ಕಲಬುರಗಿ| ಕಳ್ಳತನವಾಗಿದ್ದ 120 ಲೀಟರ್ ಡೀಸೆಲ್ ಜಪ್ತಿ: ನಾಲ್ವರು ಆರೋಪಿಗಳ ಬಂಧನ

ಕಲಬುರಗಿ: ಮಿರಿಯಾಣ ಪೊಲೀಸ್ ಠಾಣೆ ವ್ಯಾಪ್ತಿಯ ಕಲಬುರಗಿ ಸಿಮೆಂಟ್ ಕಂಪೆನಿಯ ಛತ್ರಸಾಲ ಯಾರ್ಡ್‌ನಲ್ಲಿ ನಿಲ್ಲಿಸಿದ್ದ ಟಾಟಾ ಹಿಟಾಚಿ ಯಂತ್ರದಿಂದ ಕಳ್ಳತನವಾಗಿದ್ದ ಸುಮಾರು 100ರಿಂದ 120 ಲೀಟರ್ ಡೀಸೆಲ್‌ನ್ನು ಪೊಲೀಸರು ಪತ್ತೆಹಚ್ಚಿ ಜಪ್ತಿ ಮಾಡಿದ್ದು, ಪ್ರಕರಣಕ್ಕೆ ಸಂಬಂಧಿಸಿದಂತೆ ನಾಲ್ವರು ಆರೋಪಿಗಳನ್ನು ಬಂಧಿಸಿದ್ದಾರೆ.

ಪ್ರಕರಣಕ್ಕೆ ಸಂಬಂಧಿಸಿದಂತೆ ಬಶೀರಾಬಾದ್ ನಿವಾಸಿಗಳಾದ ಮುಜಾಹೀದ ಯುಸೂಫ್ ಅಲಿ (32), ಫಜೀಲ್ ಅಜಗರ್ ಅಲಿ (25), ಶೋಯೆಬ್ ಮುನಾವರ (19) ಹಾಗೂ ದಾವೂದ ಶೇಖ್ ಚಾಂದ್ (28) ಬಂಧಿತ ಆರೋಪಿಗಳಾಗಿದ್ದಾರೆ.

ಘಟನೆಗೆ ಸಂಬಂಧಿಸಿದಂತೆ ಗುಲಾಬಿಗ್, ಔರಂಗಾಬಾದ್ ಜಿಲ್ಲೆ ನಿವಾಸಿ ಹಾಗೂ ಸೆಕ್ಯುರಿಟಿ ಹೆಡ್ ಮೇಲ್ವಿಚಾರಕರಾದ ಸುಮಿತ್ ಕುಮಾರ್ ನೀಡಿದ ದೂರಿನ ಮೇರೆಗೆ ಮಿರಿಯಾಣ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು.

ಪ್ರಕರಣದ ಪತ್ತೆಗಾಗಿ ಚಿಂಚೋಳಿ ಉಪವಿಭಾಗದ ಡಿವೈಎಸ್‌ಪಿ ಸಂಗಮನಾಥ ಎಸ್. ಹಿರೇಮಠ ಹಾಗೂ ಚಿಂಚೋಳಿ ವೃತ್ತದ ಸಿಪಿಐ ಕಪಿಲದೇವ ಎ.ಜಿ. ಅವರ ಮಾರ್ಗದರ್ಶನದಲ್ಲಿ ಮಿರಿಯಾಣ ಪೊಲೀಸ್ ಠಾಣೆಯ ಪಿಎಸ್‌ಐ ಶಿವಶಂಕರ ಸುಬೇದಾರ ಅವರ ನೇತೃತ್ವದಲ್ಲಿ ಅಪರಾಧ ಪತ್ತೆದಳ ರಚಿಸಲಾಗಿತ್ತು.

ಕಾರ್ಯಾಚರಣೆಯಲ್ಲಿ ಎಎಸ್‌ಐ ಅಶೋಕ ಸೇರಿದಂತೆ ಶಾಂತವೀರ, ರಾಜಕುಮಾರ, ಬಲರಾಮ, ಪ್ರಶಾಂತ, ಸುಲೇಮಾನ, ಮಾಂತೇಶ ನಾಯಕ, ಅಶೋಕ ರೆಡ್ಡಿ, ಕಾಶೀನಾಥ, ಮಂಜುನಾಥ ಹಾಗೂ ಗವಿಸಿದ್ದಯ್ಯ ಅವರು ಭಾಗವಹಿಸಿದ್ದರು.