USA | ಜನ್ಮಸಿದ್ಧ ಪೌರತ್ವವನ್ನು ಎತ್ತಿಹಿಡಿದ ಸುಪ್ರೀಂ ಕೋರ್ಟ್

ವಾಷಿಂಗ್ಟನ್, ಜೂ.30: ಅಮೆರಿಕದ ಸುಪ್ರೀಂ ಕೋರ್ಟ್ ಮಂಗಳವಾರ ನೀಡಿದ ಮಹತ್ವದ ತೀರ್ಪಿನಲ್ಲಿ ಜನ್ಮಸಿದ್ಧ ಪೌರತ್ವದ ವಿಶಾಲ ಪರಿಕಲ್ಪನೆಯನ್ನು ಎತ್ತಿಹಿಡಿದಿದೆ. ಅಮೆರಿಕದಲ್ಲಿ ಅಕ್ರಮವಾಗಿ ಅಥವಾ ತಾತ್ಕಾಲಿಕವಾಗಿ ವಾಸಿಸುತ್ತಿರುವ ಜನರ ಮಕ್ಕಳಿಗೆ ಅಮೆರಿಕದ ಪೌರತ್ವ ಸಿಗುವುದಿಲ್ಲ ಎಂದು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಹೊರಡಿಸಿದ್ದ ಕಾರ್ಯಾಂಗದ ಆದೇಶವನ್ನು ಕೋರ್ಟ್ ತಿರಸ್ಕರಿಸಿದೆ.

ಅಮೆರಿಕದ ಅಂತರ್ಯುದ್ಧದ ನಂತರ ಜಾರಿಗೆ ತರಲಾದ 14ನೇ ತಿದ್ದುಪಡಿ ಮತ್ತು ಇತ್ತೀಚಿನ ಫೆಡರಲ್ ಕಾನೂನುಗಳ ದೀರ್ಘಕಾಲದ ವ್ಯಾಖ್ಯಾನವನ್ನು ಆಧರಿಸಿ ನ್ಯಾಯಮೂರ್ತಿಗಳು ಈ ತೀರ್ಪು ನೀಡಿದ್ದಾರೆ. ಇದರ ಪ್ರಕಾರ, ಕೆಲವೇ ಕೆಲವು ವಿನಾಯಿತಿಗಳನ್ನು ಹೊರತುಪಡಿಸಿ, ದೇಶದಲ್ಲಿ ಜನಿಸುವ ಯಾರೇ ಆಗಿದ್ದರೂ ಅಮೆರಿಕದ ನಾಗರಿಕರಾಗುತ್ತಾರೆ.

"ಅಂದೂ ಇಂದೂ ಪೌರತ್ವ ಎಂಬುದು ನಮ್ಮ ರಾಜಕೀಯ ಸಮುದಾಯದಲ್ಲಿ ಮುಕ್ತವಾಗಿ ಭಾಗವಹಿಸುವ ಹಕ್ಕುಗಳನ್ನು ಹೊಂದುವ ಹಕ್ಕಾಗಿದೆ. 14ನೇ ತಿದ್ದುಪಡಿಯನ್ನು ರೂಪಿಸಿದವರು ಈ ಭರವಸೆಯನ್ನು 'ಈ ದೇಶದಲ್ಲಿ ಮುಕ್ತವಾಗಿ ಜನಿಸಿದ ಪ್ರತಿಯೊಬ್ಬ ವ್ಯಕ್ತಿಗೂ' ವಿಸ್ತರಿಸಿದ್ದರು. ನಾವು ಇಂದು ಆ ಭರವಸೆಯನ್ನು ಉಳಿಸಿಕೊಂಡಿದ್ದೇವೆ" ಎಂದು ಮುಖ್ಯ ನ್ಯಾಯಮೂರ್ತಿ ಜಾನ್ ರಾಬರ್ಟ್ಸ್ ತೀರ್ಪಿನಲ್ಲಿ ಉಲ್ಲೇಖಿಸಿದ್ದಾರೆ.

ಟ್ರಂಪ್ ಅವರ ಈ ನಿರ್ಬಂಧಗಳನ್ನು ಈಗಾಗಲೇ ಹಲವಾರು ಕೆಳ ನ್ಯಾಯಾಲಯಗಳು ತಡೆಹಿಡಿದಿದ್ದವು. ಹೀಗಾಗಿ ಇವು ಅಮೆರಿಕದ ಯಾವುದೇ ಭಾಗದಲ್ಲೂ ಜಾರಿಗೆ ಬಂದಿರಲಿಲ್ಲ.