Nvidia ಸಿಇಒ ಆಗಿ ಮರಳಲು ಸಿದ್ಧ: ಮೌನ ಮುರಿದ ಜೆನ್ಸನ್ ಹುವಾಂಗ್
ವೈಯಕ್ತಿಕ ತಪ್ಪುಗಳಿಗೆ ಹೊಣೆ ಹೊತ್ತು, ಸ್ವತಂತ್ರ ತನಿಖೆಗೆ ಸಹಕಾರದ ಭರವಸೆ

Photo Credit : NDTV
ವಾಶಿಂಗ್ಟನ್: Nvidia ಸಿಇಒ ಹುದ್ದೆಯಿಂದ ನಿರ್ಗಮಿಸಿದ ಬಳಿಕ ಇದೇ ಮೊದಲ ಬಾರಿಗೆ ಪ್ರತಿಕ್ರಿಯಿಸಿರುವ ಕಂಪೆನಿಯ ಸಹ-ಸ್ಥಾಪಕ ಜೆನ್ಸನ್ ಹುವಾಂಗ್, ಮತ್ತೆ ಸಿಇಒ ಆಗಿ ಮರಳುವ ಸಾಧ್ಯತೆಯ ಕುರಿತು ಮೌನ ಮುರಿದಿದ್ದಾರೆ. ಕಂಪೆನಿಯ ನಿರ್ದೇಶಕರ ಮಂಡಳಿಯು ತಮ್ಮ ಮರುನೇಮಕಾತಿ ಸಂಸ್ಥೆಯ ಹಿತಾಸಕ್ತಿಗೆ ಪೂರಕ ಎಂದು ನಿರ್ಧರಿಸಿದರೆ, ಮತ್ತೆ ಸಿಇಒ ಜವಾಬ್ದಾರಿ ವಹಿಸಿಕೊಳ್ಳುವುದನ್ನು ಗೌರವವೆಂದು ಪರಿಗಣಿಸುವುದಾಗಿ ಅವರು ಹೇಳಿದ್ದಾರೆ.
ತಮ್ಮ ವೈಯಕ್ತಿಕ ಜೀವನದಲ್ಲಿ ಗಂಭೀರ ತಪ್ಪುಗಳನ್ನು ಮಾಡಿರುವುದಾಗಿ ಒಪ್ಪಿಕೊಂಡಿರುವ ಹುವಾಂಗ್, ಮಂಡಳಿಗೆ ಸಮಸ್ಯೆಗಳನ್ನು ಸೃಷ್ಟಿಸಿದ್ದಕ್ಕಾಗಿ ವಿಷಾದ ವ್ಯಕ್ತಪಡಿಸಿದ್ದಾರೆ. ಮಂಡಳಿ ನಡೆಸುತ್ತಿರುವ ಸ್ವತಂತ್ರ ತನಿಖೆಗೆ ಸಂಪೂರ್ಣ ಸಹಕಾರ ನೀಡುವುದಾಗಿಯೂ ಭರವಸೆ ನೀಡಿದ್ದಾರೆ.
ಹುವಾಂಗ್ ಅವರ ರಾಜೀನಾಮೆಯ ಬಳಿಕ ಅವರನ್ನು ಮರಳಿ ನೇಮಿಸಿಕೊಳ್ಳುವಂತೆ ಆನ್ ಲೈನ್ ಅಭಿಯಾನ ಆರಂಭವಾಗಿದ್ದು, ಟೆಸ್ಲಾ ಮತ್ತು ಸ್ಪೇಸ್ ಎಕ್ಸ್ ಸಿಇಒ ಎಲಾನ್ ಮಸ್ಕ್ ಸೇರಿದಂತೆ ತಂತ್ರಜ್ಞಾನ ಕ್ಷೇತ್ರದ ಹಲವು ಪ್ರಮುಖರು ಬೆಂಬಲ ಸೂಚಿಸಿದ್ದಾರೆ. ಆದರೆ, ಹುವಾಂಗ್ ಅವರನ್ನು ಮರಳಿ ನೇಮಿಸಿಕೊಳ್ಳುವ ಬಗ್ಗೆ ಸದ್ಯಕ್ಕೆ ಯಾವುದೇ ಚಿಂತನೆ ನಡೆಸುತ್ತಿಲ್ಲ ಎಂದು Nvidia ನಿರ್ದೇಶಕರ ಮಂಡಳಿಯ ಮೂಲಗಳನ್ನು ಉಲ್ಲೇಖಿಸಿ ರಾಯಿಟರ್ಸ್ ವರದಿ ಮಾಡಿದೆ.




