ಒಮಾನ್ ಕೊಲ್ಲಿಯಲ್ಲಿ ಇರಾನಿನ ತೈಲ ಟ್ಯಾಂಕರ್ ಮುಳುಗಿಸಿದ ಅಮೆರಿಕ: 3 ಟ್ಯಾಂಕರ್‌ ಗಳ ಮೇಲೆ ದಾಳಿ; 2 ಹಡಗುಗಳಿಗೆ ತೀವ್ರ ಹಾನಿ

ವಾಷಿಂಗ್ಟನ್: ಇರಾನ್ ಮತ್ತು ಅಮೆರಿಕ ನಡುವಿನ ಸೇನಾ ಸಂಘರ್ಷ ಮತ್ತಷ್ಟು ತೀವ್ರಗೊಂಡಿದೆ. ಇರಾನ್‌ ನ ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ (IRGC) ಅಮೆರಿಕದ ನೌಕಾಪಡೆಯ ಯುದ್ಧನೌಕೆಗಳ ಮೇಲೆ ದಾಳಿ ನಡೆಸಿದ ಬಳಿಕ, ಅಮೆರಿಕದ ಪಡೆಗಳು ಮೂರು ಇರಾನಿನ ತೈಲ ಟ್ಯಾಂಕರ್‌ ಗಳ ಮೇಲೆ ದಾಳಿ ನಡೆಸಿವೆ ಎಂದು ಅಮೆರಿಕದ ಸೆಂಟ್ರಲ್ ಕಮಾಂಡ್ (CENTCOM) ತಿಳಿಸಿದೆ.

ಈ ಮೂರು ಹಡಗುಗಳ ಪೈಕಿ M/T Kylo ಒಮಾನ್ ಕೊಲ್ಲಿಯಲ್ಲಿ ಮುಳುಗಿದೆ. ಉಳಿದ ಎರಡು ಹಡಗುಗಳಾದ M/T Downey ಮತ್ತು M/T Stark 1 ಗೆ ತೀವ್ರ ಹಾನಿಯಾಗಿದೆ. ಆದರೆ ಅವು ಶಾಶ್ವತವಾಗಿ ಕಾರ್ಯನಿರ್ವಹಿಸಲು ಸಾಧ್ಯವಾಗದಂತೆ ಮಾಡಲಾಗಿದೆ ಎಂದು ಅಮೆರಿಕದ ಸೇನೆ ಹೇಳಿದೆ.

ಬೆಂಕಿ ಹೊತ್ತಿಕೊಂಡ ಬಳಿಕ ಮುಳುಗಿದ Kylo

ಕೊಮೊರೊಸ್ ಧ್ವಜ ಹೊಂದಿದ್ದ M/T Kylo ಹಡಗನ್ನು ‘Noxen’ ಎಂದೂ ಕರೆಯಲಾಗುತ್ತದೆ. ಅಮೆರಿಕದ ದಾಳಿಯ ಬಳಿಕ ಹಡಗಿಗೆ ಬೆಂಕಿ ಹೊತ್ತಿಕೊಂಡಿತ್ತು. ಸಿಬ್ಬಂದಿ ಹಡಗನ್ನು ತೊರೆದ ಬಳಿಕ ಅದು ಮುಳುಗಿದೆ ಎಂದು CENTCOM ತಿಳಿಸಿದೆ.

ಹಡಗಿಗೆ ಬೆಂಕಿ ಹೊತ್ತಿಕೊಂಡಿರುವುದು ಹಾಗೂ ಬಳಿಕ ಅದು ಸಮುದ್ರದಲ್ಲಿ ಮುಳುಗುತ್ತಿರುವ ದೃಶ್ಯಗಳಿರುವ ವೀಡಿಯೊವನ್ನು CENTCOM ತನ್ನ ‘ಎಕ್ಸ್‌’ ಖಾತೆಯಲ್ಲಿ ಪ್ರಕಟಿಸಿದೆ.

‘ಅಮೆರಿಕದ ಸೇನಾ ಸಿಬ್ಬಂದಿಯ ನಿಖರತೆ ಮತ್ತು ವೃತ್ತಿಪರತೆಯಿಂದಾಗಿ M/T Kylo ಇಂದು ಒಮಾನ್ ಕೊಲ್ಲಿಯಲ್ಲಿ ಮುಳುಗಿದೆ. ಅದು ಈಗ ಸಮುದ್ರದ ತಳದಲ್ಲಿರುವ ಇರಾನ್‌ ನ ನೌಕಾಪಡೆಯನ್ನು ಸೇರಿದೆ’ ಎಂದು CENTCOM ಹೇಳಿದೆ.

ಅಮೆರಿಕ ಮತ್ತು ಇರಾನ್ ನಡುವಿನ ಸೇನಾ ಸಂಘರ್ಷ ತೀವ್ರಗೊಂಡಿರುವ ನಡುವೆಯೇ ಈ ದಾಳಿ ನಡೆದಿದೆ. ಅಮೆರಿಕದ ಪಡೆಗಳು ಗುರಿಯಾಗಿಸಿಕೊಂಡ ಮೂರು ಹಡಗುಗಳೂ ಇರಾನಿನ ಕಚ್ಚಾ ತೈಲ ಸಾಗಣೆ ಟ್ಯಾಂಕರ್‌ ಗಳು ಎಂದು CENTCOM ತಿಳಿಸಿದೆ.

ತೈಲ ಸಾಗಣೆಗೆ ಅಡ್ಡಿಯಾಗುವ ಆತಂಕ:

ಇರಾನಿನ ವಾಣಿಜ್ಯ ಮತ್ತು ಪೆಟ್ರೋಲಿಯಂ ಸಂಬಂಧಿತ ಆಸ್ತಿಗಳ ವಿರುದ್ಧ ಅಮೆರಿಕ ನಡೆಸುತ್ತಿರುವ ಸೇನಾ ಕಾರ್ಯಾಚರಣೆಯಲ್ಲಿ ಈ ದಾಳಿಗಳು ಪ್ರಮುಖ ಏರಿಕೆಯನ್ನು ಸೂಚಿಸುತ್ತವೆ. ಈ ದಾಳಿಗಳಿಂದ ಪ್ರದೇಶದಲ್ಲಿನ ತೈಲ ಸಾಗಣೆ ಮತ್ತು ಸಮುದ್ರ ವ್ಯಾಪಾರಕ್ಕೆ ಮತ್ತಷ್ಟು ಅಡ್ಡಿಯಾಗುವ ಸಾಧ್ಯತೆ ಇದೆ.

ಒಮಾನ್ ಕೊಲ್ಲಿ ಪರ್ಷಿಯನ್ ಕೊಲ್ಲಿಯನ್ನು ಅರೇಬಿಯನ್ ಸಮುದ್ರದೊಂದಿಗೆ ಸಂಪರ್ಕಿಸುವ ಪ್ರಮುಖ ಜಲಮಾರ್ಗವಾಗಿದೆ. ಇಂಧನ ಸಾಗಣೆಯ ದೃಷ್ಟಿಯಿಂದಲೂ ಇದು ಮಹತ್ವದ ಮಾರ್ಗ. ಇಲ್ಲಿ ವಾಣಿಜ್ಯ ಹಡಗುಗಳ ಸಂಚಾರಕ್ಕೆ ಅಡ್ಡಿಯಾದರೆ ಪ್ರಾದೇಶಿಕ ವ್ಯಾಪಾರದ ಜತೆಗೆ ಜಾಗತಿಕ ಇಂಧನ ಮಾರುಕಟ್ಟೆಯ ಮೇಲೂ ವ್ಯಾಪಕ ಪರಿಣಾಮ ಬೀರುವ ಸಾಧ್ಯತೆ ಇದೆ.

ಅಮೆರಿಕದ ದಾಳಿಗೆ ಇರಾನ್ ಖಂಡನೆ

ಇರಾನ್ ತನ್ನ ವಾಣಿಜ್ಯ ಹಡಗುಗಳ ಮೇಲೆ ಅಮೆರಿಕ ನಡೆಸಿದ ದಾಳಿಯನ್ನು ತೀವ್ರವಾಗಿ ಖಂಡಿಸಿದೆ.

ಭಾರತದಲ್ಲಿರುವ ಇಸ್ಲಾಮಿಕ್ ಗಣರಾಜ್ಯ ಇರಾನ್‌ನ ರಾಯಭಾರ ಕಚೇರಿಯು ‘ಎಕ್ಸ್‌’ನಲ್ಲಿ ಈ ಖಂಡನೆಯನ್ನು ಹಂಚಿಕೊಂಡಿದೆ. ಪರ್ಷಿಯನ್ ಕೊಲ್ಲಿ ಮತ್ತು ಒಮಾನ್ ಸಮುದ್ರದಲ್ಲಿ ಇರಾನಿನ ವಾಣಿಜ್ಯ ಹಡಗುಗಳ ಮೇಲೆ ನಡೆದ ಅಮೆರಿಕದ ದಾಳಿಯನ್ನು ಇರಾನ್ ಖಂಡಿಸಿದೆ ಎಂದು ರಾಯಭಾರ ಕಚೇರಿ ತಿಳಿಸಿದೆ.