Kalaburagi | ನಾಯಕತ್ವ ಎಂದರೆ ದೊಡ್ಡ ಜವಾಬ್ದಾರಿ : ಸೈಯದ್ ಮುಹಮ್ಮದ್ ಅಲಿ ಅಲ್ ಹುಸೈನಿ
ಕಲಬುರಗಿ: ಒಳ್ಳೆಯ ಕೇಳುಗರೇ ಉತ್ತಮ ನಾಯಕರಾಗಲು ಸಾಧ್ಯ. ನಾಯಕತ್ವ ಎಂದರೆ ಅಧಿಕಾರವಲ್ಲ, ಅದು ದೊಡ್ಡ ಜವಾಬ್ದಾರಿಯಾಗಿದ್ದು, ನಾಯಕನಲ್ಲಿ ಸಹನೆ, ವಿನಯ ಹಾಗೂ ಎಲ್ಲರ ಅಭಿಪ್ರಾಯವನ್ನು ಆಲಿಸುವ ಗುಣ ಇರಬೇಕು ಎಂದು ಖ್ವಾಜಾ ಬಂದಾನವಾಜ್ ವಿಶ್ವವಿದ್ಯಾಲಯದ ಕುಲಾಧಿಪತಿ, ವಕ್ಫ್ ಬೋರ್ಡ್ ಅಧ್ಯಕ್ಷ ಸೈಯದ್ ಮುಹಮ್ಮದ್ ಅಲಿ ಅಲ್ ಹುಸೈನಿ ಹೇಳಿದರು.
ನಗರದ ಸೈಯದ್ ಅಕ್ಬರ್ ಹುಸೈನಿ ಶಾಲೆಯಲ್ಲಿ ಮಂಗಳವಾರ ನಡೆದ 2026-27ನೇ ಶೈಕ್ಷಣಿಕ ವರ್ಷದ ಇನ್ವೆಸ್ಟಿಟ್ಯೂರ್ ಸಮಾರಂಭದಲ್ಲಿ ಮುಖ್ಯ ಅತಿಥಿಯಾಗಿ ಮಾತನಾಡಿದ ಅವರು, ವಿದ್ಯಾರ್ಥಿ ನಾಯಕರ ಆಯ್ಕೆ ಶಾಲಾ ಜೀವನದ ಅತ್ಯಂತ ಮಹತ್ವದ ಹಂತವಾಗಿದೆ. ಉತ್ತಮ ಸಾಮರ್ಥ್ಯ, ಶಿಸ್ತು ಹಾಗೂ ನಾಯಕತ್ವದ ಗುಣಗಳನ್ನು ಹೊಂದಿರುವ ವಿದ್ಯಾರ್ಥಿಗಳನ್ನು ಆಯ್ಕೆ ಮಾಡುವ ಪ್ರಕ್ರಿಯೆಯಿದು ಎಂದು ತಿಳಿಸಿದರು.
ಹೌಸ್ ಕ್ಯಾಪ್ಟನ್ಗಳು ಹಾಗೂ ಉಪನಾಯಕರು ಕೇವಲ ಹುದ್ದೆಯ ಗೌರವವನ್ನು ಅನುಭವಿಸುವುದಲ್ಲ, ಇತರ ವಿದ್ಯಾರ್ಥಿಗಳಿಗೆ ಮಾದರಿಯಾಗಬೇಕು. ವಿನಯದಿಂದ ನಡೆದುಕೊಳ್ಳಬೇಕು, ಎಲ್ಲರನ್ನು ಗೌರವಿಸಬೇಕು. ನಾಯಕತ್ವ ಸುಲಭದ ಕೆಲಸವಲ್ಲ. ಆದೇಶಗಳನ್ನು ನೀಡುವುದಕ್ಕಿಂತ ಎಲ್ಲರ ಸಲಹೆಗಳನ್ನು ಆಲಿಸಿ, ಸೂಕ್ತ ನಿರ್ಧಾರ ಕೈಗೊಳ್ಳುವ ಗುಣ ನಾಯಕರಲ್ಲಿ ಇರಬೇಕು ಎಂದು ಹೇಳಿದರು.
ಇಂದಿನ ಯುವಪೀಳಿಗೆ ಮೊಬೈಲ್ಗೆ ಅತಿಯಾಗಿ ಅವಲಂಬಿತವಾಗುತ್ತಿದೆ. ಅಗತ್ಯವಿರುವಷ್ಟೇ ಮೊಬೈಲ್ ಬಳಸಬೇಕು. ಕೃತಕ ಬುದ್ಧಿಮತ್ತೆ (AI) ಹಾಗೂ ಚಾಟ್ಜಿಪಿಟಿಯಂತಹ ತಂತ್ರಜ್ಞಾನಗಳನ್ನು ಸಹ ವಿವೇಚನೆಯಿಂದ ಬಳಸಬೇಕು. ಅವುಗಳ ಮೇಲಿನ ಅತಿಯಾದ ಅವಲಂಬನೆ ಉತ್ತಮವಲ್ಲ ಎಂದು ವಿದ್ಯಾರ್ಥಿಗಳಿಗೆ ಕಿವಿಮಾತು ಹೇಳಿದರು.
ಶಾಲಾ ವಿದ್ಯಾರ್ಥಿ ಜೀವನ ಅತ್ಯಂತ ಅಮೂಲ್ಯವಾದುದು. ಅದನ್ನು ಸದುಪಯೋಗಪಡಿಸಿಕೊಳ್ಳಬೇಕು. ಪಠ್ಯದ ಜೊತೆಗೆ ಕ್ರೀಡೆ, ಸಾಂಸ್ಕೃತಿಕ ಹಾಗೂ ಇತರೆ ಪಠ್ಯೇತರ ಚಟುವಟಿಕೆಗಳಲ್ಲೂ ಸಕ್ರಿಯವಾಗಿ ಭಾಗವಹಿಸಬೇಕು. ಶಿಕ್ಷಕರಿಗೆ ಗೌರವ ನೀಡಿ, ಸಹಪಾಠಿಗಳನ್ನು ಪ್ರೋತ್ಸಾಹಿಸಿ ಉತ್ತಮ ನಾಯಕತ್ವದ ಗುಣಗಳನ್ನು ಬೆಳೆಸಿಕೊಳ್ಳಬೇಕು ಎಂದು ಸಲಹೆ ನೀಡಿದರು.
ನನ್ನ ತಂದೆ ದಿವಂಗತ ಡಾ.ಸೈಯದ್ ಶಾಹ್ ಖುಸ್ರೋ ಹುಸ್ಸೇನಿ ಅವರ ಕನಸನ್ನು ಎಲ್ಲರೂ ಸೇರಿ ನನಸಾಗಿಸೋಣ ಎಂದು ಅವರು ಕರೆ ನೀಡಿದರು.
ಸಮಾರಂಭದಲ್ಲಿ ಪರ್ಲ್, ಸಫೈರ್, ಎಮರಾಲ್ಡ್ ಹಾಗೂ ರೂಬಿ ಎಂಬ ನಾಲ್ಕು ಹೌಸ್ಗಳ ನಾಯಕರು ಮತ್ತು ಉಪನಾಯಕರಿಗೆ ಬ್ಯಾಡ್ಜ್ಗಳನ್ನು ತೊಡಿಸಿ ಅಧಿಕಾರ ವಹಿಸಲಾಯಿತು. ವಿದ್ಯಾರ್ಥಿಗಳು ಆಕರ್ಷಕ ನೃತ್ಯ ಪ್ರದರ್ಶನ ನೀಡಿದರು.
ವಿದ್ಯಾರ್ಥಿಗಳಾದ ಅಬ್ದುಲ್ ಸಮದ್ ಹಾಗೂ ಅಬುಲ್ ಉಜರ್ ಪ್ರಾರ್ಥನೆ ಸಲ್ಲಿಸಿದರು. ರೂಫಿ ಜೈನಬ್ ಸ್ವಾಗತಿಸಿದರು. ಸೈಯದ್ ಅಲಿಷಾ ಫಾತಿಮಾ ವಂದಿಸಿದರು. ಮುಹಮ್ಮದ್ ಅಯಾನ್, ಮಿರ್ಜಾ ಉಜೈರ್ ಬೇಗ್ ಹಾಗೂ ಸೈದಾ ಶಿಬ್ರಾ ಹುಸ್ಸೇನಿ ಕಾರ್ಯಕ್ರಮ ನಿರೂಪಿಸಿದರು.
ಕಾರ್ಯಕ್ರಮದಲ್ಲಿ ಕೆಬಿಎನ್ ಕ್ಯಾಂಪಸ್ ನಿರ್ದೇಶಕ ಡಾ.ಸೈಯದ್ ಮುಸ್ತಫಾ ಅಲ್ ಹುಸ್ಸೇನಿ, ಪ್ರಾಥಮಿಕ ಮತ್ತು ಪ್ರೌಢ ಶಿಕ್ಷಣ ವಿಭಾಗದ ಕಾರ್ಯದರ್ಶಿ ಬೆನ್ನಿ ಕುರಿಯಾಕೋಸ್, ವಿಶ್ವವಿದ್ಯಾಲಯದ ಸಮ ಉಪಕುಲಪತಿ ಪ್ರೊ.ಅಶ್ಫಾಕ್ ಅಹ್ಮದ್, ಕುಲಸಚಿವ ಮಿರ್ ವಿಲಾಯತ್ ಅಲಿ, ಶಾಲೆಯ ಪ್ರಾಂಶುಪಾಲ ಲಿಜೆಶ್ ತುರುತಿಲ್, ಶಿಕ್ಷಕ ವರ್ಗ, ವಿದ್ಯಾರ್ಥಿಗಳು ಹಾಗೂ ಪೋಷಕರು ಉಪಸ್ಥಿತರಿದ್ದರು.
