ಕಲಬುರಗಿ| ಸಂಪೂರ್ಣವಾಗಿ ಆನ್‌ಲೈನ್ ನಲ್ಲಿ ನರ್ಸಿಂಗ್ ನೋಂದಣಿ; ಸಚಿವ ಶರಣಪ್ರಕಾಶ್ ಪಾಟೀಲ್

ಕಲಬುರಗಿ: ಕರ್ನಾಟಕ ನರ್ಸಿಂಗ್ ಕೌನ್ಸಿಲ್‌ನ ಸೇವೆಗಳನ್ನು ಸಂಪೂರ್ಣವಾಗಿ ಆನ್‌ಲೈನ್‌ಗೊಳಿಸಲಾಗಿದ್ದು, ವಿದ್ಯಾರ್ಥಿಗಳು ಮತ್ತು ನರ್ಸ್‌ಗಳು ನೋಂದಣಿ ಹಾಗೂ ನವೀಕರಣಕ್ಕಾಗಿ ಬೆಂಗಳೂರಿಗೆ ಅಲೆಯುವ ಪ್ರಮೇಯ ತಪ್ಪಲಿದೆ ಎಂದು ರಾಜ್ಯದ ವೈದ್ಯಕೀಯ ಶಿಕ್ಷಣ,‌ ಕೌಶಲ್ಯಭಿವೃದ್ದಿ, ಉದ್ಯಮಶೀಲತೆ ಜಾಗೂ ಜೀವನೋಪಾಯ ಖಾತೆ ಸಚಿವ ಡಾ.ಶರಣಪ್ರಕಾಶ ಪಾಟೀಲ್ ಅವರು ಹೇಳಿದರು.

ಕರ್ನಾಟಕ ರಾಜ್ಯ ಶುಶ್ರೂಷ ಪರಿಷತ್ತಿನಿಂದ ಕಲಬುರಗಿ ವಿಭಾಗ ಮಟ್ಟದಲ್ಲಿ ಕೆಎಸ್ಎನ್‌ಸಿ ವತಿಯಿಂದ ಆಯೋಜಿಸಿದ ಆನ್ ಲೈನ್ ಮತ್ತು ಇತರ ಸೇವೆಗಳ ಕುರಿತಾದ ಜಾಗೃತ ಅಭಿಯಾನ ಕಾರ್ಯಾಗಾರವನ್ನು ಶನಿವಾರ ನಗರದ ಡಾ.ಎಸ್.ಎಂ.ರಂಗಮಂದಿರದಲ್ಲಿಉದ್ಘಾಟಿಸಿ ಮಾತನಾಡಿದರು.

ಹಿಂದೆ ನೋಂದಣಿ ಮತ್ತು ನವೀಕರಣ ಪ್ರಕ್ರಿಯೆಗಾಗಿ ಬೆಂಗಳೂರಿಗೆ ತೆರಳಿ ಸಾಲಿನಲ್ಲಿ ನಿಲ್ಲಬೇಕಾದ ಕಷ್ಟವಿತ್ತು. ಆದರೆ ಈಗ ತಂತ್ರಜ್ಞಾನವನ್ನು ಅಳವಡಿಸಿಕೊಳ್ಳುವುದರಿಂದ ಎಲ್ಲವೂ ಮನೆಯಲ್ಲೇ ಕುಳಿತು ಆನ್‌ಲೈನ್ ಮೂಲಕ ಸುಲಭವಾಗಿ ನೆರವೇರಲಿದೆ. ಈ ವ್ಯವಸ್ಥೆಯಿಂದ ಆಡಳಿತದಲ್ಲಿ ಸಂಪೂರ್ಣ ಪಾರದರ್ಶಕತೆ ಬರಲಿದೆ ಎಂದು ಹರ್ಷ ವ್ಯಕ್ತಪಡಿಸಿದರು.

ರಾಜ್ಯದಲ್ಲಿ ಅತಿ ಹೆಚ್ಚು ವೈದ್ಯಕೀಯ ಕಾಲೇಜುಗಳು, ಪಿ.ಜಿ. ಸೀಟ್‌ಗಳು, ಎಂ.ಬಿ.ಬಿ.ಎಸ್. ಸೀಟ್‌ಗಳು (15,000ಕ್ಕೂ ಹೆಚ್ಚು) ಹಾಗೂ ನರ್ಸಿಂಗ್ ಮತ್ತು ಅಲಯಡ್ ಹೆಲ್ತ್ ಸೈನ್ಸಸ್ ಕಾಲೇಜುಗಳಿದ್ದು, ವೈದ್ಯಕೀಯ ಶಿಕ್ಷಣದಲ್ಲಿ ಕರ್ನಾಟಕವು ದೇಶದಲ್ಲೇ ಮೊದಲ ಸ್ಥಾನದಲ್ಲಿದೆ ಎಂದು ತಿಳಿಸಿದರು.

ಜರ್ಮನಿ, ಜಪಾನ್, ಇಟಲಿ ಸೇರಿದಂತೆ ವಿದೇಶಗಳಲ್ಲಿ ಭಾರತೀಯ ನರ್ಸ್‌ಗಳಿಗೆ ಮತ್ತು ಅಲಯಡ್ ಹೆಲ್ತ್ ಸೈನ್ಸ್ ಪದವೀಧರರಿಗೆ ಅತ್ಯಧಿಕ ಬೇಡಿಕೆ ಹಾಗೂ ಉತ್ತಮ ವೇತನವಿದೆ. ವಿದೇಶಗಳಲ್ಲಿ ಉದ್ಯೋಗ ಪಡೆಯಲು ಇಂಗ್ಲಿಷ್ ಜೊತೆಗೆ ಜಪಾನೀಸ್, ಜರ್ಮನ್ ಅಥವಾ ಇಟಾಲಿಯನ್ ನಂತಹ ವಿದೇಶಿ ಭಾಷೆಗಳನ್ನು ಕಲಿಯುವುದು ಅನಿವಾರ್ಯವಾಗಿದ್ದು, ವಿದ್ಯಾರ್ಥಿಗಳು ಭಾಷಾ ಕೌಶಲ್ಯವನ್ನು ಮೈಗೂಡಿಸಿಕೊಳ್ಳಬೇಕು ಎಂದು ಸಚಿವರು ಕಿವಿಮಾತು ಹೇಳಿದರು.

ಯಾದಗಿರಿ ವೈದ್ಯಕೀಯ ವಿಜ್ಞಾನಗಳ YIMS ಸಂಸ್ಥೆಯ ನಿರ್ದೇಶಕರಾದ ಡಾ. ಶಿವಕುಮಾರ್ ಸಿ.ಆರ್ ಮಾತನಾಡಿ, ನರ್ಸಿಂಗ್ ಅಥವಾ ವೈದ್ಯಕೀಯ ವೃತ್ತಿ ಎಂದರೆ ಕೇವಲ ದೊಡ್ಡ ಹುದ್ದೆಯಲ್ಲ, ಅದಕ್ಕೆ ಕೌಶಲ್ಯ ಮತ್ತು ಜನರಿಗೆ ಸ್ಪಂದಿಸುವ 'ಸಹಾನುಭೂತಿ' (Empathy) ಅತ್ಯಂತ ಮುಖ್ಯ. ನರ್ಸಿಂಗ್ ಮತ್ತು ವೈದ್ಯಕೀಯ ಕ್ಷೇತ್ರ ಕೇವಲ ಸಂಬಳಕ್ಕಾಗಿ ಅಲ್ಲದೆ, ರೋಗಿಗಳಿಗೆ ಪ್ರೀತಿ, ಪ್ರೇಮ ಹಾಗೂ ಧೈರ್ಯ ತುಂಬುವ ಮೂಲಕ ವೈದ್ಯರು ಮತ್ತು ನರ್ಸ್‌ಗಳು ಪರಸ್ಪರ ಕೈಜೋಡಿಸಿ ಒಗ್ಗಟ್ಟಿನಿಂದ ಕೆಲಸ ಮಾಡಿದರೆ ಯಾವುದೇ ಕಠಿಣ ರೋಗವನ್ನೂ ಗುಣಪಡಿಸಬಹುದು ಎಂದು ಹೇಳಿದರು.

KSNC ಕುಲಸಚಿವ ಡಾ. ಶ್ರೀಕಾಂತ್ ಪುಲಾರಿ ಪ್ರಸ್ತಾವಿಕವಾಗಿ ಮಾತನಾಡಿ, 2018ಕ್ಕಿಂತ ಮೊದಲು ನರಸಿಂಗ್ ಕಾಲೇಜು ಮತ್ತು ಶಾಲೆಗಳವರು ನವೀಕರಣ (Renewal) ಹಾಗೂ ಇತರ ಕೆಲಸಗಳಿಗಾಗಿ ಕೌನ್ಸಿಲ್‌ಗೆ ಕಾಗದಪತ್ರಗಳೊಂದಿಗೆ ಖುದ್ದಾಗಿ ಬಂದು ಸಾಲಿನಲ್ಲಿ ನಿಲ್ಲಬೇಕಿತ್ತು. ವಿದ್ಯಾರ್ಥಿಗಳು ಹಾಗೂ ಕಾಲೇಜಿನ ಸಿಬ್ಬಂದಿ ಕೌನ್ಸಿಲ್‌ಗೆ ಅಲೆಯುವುದನ್ನು ತಪ್ಪಿಸಿ, ಎಲ್ಲವೂ ಸುಲಭವಾಗಿ ಆನ್‌ಲೈನ್ ಮೂಲಕವೇ ದೊರೆಯುವಂತೆ ಮಾಡಿ ಸೌಲಭ್ಯ ಕಲ್ಪಿಸಲಾಗಿದೆ ಎಂದರು.

ಕಿರಣಕುಮಾರ್ ಅಣ್ಣಿಗೇರಿ ಅವರು ಕಾರ್ಯಗಾರ ಕುರಿತು ವಿಶೇಷ ಉಪನ್ಯಾಸ ನೀಡಿದರು.

ಕಾರ್ಯಾಗಾರದಲ್ಲಿ KSNC ಉಪಾಧ್ಯಕ್ಷ ವೆಂಕಟಗಿರಿ, ಸಂಪರ್ಕಾಧಿಕಾರಿ ಡಾ. ರುದ್ರಪ್ಪ ಗುಗ್ಗವಾಡ, ಮಡಿವಾಳಪ್ಪ ನಾಗರಹಳ್ಳಿ, KSNC ಸದಸ್ಯರಾದ ಡಾ. ಸಿದ್ದು ತಡಲಗಿ, ಚೆನ್ನಮ್ಮ ಗದಗೆ, ಸೇರಿದಂತೆ ವೈದ್ಯಕೀಯ ಶಿಕ್ಷಣ ಕ್ಷೇತ್ರದ ಹಿರಿಯ ಅಧಿಕಾರಿಗಳು ಹಾಗೂ ಕೆ.ಎನ್.ಸಿ. (KNC) ಪದಾಧಿಕಾರಿಗಳು, ನೂರಾರು ಸಂಖ್ಯೆಯಲ್ಲಿ ವಿದ್ಯಾರ್ಥಿಗಳು ಉಪಸ್ಥಿತರಿದ್ದರು.