Kalaburagi | ಹಿರಿಯರ ಸೇವೆ, ಆರೈಕೆಯಲ್ಲಿ ಮಾನವೀಯತೆ ಮೆರೆಯಲಿ: ಅಭಿನವ ಪರ್ವತೇಶ್ವರ ಶಿವಾಚಾರ್ಯರು

ಕಲಬುರಗಿ: ಹಣ, ಆಸ್ತಿ, ಅಂತಸ್ತು ಮತ್ತು ಅಧಿಕಾರ ತಾತ್ಕಾಲಿಕ. ಆದರೆ ನಾವು ಹಂಚಿದ ಪ್ರೀತಿ, ಮಾಡಿದ ಸೇವೆ, ತೋರಿದ ಕರುಣೆ ಹಾಗೂ ಹಿರಿಯರಿಂದ ಪಡೆದ ಆಶೀರ್ವಾದ ಶಾಶ್ವತವಾಗಿ ಉಳಿಯುತ್ತವೆ ಎಂದು ಬೆಳಗುಂಪಿಯ ಅಭಿನವ ಪರ್ವತೇಶ್ವರ ಶಿವಾಚಾರ್ಯರು ಹೇಳಿದರು.

ನಗರದ ಚಿಂಚೋಳಿ ರಸ್ತೆಯ ಮಹಾದೇವಿ ವೃದ್ಧಾಶ್ರಮದಲ್ಲಿ ಜ್ಞಾನ ಶಿಕ್ಷಣ ಸಂಸ್ಥೆಯ ವತಿಯಿಂದ ಆಯೋಜಿಸಿದ್ದ ‘ಹಿರಿಯರನ್ನು ಗೌರವಿಸಿ, ಉತ್ತಮ ಸಮಾಜ ನಿರ್ಮಿಸಿ’ ಕಾರ್ಯಕ್ರಮ ಉದ್ಘಾಟಿಸಿ ಅವರು ಆಶೀರ್ವಚನ ನೀಡಿದರು.

ಜೀವನದ ನಿಜವಾದ ಅರ್ಥ ಅರಿಯಲು, ಮಾನವೀಯ ಮೌಲ್ಯಗಳನ್ನು ಸ್ಮರಿಸಲು ಹಾಗೂ ಹಿರಿಯರ ಆಶೀರ್ವಾದ ಪಡೆಯಲು ಇಂತಹ ಕಾರ್ಯಕ್ರಮಗಳು ಸಹಕಾರಿಯಾಗುತ್ತವೆ. ಹಿರಿಯರ ಸೇವೆ ಮತ್ತು ಆರೈಕೆಯ ಮೂಲಕ ಮಾನವೀಯತೆಯನ್ನು ಮೆರೆಯಬೇಕು ಎಂದರು.

ಜ್ಞಾನ ಶಿಕ್ಷಣ ಸಂಸ್ಥೆಯ ಮುಖ್ಯಸ್ಥ ಸಂಗಮೇಶ್ವರ ಸರಡಗಿ ಮಾತನಾಡಿ, ವೃದ್ಧಾಶ್ರಮದಲ್ಲಿ ವಾಸಿಸುವ ಪ್ರತಿಯೊಬ್ಬ ಹಿರಿಯರ ಹಿಂದೆ ಅನುಭವದ ಕಥೆ, ತ್ಯಾಗದ ಇತಿಹಾಸ ಹಾಗೂ ಬದುಕಿನ ಪಾಠವಿದೆ. ಅವರು ನಮ್ಮ ಸಂಸ್ಕೃತಿಯ ಜೀವಂತ ವಿಶ್ವವಿದ್ಯಾಲಯಗಳಿದ್ದಂತೆ. ಹಸಿದವರಿಗೆ ಅನ್ನ ನೀಡುವಾಗ, ನೋವಿನಲ್ಲಿರುವವರಿಗೆ ಸಾಂತ್ವನ ಹೇಳುವಾಗ ಹಾಗೂ ಹಿರಿಯರಿಗೆ ಪ್ರೀತಿ ತೋರುವುದರಲ್ಲಿ ದೇವರನ್ನು ಕಾಣಬಹುದು ಎಂದು ಹೇಳಿದರು.

ಶಿಕ್ಷಕ ಶಿವಕಾಂತ ಚಿಮ್ಮಾ ಮಾತನಾಡಿ, ಹಿರಿಯರ ಕಣ್ಣೀರು ಒರೆಸುವ ಕೈಗಳು ದೇವರ ಸೇವೆ ಮಾಡಿದಂತೆ. ಅವರ ಮುಖದಲ್ಲಿ ನಗು ಮೂಡಿಸುವ ಹೃದಯ ನಿಜವಾದ ಪುಣ್ಯ ಸಂಪಾದಿಸುತ್ತದೆ ಎಂದರು.

ಬಾಲಕೃಷ್ಣ ಕುಲಕರ್ಣಿ ಹಾಗೂ ಬಸಮ್ಮ ಸ್ಥಾವರಮಠ ವೇದಿಕೆಯಲ್ಲಿದ್ದರು. ಶಿವರಾಜ ಬೀರಬಿಟ್ಟೆ ಪ್ರಾರ್ಥಿಸಿದರು. ಮಲ್ಲಿನಾಥ ಮುನ್ನೊಳ್ಳಿ ಸ್ವಾಗತಿಸಿದರು. ವೀರೇಶ ಬೋಳಶೆಟ್ಟಿ ನಿರೂಪಿಸಿದರು. ಸಮಾಜ ಸೇವಕ ಸಂಜೀವಕುಮಾರ ಶೆಟ್ಟಿ ವಂದಿಸಿದರು.

ಇದೇ ಸಂದರ್ಭದಲ್ಲಿ ಶಿಕ್ಷಣ ಪ್ರೇಮಿ ಸಂಗಮೇಶ್ವರ ಸರಡಗಿ ಅವರನ್ನು ಗೆಳೆಯರ ಬಳಗದ ವತಿಯಿಂದ ಸತ್ಕರಿಸಲಾಯಿತು. ವೃದ್ಧಾಶ್ರಮದಲ್ಲಿರುವ ಎಲ್ಲ ಹಿರಿಯರಿಗೆ ಉಡುಗೊರೆ ವಿತರಿಸಲಾಯಿತು.

ಕಾರ್ಯಕ್ರಮದಲ್ಲಿ ಸರೋಜಾ ಸರಡಗಿ, ಶರಣು ಕಲಶಟ್ಟಿ, ಶರಣು ಸರಡಗಿ, ಸುಶೀಲಬಾಯಿ ಸರಡಗಿ, ಬಸವರಾಜ ಸಲಗರ, ಸಂಜೀವಕುಮಾರ ಸಲಗರ ಸೇರಿದಂತೆ ಕೆಎಚ್‌ಬಿ ಗ್ರೀನ್ ಪಾರ್ಕ್ ಬಡಾವಣೆಯ ನಿವಾಸಿಗಳು ಭಾಗವಹಿಸಿದ್ದರು.