Kalaburagi | ಸುಸ್ಥಿರ ವಸತಿ ನಿರ್ಮಾಣಕ್ಕೆ ಪರಿಸರಸ್ನೇಹಿ ತಂತ್ರಜ್ಞಾನ ಅಳವಡಿಕೆ ಅಗತ್ಯ: ಪ್ರೊ.ಬಟ್ಟು ಸತ್ಯನಾರಾಯಣ
ಸಿಯುಕೆಯಲ್ಲಿ ವಿಶ್ವ ಆವಾಸ ದಿನ-2026 ಕಾರ್ಯಕ್ರಮ

ಕಲಬುರಗಿ : ಹೆಚ್ಚುತ್ತಿರುವ ಜನಸಂಖ್ಯೆ ಹಾಗೂ ನಗರೀಕರಣದ ಹಿನ್ನೆಲೆಯಲ್ಲಿ ಸಮರ್ಪಕ ವಸತಿ ಕಲ್ಪಿಸುವುದು ಜಾಗತಿಕ ಸವಾಲಾಗಿದೆ. ಈ ಸವಾಲನ್ನು ಎದುರಿಸಲು ಪರಿಸರಸ್ನೇಹಿ ನಿರ್ಮಾಣ ತಂತ್ರಜ್ಞಾನ, ನಿರ್ಮಾಣ ಸಾಮಗ್ರಿಗಳ ಮರುಬಳಕೆ ಮತ್ತು ನೈಸರ್ಗಿಕ ಸಂಪನ್ಮೂಲಗಳ ಸಮರ್ಪಕ ಬಳಕೆಗೆ ಆದ್ಯತೆ ನೀಡಬೇಕು ಎಂದು ಕರ್ನಾಟಕ ಕೇಂದ್ರೀಯ ವಿಶ್ವವಿದ್ಯಾಲಯದ (ಸಿಯುಕೆ) ಕುಲಪತಿ ಪ್ರೊ. ಬಟ್ಟು ಸತ್ಯನಾರಾಯಣ ಹೇಳಿದರು.
ಕರ್ನಾಟಕ ಕೇಂದ್ರೀಯ ವಿಶ್ವವಿದ್ಯಾಲಯ ಹಾಗೂ ಇನ್ಸ್ಟಿಟ್ಯೂಷನ್ ಆಫ್ ಎಂಜಿನಿಯರ್ಸ್ (ಇಂಡಿಯಾ), ಕಲಬುರಗಿ ಕೇಂದ್ರದ ಸಹಯೋಗದಲ್ಲಿ ವಿಶ್ವವಿದ್ಯಾಲಯದ ಸಭಾಂಗಣದಲ್ಲಿ ಆಯೋಜಿಸಿದ್ದ ವಿಶ್ವ ಆವಾಸ ದಿನ-2026 ಕಾರ್ಯಕ್ರಮವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.
ಮರಳು, ಕಲ್ಲು ಸೇರಿದಂತೆ ನೈಸರ್ಗಿಕ ಸಂಪನ್ಮೂಲಗಳ ವಿವೇಚನಾರಹಿತ ಬಳಕೆಯಿಂದ ಪರಿಸರದ ಮೇಲೆ ಗಂಭೀರ ಪರಿಣಾಮ ಉಂಟಾಗುತ್ತಿದೆ. ಹೀಗಾಗಿ ನಿರ್ಮಾಣ ಕ್ಷೇತ್ರದಲ್ಲಿ ಮರುಬಳಕೆ ಸಾಮಗ್ರಿಗಳು ಹಾಗೂ ಪರಿಸರಸ್ನೇಹಿ ತಂತ್ರಜ್ಞಾನಗಳನ್ನು ಅಳವಡಿಸಿಕೊಳ್ಳಬೇಕು. ಇದರಿಂದ ಪರಿಸರ ಸಂರಕ್ಷಣೆಯ ಜೊತೆಗೆ ಮುಂದಿನ ಪೀಳಿಗೆಗೆ ಸಮರ್ಪಕ ವಸತಿ ಸೌಲಭ್ಯ ಕಲ್ಪಿಸಲು ಸಾಧ್ಯವಾಗುತ್ತದೆ ಎಂದರು.
ಜಾಗತಿಕ ವಸತಿ ಬಿಕ್ಕಟ್ಟಿನ ಕುರಿತು ಪ್ರಸ್ತಾಪಿಸಿದ ಅವರು, ವಿಶ್ವದಾದ್ಯಂತ ಸುಮಾರು ಮೂರು ಬಿಲಿಯನ್ ಜನರು ಸಮರ್ಪಕ ವಸತಿ ಹಾಗೂ ಉತ್ತಮ ಜೀವನ ಪರಿಸ್ಥಿತಿಗಳ ಕೊರತೆ ಎದುರಿಸುತ್ತಿದ್ದಾರೆ. ವಸತಿ ಎಂದರೆ ಕೇವಲ ಆಶ್ರಯಕ್ಕೆ ಸೀಮಿತವಲ್ಲ. ವಿದ್ಯುತ್, ಕುಡಿಯುವ ನೀರು, ನೈರ್ಮಲ್ಯ, ಅಡುಗೆ ಸೌಲಭ್ಯ ಹಾಗೂ ಸಾರಿಗೆಯಂತಹ ಮೂಲಸೌಕರ್ಯಗಳೂ ಅಗತ್ಯ. ಇವುಗಳ ಲಭ್ಯತೆಯೇ ಗೌರವಯುತ ಜೀವನಕ್ಕೆ ಆಧಾರವಾಗಿವೆ ಎಂದು ಹೇಳಿದರು.
ವಸತಿ ಸಮಸ್ಯೆಗಳಿಗೆ ಪರಿಹಾರ ಕಂಡುಕೊಳ್ಳಲು ನವೀನ ಎಂಜಿನಿಯರಿಂಗ್ ತಂತ್ರಜ್ಞಾನಗಳನ್ನು ಅಭಿವೃದ್ಧಿಪಡಿಸಬೇಕು. ಭಾರತದಲ್ಲಿ ವಸತಿ ಸಾಲದ ಲಭ್ಯತೆ ಹಾಗೂ ಬಡ್ಡಿದರಗಳ ಇಳಿಕೆಯಿಂದ ಸ್ವಂತ ಮನೆ ಹೊಂದುವ ಅವಕಾಶಗಳು ಹೆಚ್ಚಾಗಿವೆ. ನಗರ ಪ್ರದೇಶಗಳಲ್ಲಿ ಭೂಮಿಯ ಬೆಲೆ ಏರಿಕೆಯಾಗುತ್ತಿರುವುದರಿಂದ ಬಹುಮಹಡಿ ಕಟ್ಟಡಗಳು ಮತ್ತು ಅಪಾರ್ಟ್ಮೆಂಟ್ಗಳ ನಿರ್ಮಾಣ ಹೆಚ್ಚುತ್ತಿದೆ. ಆದರೆ ವಸತಿ ಅಭಿವೃದ್ಧಿಯೊಂದಿಗೆ ರಸ್ತೆ, ಒಳಚರಂಡಿ, ನೀರು ಸರಬರಾಜು, ವಿದ್ಯುತ್ ಹಾಗೂ ಸಾರ್ವಜನಿಕ ಸಾರಿಗೆ ವ್ಯವಸ್ಥೆಯನ್ನೂ ಸಮರ್ಪಕವಾಗಿ ಕಲ್ಪಿಸುವುದು ಅಗತ್ಯ ಎಂದು ಪ್ರತಿಪಾದಿಸಿದರು.
ವಿಟಿಯು ಕಲಬುರಗಿಯ ಸಿವಿಲ್ ಎಂಜಿನಿಯರಿಂಗ್ ವಿಭಾಗದ ಮುಖ್ಯಸ್ಥ ಹಾಗೂ ಸಂಶೋಧನೆ ಮತ್ತು ಅಭಿವೃದ್ಧಿ ಕೇಂದ್ರದ ಸಂಯೋಜಕ ಡಾ. ಬ್ರಿಜ್ಭೂಷಣ್ ಅವರು ವಿಶ್ವ ಆವಾಸ ದಿನದ ಮಹತ್ವ, ಸಮರ್ಪಕ ವಸತಿ ಕಲ್ಪಿಸುವಲ್ಲಿನ ಸವಾಲುಗಳು ಹಾಗೂ ಸುಸ್ಥಿರ ವಸತಿ ಅಭಿವೃದ್ಧಿಯ ಅಗತ್ಯತೆ ಕುರಿತು ವಿಶೇಷ ಉಪನ್ಯಾಸ ನೀಡಿದರು.
ಐಇಐ ಕಲಬುರಗಿ ಸ್ಥಳೀಯ ಕೇಂದ್ರದ ಕಾರ್ಯದರ್ಶಿ ಪ್ರೊ. ಉದಯಶಂಕರ್ ಬಳ್ಳಾರಿ, ಐಇಐ ತಾಂತ್ರಿಕ ಸಮಿತಿಯ ಸದಸ್ಯ ಪ್ರೊ. ವಿಷ್ಣುದತ್ತ ಕೊಹೀರ್ ಹಾಗೂ ಸಿಯುಕೆ ಎಂಜಿನಿಯರಿಂಗ್ ವಿಭಾಗದ ಮುಖ್ಯಸ್ಥ ಪ್ರೊ. ಪ್ರಮೋದ್ ಕುಮಾರ್ ಮಾತನಾಡಿದರು.
ಕಾರ್ಯಕ್ರಮದ ಸಂಯೋಜಕ ಡಾ. ಸಂಗಮೇಶ್ ಸ್ವಾಗತಿಸಿದರು. ಮತ್ತೊಬ್ಬ ಸಂಯೋಜಕ ಡಾ. ನಿತಿನ್ ಬಿ. ವಂದಿಸಿದರು.
ಡಾ. ಪಾಂಡು ರಂಗ ಪ್ರಸಾದ್, ಡಾ. ವೀಣಾ ಎಸ್. ಮನುರೆ, ಡಾ. ದೇವಿಕಾ ಎಸ್. ದಾಬ್ಕೆ, ಐಇಐ ಪದಾಧಿಕಾರಿಗಳಾದ ರವೀಂದ್ರ ಕಾಗಡ, ಪತಂಗೆ, ಮಹಮ್ಮದ್ ಸಿರಾಜ್, ಮನ್ಸೂರು ಅಹಮದ್, ಮಹಮ್ಮದ್ ಹುಸೇನ್ ಸೇರಿದಂತೆ ಸಿಯುಕೆ ಬೋಧಕ ಸಿಬ್ಬಂದಿ, ಸಂಶೋಧನಾ ವಿದ್ಯಾರ್ಥಿಗಳು ಹಾಗೂ ವಿದ್ಯಾರ್ಥಿಗಳು ಭಾಗವಹಿಸಿದ್ದರು.
ವಂದೇ ಮಾತರಂ ಗೀತೆಯೊಂದಿಗೆ ಆರಂಭಗೊಂಡ ಕಾರ್ಯಕ್ರಮ ರಾಷ್ಟ್ರಗೀತೆಯೊಂದಿಗೆ ಮುಕ್ತಾಯಗೊಂಡಿತು.






