Aland | ಯುವಕರು ಸಮಾಜಮುಖಿ ನಾಯಕತ್ವದ ಗುಣ ಬೆಳೆಸಿಕೊಳ್ಳಲಿ : ಟಿ.ಗುರುಬಸಪ್ಪ

ಆಳಂದ: ಯುವಕರು ವ್ಯಕ್ತಿಗತ ಹಿತಾಸಕ್ತಿ ಹಾಗೂ ಆಕರ್ಷಣೆಗಳಿಗೆ ಸಮಯ ಮತ್ತು ಶ್ರಮ ವ್ಯರ್ಥ ಮಾಡದೆ, ಸಮಾಜಮುಖಿ ನಾಯಕತ್ವದ ಗುಣಗಳನ್ನು ಬೆಳೆಸಿಕೊಳ್ಳಬೇಕು ಎಂದು ಕಲಬುರಗಿಯ ನಿವೃತ್ತ ಪ್ರಾಧ್ಯಾಪಕ ಟಿ. ಗುರುಬಸಪ್ಪ ಹೇಳಿದರು.

ತಾಲ್ಲೂಕಿನ ಮಾದನ ಹಿಪ್ಪರಗಿ ಗ್ರಾಮದ ಶ್ರೀ ಶಿವಲಿಂಗೇಶ್ವರ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜಿನಲ್ಲಿ ಬುಧವಾರ ಆಂತರಿಕ ಗುಣಮಟ್ಟ ಭರವಸೆ ಕೋಶದ ವತಿಯಿಂದ ಆಯೋಜಿಸಿದ್ದ ಉಪನ್ಯಾಸ ಸರಣಿ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.

ಉಪನ್ಯಾಸಕ ರಮೇಶ ಮಾಡಿಯಾಳಕರ್ ಮಾತನಾಡಿ, ದೇಶದ ಪ್ರಗತಿ ಹಾಗೂ ಸಾಮಾಜಿಕ ಪರಿವರ್ತನೆಯಲ್ಲಿ ಸಂವಿಧಾನದ ಕೊಡುಗೆ ಅಪಾರವಾಗಿದೆ. ಸಮಸಮಾಜ ನಿರ್ಮಾಣದ ಆಶಯದೊಂದಿಗೆ ಡಾ. ಬಿ.ಆರ್. ಅಂಬೇಡ್ಕರ್ ಅವರು ಪ್ರತಿಯೊಬ್ಬರಿಗೂ ಹಕ್ಕು ಮತ್ತು ಸೌಲಭ್ಯಗಳನ್ನು ಕಲ್ಪಿಸಿದ್ದಾರೆ ಎಂದರು.

ಉಪನ್ಯಾಸಕ ಪರಮೇಶ್ವರ ತಳಕೇರಿ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿ, ವಿದ್ಯಾರ್ಥಿಗಳು ಆತ್ಮವಿಶ್ವಾಸ ಹಾಗೂ ಜೀವಪರ ಕಾಳಜಿಯನ್ನು ಬೆಳೆಸಿಕೊಳ್ಳುವುದರ ಜತೆಗೆ ನಿರಂತರ ಅಧ್ಯಯನಶೀಲರಾಗಬೇಕು ಎಂದು ಸಲಹೆ ನೀಡಿದರು. ಸಂಪನ್ಮೂಲ ವ್ಯಕ್ತಿ ಸಂಜಯ ಪಾಟೀಲ ಅವರು ವಚನ ಸಾಹಿತ್ಯದ ಪ್ರಸ್ತುತತೆ ಕುರಿತು ಉಪನ್ಯಾಸ ನೀಡಿದರು.

ಕಾಲೇಜಿನ ಪ್ರಾಚಾರ್ಯ ಬಸವ ಪಾಟೀಲ ಜಾವಳಿ ಅಧ್ಯಕ್ಷತೆ ವಹಿಸಿದ್ದರು. ಸಂಯೋಜಕ ಪರಶುರಾಮ ಚವ್ಹಾಣ, ಶಿವಕುಮಾರ, ಪ್ರಾಧ್ಯಾಪಕರಾದ ಶ್ರವಣ ಕಾಂಬಳೆ, ವಿಜಯಲಕ್ಷ್ಮಿ, ಬಸಪ್ಪ ಎಚ್., ವಿಜಯಕುಮಾರ, ವಿಜಯಲಕ್ಷ್ಮಿ ಗೌತಮ, ಮುಸಾಫಿರ್, ಅರ್ಪಿತಾ, ಪರಮೇಶ್ವರ ಭೂಸನೂರು, ಅನೀಲ ಬನಸೋಡೆ, ಸ್ನೇಹಾ ಮಾಡ್ಯಾಳಕರ್, ರಾಜೇಂದ್ರ, ಆರೀಫ್ ಹಾಗೂ ಅಂಬಿಕಾ ಉಪಸ್ಥಿತರಿದ್ದರು.

ಇಂದಿರಾ ಗಜೇಂದ್ರಗಡ ನಿರೂಪಿಸಿದರು. ಶಿವಕುಮಾರ ಸ್ವಾಗತಿಸಿದರು. ನೀಲಾಂಬಿಕಾ ಕರಬಸ್ತಿ ವಂದಿಸಿದರು.