ಶಹಾಬಾದ್ | ಪ್ರತಿ ಪುಸ್ತಕವೂ ಹೊಸ ಜಗತ್ತನ್ನು ಪರಿಚಯಿಸುತ್ತದೆ: ಶಿವಲಿಂಗಪ್ಪ ಹೆಬ್ಬಾಳ

ಶಹಾಬಾದ್: ಪ್ರತಿ ಪುಸ್ತಕವೂ ಒಂದು ಹೊಸ ಜಗತ್ತನ್ನು ಪರಿಚಯಿಸುತ್ತದೆ. ಪ್ರತಿ ಮನೆಯಲ್ಲೂ ಗ್ರಂಥಾಲಯ ಇರುವುದರಿಂದ ವೈಚಾರಿಕತೆ ಹಾಗೂ ಸಾಮಾಜಿಕ ಜವಾಬ್ದಾರಿಯ ಮನೋಭಾವ ಬೆಳೆಸಲು ಸಾಧ್ಯವಾಗುತ್ತದೆ ಎಂದು ನಿವೃತ್ತ ಶಿಕ್ಷಕ ಶಿವಲಿಂಗಪ್ಪ ಹೆಬ್ಬಾಳ ಹೇಳಿದರು.

ನಗರದ ಶ್ರೀ ಜಗದಂಬಾ ದೇವಿ ದೇವಸ್ಥಾನದ ಆವರಣದಲ್ಲಿ ಕರ್ನಾಟಕ ಸರ್ಕಾರದ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಹಾಗೂ ಬೆಂಗಳೂರಿನ ಕನ್ನಡ ಪುಸ್ತಕ ಪ್ರಾಧಿಕಾರದ ‘ಮನೆಗೊಂದು ಗ್ರಂಥಾಲಯ’ ಯೋಜನೆಯ ಆಶಯದಂತೆ ಮನೆಯಲ್ಲಿ ಗ್ರಂಥಾಲಯ ರೂಪಿಸಿರುವ ಪತ್ರಕರ್ತರಾದ ಕೆ. ರಮೇಶ ಭಟ್ಟ ಮತ್ತು ಲೋಹಿತ ಕಟ್ಟಿ ಅವರಿಗೆ ಅಭಿನಂದನಾ ಪತ್ರ ನೀಡಿ ಗೌರವಿಸಿ ಅವರು ಮಾತನಾಡಿದರು.

ಮನೆಯಲ್ಲಿ ಪುಸ್ತಕಗಳಿರುವುದರಿಂದ ಓದುವ ಹವ್ಯಾಸ ಬೆಳೆಯುತ್ತದೆ. ಪುಸ್ತಕಗಳು ವ್ಯಕ್ತಿಯ ಜ್ಞಾನವನ್ನು ವಿಸ್ತರಿಸುವುದರ ಜೊತೆಗೆ ಉತ್ತಮ ಆಲೋಚನೆಗಳನ್ನು ಬೆಳೆಸಲು ಸಹಕಾರಿಯಾಗುತ್ತವೆ ಎಂದರು.

ಉಪನ್ಯಾಸಕ ಮರಲಿಂಗ ಯಾದಗಿರಿ ಮಾತನಾಡಿ, ಪುಸ್ತಕಗಳು ಮನುಷ್ಯನಲ್ಲಿ ವಿಶಾಲ ಮನೋಭಾವವನ್ನು ಬೆಳೆಸುತ್ತವೆ. ಮನೆಯಲ್ಲಿ ಓದುವ ವಾತಾವರಣ ನಿರ್ಮಿಸುವುದರ ಜೊತೆಗೆ ಜ್ಞಾನದ ಹೊಸ ದಾರಿಯನ್ನು ತೋರಿಸುತ್ತವೆ ಎಂದು ಹೇಳಿದರು.

ಕಳೆದ ಒಂದು ವಾರದಿಂದ ಪುಸ್ತಕ ಪ್ರಾಧಿಕಾರದ ಸದಸ್ಯರಾದ ಕೆ.ಬಿ. ಕಿರಣಸಿಂಗ್ ಹಾಗೂ ಬಿ.ಎಚ್. ನಿರಗುಡಿ ಅವರು ವೈಯಕ್ತಿಕವಾಗಿ ನಗರದಲ್ಲಿ ಮನೆಮನೆಗೆ ಭೇಟಿ ನೀಡಿ, ಗ್ರಂಥಾಲಯ ಸ್ಥಾಪಿಸಿರುವ ಅಣವೀರ ಇಂಗಿನಶೆಟ್ಟಿ, ಮೃತ್ಯುಂಜಯ ಸ್ವಾಮಿ ಹಿರೇಮಠ, ಮರಲಿಂಗ ಯಾದಗಿರಿ, ಪಿ.ಎಸ್. ಮೇತ್ರಿ, ಪ್ರವೀಣಕುಮಾರ ರಾಜನ್, ನಾಗಣ್ಣ ರಾಂಪೂರೆ, ಖಾಜಾ ಪಟೇಲ್, ರಾಜಶೇಖರ ಕೋಬಾಳ, ಶಿವಲಿಂಗಪ್ಪ ಹೆಬ್ಬಾಳಕರ್, ಶಂಕರ ಜಾನಾ, ಶರಣಗೌಡ ಪಾಟೀಲ, ಗಿರಿಮಲ್ಲಪ್ಪ ವಳಸಂಗ, ಡಾ. ಅಹ್ಮದ ಪಟೇಲ ಹಾಗೂ ಶಿವಪುತ್ರ ಕರಣಿಕ ಅವರಿಗೆ ಅಭಿನಂದನಾ ಪತ್ರ ನೀಡಿ ಗೌರವಿಸಿದರು.

ಕಾರ್ಯಕ್ರಮದಲ್ಲಿ ಕಾಶಣ್ಣ ಚನ್ನೂರ, ಶರಣು ಪಗಲಾಪುರ, ಶಿವಕುಮಾರ ಕುಸಾಳೆ, ಭೀಮಯ್ಯ ಗುತ್ತೇದಾರ ಸೇರಿದಂತೆ ಇತರರು ಉಪಸ್ಥಿತರಿದ್ದರು.