ಯಡ್ರಾಮಿ | ಕರಕಿಹಳ್ಳಿ ಗ್ರಾಮ ಪಂಚಾಯತ್ ಜೆಡಿಎಸ್ ತೆಕ್ಕೆಗೆ
ಯಡ್ರಾಮಿ: ತಾಲೂಕಿನ ಕರಕಿಹಳ್ಳಿ ಗ್ರಾಮ ಪಂಚಾಯತ್ನಲ್ಲಿ ಶುಕ್ರವಾರ ನಡೆದ ಚುನಾವಣೆಯಲ್ಲಿ ಜೆಡಿಎಸ್ ಬೆಂಬಲಿತ ಕಾಶಿನಾಥಗೌಡ ಈರಣ್ಣಗೌಡ ವರವಿ ಅವರು ನೂತನ ಅಧ್ಯಕ್ಷರಾಗಿ ಹಾಗೂ ಉಪಾಧ್ಯಕ್ಷೆಯಾಗಿ ಚಂದ್ರಕಲ್ಲಾ ಶಂಕರಲಿಂಗ ಆಯ್ಕೆಯಾದರು.
ಹಿಂದಿನ ಅಧ್ಯಕ್ಷೆ ಮಲನಬಿ ಸೈಯದ್ ಪಟೇಲ್ ಹಾಗೂ ಉಪಾಧ್ಯಕ್ಷೆ ಶಿವಕಾಂತಮ್ಮ ಈರಪ್ಪ ಅವರ ರಾಜೀನಾಮೆಯಿಂದ ತೆರವಾದ ಹುದ್ದೆಗಳಿಗೆ ಚುನಾವಣೆ ನಡೆಯಿತು.
ಕರಕಿಹಳ್ಳಿ ಗ್ರಾಮ ಪಂಚಾಯತಿಯಲ್ಲಿ ಒಟ್ಟು 17 ಸದಸ್ಯರಿದ್ದು, ಅಧ್ಯಕ್ಷ ಸ್ಥಾನಕ್ಕೆ ಕಾಶಿನಾಥಗೌಡ ಅವಿರೋಧವಾಗಿ ಆಯ್ಕೆಯಾಗಿದ್ದಾರೆ. ಉಪಾಧ್ಯಕ್ಷ ಸ್ಥಾನಕ್ಕೆ ನಡೆದ ಮತದಾನದಲ್ಲಿ ಚಂದ್ರಕಲ್ಲಾ ಅವರು 11 ಮತಗಳನ್ನು ಪಡೆದು ಜಯಗಳಿಸಿದರು.
ಪ್ರತಿಸ್ಪರ್ಧಿ ಸವೀತಾ ಗುರುನಾಥಗೌಡ 5 ಮತಗಳನ್ನು ಪಡೆದು ಸೋತಿದ್ದು, 1 ಮತ ತಿರಸ್ಕೃತವಾಗಿದೆ ಎಂದು ಚುನಾವಣಾಧಿಕಾರಿ ತಹಶೀಲ್ದಾರ್ ಯಲ್ಲಪ್ಪ ಸುಭೇದಾರ ತಿಳಿಸಿದ್ದಾರೆ.
ಚುನಾವಣೆ ಪ್ರಕ್ರಿಯೆ ಪಾರದರ್ಶಕವಾಗಿ ನಡೆಯಲು ಅಗತ್ಯ ಕ್ರಮಗಳನ್ನು ಕೈಗೊಳ್ಳಲಾಗಿತ್ತು. ಫಲಿತಾಂಶ ಪ್ರಕಟವಾದ ಬಳಿಕ ಜೆಡಿಎಸ್ ಬೆಂಬಲಿಗರು ಪರಸ್ಪರ ಅಭಿನಂದನೆ ಸಲ್ಲಿಸಿದರು.
ಈ ವೇಳೆ ಡಿಸಿಸಿ ಬ್ಯಾಂಕ್ ಕಲಬುರಗಿಯ ನಿರ್ದೇಶಕ ಬಸವರಾಜಗೌಡ ಪಾಟೀಲ ನರಿಬೋಳ, ರಮೇಶ ವಕೀಲ, ಬಸನಗೌಡ, ರಾಜು ಕರಕಿಹಳ್ಳಿ, ಶ್ರೀಶೈಲಗೌಡ, ಬಸಲಿಂಗಪ್ಪಗೌಡ, ಮಹಿಬೂಬ ಪಟೇಲ್, ಶಂಕರಲಿಂಗ ಪೂಜಾರಿ, ರಾಜು ಪೂಜಾರಿ, ಭೀಮರಾಯಗೌಡ, ಅಡಿವೇಪ್ಪಗೌಡ, ಹಣಮಂತರಾಯಗೌಡ, ಹಳ್ಳೇಪ್ಪ ತಳವಾರ, ಭೀಮರಾಯ ಪೂಜಾರಿ, ಚಂದ್ರಶ್ಯಾ ವಸ್ತಾರಿ, ಗ್ರಾಮ ಪಂಚಾಯಿತಿ ಸದ್ಯಸರು, ಸಿಬ್ಬಂದಿಗಳು ಸೇರಿದಂತೆ ಇತರಿದ್ದರು.
