Yedrami | ಟನ್ ಕಬ್ಬಿಗೆ 3,600 ರೂ. ದರ ಘೋಷಣೆ: ಉಗಾರ ಶುಗರ್ಗೆ ಕಬ್ಬು ಸಾಗಣೆ ಬಿರುಸು

ಯಡ್ರಾಮಿ: ತಾಲೂಕಿನ ನಾಗರಹಳ್ಳಿ ಗ್ರಾಮದ ಬಳಿಯ ಉಗಾರ ಶುಗರ್ ಸಕ್ಕರೆ ಕಾರ್ಖಾನೆಯು ಟನ್ ಕಬ್ಬಿಗೆ 3,600 ರೂ. ದರ ಘೋಷಿಸಿದ ಬೆನ್ನಲ್ಲೇ ಕಬ್ಬು ಹಂಗಾಮು ಬಿರುಸು ಪಡೆದುಕೊಂಡಿದೆ. ನ್ಯಾಯಯುತ ದರಕ್ಕಾಗಿ ರೈತ ಸಂಘಟನೆಗಳು ನಡೆಸಿದ ನಿರಂತರ ಹೋರಾಟಕ್ಕೆ ಜಯ ಸಿಕ್ಕಿದ್ದು, ಕಳೆದ ಎರಡು ದಿನಗಳಿಂದ ಕಾರ್ಖಾನೆಗೆ ಕಬ್ಬು ಸಾಗಣೆ ಕಾರ್ಯ ಚುರುಕುಗೊಂಡಿದೆ.
ಕಬ್ಬಿಗೆ ನ್ಯಾಯಯುತ ದರ ನೀಡುವಂತೆ ಆಗ್ರಹಿಸಿ ರೈತ ಸಂಘ ಹಾಗೂ ಹಸಿರು ಸೇನೆ ನೇತೃತ್ವದಲ್ಲಿ ಕಬ್ಬು ಬೆಳೆಗಾರರು ನಾಗರಹಳ್ಳಿಯಲ್ಲಿ ಅಹೋರಾತ್ರಿ ಧರಣಿ ನಡೆಸಿದ್ದರು. ಸರ್ಕಾರ ಘೋಷಿಸಿದ್ದ ಟನ್ಗೆ 3,200 ರೂ. ದರಕ್ಕೆ ಒಪ್ಪದ ರೈತರು, ಕನಿಷ್ಠ 3,600 ರೂ. ನೀಡಬೇಕೆಂದು ಪಟ್ಟು ಹಿಡಿದಿದ್ದರು. ರೈತರ ಒತ್ತಡಕ್ಕೆ ಮಣಿದ ಕಾರ್ಖಾನೆ ಆಡಳಿತ ಮಂಡಳಿ ಅಂತಿಮವಾಗಿ ಟನ್ಗೆ 3,600 ರೂ. ದರ ಘೋಷಿಸಿದೆ. ಇದರಿಂದ ರೈತರು ತಮ್ಮ ಜಮೀನುಗಳಲ್ಲಿ ಬೆಳೆದ ಕಬ್ಬನ್ನು ಟ್ರ್ಯಾಕ್ಟರ್ಗಳ ಮೂಲಕ ಕಾರ್ಖಾನೆಗೆ ಸಾಗಿಸುತ್ತಿದ್ದಾರೆ.
ಕಳೆದ ಕೆಲವು ದಿನಗಳಿಂದ ಕಬ್ಬಿನ ದರ ಘೋಷಣೆಯಾಗದ ಕಾರಣ ಕಾರ್ಖಾನೆಗಳ ಆರಂಭ ವಿಳಂಬವಾಗಿತ್ತು. ಇದರಿಂದ ಬೆಳೆದ ಕಬ್ಬು ನಿಗದಿತ ಸಮಯಕ್ಕೆ ಕಾರ್ಖಾನೆ ತಲುಪುವುದೇ ಎಂಬ ಆತಂಕ ರೈತರನ್ನು ಕಾಡುತ್ತಿತ್ತು. ಒಂದೆಡೆ ತೀವ್ರ ಬರದಿಂದ ನೀರಿನ ಕೊರತೆ ಉಂಟಾಗಿ ಕಬ್ಬು ಒಣಗುವ ಭೀತಿ ಎದುರಾಗಿದ್ದರೆ, ಮತ್ತೊಂದೆಡೆ ಕಟಾವು ವಿಳಂಬದಿಂದ ಕಬ್ಬಿನ ರಿಕವರಿ ಪ್ರಮಾಣ ಕುಸಿಯುವ ಆತಂಕವೂ ಬೆಳೆಗಾರರನ್ನು ಚಿಂತೆಗೀಡು ಮಾಡಿತ್ತು. ಇದೀಗ ದರ ಘೋಷಣೆಯಾಗಿರುವುದರಿಂದ ಕಬ್ಬು ಸಾಗಣೆಗೆ ವೇಗ ದೊರೆತಿದೆ. ದಿನದಿಂದ ದಿನಕ್ಕೆ ಟ್ರ್ಯಾಕ್ಟರ್ಗಳ ಮೂಲಕ ಕಬ್ಬು ಕಾರ್ಖಾನೆಗೆ ತಲುಪುತ್ತಿದ್ದು, ರೈತರಲ್ಲಿ ಸಮಾಧಾನ ಮೂಡಿದೆ. ಸಕಾಲದಲ್ಲಿ ಕಬ್ಬು ಕಟಾವು ಮಾಡಿ ಕಾರ್ಖಾನೆಗೆ ಸಾಗಿಸಬಹುದು ಎಂಬ ವಿಶ್ವಾಸ ಬೆಳೆಗಾರರಲ್ಲಿ ಮೂಡಿದೆ.
ಹೋರಾಟಕ್ಕೆ ಸಂದ ಜಯ :
ಸರ್ಕಾರ ಘೋಷಿಸಿದ್ದ 3,200 ರೂ. ದರಕ್ಕೆ ಒಪ್ಪದೆ ಟನ್ಗೆ 3,600 ರೂ. ನೀಡುವಂತೆ ಪಟ್ಟು ಹಿಡಿದಿದ್ದ ರೈತ ಸಂಘಟನೆಗಳು ನಾಗರಹಳ್ಳಿಯಲ್ಲಿ ಅಹೋರಾತ್ರಿ ಧರಣಿ ನಡೆಸಿದ್ದವು. ರೈತರ ನಿರಂತರ ಹೋರಾಟದಿಂದ ಜಿಲ್ಲಾಡಳಿತದ ಮೇಲೆಯೂ ಒತ್ತಡ ಹೆಚ್ಚಾಗಿತ್ತು. ಹಲವು ಸವಾಲುಗಳ ನಡುವೆಯೂ ಧೃತಿಗೆಡದೆ ಹೋರಾಟ ಮುಂದುವರಿಸಿದ ರೈತರು, ಸರ್ಕಾರದ ಘೋಷಿತ ದರಕ್ಕಿಂತ ಟನ್ಗೆ 400 ರೂ. ಹೆಚ್ಚುವರಿ ದರ ಪಡೆಯುವಲ್ಲಿ ಯಶಸ್ವಿಯಾಗಿದ್ದಾರೆ. ರೈತರ ಒಗ್ಗಟ್ಟು ಮತ್ತು ಸಂಘಟಿತ ಹೋರಾಟಕ್ಕೆ ಈ ಫಲಿತಾಂಶ ಸಾಕ್ಷಿಯಾಗಿದೆ.
ನಾವು ಯಾವಾಗಲೂ ಕಬ್ಬು ಬೆಳೆಗಾರರ ಪರವಾಗಿ ಧ್ವನಿ ಎತ್ತುತ್ತಾ ಬಂದಿದ್ದೇವೆ. ಹೋರಾಟದ ಮೂಲಕ ರೈತರ ಬಾಕಿ ಹಣ ಕೊಡಿಸುವಲ್ಲಿಯೂ ಯಶಸ್ವಿಯಾಗಿದ್ದೇವೆ. ಪ್ರಸಕ್ತ ಸಾಲಿನಲ್ಲಿ ಕಬ್ಬಿನ ದರ ಘೋಷಣೆ ವಿಚಾರದಲ್ಲಿ ತಾಳ್ಮೆ ಕಳೆದುಕೊಳ್ಳದೆ, ನಾಯಕ ಈರಣ್ಣ ಭಜಂತ್ರಿ ಅವರ ಮಾರ್ಗದರ್ಶನದಲ್ಲಿ ಹೋರಾಟ ಮುಂದುವರಿಸಿದ್ದೇವೆ. ಎಲ್ಲರಿಗೂ ಮಾದರಿಯಾಗುವ ರೀತಿಯಲ್ಲಿ ಸಂಘಟಿತ ಹೋರಾಟ ನಡೆಸಿ ಯಶಸ್ಸು ಕಂಡಿದ್ದೇವೆ.
-ರಮೇಶ ಆಲೂರ, ರೈತ ಮುಖಂಡರು






