ವಿದೇಶಿ ವಿದ್ಯಾರ್ಥಿಗಳ ಮೇಲೆ ಪರಿಣಾಮ ಬೀರುವ ಹೊಸ ವೀಸಾ ನಿಯಮಕ್ಕೆ ಶ್ವೇತಭವನ ಅನುಮೋದನೆ

ವಾಷಿಂಗ್ಟನ್, ಜೂ.20: ಅಂತರರಾಷ್ಟ್ರೀಯ ವಿದ್ಯಾರ್ಥಿಗಳು ಮತ್ತು ವಿನಿಮಯ ಸಂದರ್ಶಕರಿಗಾಗಿ ದೀರ್ಘಕಾಲದಿಂದ ಜಾರಿಯಲ್ಲಿದ್ದ ವಾಸ್ತವ್ಯದ ಅವಧಿ ವ್ಯವಸ್ಥೆಯ ಬದಲಿಗೆ ನಿರ್ದಿಷ್ಟ ಪ್ರವೇಶ ಅವಧಿಗಳನ್ನು ಜಾರಿಗೆ ತರಲು ರಾಷ್ಟ್ರೀಯ ಭದ್ರತಾ ಇಲಾಖೆ ಪ್ರಸ್ತಾಪಿಸಿದ್ದ ಅಂತಿಮ ನಿಯಮಾವಳಿಗೆ ಶ್ವೇತಭವನದ ಮ್ಯಾನೇಜ್‌ಮೆಂಟ್ ಮತ್ತು ಬಜೆಟ್ ಕಚೇರಿ (ಒಎಂಬಿ) ಅನುಮೋದನೆ ನೀಡಿದೆ.

ಅಮೆರಿಕದ ವಲಸೆ ನಿಯಮಗಳಲ್ಲಿನ ಈ ಮಹತ್ವದ ತಿದ್ದುಪಡಿಯು, ಅಂತರರಾಷ್ಟ್ರೀಯ ವಿದ್ಯಾರ್ಥಿಗಳು ಹೆಚ್ಚುವರಿ ಅನುಮತಿಗಳನ್ನು ಪಡೆಯದೇ ತಮ್ಮ ಸಂಪೂರ್ಣ ಶೈಕ್ಷಣಿಕ ಅವಧಿಗೆ ದೇಶದಲ್ಲಿ ಉಳಿದುಕೊಳ್ಳುವ ಅವಕಾಶಗಳನ್ನು ಸಂಕೀರ್ಣಗೊಳಿಸಬಹುದು.

ಈ ಉಪಕ್ರಮವು ಇತ್ತೀಚಿನ ವರ್ಷಗಳಲ್ಲಿ ವಿದ್ಯಾರ್ಥಿ ವೀಸಾ ನಿಯಮಾವಳಿಗಳಿಗೆ ತರಲಾದ ಅತ್ಯಂತ ಗಮನಾರ್ಹ ಬದಲಾವಣೆಗಳಲ್ಲಿ ಒಂದಾಗಿದ್ದು, ಅಮೆರಿಕದಲ್ಲಿ ತಮ್ಮ ಶಿಕ್ಷಣವನ್ನು ಮುಂದುವರಿಸಲು ಉದ್ದೇಶಿಸಿರುವ ಸಾವಿರಾರು ಭಾರತೀಯ ವಿದ್ಯಾರ್ಥಿಗಳ ಮೇಲೆ ಇದು ಪ್ರಭಾವ ಬೀರಬಹುದು.

ಒಎಂಬಿ ಅಂತಿಮ ನಿಯಮವನ್ನು ಅನುಮೋದಿಸಿದ ನಂತರ, ಇದನ್ನು ಫೆಡರಲ್ ರಿಜಿಸ್ಟರ್‌ ನಲ್ಲಿ ಪ್ರಕಟಿಸಲಾಗುವುದು. ಇದು ಜಾರಿಗೆ ಬರಲು 30ರಿಂದ 60 ದಿನಗಳ ಅವಧಿ ಬೇಕಾಗಬಹುದು ಎಂದು ನಿರೀಕ್ಷಿಸಲಾಗಿದೆ.