Afzalpur | ಬೈರಾಮಡಗಿ ಶಾಖಾ ಮಠದ ಪೀಠಾಧಿಪತಿ ನೇಮಕ ಕಾನೂನುಬಾಹಿರ: ಶಾಂತಲಿಂಗ ಮಹಾಸ್ವಾಮೀಜಿ ಆರೋಪ

ಅಫಜಲಪುರ: ತಾಲೂಕಿನ ಬೈರಾಮಡಗಿ ಶಾಖಾ ಮಠಕ್ಕೆ ಇತ್ತೀಚೆಗೆ ನಡೆದ ಪೀಠಾಧಿಪತಿ ನೇಮಕ ಸಂಪೂರ್ಣ ಕಾನೂನುಬಾಹಿರವಾಗಿದೆ. ಮೂಲ ಪೀಠದ ಅಧಿಕಾರವನ್ನು ಉಲ್ಲಂಘಿಸಿ ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ದುಧನಿಯ ಶ್ರೀ ಗುರುಶಾಂತಲಿಂಗೇಶ್ವರ ವಿರಕ್ತ ಮಠದ ಪೀಠಾಧಿಪತಿ ಶಾಂತಲಿಂಗ ಮಹಾಸ್ವಾಮೀಜಿ ಆರೋಪಿಸಿದ್ದಾರೆ.

ದುಧನಿ ಗ್ರಾಮದಲ್ಲಿ ಬುಧವಾರ ಪತ್ರಿಕಾ ಪ್ರಕಟಣೆ ನೀಡಿರುವ ಅವರು, ದುಧನಿಯ ಶ್ರೀ ಗುರುಶಾಂತಲಿಂಗೇಶ್ವರ ವಿರಕ್ತ ಮಠದ ಅಧೀನದಲ್ಲಿ ನಿಂಬಾಳ, ಕೌಲಗಿ, ಬಳರ್ಗಿ, ಸಿನ್ನೂರ, ಕಾರ್ತಾಬಾದ, ಲಾಡ್ ಚೊಂಚೋಳಿ ಹಾಗೂ ಬೈರಾಮಡಗಿ ಸೇರಿದಂತೆ ಹಲವು ಶಾಖಾ ಮಠಗಳು ಕಾರ್ಯನಿರ್ವಹಿಸುತ್ತಿವೆ. ಈ ಎಲ್ಲ ಮಠಗಳಿಗೂ ದುಧನಿಯ ಮಠವೇ ಮೂಲ ಪೀಠವಾಗಿದೆ ಎಂದು ತಿಳಿಸಿದ್ದಾರೆ.

ಬೈರಾಮಡಗಿ ಶಾಖಾ ಮಠದ ಗುರುಗಳು 2015ರಲ್ಲಿ ಲಿಂಗೈಕ್ಯರಾದ ಬಳಿಕ ಆ ಮಠಕ್ಕೆ ಹೊಸ ಪೀಠಾಧಿಪತಿಯನ್ನು ನೇಮಕ ಮಾಡುವ ಅಧಿಕಾರ ಮೂಲ ಪೀಠಕ್ಕೇ ಸೇರಿದೆ. ಆದರೆ, ಕೆಲವರು ಮಠದ ಆಸ್ತಿಯ ಮೇಲೆ ಹಿಡಿತ ಸಾಧಿಸುವ ಉದ್ದೇಶದಿಂದ ಮೂಲ ಪೀಠದ ಅನುಮತಿ ಇಲ್ಲದೆ ಬೇರೊಬ್ಬ ವ್ಯಕ್ತಿಯನ್ನು ಪೀಠಾಧಿಪತಿಯಾಗಿ ನೇಮಕ ಮಾಡಿದ್ದಾರೆ ಎಂದು ಆರೋಪಿಸಿದ್ದಾರೆ.

ಈ ಸಂಬಂಧ ಅಫಜಲಪುರದ ನ್ಯಾಯಾಲಯದಲ್ಲಿ ವಿಚಾರಣೆ ನಡೆಯುತ್ತಿದ್ದು, ಕೆಲವರ ವಿರುದ್ಧ ನ್ಯಾಯಾಲಯವು ತಾತ್ಕಾಲಿಕ ತಡೆಯಾಜ್ಞೆಯನ್ನೂ ನೀಡಿದೆ. ಆದಾಗ್ಯೂ, ಕಳೆದ ನವೆಂಬರ್ 1ರಂದು ಷಟಕ್ಷರಿ ಎಂಬ ವ್ಯಕ್ತಿಯನ್ನು ಬೈರಾಮಡಗಿ ಶಾಖಾ ಮಠದ ಪೀಠಾಧಿಪತಿಯಾಗಿ ನೇಮಕ ಮಾಡಿರುವುದು ನ್ಯಾಯಾಲಯದ ಆದೇಶ ಹಾಗೂ ಮಠದ ಸಂಪ್ರದಾಯಗಳಿಗೆ ವಿರುದ್ಧವಾಗಿದೆ ಎಂದು ತಿಳಿಸಿದ್ದಾರೆ.

ಈ ನೇಮಕವನ್ನು ಮೂಲ ಪೀಠದ ಅಧೀನದಲ್ಲಿರುವ ಎಲ್ಲ ಶಾಖಾ ಮಠಗಳ ಶ್ರೀಗಳು ಖಂಡಿಸಿದ್ದು, ಷಟಕ್ಷರಿ ಅವರಿಗೆ ಬೈರಾಮಡಗಿ ಶಾಖಾ ಮಠದೊಂದಿಗೆ ಯಾವುದೇ ಅಧಿಕೃತ ಸಂಬಂಧವಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.

ಈ ಸಂದರ್ಭದಲ್ಲಿ ದುಧನಿ ಹಾಗೂ ಬೈರಾಮಡಗಿ ಭಕ್ತಾದಿ ಮಂಡಳಿಯ ಮುಖಂಡರಾದ ಮಹಾಂತೇಶ ಪಾಟೀಲ, ಸುಭಾಷ್ ಪರಮಶೆಟ್ಟಿ, ಯಶ್ವಂತ್ರಾಯ ಬಿರಾದಾರ, ಬಸಣ್ಣ ಹಿರೇಗೌಡರ, ಪ್ರೇಮನಾಥ ಜಗದಿ ಹಾಗೂ ಬಸವರಾಜ ಅಂಕಲಗಿ ಉಪಸ್ಥಿತರಿದ್ದರು.