Kalaburagi | ಅಂಬೇಡ್ಕರ್ ಅವರ 22 ಪ್ರತಿಜ್ಞೆಗಳು ಬದುಕಿಗೆ ಹೊಸ ದಿಕ್ಕು ನೀಡಿವೆ : ಭಂತೆ ಬೋಧಿತಿಸ್ಸ

ಕಲಬುರಗಿ: ಬಾಬಾಸಾಹೇಬ ಡಾ. ಬಿ.ಆರ್. ಅಂಬೇಡ್ಕರ್ ಅವರು 1956ರಲ್ಲಿ ಬೌದ್ಧ ಧಮ್ಮ ಸ್ವೀಕರಿಸುವ ಮೂಲಕ ನಮಗೆ ಧಮ್ಮದ ಮಾರ್ಗ ತೋರಿಸಿದ್ದಾರೆ. ಅವರು ಬೋಧಿಸಿದ 22 ಪ್ರತಿಜ್ಞೆಗಳು ಹಾಗೂ ಬುದ್ಧ, ಧಮ್ಮ ಮತ್ತು ಸಂಘ ಎಂಬ ತ್ರಿರತ್ನಗಳು ನಮ್ಮ ಬದುಕಿಗೆ ಹೊಸ ದಿಕ್ಕು ನೀಡಿವೆ. ಈ ತ್ರಿರತ್ನಗಳ ಮೂಲಕ ನಾವೆಲ್ಲರೂ ಆಗರ್ಭ ಶ್ರೀಮಂತರಾಗಿದ್ದೇವೆ ಎಂದು ಭಂತೆ ಬೋಧಿತಿಸ್ಸ ಹೇಳಿದರು.

ನಗರದ ಬಸವನಗರದಲ್ಲಿ 70ನೇ ಧಮ್ಮಚಕ್ರ ಪ್ರವರ್ತನಾ ದಿನದ ನಿಮಿತ್ತ ರಾಹುಲ್ ಯುವಕ ಸಂಘದ ವತಿಯಿಂದ ಆಯೋಜಿಸಿದ್ದ ಧಮ್ಮಜ್ಯೋತಿ ಯಾತ್ರೆಯ ಬಳಿಕ, ಬಸವನಗರದ ಕರುಣಾ ಬುದ್ಧ ವಿಹಾರದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.

ಬಾಬಾಸಾಹೇಬ ಅಂಬೇಡ್ಕರ್ ಅವರು ಬೌದ್ಧ ಧಮ್ಮ ಸ್ವೀಕರಿಸುವ ಮೂಲಕ ಸಮಾನತೆ, ಸ್ವಾಭಿಮಾನ ಹಾಗೂ ಮಾನವೀಯ ಮೌಲ್ಯಗಳ ಮಹತ್ವವನ್ನು ಸಾರಿದ್ದಾರೆ. ಅವರು ನೀಡಿದ 22 ಪ್ರತಿಜ್ಞೆಗಳನ್ನು ಜೀವನದಲ್ಲಿ ಅಳವಡಿಸಿಕೊಂಡು, ಬುದ್ಧನ ತತ್ವಗಳಂತೆ ಬದುಕಬೇಕು. ಧಮ್ಮದ ಮಾರ್ಗದಲ್ಲಿ ಸಾಗುವ ಮೂಲಕ ಸಮಾಜದಲ್ಲಿ ಶಾಂತಿ, ಸಹಬಾಳ್ವೆ ಮತ್ತು ಸಮಾನತೆಯನ್ನು ಬೆಳೆಸಬೇಕು ಎಂದು ಭಂತೆ ಬೋಧಿತಿಸ್ಸ ಸಂದೇಶ ನೀಡಿದರು.

ಇದಕ್ಕೂ ಮುನ್ನ ನಗರದ ಜಗತ್ ವೃತ್ತದಲ್ಲಿ ಕಲಬುರಗಿ ನಗರ ಪೊಲೀಸ್ ಆಯುಕ್ತ ಶರಣಪ್ಪ ಎಸ್.ಡಿ. ಅವರು ಧಮ್ಮಜ್ಯೋತಿ ಯಾತ್ರೆಗೆ ಚಾಲನೆ ನೀಡಿದರು. ಪಂಚಶೀಲ ಧ್ವಜಗಳನ್ನು ಹಿಡಿದ ಯುವಕರು ‘ಜೈ ಭೀಮ್’, ‘ಜೈ ಬುದ್ಧ’ ಎಂಬ ಘೋಷಣೆಗಳನ್ನು ಮೊಳಗಿಸುತ್ತ ನಗರದ ಪ್ರಮುಖ ಬೀದಿಗಳಲ್ಲಿ ಯಾತ್ರೆ ನಡೆಸಿದರು. ಬಳಿಕ ಯಾತ್ರೆಯು ಬಸವನಗರದ ಕರುಣಾ ಬುದ್ಧ ವಿಹಾರವನ್ನು ತಲುಪಿತು.

ಕಾರ್ಯಕ್ರಮದ ಆರಂಭದಲ್ಲಿ ಡಾ. ಬಿ.ಆರ್. ಅಂಬೇಡ್ಕರ್ ಅವರ ಪ್ರತಿಮೆಗೆ ಮಾಲಾರ್ಪಣೆ ಮಾಡಿ ಗೌರವ ಸಲ್ಲಿಸಲಾಯಿತು. ನಂತರ ಭಂತೆ ಬೋಧಿತಿಸ್ಸ ಅವರು ತ್ರಿಸರಣ ಮತ್ತು ಪಂಚಶೀಲ ಬೋಧಿಸಿದರು. ಹಣಮಂತ ಬೋಧನಕರ ಅವರು ಬಾಬಾಸಾಹೇಬರು ನೀಡಿದ 22 ಪ್ರತಿಜ್ಞೆಗಳನ್ನು ಬೋಧಿಸಿದರು.

ಜಿಲ್ಲೆಯ ವಿವಿಧ ತಾಲೂಕುಗಳು ಹಾಗೂ ನಗರ ಪ್ರದೇಶಗಳಿಂದ ಆಗಮಿಸಿದ್ದ ಬೌದ್ಧ ಅನುಯಾಯಿಗಳು, ಬಸವನಗರದ ಮಹಿಳೆಯರು ಸೇರಿದಂತೆ ನೂರಾರು ಜನರು ಯಾತ್ರೆಯಲ್ಲಿ ಭಾಗವಹಿಸಿ ಧಮ್ಮದ ಸಂದೇಶ ಸಾರಿದರು.

ಕಾರ್ಯಕ್ರಮದಲ್ಲಿ ಮಹಾನಗರ ಪಾಲಿಕೆ ಆಯುಕ್ತ ಅವಿನಾಶ್ ಶಿಂಧೆ, ಮಲ್ಲಿಕಾರ್ಜುನ ಸುಹಾಸಿನಿ, ರಾಜಶೇಖರ ಮಾಂಗ್, ಸಂಧ್ಯಾ ಕಾಣೇಕರ, ಸೂರ್ಯಕಾಂತ ನಿಂಬಾಳ್ಕರ್, ಸಿದ್ದರಾಮ ಬೇಳಕೋಟಿ, ದೇವೇಂದ್ರ ಸಿನ್ನೂರ, ಹರಿಯಪ್ಪ ಹಳ್ಳಿ, ವಿಜಯಕುಮಾರ ಶಿಂಧೆ, ಭೀಮಾ ಕಟ್ಟಿ, ಜಯಪ್ಪ ಕೊಳ್ಳೂರ, ಎಸ್.ಎಸ್. ತವಡೆ ಹಾಗೂ ಸುರೇಶ ಕಾಣೇಕರ ಸೇರಿದಂತೆ ನಗರದ ಪ್ರಮುಖರು ಉಪಸ್ಥಿತರಿದ್ದರು.