Yelburga | ಕರಮುಡಿಯಿಂದ ಹೊಸಪೇಟೆಗೆ ನೂತನ ಬಸ್ ಸೇವೆ ಆರಂಭ

ಯಲಬುರ್ಗಾ: ತಾಲ್ಲೂಕಿನ ಕರಮುಡಿ ಗ್ರಾಮದಿಂದ ಹೊಸಪೇಟೆಗೆ ನೂತನ ಬಸ್ ಸೇವೆಗೆ ಬುಧವಾರ ಚಾಲನೆ ನೀಡಲಾಯಿತು. ಬಹುದಿನಗಳಿಂದ ಇದ್ದ ಸಾರಿಗೆ ಸಮಸ್ಯೆಗೆ ಸ್ಪಂದಿಸಿ ಸಾರ್ವಜನಿಕರು ಹಾಗೂ ವಿದ್ಯಾರ್ಥಿಗಳ ಬೇಡಿಕೆಯಂತೆ ಈ ಬಸ್ ಸೇವೆಯನ್ನು ಆರಂಭಿಸಲಾಗಿದೆ.

ಗ್ರಾಮದ ಯುವ ಮುಖಂಡ ಇಮಾಮಸಾಬ್ ಗುಳೇದಗುಡ್ಡ ಮಾತನಾಡಿ, ನೂತನ ಬಸ್ ಸೇವೆ ಆರಂಭಿಸಲು ಸಹಕರಿಸಿದ ಉನ್ನತ ಶಿಕ್ಷಣ ಸಚಿವ ಹಾಗೂ ಶಾಸಕ ಬಸವರಾಜ ರಾಯರೆಡ್ಡಿ ಮತ್ತು ಸಾರಿಗೆ ಇಲಾಖೆ ಅಧಿಕಾರಿಗಳಿಗೆ ಗ್ರಾಮದ ಪರವಾಗಿ ಕೃತಜ್ಞತೆ ಸಲ್ಲಿಸಿದರು.

ಕರಮುಡಿ ಹಾಗೂ ಸುತ್ತಮುತ್ತಲಿನ ಗ್ರಾಮಗಳ ವಿದ್ಯಾರ್ಥಿಗಳು, ರೈತರು, ಉದ್ಯೋಗಿಗಳು ಮತ್ತು ಸಾರ್ವಜನಿಕರಿಗೆ ಹೊಸಪೇಟೆ ಸೇರಿದಂತೆ ಇತರ ನಗರಗಳಿಗೆ ಸಂಚಾರ ನಡೆಸಲು ಈ ಬಸ್ ಸೇವೆಯಿಂದ ಹೆಚ್ಚಿನ ಅನುಕೂಲವಾಗಲಿದೆ ಎಂದು ಹೇಳಿದರು.

ಬಸ್ ಸೇವೆ ಆರಂಭದ ಸಂದರ್ಭದಲ್ಲಿ ಗೌಡಪ್ಪ ಬಳಕುಂದಿ, ಬಸವರಾಜ ನಿಡಶೇಷಿ, ಉಮೇಶ್ ಕುಕನೂರು, ಶರಣಪ್ಪ ಕುರಿ, ರವಿಚಂದ್ರ ಕೆಂಚರಡ್ಡಿ, ನಿಖಿಲ್ ಶೆಟ್ಟಿ, ಪೂಜಾರಪ್ಪ ಅರ್ಚಕರು, ಶರಣಬಸವ ಹೊಸಮನಿ ಸೇರಿದಂತೆ ಗ್ರಾಮಸ್ಥರು ಹಾಗೂ ವಿದ್ಯಾರ್ಥಿಗಳು ಉಪಸ್ಥಿತರಿದ್ದರು.