Kalaburagi | ಅಂಕಿತಾ ಭಂಡಾರಿ ಹತ್ಯೆ ಪ್ರಕರಣ: ನ್ಯಾಯ, ಪಾರದರ್ಶಕ ತನಿಖೆಗೆ ಆಗ್ರಹಿಸಿ ಪ್ರತಿಭಟನೆ

ಕಲಬುರಗಿ: ಉತ್ತರಾಖಂಡದ ಅಂಕಿತಾ ಭಂಡಾರಿ ಹತ್ಯೆ ಪ್ರಕರಣದಲ್ಲಿ ನ್ಯಾಯ, ಪಾರದರ್ಶಕ ತನಿಖೆ ಹಾಗೂ ಸಂವಿಧಾನಾತ್ಮಕ ಹೊಣೆಗಾರಿಕೆಯನ್ನು ಖಚಿತಪಡಿಸಬೇಕು ಎಂದು ಆಗ್ರಹಿಸಿ ವಿವಿಧ ಮಹಿಳಾ ಮತ್ತು ಸಾಮಾಜಿಕ ಸಂಘಟನೆಗಳ ಮುಖಂಡರು ಬುಧವಾರ ಜಿಲ್ಲಾಧಿಕಾರಿ ಕಚೇರಿ ಎದುರು ಪ್ರತಿಭಟನೆ ನಡೆಸಿದರು.

2022ರ ಸೆಪ್ಟೆಂಬರ್‌ನಲ್ಲಿ ಉತ್ತರಾಖಂಡದಲ್ಲಿ ನಡೆದ 19 ವರ್ಷದ ಅಂಕಿತಾ ಭಂಡಾರಿ ಹತ್ಯೆ ಪ್ರಕರಣ ದೇಶಾದ್ಯಂತ ತೀವ್ರ ಆಘಾತ ಮೂಡಿಸಿತ್ತು. ಪ್ರಕರಣಕ್ಕೆ ಸಂಬಂಧಿಸಿದ ಗಂಭೀರ ಆರೋಪಗಳು ಹಾಗೂ ಬಗೆಹರಿಯದ ಪ್ರಶ್ನೆಗಳು ಸಾರ್ವಜನಿಕ ವಲಯದಲ್ಲಿ ಚರ್ಚೆಯಾಗುತ್ತಿವೆ. ಸಂತ್ರಸ್ತೆಯ ಕುಟುಂಬ ನ್ಯಾಯ ಮತ್ತು ಪಾರದರ್ಶಕತೆಗಾಗಿ ಹೋರಾಟ ಮುಂದುವರಿಸಿದೆ ಎಂದು ಪ್ರತಿಭಟನಾಕಾರರು ತಿಳಿಸಿದರು.

ಪ್ರಕರಣಕ್ಕೆ ಸಂಬಂಧಿಸಿದ ಸಾರ್ವಜನಿಕ ಆರೋಪಗಳನ್ನು ಎದುರಿಸುತ್ತಿರುವ ವ್ಯಕ್ತಿಯೊಬ್ಬರನ್ನು ಸಿಕ್ಕಿಂ ರಾಜ್ಯಪಾಲರಂತಹ ಸಂವಿಧಾನಾತ್ಮಕ ಹುದ್ದೆಗೆ ನೇಮಕ ಮಾಡಿರುವ ಕುರಿತು ಸಂಘಟನೆಗಳು ತೀವ್ರ ಕಳವಳ ವ್ಯಕ್ತಪಡಿಸಿದವು. ಈ ಕುರಿತು ರಾಷ್ಟ್ರಪತಿಗೆ ಪ್ರತ್ಯೇಕ ಮನವಿ ಸಲ್ಲಿಸಲು ಸಿದ್ಧತೆ ನಡೆಸಿರುವುದಾಗಿ ತಿಳಿಸಿದವು.

ಅಂಕಿತಾ ಭಂಡಾರಿ ಪ್ರಕರಣದ ಕುರಿತು ಸಾರ್ವಜನಿಕ ವಲಯದಲ್ಲಿರುವ ಕಳವಳಗಳನ್ನು ಗಂಭೀರವಾಗಿ ಪರಿಗಣಿಸಿ, ಬಗೆಹರಿಯದ ಪ್ರಶ್ನೆಗಳ ಬಗ್ಗೆ ಪಾರದರ್ಶಕ, ನಿಷ್ಪಕ್ಷಪಾತ ಹಾಗೂ ಸ್ವತಂತ್ರ ಪರಿಶೀಲನೆ ನಡೆಸಬೇಕು. ರಾಜ್ಯಪಾಲರ ನೇಮಕಾತಿ ಕುರಿತು ಸೂಕ್ತ ಸಂವಿಧಾನಾತ್ಮಕ ಕ್ರಮ ಕೈಗೊಳ್ಳಬೇಕು. ರಾಜಕೀಯ ಪ್ರಭಾವದಿಂದ ನ್ಯಾಯ ಮರೆಯಾಗದಂತೆ ನೋಡಿಕೊಳ್ಳಬೇಕು ಎಂದು ಪ್ರತಿಭಟನಾಕಾರರು ಆಗ್ರಹಿಸಿದರು.

ಯಾವುದೇ ವ್ಯಕ್ತಿಯನ್ನು ತಪ್ಪಿತಸ್ಥರೆಂದು ಘೋಷಿಸುವುದು ತಮ್ಮ ಉದ್ದೇಶವಲ್ಲ. ಪ್ರತಿಯೊಬ್ಬರಿಗೂ ಕಾನೂನು ಪ್ರಕ್ರಿಯೆಯಡಿ ನ್ಯಾಯ ದೊರೆಯಬೇಕು. ಆದರೆ, ಗಂಭೀರ ಸಾರ್ವಜನಿಕ ಆರೋಪಗಳನ್ನು ನಿರ್ಲಕ್ಷಿಸಬಾರದು. ಸಂವಿಧಾನಾತ್ಮಕ ಹುದ್ದೆಗಳನ್ನು ಅಲಂಕರಿಸುವವರು ಸಾರ್ವಜನಿಕ ವಿಶ್ವಾಸ ಮತ್ತು ನೈತಿಕ ಹೊಣೆಗಾರಿಕೆಯ ಉನ್ನತ ಮಾನದಂಡಗಳನ್ನು ಪಾಲಿಸಬೇಕು ಎಂದು ಒತ್ತಾಯಿಸಿದರು.

ಅಂಕಿತಾ ಭಂಡಾರಿ ಉತ್ತರಾಖಂಡದ ಮಗಳಷ್ಟೇ ಅಲ್ಲ, ಭಾರತದ ಮಗಳು. ಆಕೆಗೆ ನ್ಯಾಯ ದೊರಕಿಸುವುದು ಮಹಿಳೆಯರ ಘನತೆ, ಸುರಕ್ಷತೆ, ಸಾರ್ವಜನಿಕ ಹೊಣೆಗಾರಿಕೆ ಹಾಗೂ ನ್ಯಾಯ ವ್ಯವಸ್ಥೆಯ ಮೇಲಿನ ನಂಬಿಕೆಗೆ ಸಂಬಂಧಿಸಿದ ವಿಷಯವಾಗಿದೆ. ಅಂಕಿತಾ ಕುಟುಂಬಕ್ಕೆ ಸತ್ಯ ತಿಳಿಯಬೇಕು, ನ್ಯಾಯ ದೊರೆಯಬೇಕು ಹಾಗೂ ಸಾರ್ವಜನಿಕ ಜೀವನದಲ್ಲಿ ಹೊಣೆಗಾರಿಕೆ ಖಚಿತವಾಗಬೇಕು ಎಂದು ಸಂಘಟನೆಗಳ ಪ್ರತಿನಿಧಿಗಳು ಹೇಳಿದರು.

ಪ್ರತಿಭಟನೆಯಲ್ಲಿ ವಾಯ್ಸ್ ಆಫ್ ವಿಮೆನ್ಸ್ ಕಲಬುರಗಿ ಅಧ್ಯಕ್ಷೆ ಶಹನಾಜ್ ಅಖ್ತರ್, ಇರಫಾನಾ ಪರ್ವೀನ್, ಅನುರಾಧಾ ಎಸ್. ನೈನ್, ಶಶಿಕಲಾ, ನಸೀಮಾ ಬಾನು, ಶಿಫಾ ಮಹಿಳಾ ಸೊಸೈಟಿ ಅಧ್ಯಕ್ಷೆ ತಹೇನಿಯತ್ ಫಾತಿಮಾ, ಜನ ವಿಕಾಸ ಫೌಂಡೇಶನ್ ಕಲಬುರಗಿ ಅಧ್ಯಕ್ಷೆ ಶಾಹೀನ್ ಬೇಗಂ, ಉಪಾಧ್ಯಕ್ಷೆ ಮಶಾಖ್ ಪಟೇಲ್, ಅಂಬೇಡ್ಕರ್ ಸೇನೆಯ ಶೀಲಾ ಗಾಯಕ್ವಾಡ್, ಗೌತಮಿ ಮೈಲ್ಕಾರಿ, ಅನಿತಾ ಮಠಿ ಮೂಡ್, ಶೋಭಾ ಕಾಂಬ್ಳೆ, ಕಲ್ಪನಾ ಗುಡೂರು, ಕಲ್ಯಾಣ ಕರ್ನಾಟಕ ಪ್ರಾದೇಶಿಕ ಅಭಿವೃದ್ಧಿ ಟ್ರಸ್ಟ್ ಅಧ್ಯಕ್ಷೆ ಫಾತಿಮಾ, ಶಾಹೀನ್ ಸುಲ್ತಾನಾ ಹಾಗೂ ರೇಷ್ಮಾ ರಶೀದಾ ಸೇರಿದಂತೆ ವಿವಿಧ ಸಂಘಟನೆಗಳ ಪ್ರತಿನಿಧಿಗಳು ಪಾಲ್ಗೊಂಡಿದ್ದರು.