ಒಳಚರಂಡಿಗಳ ಅವ್ಯವಸ್ಥೆಗೆ ಮನಪಾ ಸಭೆಯಲ್ಲಿ ಆಕ್ರೋಶ: ಸದಸ್ಯರನ್ನೊಳಗೊಂಡ ಸಮಗ್ರ ಚರ್ಚೆಗೆ ನಿರ್ಧಾರ
ಮಂಗಳೂರು: ನಗರದಲ್ಲಿ ಹದಗೆಟ್ಟಿರುವ ಒಳಚರಂಡಿ ವ್ಯವಸ್ಥೆ, ವೆಟ್ವೆಲ್ವೆಗಳ ಅಸರ್ಮಪಕ ನಿರ್ವಹಣೆ ವಿಚಾರವು ಬುಧವಾರ ನಡೆದ ಮಂಗಳೂರು ಮಹಾನಗರ ಪಾಲಿಕೆಯ ಸಾಮಾನ್ಯ ಸಭೆಯಲ್ಲಿ ಸದಸ್ಯರ ತೀವ್ರ ಆಕ್ರೋಶ, ಚರ್ಚೆಗೆ ಗ್ರಾಸವಾಯಿತು.
ಮೇಯರ್ ಜಯಾನಂದ ಅಂಚನ್ ಅಧ್ಯಕ್ಷತೆಯಲ್ಲಿ ನಡೆದ ಸಭೆಯಲ್ಲಿ ಈ ಬಗ್ಗೆ ಸದಸ್ಯರಿಂದ ಸುದೀರ್ಘ ಚರ್ಚೆ, ವೆಟ್ವೆಲ್ಗಳ ನಿರ್ವಹಣೆ ಕೊರತೆ ಬಗ್ಗೆ ಆರೋಪ ವ್ಯಕ್ತವಾದ ಹಿನ್ನೆಲೆಯಲ್ಲಿ, ಸರ್ವ ಸದಸ್ಯರನ್ನು ಒಳಗೊಂಡು ಸಮಗ್ರ ಚರ್ಚೆ ನಡೆಸಿ ಕ್ರಮಕ್ಕೆ ಪಾಲಿಕೆಯ ನೂತನ ಆಯುಕ್ತ ಆನಂದ್ ನಿರ್ದೇಶಿಸಿದರು.
ಪ್ರತಿಪಕ್ಷದ ಸದಸ್ಯರಾದ ಅಬ್ದುಲ್ ರವೂಫ್ ಅವರು ವಿಷಯ ಪ್ರಸ್ತಾಪಿಸಿ, ನಗರದ ಯುಜಿಡಿ ಸಮಸ್ಯೆ ಹದಗೆಟ್ಟಿದ್ದು, ಕೊಳಚೆ ನೀರು ರಸ್ತೆಯಲ್ಲಿ ಹರಿದಾಡುತ್ತಿದೆ. ದುರ್ವಾಸನೆ ಬೀರುತ್ತಿದೆ ಎಂದು ಆರೋಪಿಸಿದರೆ, ಸದಸ್ಯರನೇಕರು ತಮ್ಮ ವಾರ್ಡ್ಗಳಲ್ಲಿನ ಸಮಸ್ಯೆಗಳನ್ನು ವಿವರಿಸಿದರು.
ವೆಟ್ವೆಲ್ಗಳ ನಿರ್ವಹಣೆಗೆ ಕೋಟಿಗಟ್ಟಲೆ ಹಣ ಗುತ್ತಿಗೆದಾರರಿಗೆ ನೀಡಲಾಗುತ್ತಿದ್ದರೂ ನಿರ್ವಹಣೆ ಆಗುತ್ತಿಲ್ಲ ಎಂದು ಸದಸ್ಯ ವಿನಯ್ ರಾಜ್ ಆರೋಪಿಸಿದರು. ಈ ಬಗ್ಗೆ ಸುದೀರ್ಘ ಚರ್ಚೆಯ ಬಳಿಕ ಸಭೆಗೆ ನಿರ್ದೇಶನ ನೀಡಲಾಯಿತು.
ಸದಸ್ಯ ಶಶಿಧರ ಶೆಟ್ಟಿಯವರು ನಗರದ ಪಾರ್ಕಿಂಗ್ ವ್ಯವಸ್ಥೆ ಬಿಗಾಡಾಯಿಸಿದ್ದು, ನಗರ ಅಗಲೀಕರಣಗೊಂಡು ಕಾಂಕ್ರೀಟಿಕೀರಣಗೊಂಡಿದ್ದರೂ ಪೂರಕ ಪಾರ್ಕಿಂಗ್ ವ್ಯವಸ್ಥೆ ಇಲ್ಲದೆ, ಸಾರ್ವಜನಿಕರು ಪರದಾಡುವಂತಾಗಿದೆ ಎಂದು ದೂರಿದರು.
ಸುಧೀರ್ ಶೆಟ್ಟಿಯವರು ಮಾತನಾಡಿ, ಕದ್ರಿ ಪಾರ್ಕ್ ಬಳಿ ಬೆಳಗ್ಗೆ ೫ ಗಂಟೆಯ ಹೊತ್ತಿಗೆ ಟ್ರಾಫಿಕ್ ಪೊಲೀಸರು ದಂಡ ಹಾಕುವ ಕೆಲಸ ಮಾಡುತ್ತಾರೆ ಎಂದು ಆಕ್ಷೇಪಿಸಿದರೆ, ನಗರದಲ್ಲಿ ಸೂಕ್ತ ಬಸ್ ಶೆಲ್ಟರ್ಗಳೇ ಇಲ್ಲ ಎಂದು ಅಬ್ದುಲ್ ಲತೀಫ್ ಸಭೆಯ ಗಮನ ಸೆಳೆದರು.
ಸ್ವಯಂ ಘೋಷಿತ ಆಸ್ತಿ ತೆರಿಗೆಯನ್ನು ಜನರಿಗೆ ಹೊರೆ ಆಗದಂತೆ 2021-22ನೆ ಸಾಲಿನಲ್ಲಿ ಏರಿಕೆ ಮಾಡಲಾಗಿತ್ತು. ಈ ಸಮಯ ಸರಕಾರದಿಂದ ಶೋಕಾಸು ನೋಟೀಸು ಹಿನ್ನೆಲೆಯಲ್ಲಿ ಎರಡೆರಡು ಬಾರಿ ತಿದ್ದುಪಡಿ ಮಾಡಿ ತೆರಿಗೆ ಏರಿಕೆ ಮಾಡಲಾಗಿದೆ. ಆದರೆ ಈ ಸಂದರ್ಭ ಖಾಲಿ ಜಾಗಕ್ಕೆ ಭಾರೀ ಪ್ರಮಾಣದಲ್ಲಿ ತೆರಿಗೆ ಏರಿಕೆಯಾಗಿದೆ. ಸಾರ್ವಜನಿಕರೊಬ್ಬರು 60 ಸೆಂಟ್ಸ್ ಖಾಲಿ ಜಾಗಕ್ಕೆ ಹಿಂದೆ 5000 ರೂ. ತೆರಿಗೆ ಕಟ್ಟುತ್ತಿದ್ದರೆ ಏರಿಕೆಯಾದ ದರದ ಪ್ರಕಾರ 60000 ರೂ. ಕಟ್ಟಬೇಕಾಗಿದೆ. ಇದು ಜನರಿಗೆ ಹೊರೆಯಾಗುತ್ತಿದೆ. ಈ ಬಗ್ಗೆ ಸಭೆಯಲ್ಲಿ ನಿರ್ಣಯ ಮಾಡಿ ತಿದ್ದುಪಡಿಗೆ ಸರಕಾರಕ್ಕೆ ಕಳುಹಿಸಬೇಕು ಎಂದು ಮುಖ್ಯ ಸಚೇತಕ ಪ್ರೇಮಾನಂದ ಶೆಟ್ಟಿ ಸಭೆಯಲ್ಲಿ ಮನವಿ ಮಾಡಿದರು.
ಕೆಪಿಟಿ ಜಂಕ್ಷನ್ನಿಂದ ಕಾವೂರು ಜಂಕ್ಷನ್ವರೆಗೆ ರೋಡ್ ಡಿವೈಡರ್ ನಡುವೆ ಪೈಪ್ಲೈನ್ಗಳನ್ನು ಹಾಕಲಾಗಿದ್ದು ಇದು ಸಾರ್ವಜನಿಕರಿಗೆ ತೊಂದರೆಯಾಗುತ್ತಿದೆ. ಕಳೆದ ಎರಡು ವರ್ಷಗಳಿಂದ ಈ ಪೈಪ್ಲೈನ್ಗಳನ್ನು ತೆರವುಗೊಳಿಸುವ ಕಾರ್ಯ ನಡೆದಿಲ್ಲ ಎಂದು ಸದಸ್ಯೆ ಸಂಗೀತ ನಾಯಕ್ ಅವರು ಸಭೆಯಲ್ಲಿ ದೂರಿದರೆ, ಗೇಲ್ ಗ್ಯಾಸ್ ಪೈಪ್ಲೈನ್ ಕಾಮಗಾರಿಯಿಂದ ತೊಂದರೆಯಾಗುತ್ತಿದೆ ಎಂಬ ಆಕ್ಷೇಪವೂ ಸಭೆಯಲ್ಲಿ ವ್ಯಕ್ತವಾಯಿತು.
ಪಾಲಿಕೆ ಆಯುಕ್ತರು ಪ್ರತಿಕ್ರಿಯಿಸಿ, ಪಾಲಿಕೆ ವ್ಯಾಪ್ತಿಯಲ್ಲಿ ನಡೆಯುವ ಕಾಮಗಾರಿಗೆ ನಾವು ಸಹಕಾರ ನೀಡಬೇಕಾಗಿದೆ. ಆದರೆ ನಮ್ಮ ಆಸ್ತಿಪಾಸ್ತಿಗೆ ಧಕ್ಕೆ ತರಲು ಆಗುವುದಿಲ್ಲ. ಸಂಬಂಧಪಟ್ಟವರ ಜತೆ ಈ ಬಗ್ಗೆ ಚರ್ಚಿಸಿ ಕ್ರಮ ವಹಿಸುವುದಾಗಿ ಹೇಳಿದರು.
ಸಭೆಯಲ್ಲಿ ಉಪ ಮೇಯರ್ ಪೂರ್ಣಿಮಾ, ಸ್ಥಾಯಿ ಸಮಿತಿ ಅಧ್ಯಕ್ಷರಾದ ಶಕಿಲಾ ಕಾವಾ, ಹೇಮಲತಾ ರಘು ಸಾಲ್ಯಾನ್, ನಯನ ಆರ್. ಕೋಟ್ಯಾನ್ ಉಪಸ್ಥಿತರಿದ್ದರು.
ಪಚ್ಚನಾಡಿಯಲ್ಲಿರುವ 9 ಲಕ್ಷ ಟನ್ ಪರಂಪರೆ ತ್ಯಾಜ್ಯ (ಲೆಗಸಿ ವೇಸ್ಟ್) ತೆರವಿಗೆ ಕಂಪನಿಯೊಂದಕ್ಕೆ ನಾಲ್ಕು ವರ್ಷಗಳ ಅವಧಿಗೆ ೫೬.38 ಕೋಟಿ ರೂ.ಗಳಿಗೆ ತ್ತಿಗೆ ನೀಡಲಾಗಿದೆ. ಅವರು ದಿನಕ್ಕೆ 250ರಿಂದ 300 ಟನ್ ತ್ಯಾಜ್ಯ ನಿರ್ವಹಣೆ ಮಾಡುತ್ತಿದ್ದು, ಆ ರೀತಿಯಲ್ಲಿ ನಡೆದರೆ ಸಂಪೂರ್ಣ ತೆರವಿಗೆ 12 ನರ್ಷಗಳೂ ಸಾಲದು. ಹೆಚ್ಚುವರಿ ತ್ಯಾಜ್ಯ ಘಟಕಗಳನ್ನು ಹಾಕಿ ದಿನಕ್ಕೆ 2000 ಟನ್ನಂತೆ ತ್ಯಾಜ್ಯ ವಿಲೇ ಮಾಡಿದರೆ ಮಾತ್ರ ನಾಲ್ಕು ವರ್ಷಗಳಲ್ಲಿ ಈ ಯೋಜನೆ ಕಾರ್ಯಸಾಧುವಾಗಲಿದೆ. ಈ ಬಗ್ಗೆ ಗಮನ ಹರಿಸಬೇಕು ಎಂದು ಎಂದು ವಿನಯರಾಜ್ ಆಗ್ರಹಿಸಿದರು.
ಪಾಲಿಕೆ ಖಜಾನೆ ಖಾಲಿ ಮಾಡಲು ಆ್ಯಂಟನಿ ಸಂಸ್ಥೆ ಯತ್ನ ಆರೋಪ
ಆ್ಯಂಟನಿ ಸಂಸ್ಥೆಯವರು ತಮಗೆ ಮಂಗಳೂರು ಮಹಾನಗರ ಪಾಲಿಕೆಯಿಂದ ೧೬.೫೦ ಕೋಟಿರೂ. ಬಾಕಿ ಇದೆ ಎಂದು ನ್ಯಾಯಾಲಯಕ್ಕೆ ಹೋಗಿದ್ದಾರೆ. ಅವರ ಮೇಲೆ ಹಾಕಿರುವ ದಂಡವನ್ನು ಪ್ರಶ್ನಿಸಿ ನ್ಯಾಯಾಲಯಕ್ಕೆ ಹೋಗಿದ್ದು, ಪಾಲಿಕೆ ವತಿಯಿಂದ ನೇಮಕ ಮಾಡಲಾಗಿರುವ ನ್ಯಾಯವಾದಿಯ ಬದಲಿಗೆ ಬೆಂಗಳೂರಿನ ವಕೀಲರು ವಾದ ಮಾಡಲು ಬರುತ್ತಿದ್ದಾರೆ. ಇದರಿಂದ ಪಾಲಿಕೆಗೆ ಜಯ ಸಿಗುವುದು ಕಷ್ಟವಾಗಲಿದ್ದು, ಪಾಲಿಕೆ ಖಜಾನೆಯನ್ನು ಆ್ಯಂಟನಿ ಸಂಸ್ಥೆ ಖಾಲಿ ಮಾಡಲು ಮುಂದಾಗಿದೆ ಎಂದು ಗಂಭೀರ ಆರೋಪ ಮಾಡಿದ ವಿನಯ ರಾಜ್, ತನಿಖೆಗೆ ಒತ್ತಾಯಿದರು.
ಪಾಲಿಕೆ ವ್ಯಾಪ್ತಿಯಲ್ಲಿ ಪೌರ ಕಾರ್ಮಿಕರ ನೇಮಕಾತಿ ಬಗ್ಗೆ ಸಂಶಯ ಕಾಡುತ್ತಿದ್ದು, ಅರ್ಜಿ ಹಾಕಿರುವ ಸ್ಥಳೀಯರಿಗೆ ಅನ್ಯಾಯವಾಗುತ್ತಿದೆ. ಕುಟುಂಬವೊಂದರಿಂದ ಆರು ಮಂದಿಗೆ ನೇಮಕಾತಿ ನೀಡಲಾದ ಬಗ್ಗೆಯೂ ಮಾಹಿತಿ ಇದೆ. ಮೊದಲು ತುಳುನಾಡಿನ ಅರ್ಹರನ್ನು ನೇಮಕ ಮಾಡುವ ಕಾರ್ಯಬೇಕು ಎಂದು ಪ್ರತಿಪಕ್ಷದ ನಾಯಕ ನವೀನ್ ಡಿಸೋಜಾ ಸೇರಿದಂತೆ ಸದಸ್ಯರು ಒತ್ತಾಯಿಸಿದರು.
ಆಡಳಿತ ಪಕ್ಷದ ಸುಧೀರ್ ಶೆಟ್ಟಿ ಅವರು ಪ್ರತಿಕ್ರಿಯಿಸಿ, ಸ್ಥಳೀಯರಿಗೆ ಉದ್ಯೋಗ ಕೊಡುವುದು ನಮ್ಮ ಧರ್ಮ. ಯಾವ ಮಾನದಂಡದಲ್ಲಿ ನೇರ ನೇಮಕಾತಿ ನಡೆಸಲಾಗುತ್ತಿದೆ ಎಂಬುದನ್ನು ತಿಳಿದು ಸ್ಥಳೀಯರಿಗೆ ಪ್ರಥಮ ಆದ್ಯತೆಯಲ್ಲಿ ನೇಮಕಾತಿಗೆ ಅವಕಾಶ ಕಲ್ಪಿಸಬೇಕು ಎಂದು ಹೇಳಿದರು.
ಈ ಸಂಬಂಧ ಪ್ರತ್ಯೇಕ ಸಭೆ ನಡೆಸಿ ಪರಿಶೀಲನೆ ಬಳಿಕ ನಿರ್ಧಾರ ಕೈಗೊಳ್ಳುವುದಾಗಿ ಮೇಯರ್ ಜಯಾನಂದ ಅಂಚನ್ ತಿಳಿಸಿದರು.
