ರಾಜ್ಯೋತ್ಸವ ಪ್ರಶಸ್ತಿಗೆ ಕಲಬುರಗಿ ಜಿಲ್ಲೆಯ ಮೂವರು ಸಾಧಕರ ಆಯ್ಕೆ: ಸಚಿವ ಅಜಯ್ ಸಿಂಗ್ ಹರ್ಷ

ಕಲಬುರಗಿ : ಜಿಲ್ಲೆಯ ಮೂವರು ಸಾಧಕರಾದ ಸೊನ್ನದ ಸಿದ್ದಲಿಂಗೇಶ್ವರ ಮಠದ ಡಾ.ಶಿವಾನಂದ ಮಹಾಸ್ವಾಮಿಗಳು, ಶಿಕ್ಷಣ ತಜ್ಞೆ ಡಾ.ಸಂಗೀತಾ ಕಟ್ಟೀಮನಿ ಹಾಗೂ ವಿಜ್ಞಾನಿ ಡಾ.ರಾಜಾಸಾಹೇಬ ಎ.ಎಚ್. ಅವರು 2026ನೇ ಸಾಲಿನ ರಾಜ್ಯೋತ್ಸವ ಪ್ರಶಸ್ತಿಗೆ ಆಯ್ಕೆಯಾಗಿರುವುದಕ್ಕೆ ಸಣ್ಣ ನೀರಾವರಿ ಸಚಿವ ಡಾ.ಅಜಯ್ ಸಿಂಗ್ ಹರ್ಷ ವ್ಯಕ್ತಪಡಿಸಿ ಅಭಿನಂದನೆ ಸಲ್ಲಿಸಿದ್ದಾರೆ.

ಈ ಕುರಿತು ಪತ್ರಿಕಾ ಹೇಳಿಕೆ ನೀಡಿರುವ ಅವರು, ಡಾ. ಶಿವಾನಂದ ಮಹಾಸ್ವಾಮಿಗಳು ಕಳೆದ ನಾಲ್ಕು ದಶಕಗಳಿಂದ ಅನ್ನದಾಸೋಹ, ಅನಾಥ ಮಕ್ಕಳ ಶಿಕ್ಷಣ ಹಾಗೂ ಬಡವರ ಸೇವೆಯಲ್ಲಿ ತೊಡಗಿಸಿಕೊಂಡಿದ್ದಾರೆ. ಸೊನ್ನದ ಮಠಕ್ಕೆ ‘ಅನ್ನದ ಮಠ’ ಎಂಬ ಹೆಗ್ಗಳಿಕೆ ತಂದುಕೊಟ್ಟಿದ್ದಾರೆ. ತಮ್ಮ ತಂದೆ, ಮಾಜಿ ಮುಖ್ಯಮಂತ್ರಿ ಡಾ. ಧರ್ಮಸಿಂಗ್ ಅವರಿಗೂ ಮಠದ ಬಗ್ಗೆ ಅಪಾರ ಗೌರವವಿತ್ತು. ಮಠದ ಸಮಾಜಮುಖಿ ಕಾರ್ಯಗಳಿಗೆ ತಮ್ಮ ಬೆಂಬಲ ಮುಂದುವರಿಯಲಿದೆ ಎಂದು ತಿಳಿಸಿದ್ದಾರೆ.

ಪ್ರಾದೇಶಿಕ ಅಸಮಾನತೆ ಅಧ್ಯಯನಕ್ಕಾಗಿ ರಚಿಸಲಾಗಿದ್ದ ಪ್ರೊ. ಗೋವಿಂದರಾವ್ ಸಮಿತಿಯ ಸದಸ್ಯೆಯಾಗಿದ್ದ ಡಾ. ಸಂಗೀತಾ ಕಟ್ಟೀಮನಿ ಹಾಗೂ ವಿಜ್ಞಾನಿ ಡಾ. ರಾಜಾಸಾಹೇಬ ಅವರ ಸಾಧನೆಗೂ ರಾಜ್ಯೋತ್ಸವ ಪ್ರಶಸ್ತಿ ಸಂದಿರುವುದು ಸಂತಸ ತಂದಿದೆ ಎಂದು ಸಚಿವರು ಹರ್ಷ ವ್ಯಕ್ತಪಡಿಸಿದ್ದಾರೆ.