ನು ನಿರ್ಲಕ್ಷಿಸಿ ಹಲ್ಲೆಯನ್ನು ಮುಂದುವರಿಸಿದ್ದರಿಂದ, ಪೊಲೀಸರು ಗುಂಡು ಹಾರಿಸಿ ಆತನನ್ನು ಹತ್ಯೆಗೈದಿದ್ದಾರೆ ಎಂದು ವರದಿಯಾಗಿದೆ.
ಮೃತ ಆರೋಪಿಯನ್ನು 38 ವರ್ಷದ ಮೂರನೇ ರಾಬರ್ಟ್ ಜೆನ್ಕಿನ್ಸ್ ಹಾಗೂ ಮೃತ ತಂದೆಯನ್ನು 69 ವರ್ಷದ ರಾಬರ್ಟ್ ಜೆನ್ಕಿನ್ಸ್ ಜೂನಿಯರ್ ಎಂದು ಗುರುತಿಸಲಾಗಿದೆ.
ಪ್ರಾಥಮಿಕ ವರದಿಗಳ ಪ್ರಕಾರ, ಸಶಸ್ತ್ರ ಕೌಟುಂಬಿಕ ಹಿಂಸಾಚಾರ ನಡೆಯುತ್ತಿದೆ ಎಂಬ ಮಾಹಿತಿ ನೀಡಿ ಪೊಲೀಸ್ ನಿಯಂತ್ರಣ ಕೊಠಡಿಗೆ ಪದೇ ಪದೇ ಕರೆಗಳು ಬಂದಿದ್ದರಿಂದ, ಅಧಿಕಾರಿ ಆ್ಯಂಥೋನಿ ಅಫಿಯಲಿ ತಕ್ಷಣ ಸ್ಥಳಕ್ಕೆ ಧಾವಿಸಿದ್ದರು. ಅವರು ಸ್ಥಳಕ್ಕೆ ತಲುಪಿದಾಗ, ಮೂರನೇ ರಾಬರ್ಟ್ ಜೆನ್ಕಿನ್ಸ್ ತನ್ನ ತಂದೆಯ ಮೇಲೆ ಬೇಸ್ಬಾಲ್ ಬ್ಯಾಟ್ನಿಂದ ಮಾರಣಾಂತಿಕ ಹಲ್ಲೆ ನಡೆಸುತ್ತಿರುವುದನ್ನು ಕಂಡಿದ್ದಾರೆ. ಆಗ ದಾಳಿಗೆ ಒಳಗಾಗಿದ್ದ ರಾಬರ್ಟ್ ಜೆನ್ಕಿನ್ಸ್ ಜೂನಿಯರ್ ನಿಶ್ಚಲನಾಗಿ ಮನೆಯ ಮುಂಭಾಗದ ಹುಲ್ಲುಹಾಸಿನ ಮೇಲೆ ಬಿದ್ದಿದ್ದರು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಈ ವೇಳೆ ಬ್ಯಾಟ್ ಅನ್ನು ಕೆಳಗೆ ಹಾಕಿ ದಾಳಿ ನಿಲ್ಲಿಸುವಂತೆ ಅಧಿಕಾರಿ ಆ್ಯಂಥೋನಿ ಅಫಿಯಲಿ ಆರೋಪಿಗೆ ಪದೇ ಪದೇ ಸೂಚನೆ ನೀಡುತ್ತಾ ಆತನತ್ತ ಮುನ್ನಡೆದಿರುವ ದೃಶ್ಯಗಳು ಬಾಡಿ ಕ್ಯಾಮೆರಾದಲ್ಲಿ ಸೆರೆಯಾಗಿವೆ. ನಾಲ್ಕು ಬಾರಿ ಎಚ್ಚರಿಕೆ ನೀಡಿದರೂ ಆರೋಪಿ ಅದನ್ನು ಪಾಲಿಸದೆ ತನ್ನ ತಂದೆಯ ಮೇಲೆ ಹಲ್ಲೆ ಮುಂದುವರಿಸಿದ್ದಾನೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.
ಇದರಿಂದಾಗಿ ಅಧಿಕಾರಿ ಆ್ಯಂಥೋನಿ ಅಫಿಯಲಿ ಆರೋಪಿ ಮೂರನೇ ರಾಬರ್ಟ್ ಜೆನ್ಕಿನ್ಸ್ ಮೇಲೆ ಹಲವು ಸುತ್ತು ಗುಂಡು ಹಾರಿಸಿದ್ದಾರೆ. ಗುಂಡೇಟಿಗೆ ಒಳಗಾದ ಆರೋಪಿ ಬ್ಯಾಟ್ ಅನ್ನು ಕೈಬಿಟ್ಟು ಸ್ಥಳದಲ್ಲೇ ಕುಸಿದು ಬಿದ್ದಿದ್ದಾನೆ. ಈ ವೇಳೆ ಅಧಿಕಾರಿ ಕನಿಷ್ಠ 18 ಸುತ್ತು ಗುಂಡು ಹಾರಿಸಿರುವುದು ಬಾಡಿ ಕ್ಯಾಮೆರಾ ದೃಶ್ಯಗಳಿಂದ ತಿಳಿದುಬಂದಿದೆ ಎಂದು ವರದಿಗಳು ಹೇಳಿವೆ.
ಬಳಿಕ ತಂದೆ ಮತ್ತು ಪುತ್ರ ಇಬ್ಬರನ್ನೂ ಆಸ್ಪತ್ರೆಗೆ ದಾಖಲಿಸಲಾಯಿತಾದರೂ, ಚಿಕಿತ್ಸೆ ಫಲಕಾರಿಯಾಗದೆ ಇಬ್ಬರೂ ಮೃತಪಟ್ಟಿದ್ದಾರೆ.
ಘಟನೆಯಲ್ಲಿ ಪೊಲೀಸ್ ಅಧಿಕಾರಿ ಪ್ರಮಾಣಿತ ಕಾರ್ಯವಿಧಾನವನ್ನು ಅನುಸರಿಸಿದ್ದಾರೆಯೇ ಅಥವಾ ಮಾರಣಾಂತಿಕ ಬಲವನ್ನು ಬಳಸುವ ಅಗತ್ಯವಿತ್ತೇ ಎಂಬುದರ ಕುರಿತು ಕನೆಕ್ಟಿಕಟ್ ಪೊಲೀಸ್ ಮಹಾ ನಿರ್ದೇಶಕರ ಕಚೇರಿ ತನಿಖೆಗೆ ಆದೇಶಿಸಿದೆ.
🚨 Meriden, CT tragedy (July 19, 2026):
— The Globe & News (@TheGlobeNewt) July 23, 2026
Two men are dead after a son allegedly beat his father to death with a baseball bat on Sagamore Road. Responding Officer Anthony Offiaeli arrived, ordered the suspect (Robert Lee Jenkins III, 38) to drop the bat multiple times, then fired…
