ಕೇಸರಿ ಹೂವಿನ ಕೃಷಿಯಲ್ಲಿ ಯಶಸ್ವಿಯಾದ ಪ್ರಗತಿಪರ ರೈತ ಲೋಕೇಶ್

ಕೋಲಾರ: ಕೆಂಪು ಚಿನ್ನದ ಬೆಲೆ ಕೇಳಿದರೇನೆ ಎಲ್ಲರೂ ಬೆಚ್ಚಿ ಬೀಳುತ್ತಾರೆ, ಏಕೆಂದರೆ ಅದನ್ನು ಎಲ್ಲ ಕಡೆಯೂ ಬೆಳೆಯಲು ಆಗುವುದಿಲ್ಲ.ಅದಕ್ಕೆ ಕೆಂಪು ಚಿನ್ನಕ್ಕೆ ಮಿತಿಮೀರಿದ ಬೇಡಿಕೆ ಇದೆ. ಇದನ್ನು ಬೆಳೆಯುವವರು ಕೋಟ್ಯಾಧಿಪತಿಗಳಾಗುತ್ತಾರೆ. ಇದೆ ಕಾರಣಕ್ಕಾಗಿಯೇ ಅದನ್ನು ಕೆಂಪು ಚಿನ್ನ ಎಂದೇ ಕರೆಯುತ್ತಾರೆ. ಅಷ್ಟಕ್ಕೂ ಯಾವುದು ಆ ಬೆಳೆ ಅಂತೀರಾ ಅದುವೇ ಕೇಸರಿ ಹೂವು.

ಕೇಸರಿ ಅಂದಾಕ್ಷಣ ಅದು ಕಾಶ್ಮೀರದಲ್ಲಿ ಮಾತ್ರ ಬೆಳೆಯುತ್ತಾರೆ ಅನ್ನೋ ಮಾತಿದೆ. ಅದಕ್ಕೆ ಮುಖ್ಯ ಕಾರಣ ಕೇಸರಿ ಬೆಳೆಯಲು ಸೂಕ್ತ ವಾತಾವರಣ ಇರೋದು ಕಾಶ್ಮೀರದಲ್ಲಿ ಮಾತ್ರ. ಅದೇ ರೀತಿ ಇರಾನ್‌ನಲ್ಲಿ ಸಹ ಕೇಸರಿ ಬೆಳೆಯಲು ವಾತಾವರಣ ಸೂಕ್ತವಾಗಿದೆ. ಹಾಗಾಗಿ ಮಾರುಕಟ್ಟೆಯಲ್ಲಿ ಕಾಶ್ಮೀರ ಮತ್ತು ಇರಾನ್ ಕೇಸರಿ ಮಾತ್ರವೇ ಲಭ್ಯವಾಗುತ್ತಿದೆ. ಆದರೆ ಅಸಾಧ್ಯ ಎನ್ನುವಂತೆ ಕೋಲಾರ ಜಿಲ್ಲೆ ಮಾಲೂರು ಪಟ್ಟಣದ ಪ್ರಗತಿಪರ ಹಾಗೂ ಸಾವಯವ ಕೃಷಿಕ ಹಾಗೂ ಕೃಷಿ ವಿಜ್ಞಾನಿ ಲೋಕೇಶ್ ಎಂಬವರು ಬಯಲು ಸೀಮೆ ಕೋಲಾರದಲ್ಲಿ ಕೇಸರಿ ಬೆಳೆ ಬೆಳೆಯುವ ಮೂಲಕ ಯಶಸ್ವಿಯಾಗಿದ್ದಾರೆ.

ಲೋಕೇಶ್ ಅವರು ತಮ್ಮ ಮನೆಯ ಒಂದು ಕೊಠಡಿಯಲ್ಲಿ ಕೇಸರಿ ಬೆಳೆಯಲು ಬೇಕಾಗುವ ವಾತಾವರಣವನ್ನು ನಿರ್ಮಾಣ ಮಾಡಿಕೊಂಡು ಅಲ್ಲಿ ಕೇಸರಿ ಬೆಳೆದು ಯಶಸ್ವಿಯಾಗಿದ್ದಾರೆ. ತಮ್ಮ ಮನೆಯ ಒಂದು ಕೊಠಡಿಯಲ್ಲಿ ಕಾಶ್ಮೀರದ ರೀತಿಯಲ್ಲಿರುವ ಹವಾನಿಯಂತ್ರಿತ ಕೊಠಡಿ ಸೃಷ್ಟಿಮಾಡಿಕೊಂಡು ನಂತರ ಕಾಶ್ಮೀರದಿಂದ ಕೇಸರಿ ಗಡ್ಡೆಗಳನ್ನು ತರಿಸಿಕೊಂಡು ಕೇಸರಿ ಬೆಳೆ ಬೆಳೆಯಲು ನಿರ್ಧರಿಸಿ ಪ್ರಾಯೋಗಿಕವಾಗಿ ಇದನ್ನು ಬೆಳೆದಿದ್ದಾರೆ. ಸುಮಾರು ಹತ್ತು ಸಾವಿರ ರೂ.ಗೆ ಕೇಸರಿ ಗಡ್ಡೆಗಳನ್ನು ತರಿಸಿಕೊಂಡು ಅದನ್ನು ಹವಾನಿಯಂತ್ರಿತ ಕೊಠಡಿಯಲ್ಲಿ ಇಂಡೋರ್‌ಫಾರ್ಮಿಂಗ್ ಮಾಡಿದ್ದಾರೆ. ಈ ವೇಳೆ ಅವರಿಗೆ ಮೊದಲ ಬಿತ್ತನೆಯಲ್ಲೇ ಸುಮಾರು 20ಗ್ರಾಂ ಕೇಸರಿ ಸಿಕ್ಕಿದೆ. ಸದ್ಯ ಮಾರುಕಟ್ಟೆಯಲ್ಲಿ ಒಂದು ಗ್ರಾಂ ಕೇಸರಿಗೆ 1,000-1,500 ರೂ. ಬೆಲೆ ಇದೆ. ಹಾಗಾಗಿ ಲೋಕೇಶ್ ಅವರಿಗೆ ಹತ್ತು ಸಾವಿರಕ್ಕೆ ಹತ್ತು ಸಾವಿರ ಲಾಭ ಸಿಕ್ಕಿದೆ. ಅಲ್ಲದೆ ಕೇಸರಿ ಗಡ್ಡೆಗಳು ಒಮ್ಮ ಬಿತ್ತನೆಮಾಡಿದರೆ ಅದು ಜೀವನ ಪರ್ಯಂತ ಹೂ ಬಿಡುತ್ತದೆ. ಅಲ್ಲದೆ ಗಡ್ಡೆಗಳು ಸಹ ಹೆಚ್ಚಾಗುತ್ತದೆ ಹಾಗಾಗಿ ಅವರಿಗೆ ಪ್ರತೀ ವರ್ಷ ನಿರೀಕ್ಷೆಗೂ ಮೀರಿದ ಲಾಭ ಸಿಗುತ್ತದೆ ಎಂಬುವುದು ಲೋಕೇಶ್ ಅವರ ಮಾತಾಗಿದೆ.

ಕಾರ್ಡಿಸೆಪ್ಸ್ ಅನ್ನೋ ಮಶ್ರೂಮ್(ಅಣಬೆ)ಯನ್ನು ಲೋಕೇಶ್ ಬೆಳೆದು ಯಶಸ್ವಿಯಾಗಿದ್ದಾರೆ. ವಿದೇಶಗಳಲ್ಲಿ ಕಾರ್ಡಿಸೆಪ್ಸ್ ಮಶ್ರೂಮ್ ಒಂದು ಕೆಜಿಗೆ 3.5 ಲಕ್ಷ ರೂ.ಇದೆ ಇದನ್ನು ನ್ಯಾಚುರಲ್ ವಯಾಗ್ರ ಎಂದು ಕರೆಯುತ್ತಾರೆ. ಈ ಮಶ್ರೂಮ್‌ಅನ್ನು ಹೆಚ್ಚಾಗಿ ಬಾಡಿ ಬಿಲ್ಡರ್‌ಗಳು ಹಾಗೂ ಔಷಗಳ ತಯಾರಿಕೆಗೆ ಹೆಚ್ಚಾಗಿ ಬಳಸುತ್ತಾರೆ. ಹಾಗಾಗಿ ಇದೂ ಕೂಡಾ ಮಾರುಕಟ್ಟೆಯಲ್ಲಿ ಅತಿ ಹೆಚ್ಚು ಬೇಡಿಕೆ ಇದ್ದು ಇದನ್ನು ಲೋಕೇಶ್ ಅವರು ತಮ್ಮ ಪ್ರಯೋಗಾಲಯದಲ್ಲಿ ಬೆಳೆಯುವ ಮೂಲಕ ಯಶಸ್ವಿಯಾಗಿದ್ದಾರೆ.

ಒಟ್ಟಾರೆ ಕೃಷಿಯಲ್ಲಿ ಸದಾ ಒಂದಿಲ್ಲೊಂದು ಪ್ರಯೋಗ ಮಾಡುವ ಮೂಲಕ ಹೆಸರು ಮಾಡಿದ್ದ ಕೋಲಾರ ಕೃಷಿಕರು ಸದ್ಯ ಅತ್ಯಂತ ಬೆಲೆ ಬಾಳುವ ಹಾಗೂ ಅಸಾಧ್ಯ ಎನ್ನುವ ಕೇಸರಿ, ಮಶ್ರೂಮ್‌ರೀತಿಯ ಬೆಳೆಗಳನ್ನು ಬೆಳೆಯುವ ಮೂಲಕ ಹೊಸದೊಂದು ಪ್ರಯತ್ನಕ್ಕೆ ದಾರಿ ತೋರುವ ಕೆಲಸ ಮಾಡಿದ್ದಾರೆ. ಸದ್ಯ ಇದು ನಿಜಕ್ಕೂ ದೊಡ್ಡ ಮಟ್ಟದಲ್ಲಿ ಬೆಳೆಯಲು ಅನುಕೂಲವಾದರೆ ಹೊಸ ಕ್ರಾಂತಿಕಾರಿ ಕೃಷಿಗೆ ನಾಂದಿಯಾಗೋದರಲ್ಲಿ ಅನುಮಾನವಿಲ್ಲ.

ಮಾರುಕಟ್ಟೆಯಲ್ಲಿ ಕಾಶ್ಮೀರ ಕೇಸರಿ ಹಾಗೂ ಇರಾನ್ ಕೇಸರಿ ಮಾತ್ರ ಸಿಗುತ್ತದೆ. ಒಂದು ಕೆಜಿ ಕೇಸರಿಗೆ ಐದರಿಂದ-ಹತ್ತು ಲಕ್ಷ ರೂ.ವರೆಗೆ ಬೆಲೆ ಇದೆ. ಕೇಸರಿಗೆ ಸದ್ಯ ಪ್ರತೀ ವರ್ಷ ೧೦೦ ಟನ್‌ಗಳಷ್ಟು ಬೇಡಿಕೆ ಇದ್ದು, ಸದ್ಯ ೩.೮ ಟನ್‌ಗಳಷ್ಟು ಮಾತ್ರ ಕೇಸರಿ ಉತ್ಪಾದನೆಯಾಗುತ್ತಿದೆ. ಹಾಗಾಗಿ ಮಾರುಕಟ್ಟೆಯಲ್ಲಿ ಕೇಸರಿಗೆ ಬೇಡಿಕೆ ಹೆಚ್ಚಿದೆ. ಹಾಗಾಗಿ ಕೇಸರಿ ಅತ್ಯಂತ ಲಾಭದಾಯಕ ಬೆಳೆ.

ಲೋಕೇಶ್, ಕೃಷಿ ವಿಜ್ಞಾನಿ