ಸಹಕಾರ ರಂಗದಲ್ಲಿ ಅಹಿಂದ ವರ್ಗಗಳ ಪಾಲುದಾರಿಕೆ ಹೆಚ್ಚಲಿ: ಕೆ.ಎಸ್.ಗಣೇಶ್
ಕೋಲಾರ: 73ನೇ ಸಹಕಾರ ಸಪ್ತಾಹ ಸಮಾರೋಪ ಸಮಾರಂಭ

ಕೋಲಾರ, ನ.21: ಸಹಕಾರ ರಂಗದಲ್ಲಿ ಅಹಿಂದ ವರ್ಗಗಳ ಪಾಲುದಾರಿಕೆಗೆ ಸಹಕಾರಿ ಮುಖಂಡರು ಮುಕ್ತ ಮನಸ್ಸಿನಿಂದ ಅವಕಾಶ ಕಲ್ಪಿಸಬೇಕೆಂದು ಕೋಲಾರ ಚಿಕ್ಕಬಳ್ಳಾಪುರ ಕಾರ್ಯನಿರತ ಪತ್ರಕರ್ತರ ವಿವಿಧೋದ್ದೇಶ ಸಹಕಾರ ಸಂಘ ನಿಯಮಿತದ ಅಧ್ಯಕ್ಷ ಕೆ.ಎಸ್.ಗಣೇಶ್ ಹೇಳಿದ್ದಾರೆ.
ರಾಜ್ಯ ಸಹಕಾರ ಮಹಾಮಂಡಲ, ಕೋಲಾರ ಜಿಲ್ಲಾ ಸಹಕಾರ ಒಕ್ಕೂಟ ನಿಯಮಿತವು, ಕೋಲಾರ ಮತ್ತು ಚಿಕ್ಕಬಳ್ಳಾಪುರ ಕಾರ್ಯನಿರತ ಪತ್ರಕರ್ತರ ವಿವಿದ್ದೋದ್ದೇಶ ಸಹಕಾರ ಸಂಘ ನಿಯಮಿತ, ಪತ್ರಕರ್ತರ ಗೃಹ ನಿರ್ಮಾಣ ಸಹಕಾರ ಸಂಘ ಹಾಗೂ ಸಹಕಾರ ಇಲಾಖೆಯ ಆಶ್ರಯದಲ್ಲಿ ಪತ್ರಕರ್ತರ ಭವನದಲ್ಲಿ ಶುಕ್ರವಾರ ಹಮ್ಮಿಕೊಂಡಿದ್ದ 73ನೇ ಸಹಕಾರ ಸಪ್ತಾಹ ಸಮಾರೋಪ ಸಮಾರಂಭದಲ್ಲಿ ಅವರು ಮಾತನಾಡುತ್ತಿದ್ದರು.
ಸಹಕಾರ ರಂಗದಲ್ಲಿ ಮಹಿಳೆಯರು, ಯುವ ಜನರು ಹಾಗೂ ಅಬಲ ವರ್ಗಗಳ ಪಾಲುದಾರಿಕೆ ಹೆಚ್ಚಬೇಕೆಂಬ ಕುರಿತು ವಿಷಯದಡಿ ಸಪ್ತಾಹದ ಕಾರ್ಯಕ್ರಮದಲ್ಲಿ ಒಂದು ದಿನ ಚರ್ಚಿಸಲಾಗುತ್ತದೆ, ಆದರೆ, ಅಹಿಂದ ವರ್ಗದವರು ಪಾಲುದಾರಿಕೆ ಸಹಕಾರ ರಂಗದಲ್ಲಿ ಎಷ್ಟಿದೆ ಎಂಬ ಬಗ್ಗೆ ಸಹಕಾರಿ ಮುಖಂಡರದಲ್ಲಿ ಆತ್ಮಾವಲೋಕನ ನಡೆಯಬೇಕಿದೆ ಎಂದು ಅವರು ಹೇಳಿದರು.
ಸಹಕಾರ ಸಂಸ್ಥೆಗಳ ಮಾತೃ ಸಂಸ್ಥೆಯಾಗಿರುವ ಕೋಲಾರ ಜಿಲ್ಲಾ ಸಹಕಾರ ಒಕ್ಕೂಟವು ಮೊದಲು ತನ್ನ ನಿರ್ದೇಶಕ ಸ್ಥಾನಗಳನ್ನು ಅಹಿಂದ ವರ್ಗಗಳಿಗೆ ಮೀಸಲಿಟ್ಟು ಚುನಾವಣೆ ನಡೆಸುವ ಮೂಲಕ ಇತರ ಸಹಕಾರ ಸಂಸ್ಥೆಗಳಿಗೆ ಮೇಲ್ಪಂಕ್ತಿಯನ್ನು ಹಾಕಿಕೊಡಬೇಕು, ಕುಂಟು ನೆಪಗಳನ್ನು ಇಟ್ಟುಕೊಂಡು ಅಹಿಂದ ವರ್ಗವನ್ನು ಸಹಕಾರಿ ಕ್ಷೇತ್ರದಿಂದ ದೂರವಿಟ್ಟರೆ ಸಹಕಾರಿ ರಂಗ ಪರಿಪೂರ್ಣವಾಗುವುದಿಲ್ಲ ಎಂದು ಅಭಿಪ್ರಾಯಿಸಿದರು.
ಇದೇ ರೀತಿಯಲ್ಲಿಯೇ ಸಹಕಾರ ರಂಗದ ಭ್ರಷ್ಟಾಚಾರವು ಹಾವು ಸಾಯುವುದಿಲ್ಲ, ಕೋಲು ಮುರಿಯುವುದಿಲ್ಲ ಎಂಬಂತಾಗಿಬಿಟ್ಟಿದೆ, ಉರೆಲ್ಲಾ ಸಸ್ಯಹಾರಿಗಳೇ ಕೋಳಿ ತಿಂದವರಾರು ಎಂಬಂತೆ ಡಿಸಿಸಿ ಬ್ಯಾಂಕ್ ಮುಳುಗುತ್ತಿರುವ ಕುರಿತು ಎಲ್ಲರೂ ಮಾತನಾಡುತ್ತಿದ್ದಾರೆ, ಆದರೆ, ಮುಳುಗಿಸಿದವರಾರು ಎಂಬ ಬಗ್ಗೆ ಯಾರೂ ಚಕಾರ ಎತ್ತುತ್ತಿಲ್ಲ, ಈ ಹಿಂದೆಯೂ ಡಿಸಿಸಿ ಬ್ಯಾಂಕ್ ನಷ್ಟವುಂಟು ಮಾಡಿದವರನ್ನು ಉಳಿಸಲಾಗಿತ್ತು, ಈ ಬಾರಿಯೂ ಹಾಗೆಯೇ ಆಗುತ್ತಿದೆ. ಆದ್ದರಿಂದ ಡಿಸಿಸಿ ಬ್ಯಾಂಕ್ ಭ್ರಷ್ಟಾಚಾರದ ಬಗ್ಗೆ ಮಾತನಾಡದೆ ಸರಕಾರದಿಂದ ಹೆಚ್ಚಿನ ಅನುದಾನ ತಂದು ಬ್ಯಾಂಕನ್ನು ಉದ್ಧಾರ ಮಾಡಲು ಹಾಲಿ ಅಧ್ಯಕ್ಷರು ಹಾಗೂ ಶಾಸಕ ಕೊತ್ತೂರು ಮಂಜುನಾಥ್ ಮತ್ತವರ ತಂಡ ಮುಂದಾಗಬೇಕೆಂದು ಆಗ್ರಹಿಸಿದರು,
ಪತ್ರಕರ್ತರ ಗೃಹ ನಿರ್ಮಾಣ ಸಹಕಾರ ಸಂಘದ ಅಧ್ಯಕ್ಷ ವಿ.ಮುನಿರಾಜು ಮಾತನಾಡಿ, ರಾಜಕಾರಣಿಗಳ ಪ್ರವೇಶ ಇರದಿದ್ದರೆ ಸಹಕಾರ ರಂಗವು ಶುಧ್ಧವಾಗಿ ಉಳಿಯಲು ಸಾಧ್ಯವಾಗುತ್ತದೆ ಎಂದರು.
ಪತ್ರಕರ್ತರ ಸಹಕಾರ ಸಂಘದ ಉಪಾಧ್ಯಕ್ಷ ಹಿರಿಯ ಸಹಕಾರಿ ಅಬ್ಬಣಿ ಶಂಕರ್ ಮಾತನಾಡಿ, ಸಹಕಾರಿ ಸಂಸ್ಥೆಗಳಲ್ಲಿ ಸದಸ್ಯತ್ವ ಪಡೆಯಲು ಕೇವಲ ಪಹಣಿ ಇದ್ದವರಿಗೆ ಮಾತ್ರವೇ ಅವಕಾಶ ಕಲ್ಪಿಸುವ ಕಾಯ್ದೆಗೆ ತಿದ್ದುಪಡಿ ತಂದು ಅಹಿಂದ ವರ್ಗದವರು ಸದಸ್ಯತ್ವ ಪಡೆಯುವಂತಾಗಲು ಸರಕಾರ ಆದೇಶ ಹೊರಡಿಸಬೇಕಾಗಿದೆ ಎಂದರು.
ಸಹಕಾರಿ ಒಕ್ಕೂಟದ ನಿರ್ದೇಶಕ ವಿ.ಮುರಳೀಧರ್ ಮಾತನಾಡಿ, ಜನಸಂಖ್ಯೆಗೆ ತಕ್ಕಂತೆ ಅಹಿಂದ ವರ್ಗಗಳಿಗೂ ಸಹಕಾರಿ ಸಂಸ್ಥೆಗಳಲ್ಲಿ ಪಾಲು ನೀಡಲೇಬೇಕು, ತಾವು ಪ್ರತಿನಿಧಿಸುವ ಹಾಲಿನ ಡೇರಿಯಲ್ಲಿ ಗ್ರಾಮದ ಮೂರು ಪ್ರಮುಖ ಸಮುದಾಯಗಳ ಪ್ರತಿನಿಧಿಗಳು ಡೇರಿ ನಿರ್ದೇಶಕರಾಗಿ ಆಯ್ಕೆಯಾಗಲು ಅವಕಾಶ ಕಲ್ಪಿಸಿದ್ದೇವೆ, ಇಂತದ್ದೇ ಧೋರಣೆ ಎಲ್ಲಾ ಸಹಕಾರ ಸಂಸ್ಥೆಗಳಲ್ಲಿಯೂ ಬರಬೇಕೆಂದರು.
ಅಧ್ಯಕ್ಷತೆ ವಹಿಸಿದ್ದ ಒಕ್ಕೂಟದ ನಿರ್ದೇಶಕ ಕಲ್ವಮಂಜಲಿ ಟಿ.ಕೆ.ಬೈರೇಗೌಡ ಮಾತನಾಡಿ, ಸಹಕಾರ ಸಂಸ್ಥೆಗಳ ಬೆಳವಣಿಗೆಯಲ್ಲಿ ಉತ್ತಮ ಪರಿಸರ, ತಂತ್ರಜ್ಞಾನ ಕೌಶಲ್ಯಾಧಾರಿತ, ವೃತ್ತಿಪರ ಸೇವೆ ಅತ್ಯಗತ್ಯವಾಗಿದೆ ಎಂದು ಅಭಿಪ್ರಾಯಪಟ್ಟು, ಸಹಕಾರ ಸಪ್ತಾಹವನ್ನು ಈ ಬಾರಿ ಹಲವಾರು ಕಾರಣಗಳಿಂದ ಸಾಂಕೇತಿಕವಾಗಿ ಆಚರಿಸಲಾಗುತ್ತಿದ್ದು, ಮುಂದಿನ ವರ್ಷದಿಂದ ಹಬ್ಬದ ರೀತಿಯಲ್ಲಿ ಆಚರಿಸಲಾಗುವುದು ಎಂದು ಹೇಳಿದರು.
ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ನಿಕಟಪೂರ್ವ ಅಧ್ಯಕ್ಷ ಬಿ.ವಿ.ಗೋಪಿನಾಥ್ ಮಾತನಾಡಿ, ಸಹಕಾರ ಸಪ್ತಾಹವು ಕಳಾಹೀನವಾಗಿ ನಡೆಯಲು ಸಹಕಾರಿ ರಂಗದಲ್ಲಿರುವವರೇ ಕಾರಣವಾಗಿದ್ದಾರೆ, ಸಹಕಾರಿ ಒಕ್ಕೂಟದ ಅಧ್ಯಕ್ಷ ಉಪಾಧ್ಯಕ್ಷರ ಚುನಾವಣೆಗೂ ನ್ಯಾಯಾಲಯದಿಂದ ತಡೆ ತರಲಾಗಿದೆ, ಆಡಳಿತಾರೂಢರಿಗೆ ಚುನಾವಣೆ ನಡೆಸಲು ಆಸಕ್ತಿ ಇಲ್ಲದಿರುವ ಧೋರಣೆ ಸರಿಯಲ್ಲ ಎಂದರು.
ವೇದಿಕೆಯಲ್ಲಿ ಪತ್ರಕರ್ತರ ಗೃಹನಿರ್ಮಾಣ ಸಹಕಾರ ಸಂಘದ ಉಪಾಧ್ಯಕ್ಷ ಜಮ್ಮುನಹಳ್ಳಿ ಕೃಷ್ಣ ಉಪಸ್ಥಿತರಿದ್ದರು.
ಸಹಕಾರ ಒಕ್ಕೂಟದ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಕೆ.ಎಂ.ಭಾರತಿ ಕಾರ್ಯಕ್ರಮ ನಿರೂಪಿಸಿದರು.






