Kalaburagi | ಹಝರತ್ ಡಾ.ಸೈಯದ್ ಶಾ ಖುಸ್ರೋ ಹುಸೇನಿ ಅವರ 2ನೇ ಉರೂಸ್ ಆಚರಣೆ

ಕಲಬುರಗಿ : ಹಜರತ್ ಖ್ವಾಜಾ ಬಂದೇನವಾಜ್ (ರಹ.) ದರ್ಗಾದ 23ನೇ ಸಜ್ಜಾದಾ ನಶೀನ್ ಹಾಗೂ ಖ್ವಾಜಾ ಬಂದೇನವಾಜ್ ವಿಶ್ವವಿದ್ಯಾಲಯದ ಸಂಸ್ಥಾಪಕ ಕುಲಾಧಿಪತಿಯಾಗಿದ್ದ ಹಜರತ್ ಡಾ.ಸೈಯದ್ ಶಾ ಗೇಸುದರಾಜ್ ಖುಸ್ರೋ ಹುಸೇನಿ (ರಹ.) ಅವರ ಎರಡನೇ ಉರೂಸ್ ಅನ್ನು ಶುಕ್ರವಾರ ಕಲಬುರಗಿಯಲ್ಲಿ ಭಕ್ತಿ, ಶ್ರದ್ಧೆ ಹಾಗೂ ಗೌರವದಿಂದ ಆಚರಿಸಲಾಯಿತು.

ಜುಮಾದಲ್ ಅವ್ವಲ್ ತಿಂಗಳ 4ನೇ ದಿನ ಅಸರ್ ನಮಾಝ್‌ ಬಳಿಕ ದರ್ಗಾದ ಹಾಲಿ ಸಜ್ಜಾದಾ ನಶೀನ್ ಹಝರತ್ ಡಾ.ಹಾಫಿಜ್ ಸೈಯದ್ ಮುಹಮ್ಮದ್ ಅಲಿ ಅಲ್ ಹುಸೇನಿ ಅವರು ಸಾಂಪ್ರದಾಯಿಕ ಸಂದಲ್ ವಿಧಿವಿಧಾನಗಳನ್ನು ನೆರವೇರಿಸಿದರು. ದರ್ಗಾದ ಪವಿತ್ರ ಗುಂಬಜ್ ಎದುರಿನ ಬಾರಾದರಿಯಲ್ಲಿ ವಿಶೇಷ ವ್ಯವಸ್ಥೆ ಮಾಡಲಾಗಿತ್ತು. ಸಂದಲ್ ಬಳಿಕ ಭಕ್ತರಿಗೆ ತಬರುಕ್ ವಿತರಿಸಲಾಯಿತು. ಸರ್ವರ ಒಳಿತಿಗಾಗಿ, ಶಾಂತಿ ಹಾಗೂ ಕ್ಷೇಮಕ್ಕಾಗಿ ವಿಶೇಷ ಪ್ರಾರ್ಥನೆ ಸಲ್ಲಿಸಲಾಯಿತು.

ಮಗ್ರಿಬ್ ನಮಾಜ್ ಬಳಿಕ ದರ್ಗಾ ಆವರಣದಲ್ಲಿ ನಿಯಾಝ್ ಶರೀಫ್ ಆಯೋಜಿಸಲಾಗಿತ್ತು. ರಾತ್ರಿ ಭಕ್ತಿಗೀತೆಗಳು ಹಾಗೂ ಆಧ್ಯಾತ್ಮಿಕ ಸಂಗೀತದೊಂದಿಗೆ ಮೆಹಫಿಲ್-ಎ-ಸಮಾ ಕಾರ್ಯಕ್ರಮ ನಡೆಯಿತು.

ಇದಕ್ಕೂ ಮುನ್ನ ಗುರುವಾರ ಹಾಲಿ ಸಜ್ಜಾದಾ ನಶೀನ್ ಹಜರತ್ ಡಾ. ಹಾಫಿಜ್ ಸೈಯದ್ ಮುಹಮ್ಮದ್ ಅಲಿ ಅಲ್ ಹುಸೇನಿ ಅವರ ಅಧ್ಯಕ್ಷತೆಯಲ್ಲಿ ಅಖಿಲ ಭಾರತ ಮಟ್ಟದ ನಾತ್ ಮುಶಾಯಿರಾ ನಡೆಯಿತು. ಡಾ. ಸೈಯದ್ ಮುಸ್ತಫಾ ಅಲ್ ಹುಸೇನಿ ಕಾರ್ಯಕ್ರಮದ ಮೇಲ್ವಿಚಾರಣೆ ವಹಿಸಿದ್ದರು. ದೇಶದ ವಿವಿಧ ಭಾಗಗಳಿಂದ ಆಗಮಿಸಿದ್ದ ಖ್ಯಾತ ನಾತ್ ಕವಿಗಳು ಪ್ರವಾದಿ ಮುಹಮ್ಮದ್ (ಸ.ಅ.) ಅವರ ಗುಣಗಾನ ಮಾಡುವ ಭಕ್ತಿಪೂರ್ಣ ಕವನಗಳನ್ನು ವಾಚಿಸಿದರು.

ನಾತ್ ಮುಶಾಯಿರಾದಲ್ಲಿ ಸಜ್ಜಾದಾ ನಶೀನ್ ಅವರು ಡಾ.ಸೈಯದ್ ಶಾ ಖುಸ್ರೋ ಹುಸೇನಿ ಅವರ ಮೂರು ಸಾಹಿತ್ಯಿಕ ಪ್ರಕಟಣೆಗಳನ್ನು ಬಿಡುಗಡೆ ಮಾಡಿದರು. ಪ್ರವಾದಿ ಮುಹಮ್ಮದ್ (ಸ.ಅ.) ಅವರ ಜೀವನ ಚರಿತ್ರೆಯನ್ನು ವಿವರಿಸುವ ಸಿರಾಜನ್ ಮುನೀರಾ ಕೃತಿಯ ಕಡಿಮೆ ಬೆಲೆಯ ಆವೃತ್ತಿಯನ್ನು ಬಿಡುಗಡೆಗೊಳಿಸಲಾಯಿತು. ಇದರೊಂದಿಗೆ ನಾತ್ ಕವನಗಳ ಸಂಕಲನ ರಫಅನಾ ಲಕ ಝಿಕ್ರಕ್ ಕೃತಿಯ ಎರಡನೇ ಆವೃತ್ತಿ ಹಾಗೂ ಅದರ ಇಂಗ್ಲಿಷ್ ಮತ್ತು ರೋಮನ್ ಲಿಪಿಯ ಆವೃತ್ತಿಗಳನ್ನೂ ಬಿಡುಗಡೆ ಮಾಡಲಾಯಿತು. ಕೃತಿಗಳನ್ನು ಹೆಚ್ಚಿನ ಓದುಗರಿಗೆ ತಲುಪಿಸುವ ಉದ್ದೇಶದಿಂದ ಈ ಪ್ರಕಟಣೆಗಳನ್ನು ಹೊರತರಲಾಗಿದೆ.

ಕಾರ್ಯಕ್ರಮದಲ್ಲಿ ಬಂದೇನವಾಜ್ ಕುಟುಂಬದ ಸದಸ್ಯರು, ಧಾರ್ಮಿಕ ವಿದ್ವಾಂಸರು, ಸೂಫಿ ಸಂತರು ಹಾಗೂ ಶಿಕ್ಷಣ ಕ್ಷೇತ್ರದ ಗಣ್ಯರು ಉಪಸ್ಥಿತರಿದ್ದರು.