ಕೊಪ್ಪಳ | ಕನಸು ಕಿಶೋರಿ ಪಾರ್ಲಿಮೆಂಟ್ನಲ್ಲಿ ವಿದ್ಯಾರ್ಥಿನಿಯರಿಂದ ಸಮಸ್ಯೆಗಳ ಪ್ರಸ್ತಾಪ
ಕುಕನೂರ: ಶಾಲೆಗಳಲ್ಲಿ ಶಿಕ್ಷಕರ ಕೊರತೆ, ಶೌಚಾಲಯ ಹಾಗೂ ಶುದ್ಧ ಕುಡಿಯುವ ನೀರಿನ ವ್ಯವಸ್ಥೆಯ ಅಭಾವ, ತರಗತಿ ಕೊಠಡಿಗಳ ಕೊರತೆ, ಶಾಲಾ ಆವರಣ ಗೋಡೆ, ಮುಖ್ಯ ದ್ವಾರ, ಬಸ್ ಸೌಲಭ್ಯ ಸೇರಿದಂತೆ ಗ್ರಾಮಗಳ ವಿವಿಧ ಮೂಲಸೌಕರ್ಯ ಸಮಸ್ಯೆಗಳನ್ನು ತಾಲೂಕು ಮಟ್ಟದ ಕನಸು ಕಿಶೋರಿ ಪಾರ್ಲಿಮೆಂಟ್ನಲ್ಲಿ ವಿದ್ಯಾರ್ಥಿನಿಯರು ಅಧಿಕಾರಿಗಳ ಗಮನಕ್ಕೆ ತಂದರು.
ಪಟ್ಟಣದ ಪ್ರವಾಸಿ ಮಂದಿರದಲ್ಲಿ ತಾಲೂಕು ಪಂಚಾಯಿತಿ, ಪಟ್ಟಣ ಪಂಚಾಯಿತಿ ಹಾಗೂ ವಿಸ್ತಾರ್ ಸಂಸ್ಥೆಯ ಕನಸು ಕಿಶೋರಿ ಸಂಘಟನೆಯ ಸಹಯೋಗದಲ್ಲಿ ಶನಿವಾರ ಕಾರ್ಯಕ್ರಮ ನಡೆಯಿತು.
ತಾಲೂಕಿನ 15 ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಸರಕಾರಿ ಹಾಗೂ ಖಾಸಗಿ ಶಾಲೆಗಳ ವಿದ್ಯಾರ್ಥಿನಿಯರು ಕನಸು ಕಿಶೋರಿ ಪಾರ್ಲಿಮೆಂಟ್ ಸದಸ್ಯರಾಗಿ ಭಾಗವಹಿಸಿ ತಮ್ಮ ಗ್ರಾಮ ಹಾಗೂ ಶಾಲೆಗಳ ಸಮಸ್ಯೆಗಳನ್ನು ಸದನದಲ್ಲಿ ಮಂಡಿಸಿದರು. ತಳಕಲ್, ಬೆಣಕಲ್, ಮಂಡಲಗೇರಿ, ಕುದರಿಮೋತಿ, ನೆಲಜೇರಿ, ಮಂಗಳೂರು, ಶಿರೂರು, ಬನ್ನಿಕೊಪ್ಪ, ಇಟಗಿ, ರಾಜೂರು ಸೇರಿದಂತೆ ವಿವಿಧ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಶಾಲೆಗಳಲ್ಲಿ ಶೌಚಾಲಯಗಳಲ್ಲಿ ನೀರಿನ ವ್ಯವಸ್ಥೆ, ಶುದ್ಧ ಕುಡಿಯುವ ನೀರಿನ ಘಟಕ, ಶಿಕ್ಷಕರ ನೇಮಕ, ಹೆಚ್ಚುವರಿ ತರಗತಿ ಕೊಠಡಿಗಳು, ಶಾಲಾ ಆವರಣ ಗೋಡೆ, ಮುಖ್ಯದ್ವಾರ ನಿರ್ಮಾಣ ಸೇರಿದಂತೆ ವಿವಿಧ ಸಮಸ್ಯೆಗಳನ್ನು ಪ್ರಸ್ತಾಪಿಸಿದರು. ಗ್ರಾಮಗಳಲ್ಲಿ ರಸ್ತೆ, ಚರಂಡಿ, ಬಸ್ ನಿಲ್ದಾಣ ಹಾಗೂ ಶಾಲಾ ಮಕ್ಕಳಿಗೆ ಸಮಯಕ್ಕೆ ಸರಿಯಾಗಿ ಕೆಎಸ್ಆರ್ಟಿಸಿ ಬಸ್ ಸೌಲಭ್ಯ ಕಲ್ಪಿಸುವಂತೆ ಒತ್ತಾಯಿಸಿದರು.
ವಿದ್ಯಾರ್ಥಿನಿಯರೇ ಸಭಾಪತಿ, ಪ್ರಧಾನಮಂತ್ರಿ ಹಾಗೂ ವಿವಿಧ ಇಲಾಖೆಗಳ ಸಚಿವೆಯರಾಗಿ ಸದನದ ಕಲಾಪ ನಡೆಸಿದರು. ರಮೀಜಾ ಸಭಾಪತಿಯಾಗಿ, ಅನುಷಾ ತಳಕಲ್ ಉಪಸಭಾಪತಿಯಾಗಿ, ವಿಜಯಲಕ್ಷ್ಮಿ ಬಳಗೇರಿ ಪ್ರಧಾನಮಂತ್ರಿಯಾಗಿ, ಯಶೋಧಾ ಇಟಗಿ ಉಪಪ್ರಧಾನಮಂತ್ರಿಯಾಗಿ, ಸ್ಪೂರ್ತಿ ಬೆಣಕಲ್ ಗೃಹಮಂತ್ರಿಯಾಗಿ, ಕವಿತಾ ನೆಲಜೇರಿ ಕಾನೂನು ಮಂತ್ರಿಯಾಗಿ, ನಂದಾ ಬಾನಾಪುರ ಹಣಕಾಸು ಮಂತ್ರಿಯಾಗಿ, ಸಂಗೀತಾ ರಾವಣಕಿ ಆರೋಗ್ಯ ಮತ್ತು ನೈರ್ಮಲ್ಯ ಮಂತ್ರಿಯಾಗಿ, ನಂದಿನಿ ಮಂಡಲಗೇರಿ ಶಿಕ್ಷಣ ಮಂತ್ರಿಯಾಗಿ, ಸ್ಪೂರ್ತಿ ಗುದ್ದೇಪ್ಪಮಠ ಪಟ್ಟಣಾಭಿವೃದ್ಧಿ ಮಂತ್ರಿಯಾಗಿ, ಅನ್ನಪೂರ್ಣ ಚಿಕ್ಕಬಿಡನಾಳ ಕ್ರೀಡಾ ಮಂತ್ರಿಯಾಗಿ, ಸುಮನಾಬೀ ಕುದರಿಮೋತಿ ಪರಿಸರ ಮಂತ್ರಿಯಾಗಿ, ಪೂಜಾ ಬನ್ನಿಕೊಪ್ಪ ಸಂಪರ್ಕ ಮಂತ್ರಿಯಾಗಿ, ರಂಜಿತಾ ಯಡಿಯಾಪುರ ಮಕ್ಕಳ ಹಕ್ಕುಗಳ ಮಂತ್ರಿಯಾಗಿ, ಅನಿತಾ ಮಸಬಹಂಚಿನಾಳ ಸಾಮಾಜಿಕ ನ್ಯಾಯ ಮಂತ್ರಿಯಾಗಿ, ತನುಜಾ ಸಾಮಾಜಿಕ ನ್ಯಾಯ ಮತ್ತು ಸಂವಹನ ಮಂತ್ರಿಯಾಗಿ ಹಾಗೂ ಸೃಷ್ಟಿ ರಾಜೂರು ಸಾಂಸ್ಕೃತಿಕ ಮಂತ್ರಿಯಾಗಿ ಕಾರ್ಯನಿರ್ವಹಿಸಿದರು.
ವಿದ್ಯಾರ್ಥಿನಿಯರು ಮಂಡಿಸಿದ ಸಮಸ್ಯೆಗಳಿಗೆ ಅಧಿಕಾರಿಗಳು ಸ್ಪಂದಿಸಿ, ಸಂಬಂಧಿಸಿದ ಇಲಾಖೆಗಳ ಮೂಲಕ ಪರಿಶೀಲಿಸಿ ಹಂತ ಹಂತವಾಗಿ ಪರಿಹಾರ ಕಲ್ಪಿಸುವ ಭರವಸೆ ನೀಡಿದರು.
ಕಾರ್ಯಕ್ರಮದಲ್ಲಿ ತಾಲೂಕು ಪಂಚಾಯಿತಿ ಕಾರ್ಯನಿರ್ವಾಹಕ ಅಧಿಕಾರಿ ಸಂತೋಷ ಪಾಟೀಲ ಬಿರಾದಾರ, ಪಟ್ಟಣ ಪಂಚಾಯಿತಿ ಮುಖ್ಯಾಧಿಕಾರಿ ನಾಗೇಶ್, ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಇಲಾಖೆಯ ಅಧಿಕಾರಿ ಬೆಟ್ಟದೇಶ ಮಾಳೆಕೊಪ್ಪ, ಕೆಎಸ್ಆರ್ಟಿಸಿ ಸಾರಿಗೆ ವ್ಯವಸ್ಥಾಪಕ ವೆಂಕಟಚಲಪತಿ, ವಿಸ್ತಾರ್ ಸಂಸ್ಥೆಯ ನಿರ್ದೇಶಕಿ ಆಶಾ ವಿ, ಆಡಳಿತ ಮತ್ತು ಹಣಕಾಸು ವ್ಯವಸ್ಥಾಪಕ ಯೇಸುಫ್ ಡಿ.ಜೆ., ಕೆಕೆಎಸ್ ಯೋಜನೆಯ ಪ್ರೋಗ್ರಾಂ ಮ್ಯಾನೇಜರ್ಗಳಾದ ಜಾಸ್ಮಿನ್ ಬೇಗಂ ಹಾಗೂ ಧರ್ಮರಾಜ್ ಜಿ., ಕೆಕೆಎಸ್ ಸಂಯೋಜಕರಾದ ಕುಸುಮ, ಜಯಶ್ರೀ, ಈರಮ್ಮ, ಕ್ರೀಯ –ಸಿಫ್ಡ್ ಸಂಯೋಜಕಿ ಚಿನ್ನಮ್ಮ, ತಾಲೂಕಿನ 15 ಗ್ರಾಮ ಪಂಚಾಯಿತಿಗಳ ಅಭಿವೃದ್ಧಿ ಅಧಿಕಾರಿಗಳು (ಪಿಡಿಒಗಳು), ಕನಸು ಕಿಶೋರಿ ಸಂಘಟನೆಯ ಸದಸ್ಯರು, ವಿಸ್ತಾರ್ ಸಿಬ್ಬಂದಿ ಹಾಗೂ ವಿದ್ಯಾರ್ಥಿನಿಯರು ಉಪಸ್ಥಿತರಿದ್ದರು.
