Aland | ವೀರಯೋಧನ ಸೇವೆ ಯುವಕರಿಗೆ ಪ್ರೇರಣೆ: ಅಭಿನವ ಶಿವಲಿಂಗ ಮಹಾಸ್ವಾಮಿಗಳು
ಎರಡು ದಶಕಗಳ ಸೇನಾ ಸೇವೆಯಿಂದ ನಿವೃತ್ತರಾಗಿ ಸ್ವಗ್ರಾಮಕ್ಕೆ ಮರಳಿದ ಯೋಧನಿಗೆ ಅದ್ಧೂರಿ ಸನ್ಮಾನ

ಆಳಂದ: ದೇಶಸೇವೆಯಲ್ಲಿ ತೊಡಗಿ, ಸಾವಿಗೂ ಅಂಜದೆ ಗಡಿಯಲ್ಲಿ ಕರ್ತವ್ಯ ನಿರ್ವಹಿಸಿದ ಸಮರಭೈರವಿ ಶಾಂತಲಿಂಗ ಘಂಟೆ ಅವರು ಎರಡು ದಶಕಗಳ ಸೇನಾ ಸೇವೆಯಿಂದ ನಿವೃತ್ತರಾಗಿ ಸ್ವಗ್ರಾಮಕ್ಕೆ ಮರಳಿರುವುದು ದರ್ಗಾಶಿರೂರ ಗ್ರಾಮದಲ್ಲಿ ಹಬ್ಬದ ಸಂಭ್ರಮ ಮೂಡಿಸಿದೆ ಎಂದು ಮಾದನಹಿಪ್ಪರಗಿಯ ಶ್ರೀ ಅಭಿನವ ಶಿವಲಿಂಗ ಮಹಾಸ್ವಾಮಿಗಳು ಹೇಳಿದರು.
ತಾಲೂಕಿನ ದರ್ಗಾಶಿರೂರ ಗ್ರಾಮದ ಬಸವೇಶ್ವರ ದೇವಸ್ಥಾನದ ಆವರಣದಲ್ಲಿ ಆಯೋಜಿಸಿದ್ದ ನಿವೃತ್ತ ಯೋಧ ಶಾಂತಲಿಂಗ ಎಸ್. ಘಂಟೆ ಅವರ ಅಭಿನಂದನಾ ಸಮಾರಂಭದಲ್ಲಿ ಸಾನ್ನಿಧ್ಯ ವಹಿಸಿ ಅವರು ಆಶೀರ್ವಚನ ನೀಡಿದರು.
ದೇಶದ ಗಡಿಗಳನ್ನು ಕಾಯುವ ಸೈನಿಕರ ಸೇವೆ, ತ್ಯಾಗ ಮತ್ತು ಧೈರ್ಯವನ್ನು ಸಮಾಜ ಸದಾ ಸ್ಮರಿಸಬೇಕು. ಇಂತಹ ವೀರಯೋಧರನ್ನು ಗೌರವಿಸುವುದರಿಂದ ಮುಂದಿನ ಪೀಳಿಗೆಗೆ ದೇಶಪ್ರೇಮದ ಪ್ರೇರಣೆ ನೀಡಿದಂತಾಗುತ್ತದೆ ಎಂದರು.
ಡಾ. ಮೋನಪ್ಪ ಎಲ್. ಸುತಾರ ಪ್ರಾಸ್ತಾವಿಕವಾಗಿ ಮಾತನಾಡಿ, ದೇಶಸೇವೆಯಲ್ಲಿ ತೊಡಗಿರುವ ಯೋಧರನ್ನು ಗೌರವಿಸುವುದು, ದೇಶಕ್ಕಾಗಿ ಸರ್ವಸ್ವವನ್ನೂ ತ್ಯಾಗ ಮಾಡಿದ ವೀರರಿಗೆ ಕೃತಜ್ಞತೆ ಸಲ್ಲಿಸುವುದು ಹಾಗೂ ಯುವ ಪ್ರತಿಭೆಗಳನ್ನು ಪ್ರೋತ್ಸಾಹಿಸುವ ಆಶಯದೊಂದಿಗೆ ಅಭಿನಂದನಾ ಸಮಾರಂಭವನ್ನು ಅದ್ಧೂರಿಯಾಗಿ ಆಯೋಜಿಸಲಾಗಿದೆ ಎಂದು ತಿಳಿಸಿದರು.
ಪ್ರಾಚಾರ್ಯ ಸಂಜಯ ಎಸ್. ಪಾಟೀಲ ಮಾತನಾಡಿ, ಆಳಂದ ತಾಲೂಕಿನಲ್ಲಿ ಭಾರತೀಯ ಸೇನೆಗೆ ಹೆಚ್ಚಿನ ಸಂಖ್ಯೆಯಲ್ಲಿ ಯುವಕರನ್ನು ಕಳುಹಿಸಿದ ಗ್ರಾಮಗಳಲ್ಲಿ ದರ್ಗಾಶಿರೂರ ಪ್ರಮುಖ ಸ್ಥಾನ ಪಡೆದಿದೆ. ಕಾರ್ಗಿಲ್ ಯುದ್ಧದಲ್ಲಿ ವೀರಮರಣವನ್ನಪ್ಪಿದ ಯೋಧ ಗುರುಬಸಪ್ಪ ಘಂಟೆ ಅವರ ಹೆಸರನ್ನು ಗ್ರಾಮದ ಪ್ರೌಢಶಾಲೆಗೆ ನಾಮಕರಣ ಮಾಡಿರುವುದು ಗ್ರಾಮಸ್ಥರ ದೇಶಭಕ್ತಿ ಹಾಗೂ ಸೈನಿಕರ ಬಗೆಗಿನ ಗೌರವಕ್ಕೆ ಸಾಕ್ಷಿಯಾಗಿದೆ ಎಂದು ಹೇಳಿದರು.
ಕಾರ್ಯಕ್ರಮದಲ್ಲಿ ಮೈಂದರ್ಗಿಯ ಶ್ರೀ ಮಹಾಂತ ಮಹಾಸ್ವಾಮಿಗಳು ಹಾಗೂ ಚಲಗೇರಿಯ ಶ್ರೀ ಶಾಂತವೀರ ಶಿವಾಚಾರ್ಯರು ಸಾನ್ನಿಧ್ಯ ವಹಿಸಿ ಮಾತನಾಡಿದರು. ಈ ವೇಳೆ ಬಾಲ್ಯದ ಸ್ನೇಹವನ್ನು ಸ್ಮರಿಸಿದರು. ರತ್ನಾಬಾಯಿ ಜಿ. ಘಂಟೆ ಅಧ್ಯಕ್ಷತೆ ವಹಿಸಿದ್ದರು.
ಬೀದರ್ ಪಿಐ ಸಂಗಮೇಶ ಘಂಟೆ, ನಿವೃತ್ತ ಸೈನಿಕರ ಸಂಘದ ಜಿಲ್ಲಾಧ್ಯಕ್ಷ ಬಸವರಾಜ ಬೀರಾದಾರ, ತಾಲೂಕು ಅಧ್ಯಕ್ಷ ಸಿದ್ಧಲಿಂಗ ಮಲಶೆಟ್ಟಿ ಸೇರಿದಂತೆ ತಾಲೂಕಿನ ವಿವಿಧ ಗ್ರಾಮಗಳಿಂದ ಆಗಮಿಸಿದ್ದ ನಿವೃತ್ತ ಯೋಧರನ್ನು ಸನ್ಮಾನಿಸಿ ಗೌರವಿಸಲಾಯಿತು.
ಆಯೋಜಕರಾದ ಸಿದ್ಧಲಿಂಗ ಸುತಾರ, ಗುರು ಬಟ್ಟರಕಿ, ರಾಮೇಶ್ವರ ಪಾಟೀಲ, ರಾಚಣ್ಣ ಗೋಗಾಯಿ, ಶಿವಬಸವ ಪಾಟೀಲ, ಶಿವಾನಂದ ಸುತಾರ, ಸಂಜಯ ಮುಲಗೆ, ಅನಿಲಕುಮಾರ ಜಕಾಪುರೆ, ಭೀಮಾಶಂಕರ ಜಕಾಪುರೆ ಸೇರಿದಂತೆ ಹಲವು ಗಣ್ಯರು ಉಪಸ್ಥಿತರಿದ್ದರು.
ಭೀಮಾಶಂಕರ ಘಂಟೆ, ಶಿವಲಿಂಗಪ್ಪ ಪಾಟೀಲ, ಬಸವರಾಜ ಬಟ್ಟರಕಿ ಹಾಗೂ ಶಾಂತಲಿಂಗ ಬಿಲಗುಂದಿ ಸಂಗೀತ ಸೇವೆ ಸಲ್ಲಿಸಿದರು. ಶಿವಲಿಂಗಪ್ಪ ಮಂಟಗಿ ನಿರೂಪಿಸಿದರು. ಸುರೇಶ ಘಂಟೆ ವಂದಿಸಿದರು.






