ಕಲಬುರಗಿ ನಾಟಕೋತ್ಸವ : ಮನ ಸೆಳೆದ ಕರಿಮಾಯಿ ನಾಟಕ

ಕಲಬುರಗಿ : ನಗರದ ಡಾ.ಎಸ್.ಎಂ.ಪಂಡಿತ್ ರಂಗಮಂದಿರದಲ್ಲಿ ಆರಂಭವಾದ “ಕಲಬುರಗಿ ನಾಟಕೋತ್ಸವ - 26”ರ ಮೊದಲ ದಿನವೇ ಪ್ರೇಕ್ಷಕರಿಂದ ಭರ್ಜರಿ ಸ್ಪಂದನೆ ವ್ಯಕ್ತವಾಯಿತು.
ಸ್ಪಂದನ ಬೆಂಗಳೂರು ಕಲಾತಂಡ ಅಭಿನಯಿಸಿದ, ಜ್ಞಾನಪೀಠ ಪ್ರಶಸ್ತಿ ಪುರಸ್ಕೃತ ಚಂದ್ರಶೇಖರ್ ಕಂಬಾರ ಅವರ ಮೂಲ ಕೃತಿಯಾದ ‘ಕರಿಮಾಯಿ’ ನಾಟಕವು ಉದ್ಘಾಟನಾ ಪ್ರದರ್ಶನವಾಗಿ ವೇದಿಕೆಗೆ ಬಂದಿದೆ.
ಹಿರಿಯ ರಂಗಕರ್ಮಿ ಹಾಗೂ ಚಿತ್ರನಟಿ ಬಿ. ಜಯಶ್ರೀ ಅವರ ನಿರ್ದೇಶನ ಮತ್ತು ಹಿನ್ನಲೆ ಮೇಳದ ಗಾಯನ ನಾಟಕಕ್ಕೆ ವಿಶೇಷ ಮೆರುಗು ನೀಡಿತು. ಮುಖ್ಯಪಾತ್ರದಲ್ಲಿ ರಂಗಭೂಮಿ, ಸಿನಿಮಾ ಹಾಗೂ ಕಿರುತೆರೆ ಖ್ಯಾತ ನಟ ರಮೇಶ್ ಪಂಡಿತ್ ಸೇರಿದಂತೆ ಹಲವು ಪರಿಚಿತ ಮುಖಗಳು ಅಭಿನಯಿಸಿ ಪ್ರೇಕ್ಷಕರಿಂದ ಮೆಚ್ಚುಗೆ ಗಳಿಸಿದರು.
ಜಾನಪದ ಮಹಾಕಾವ್ಯದ ಅನಾವರಣ :
‘ಕರಿಮಾಯಿ’ ಕೇವಲ ನಾಟಕವಲ್ಲ. ಉತ್ತರ ಕರ್ನಾಟಕದ ಜಾನಪದ ಸೊಗಡಿನೊಂದಿಗೆ ಸಾಗುವ ಒಂದು ಮಹತ್ವದ ರಂಗಕೃತಿ. ಶಿವಪುರ ಎಂಬ ಕಾಲ್ಪನಿಕ ಗ್ರಾಮದ ಸುತ್ತ ನಡೆಯುವ ಕಥೆ, ಗ್ರಾಮದ ದೇವತೆ ‘ಕರಿಮಾಯಿ’ಯ ನಂಬಿಕೆ, ಆಚರಣೆ ಮತ್ತು ಸಂಪ್ರದಾಯಗಳನ್ನೇ ಕೇಂದ್ರವಾಗಿಸಿಕೊಂಡಿದೆ.
ಸಂಪ್ರದಾಯ ಹಾಗೂ ಆಧುನಿಕತೆಯ ನಡುವಿನ ಸಂಘರ್ಷ, ಹಳೆಯ ತಲೆಮಾರಿನ ನಂಬಿಕೆಗಳು ಮತ್ತು ಹೊಸ ತಲೆಮಾರಿನ ತರ್ಕಬದ್ಧ ಚಿಂತನೆಗಳ ತಾಕರಾರು ನಾಟಕದಲ್ಲಿ ಪರಿಣಾಮಕಾರಿಯಾಗಿ ಮೂಡಿಬಂದಿವೆ. ಹಳ್ಳಿ ರಾಜಕೀಯ, ಅಧಿಕಾರದ ಹಪಾಹಪಿ ಹಾಗೂ ಅದರ ಸಾಮಾನ್ಯ ಜನರ ಬದುಕಿನ ಮೇಲಿನ ಪರಿಣಾಮವನ್ನು ಕಂಬಾರರು ಆಳವಾಗಿ ಚಿತ್ರಿಸಿದ್ದಾರೆ.
ನಾಟಕದುದ್ದಕ್ಕೂ ಜಾನಪದ ಹಾಡುಗಳು, ಲಾವಣಿಗಳು ಹಾಗೂ ಗ್ರಾಮ್ಯ ಭಾಷೆಯ ಬಳಕೆ ಪ್ರೇಕ್ಷಕರನ್ನು ವಿಭಿನ್ನ ಲೋಕಕ್ಕೆ ಕರೆದೊಯ್ಯುತ್ತದೆ. ವಿಶೇಷವಾಗಿ ಬಿ. ಜಯಶ್ರೀಯವರ ಧ್ವನಿ ಮತ್ತು ಹಿನ್ನಲೆ ಸಂಗೀತ ಮನಮಿಡಿಯುವಂತಿತ್ತು.
ಬಯಲಾಟ ಮತ್ತು ಸಣ್ಣಾಟಗಳ ತಂತ್ರಗಳನ್ನು ಬಳಸಿ, ಸೂತ್ರಧಾರರ ಪಾತ್ರಗಳ ಮೂಲಕ ಕಥೆಯನ್ನು ಮುನ್ನಡೆಸಿರುವ ನಿರ್ದೇಶನ ಶೈಲಿ ಗಮನ ಸೆಳೆದಿತು.
ಒಟ್ಟಿನಲ್ಲಿ ‘ಕರಿಮಾಯಿ’ ನಾಟಕವು ಬದಲಾಗುತ್ತಿರುವ ಕಾಲಘಟ್ಟದಲ್ಲಿ ಮನುಷ್ಯ ಮೌಲ್ಯಗಳ ಕುಸಿತ ಮತ್ತು ಮೂಲ ಬೇರುಗಳಿಂದ ದೂರವಾಗುತ್ತಿರುವ ಸಾಮಾಜಿಕ ಸ್ಥಿತಿಗತಿಗಳನ್ನು ಪ್ರತಿಬಿಂಬಿಸುವ ಚಿಂತನಾತ್ಮಕ ಕೃತಿ ಎಂಬುದಾಗಿ ಪ್ರೇಕ್ಷಕರ ಅಭಿಪ್ರಾಯ ವ್ಯಕ್ತವಾಯಿತು.






