Kasaragod | ಎಡನೀರು ಮಠದಲ್ಲಿ ‘ಗದಾಯುದ್ಧ’ ಯಕ್ಷಗಾನ ಪ್ರದರ್ಶನ

ಕಾಸರಗೋಡು: ಇಂದಿನ ಯಕ್ಷಗಾನ ರಂಗದಲ್ಲಿ ‘ಗದಾಯುದ್ಧ’ ಪ್ರಸಂಗವು ಹಲವು ಬಾರಿ ಕಾಲಮಿತಿಯ ಒತ್ತಡ ಅಥವಾ ಯುದ್ಧಧರ್ಮದ ರಂಗನಡೆಯ ಕೊರತೆಯಿಂದ ಹೆಸರಿಗಷ್ಟೇ ಸೀಮಿತವಾಗುವ ಸಂದರ್ಭಗಳು ಸಾಮಾನ್ಯ. ಆದರೆ ಸೆ.19ರಂದು ಎಡನೀರು ಮಠದಲ್ಲಿ ಪ್ರದರ್ಶನಗೊಂಡ ‘ಗದಾಯುದ್ಧ’ ಪ್ರಸಂಗವು ಆ ಕೊರತೆಯನ್ನು ನೀಗಿಸಿ, ಶೀರ್ಷಿಕೆಗೆ ತಕ್ಕ ಅರ್ಥವನ್ನು ರಂಗಮಂಚದಲ್ಲಿ ಮೂಡಿಸಿದ ಅಪೂರ್ವ ಸಾಂಸ್ಕೃತಿಕ ಪ್ರದರ್ಶನವಾಗಿ ಗಮನ ಸೆಳೆಯಿತು.

ಕಲೆ, ಸಾಹಿತ್ಯ ಮತ್ತು ಸಂಸ್ಕೃತಿಯನ್ನು ಉಳಿಸಿ ಬೆಳೆಸುವ ಉದ್ದೇಶದಿಂದ ಸಿರಿಬಾಗಿಲು ಪ್ರತಿಷ್ಠಾನ ರೂಪಿಸಿದ ಈ ರಂಗಸಂಕಲ್ಪವು ಯಕ್ಷಗಾನದ ಪಾರಂಪರಿಕ ಯುದ್ಧನಡೆಯನ್ನು ಪುನರುಜ್ಜೀವನಗೊಳಿಸುವ ಪ್ರಯತ್ನವಾಗಿ ಮೂಡಿಬಂದಿತು.

ಪ್ರಸಂಗದಲ್ಲಿ ಗದಾಪ್ರಹಾರದ ಪ್ರತಿಯೊಂದು ಸೂಕ್ಷ್ಮ ನಡೆ, ಶಾಸ್ತ್ರೀಯ ಯುದ್ಧನಿಯಮಗಳು ಮತ್ತು ರಂಗಶಿಸ್ತನ್ನು ಕಾಲಮಿತಿಯೊಳಗೆ ಸಮರ್ಥವಾಗಿ ಕಟ್ಟಿಕೊಡಲಾಯಿತು. ಹಿರಿಯ ಕಲಾವಿದರಾದ ಶಂಭಯ್ಯ ಕಂಜರ್ಪಣೆ ಹಾಗೂ ಶ್ರುತಕೀರ್ತಿ ರಾಜ್ ಉಜಿರೆ ಅವರು ಭೀಮ ಮತ್ತು ದುರ್ಯೋಧನ ಪಾತ್ರಗಳಿಗೆ ಜೀವ ತುಂಬಿದರು. ಕೌರವನ ಅಂತಿಮ ಕ್ಷಣದ ಸ್ವಾಭಿಮಾನ, ಭೀಮನ ರೌದ್ರಭಾವ ಮತ್ತು ಗದಾಯುದ್ಧದ ಭೀಕರತೆಯನ್ನು ಹಾವಭಾವ, ಹೆಜ್ಜೆಗಾರಿಕೆ ಹಾಗೂ ಶರೀರಭಾಷೆಯ ಮೂಲಕ ಜೀವಂತವಾಗಿ ಮೂಡಿಸಿ ಪ್ರೇಕ್ಷಕರಿಂದ ಮೆಚ್ಚುಗೆ ಗಳಿಸಿದರು.

ಈ ರಂಗಪ್ರಯೋಗಕ್ಕೆ ನಿರ್ದೇಶನ ನೀಡಿದ ಸಿರಿಬಾಗಿಲು ಪ್ರತಿಷ್ಠಾನದ ಅಧ್ಯಕ್ಷ ಹಾಗೂ ಧರ್ಮಸ್ಥಳ ಮೇಳದ ಪ್ರಧಾನ ಭಾಗವತ ರಾಮಕೃಷ್ಣ ಮಯ್ಯ ಅವರ ರಂಗಜ್ಞಾನ ಮತ್ತು ದೂರದೃಷ್ಟಿ ಪ್ರದರ್ಶನದ ಪ್ರಮುಖ ಆಕರ್ಷಣೆಯಾಯಿತು. ಅವರ ಗಾಯನದ ಏರಿಳಿತಗಳು ಹಾಗೂ ಹಿಮ್ಮೇಳ ಕಲಾವಿದರ ನಾದವೈಭವವು ಪ್ರಸಂಗಕ್ಕೆ ಮತ್ತಷ್ಟು ಮೆರುಗು ನೀಡಿತು.

ಕಾಲಮಿತಿಯ ಸವಾಲಿನ ನಡುವೆಯೂ ಯಕ್ಷಗಾನದ ಪಾರಂಪರಿಕ ರಂಗನಡೆಯನ್ನು ಉಳಿಸಿ ಬೆಳೆಸುವ ಸಿರಿಬಾಗಿಲು ಪ್ರತಿಷ್ಠಾನದ ಈ ಪ್ರಯತ್ನ ಕಲಾಭಿಮಾನಿಗಳಿಂದ ವ್ಯಾಪಕ ಮೆಚ್ಚುಗೆಗೆ ಪಾತ್ರವಾಯಿತು.