CNN ನಿಷೇಧದ ಬೆನ್ನಲ್ಲೇ ಟ್ರಂಪ್ ಟಿವಿ ಪ್ರಸಾರ ಸ್ಥಗಿತಗೊಳಿಸಿದ ವೈಟ್ ಹೌಸ್ ಪೂಲ್

ವಾಷಿಂಗ್ಟನ್: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಕಾರ್ಯಕ್ರಮಗಳ ಟಿವಿ ಪ್ರಸಾರವನ್ನು ಸ್ಥಗಿತಗೊಳಿಸುವುದಾಗಿ ವೈಟ್ ಹೌಸ್ ಪತ್ರಿಕಾ ಟಿವಿ ಪೂಲ್ ಸೋಮವಾರ ಘೋಷಿಸಿದೆ.

ವೈಟ್ ಹೌಸ್ ತನ್ನ ನಿಗದಿತ ‘ಪೂಲ್ ಕವರೇಜ್’ ಕರ್ತವ್ಯಗಳಿಂದ CNN ಅನ್ನು ತೆಗೆದುಹಾಕಿದ ಬಳಿಕ ಈ ಅಸಾಮಾನ್ಯ ಕ್ರಮ ಕೈಗೊಳ್ಳಲಾಗಿದೆ. CNN, MS NOW ಮತ್ತು Politico ಸಂಸ್ಥೆಗಳನ್ನು ವೈಟ್‌ ಹೌಸ್ ವರದಿಗಾರಿಕೆಯಿಂದ ನಿಷೇಧಿಸುವುದಾಗಿ ಟ್ರಂಪ್ ಘೋಷಿಸಿದ ಕೆಲವೇ ದಿನಗಳ ಬಳಿಕ ಈ ಬೆಳವಣಿಗೆ ನಡೆದಿದೆ.

“ಇಂದಿನಿಂದ ಅಧ್ಯಕ್ಷರ ‘ಪೂಲ್ ಕವರೇಜ್’ ಎಂದು ಗೊತ್ತುಪಡಿಸಲಾದ ಕಾರ್ಯಕ್ರಮಗಳನ್ನು ಟಿವಿ ಪೂಲ್ ತಂಡ ಪ್ರಸಾರ ಮಾಡುವುದಿಲ್ಲ” ಎಂದು ಟಿವಿ ಪೂಲ್ ಒಕ್ಕೂಟದ ಹಂಗಾಮಿ ಅಧ್ಯಕ್ಷ ಹಾಗೂ Fox Newsನ ವಾಷಿಂಗ್ಟನ್ ಬ್ಯೂರೋ ಮುಖ್ಯಸ್ಥ ಬ್ರಿಯಾನ್ ಬೌಟನ್, ಟಿವಿ ಪೂಲ್ ಸದಸ್ಯರಿಗೆ ಕಳುಹಿಸಿದ ಟಿಪ್ಪಣಿಯಲ್ಲಿ ತಿಳಿಸಿದ್ದಾರೆ.

“CNN ತನ್ನ ನಿಗದಿತ ಪೂಲ್ ಕರ್ತವ್ಯಗಳನ್ನು ನಿರ್ವಹಿಸದಂತೆ ವೈಟ್‌ ಹೌಸ್ ತಡೆಹಿಡಿದಿರುವುದೇ ಇದಕ್ಕೆ ಕಾರಣ. ಇದಕ್ಕೆ ಬದಲಾಗಿ ಬೇರೆ ಯಾವುದೇ ಪೂಲ್ ತಂಡವನ್ನು ನಿಯೋಜಿಸಲಾಗುವುದಿಲ್ಲ” ಎಂದು ಅವರು ಹೇಳಿದ್ದಾರೆ.

ಈ ವಾರ ವೈಟ್‌ ಹೌಸ್ ಪೂಲ್ ಪರವಾಗಿ ಟ್ರಂಪ್ ಅವರ ಕಾರ್ಯಕ್ರಮಗಳ ಟಿವಿ ಪ್ರಸಾರ ಒದಗಿಸಲು CNN ಸಿದ್ಧವಾಗಿತ್ತು. ಇದರಲ್ಲಿ ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯಲ್ಲಿ ಟ್ರಂಪ್ ಮಾಡುವ ಭಾಷಣವೂ ಸೇರಿತ್ತು. ಆದರೆ, CNN, MS NOW ಮತ್ತು Politico ಸಂಸ್ಥೆಗಳನ್ನು ವೈಟ್‌ ಹೌಸ್ ನಿಂದ ನಿಷೇಧಿಸುವುದಾಗಿ ಟ್ರಂಪ್ ಘೋಷಿಸಿದ ಬಳಿಕ, ಆಡಳಿತವು CNN ಅನ್ನು ತನ್ನ ಪ್ರಾಥಮಿಕ ಪೂಲ್ ವರದಿಗಾರರ ಪಟ್ಟಿಯಿಂದ ತೆಗೆದುಹಾಕಿತು.

ಮುದ್ರಣ ಮತ್ತು ರೇಡಿಯೊ ಮಾಧ್ಯಮಗಳನ್ನು ಒಳಗೊಂಡ ಇತರ ಪೂಲ್ ವರದಿಗಾರಿಕೆ ಎಂದಿನಂತೆ ಮುಂದುವರಿಯಲಿದೆ ಎಂದು ಬೌಟನ್ ತಿಳಿಸಿದ್ದಾರೆ. “ಈ ಪರಿಸ್ಥಿತಿಯಲ್ಲಿ ಬದಲಾವಣೆಗಳಾದಂತೆ ನಾವು ಮಾಹಿತಿ ನೀಡುತ್ತೇವೆ” ಎಂದಿದ್ದಾರೆ.

►ಸುಮಾರು ಶತಮಾನದಷ್ಟು ಹಳೆಯ ವ್ಯವಸ್ಥೆ

ವೈಟ್‌ ಹೌಸ್ ಪತ್ರಿಕಾ ಪೂಲ್ ವ್ಯವಸ್ಥೆ ಸುಮಾರು ಒಂದು ಶತಮಾನದಷ್ಟು ಹಳೆಯದು. ಪ್ರಮುಖ ಸುದ್ದಿ ವಾಹಿನಿಗಳು ಸಣ್ಣ ಗುಂಪಿನ ಪತ್ರಕರ್ತರನ್ನು ಅಧ್ಯಕ್ಷರೊಂದಿಗೆ ಪ್ರಯಾಣಿಸಲು ನಿಯೋಜಿಸುತ್ತವೆ. ಇದರಿಂದ ವರದಿಗಾರಿಕೆಯ ವೆಚ್ಚ ಮತ್ತು ಜವಾಬ್ದಾರಿಯನ್ನು ಸುದ್ದಿ ಸಂಸ್ಥೆಗಳು ಹಂಚಿಕೊಳ್ಳಲು ಸಾಧ್ಯವಾಗುತ್ತದೆ.

ಏರ್ ಫೋರ್ಸ್ ಒನ್ ವಿಮಾನ ಹಾಗೂ ಅಧ್ಯಕ್ಷರು ಭಾಗವಹಿಸುವ ವಿವಿಧ ಕಾರ್ಯಕ್ರಮಗಳಲ್ಲಿ ಸ್ಥಳಾವಕಾಶ ಸೀಮಿತವಾಗಿರುತ್ತದೆ. ಇಂತಹ ಪ್ರಯಾಣವೂ ಅತ್ಯಂತ ದುಬಾರಿಯಾಗಿರುತ್ತದೆ. ಹೀಗಾಗಿ, ದೇಶದಾದ್ಯಂತದ ಸ್ಥಳೀಯ ವಾಹಿನಿಗಳು ಮತ್ತು ಅಂತರರಾಷ್ಟ್ರೀಯ ಮಾಧ್ಯಮ ಸಂಸ್ಥೆಗಳು ಸೇರಿದಂತೆ ಪತ್ರಿಕಾ ವಲಯದ ಎಲ್ಲ ಸದಸ್ಯರಿಗೆ ಅಧ್ಯಕ್ಷರ ದೈನಂದಿನ ಚಟುವಟಿಕೆಗಳ ವರದಿ ಪಡೆಯಲು ಪೂಲ್ ವ್ಯವಸ್ಥೆ ಅವಕಾಶ ಕಲ್ಪಿಸುತ್ತದೆ.

ಸೋಮವಾರದಿಂದ CNNನ ವಾರದ ಸರದಿ ಆರಂಭವಾಗಬೇಕಿತ್ತು. ಆದರೆ ವೈಟ್‌ ಹೌಸ್ ಟ್ರಂಪ್ ಅವರ ದೈನಂದಿನ ಪತ್ರಿಕಾ ಕಾರ್ಯಕ್ರಮಗಳ ವೇಳಾಪಟ್ಟಿಯನ್ನು ಕಳುಹಿಸಿದಾಗ, ಅದರಲ್ಲಿ ಯಾವುದೇ ಪ್ರಾಥಮಿಕ ಟಿವಿ ಪೂಲ್ ವರದಿಗಾರರ ಹೆಸರನ್ನು ನಮೂದಿಸಿರಲಿಲ್ಲ.

ABC, CBS, CNN, Fox ಮತ್ತು NBC ಎಂಬ ಐದು ವಾಹಿನಿಗಳು ಅಧ್ಯಕ್ಷೀಯ ಪೂಲ್ ವರದಿಗಾರಿಕೆಯ ಜವಾಬ್ದಾರಿಯನ್ನು ಸರದಿಯ ಆಧಾರದ ಮೇಲೆ ನಿರ್ವಹಿಸುತ್ತವೆ. ಅಧ್ಯಕ್ಷರ ಚಲನವಲನಗಳನ್ನು ಅಮೆರಿಕದ ಜನರಿಗೆ ಪ್ರಸಾರ ಮಾಡಲು ಇತರ ನಾಲ್ಕು ಸುದ್ದಿ ವಾಹಿನಿಗಳು ಅವಲಂಬಿಸುವ ಟೆಲಿವಿಷನ್ ಮತ್ತು ಆಡಿಯೊ ಫೀಡ್ ಒದಗಿಸುವ ಏಕೈಕ ಮೂಲವಾಗಿ ‘ಪ್ರೈಮರಿ ಟಿವಿ ಪೂಲರ್’ ಕಾರ್ಯನಿರ್ವಹಿಸುತ್ತದೆ.

“ತಮ್ಮ ಸರ್ಕಾರದ ಬಗ್ಗೆ ನಿಖರ ಮತ್ತು ಸ್ವತಂತ್ರ ಮಾಹಿತಿಯನ್ನು ಪಡೆಯುವಲ್ಲಿ ಸಾರ್ವಜನಿಕರಿಗೆ ಪ್ರಮುಖ ಆಸಕ್ತಿಯಿದೆ. ಯಾವುದೇ ಆಡಳಿತವು ಸುದ್ದಿ ಸಂಸ್ಥೆಯೊಂದರ ವರದಿಯನ್ನು ವಿರೋಧಿಸುವ ಕಾರಣಕ್ಕಾಗಿ ಅದರ ಮೇಲೆ ನಿರ್ಬಂಧ ಹೇರಬಾರದು” ಎಂದು ವೈಟ್‌ ಹೌಸ್ ಟಿವಿ ಪೂಲ್ ನೆಟ್ವರ್ಕ್ನ ಐದು ಸಂಸ್ಥೆಗಳು ಸೋಮವಾರ ಜಂಟಿ ಹೇಳಿಕೆಯಲ್ಲಿ ತಿಳಿಸಿವೆ.

►‘ರಿಯಲ್ ಅಮೆರಿಕಸ್ ವಾಯ್ಸ್’ಗೆ ದ್ವಿತೀಯ ಪೂಲ್

ಟ್ರಂಪ್ ಪರವಾಗಿರುವ ಸಣ್ಣ ಮಾಧ್ಯಮ ಸಂಸ್ಥೆಯಾದ ‘ರಿಯಲ್ ಅಮೆರಿಕಸ್ ವಾಯ್ಸ್’ ಅನ್ನು ಸೋಮವಾರದ ವೈಟ್‌ ಹೌಸ್ ಪತ್ರಿಕಾ ವೇಳಾಪಟ್ಟಿಯಲ್ಲಿ ‘ದ್ವಿತೀಯ ಹಂತದ ಹೊರ-ನಗರ ಪ್ರಯಾಣದ ಪೂಲ್’ ಆಗಿ ಪಟ್ಟಿ ಮಾಡಲಾಗಿದೆ. ಇದು ವೈಟ್ ಹೌಸ್ ನಿಗದಿಪಡಿಸಿರುವ ಸರದಿ ವ್ಯವಸ್ಥೆಯಾಗಿದೆ.

CNN, Fox News, ABC, NBC ಮತ್ತು CBS ಈ ದ್ವಿತೀಯ ಪೂಲ್ನ ಭಾಗವಾಗಿಲ್ಲ. ಹೀಗಾಗಿ, ಅವು ಅದರ ವೀಡಿಯೊ ಫೀಡ್ ಬಳಸುವುದಿಲ್ಲ.

ಈ ವಾರ ನ್ಯೂಯಾರ್ಕ್ ನಗರದಲ್ಲಿ ನಡೆಯಲಿರುವ ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯಲ್ಲಿ ಭಾಗವಹಿಸಲಿರುವ ವಿದೇಶಾಂಗ ಕಾರ್ಯದರ್ಶಿ ಮಾರ್ಕೊ ರೂಬಿಯೊ ಅವರ ಟಿವಿ ಪ್ರಸಾರ ಒದಗಿಸಲು CNN ಸೋಮವಾರ ಸಿದ್ಧತೆ ನಡೆಸಿತ್ತು. ಸಂಪುಟ ಸದಸ್ಯರು ಮತ್ತು ಅಮೆರಿಕ ಸರ್ಕಾರದ ಇತರ ಅಧಿಕಾರಿಗಳ ಕಾರ್ಯಕ್ರಮಗಳ ಪ್ರಸಾರ ವ್ಯವಸ್ಥೆಯು ಅಧ್ಯಕ್ಷರ ಪ್ರಸಾರ ವ್ಯವಸ್ಥೆಯಿಂದ ಪ್ರತ್ಯೇಕವಾಗಿರುತ್ತದೆ.

►‘ನಕಲಿ ಸುದ್ದಿ’ ವಿರುದ್ಧ ಕ್ರಮ: ಟ್ರಂಪ್

ತಮ್ಮ ಮತ್ತು ತಮ್ಮ ಆಡಳಿತದ ಬಗ್ಗೆ “ಉದ್ದೇಶಪೂರ್ವಕವಾಗಿ ನಕಾರಾತ್ಮಕ ಸುದ್ದಿ ಪ್ರಸಾರ ಮಾಡುವ” ಸಂಘಟಿತ ಪ್ರಯತ್ನವನ್ನು CNN, MS NOW ಮತ್ತು Politico ನಡೆಸುತ್ತಿವೆ ಎಂದು ಆರೋಪಿಸಿ, ಅವುಗಳನ್ನು ವೈಟ್‌ ಹೌಸ್ ವರದಿಗಾರಿಕೆಯಿಂದ ನಿರ್ಬಂಧಿಸುವುದಾಗಿ ಟ್ರಂಪ್ ಶುಕ್ರವಾರ ಘೋಷಿಸಿದ್ದರು.

ಶನಿವಾರ ಈ ಮೂರು ಸಂಸ್ಥೆಗಳ ಪತ್ರಕರ್ತರಿಗೆ ವೈಟ್‌ ಹೌಸ್ ಪ್ರವೇಶ ನಿರಾಕರಿಸಲಾಯಿತು. ನಿರ್ಬಂಧದ ಭಾಗವಾಗಿ ಅವರ ಪತ್ರಿಕಾ ಗುರುತಿನ ಚೀಟಿಗಳನ್ನೂ ವಶಪಡಿಸಿಕೊಳ್ಳಲಾಯಿತು.

ತಮ್ಮ ವರದಿಗಾರರಿಗೆ ವೈಟ್‌ ಹೌಸ್ ಪ್ರವೇಶ ತಡೆದಿರುವುದನ್ನು ಪ್ರಶ್ನಿಸಿ CNN, MS NOW ಮತ್ತು Politico ಸೋಮವಾರ ಟ್ರಂಪ್ ಹಾಗೂ ಅವರ ಆಡಳಿತದ ಹಲವು ಉನ್ನತ ಅಧಿಕಾರಿಗಳ ವಿರುದ್ಧ ದಾವೆ ಹೂಡಿವೆ. ಈ ನಿರ್ಬಂಧವು ಅಮೆರಿಕ ಸಂವಿಧಾನದ ಮೊದಲ ತಿದ್ದುಪಡಿಯನ್ನು ಉಲ್ಲಂಘಿಸುವ ‘ದೃಷ್ಟಿಕೋನ ಆಧಾರಿತ ತಾರತಮ್ಯ’ವಾಗಿದೆ ಎಂದು ಮೂರು ಸುದ್ದಿ ಸಂಸ್ಥೆಗಳು ಆರೋಪಿಸಿವೆ.

ಸೋಮವಾರ Truth Socialನಲ್ಲಿ ಪೋಸ್ಟ್ ಮಾಡಿರುವ ಟ್ರಂಪ್, ವೈಟ್‌ ಹೌಸ್ “ಸ್ವತಂತ್ರ ಪತ್ರಿಕೋದ್ಯಮದ ಮೇಲೆ ದಾಳಿ ನಡೆಸುತ್ತಿದೆ” ಎಂಬ ಆರೋಪವನ್ನು ನಿರಾಕರಿಸಿದ್ದಾರೆ. ಬದಲಾಗಿ, “ದಾಳಿ” ನಡೆಯುತ್ತಿರುವುದು “ನಕಲಿ ಸುದ್ದಿ”ಗಳ ವಿರುದ್ಧ ಎಂದು ಹೇಳಿದ್ದಾರೆ.

ಅಮೆರಿಕದಲ್ಲಿ ಈ “ನಕಲಿ ಸುದ್ದಿ”ಯನ್ನು “ಕ್ಯಾನ್ಸರ್” ಹಾಗೂ “ನಮ್ಮ ರಾಷ್ಟ್ರೀಯ ಭದ್ರತೆಗೆ ಬೆದರಿಕೆ” ಎಂದು ಟ್ರಂಪ್ ಬಣ್ಣಿಸಿದ್ದಾರೆ. ಆದರೆ, ತಮ್ಮ ಆರೋಪವನ್ನು ಸಮರ್ಥಿಸಿಕೊಳ್ಳಲು ಅವರು ಯಾವುದೇ ನಿರ್ದಿಷ್ಟ ಉದಾಹರಣೆಗಳನ್ನು ನೀಡಿಲ್ಲ.